MASU AWAACEERERYA

Yesu Aayariwe Mweeri wa Tesempro?

PIIPILIYA hanaloca nihiku nene Yesu aayariweiye. Nyenya, owo onnanivaha nthowa ntokotoko nawi Yesu haayariwe mweeri wa Tesempro.

Thokororyani mikhalelo sa oriirya ni oviha Opetelehemu, mweeri wa Tesempro, muceche yoowo Yesu aayariweiye. Kisleu mweeri wa Ayuuta (okhanle Novempro/ Tesempro) waari mweeri wooriirya ni woorupa epula. Kisleu aachareliwa ni mweeri wa Tepete (Tesempro/Yanero). Yaari elukuluku ya nakuthu. Hankooni noone yeeyo Piipiliya onaloceiye vooloca sa oriirya ni oviha wa mapuro yaale.

Estra, mulipa oomurepa Piipiliya, onooniherya wi achu yaanasuwela wi Kisleu waari chiri mweeri wooriirya ni woorupa epula. Amanle oloca wi muloko waathukumana o Yerusalemu mu ‘nihiku makhumu meli mweri wanethanu nasese [Kisleu],’ Estra onnaloca wi achu “yànathukumela, wa nthowa na, . . . epula yintxipale yarupa.” Vooloca sa oriirya mu elukuluku yeele ya eyaakha, achu yaathukumanne yaaloca mukhataaya wii: “ela elukuluku yepwila hinnawerya olekela vanlakanivene.” (Esdra 10:9, 13; Yeremiya 36:22) Moohikhwa minikwa akukhula yaakhala mmapuro orukurerya muceche wa Petelehemu, yaanakhalano eparipari yawi awo ni ipucepuche saya ehikhale vaate ohiyu, mweeri wa Tesempro!

Nyenya, Piipiliya onaloca wi akukhula yaari vanlakani vene ewehereryaka ipucepuche saya ohiyu yoole Yesu aayariweiye. Mweeparipari, namarepa a Piipiliya Luka onnooniherya wi mu elukuluku yeele akukhula “yakona weiwo, wi enakhapelela ohiyu muhuwo wa iputxeputxe” waacamela oPetelehemu. (Luka 2:8-12) Moone wi akukhula yaakhala o nikuwani ohiyu, tahi wi yaamweececa pahiru othana. Awo yaakhalano ipucepuche saya o nikuwani ohiyu. Mano yooloca eyo yawi akukhula yaakhala o nikuwani, enniiwanana ni elukuluku yooriirya ni yoorupa epula yincipale Opetelehemu, mweeri wa Tesempro? Hooye, heniiwanana. Mwawiihiiha, ichu ineereya mu elukuluku aayariwe Yesu, sinooniherya wi Yesu haayariwe mweeri wa Tesempro.a

Piipiliya, Masu a Muluku annaloca ichu sincipale sa okhwa wa Yesu, nyenya onaloca ichu vakhaani pahiru sa oyariwa wawe. Ela ennaneeriha wuupuwela masu a Mwene Soolomoni aalonceiye wii: “Nsina notxitximiheya ti norèra opwaha yawunkhela yowalamela. Ti norèra nihiku n’okwa opwaha nihiku n’oyariwa.” (Eklesiyaste 7:1) Ti nthowa nenla Piipiliya onaloceiye ichu sincipale sa orummwa ni okhwa wa Yesu, nyenya ichu vakhaani pahiru vooloca sa oyariwa wawe.

[Nsu na vathi]

[Eruku va epaaxina 221]

Vaavaa Yesu aayariweiye, akukhula ni ipucepuche saya yaari vanlakani vene ohiyu