Rahape Aamuroromela Yehova

Haya naanyiherye wi nri mu epooma ya Yeriko. Epooma ela eri mu elapo ya o Kaanani, weiwo achu hanamweemererya Yehova. Muthiyana oniichaniwa Rahape onakhala mummo.

Vaavaa Rahape aareiye nahano, owo aahiiwa miyaha vooloca sa moota Moose aakawannyeiye Eniya Yooxeerya ni waakumiha Aisarayeli Oyiikuputu. Rahape aahiiwa tho moota Yehova aakhavihenryeiye yaawo ovootha ikhoco ni amwiicani aya. Vano Rahape onniiwa wi Aisarayeli athukumanne waacamela o Yeriko!

Ohiyu omoha, Aisarayeli eeli annaya o Yeriko wi yahocele epooma eyo. Awo annaya vaate va Rahape. Rahape onnaawopa wi evolowe nave ehaye. Eriyari ya ohiyu, mwene a Yeriko onnasuwela wi alipa oohocela awo ari mpooma nave akele vaate va Rahape. Vano mwene onnaarumiha alopwana wi yaaphare. Rahape onnaavitha alipa oohocela awo eeli opathoni wa empa awe nave onnaaleela alopwana a mwene: ‘Alipa oohocela awo yaari vaava, nnya acimunle khalai. Mwaachimakele voohilekela nave munamwaaphwanya!’ We woosuwela ntakhara heeni Rahape onnaakhapelela alipa oohocela awo?— Ntakhara Rahape onnamuroromela Yehova nave onnasuwela wi Yehova onahaala waavaha Aisarayeli elapo ya o Kaanani.

Alipa ohocela ehakumve opwahavo vaate va Rahape, awo annaroromeliha wi Rahape ni emusi awe anahaala ovuluwa Yeriko atoloxiwa. Onnasuwela tiheeni anamuleelaaya wi Rahape eere?— Awo annaloca: ‘Okuhe mukoi woophilivila vaxanelani. Weerano hiihaa oothene ari mpa mwaa anahaala ovuluxiwa.’ Rahape onneerano chiryene yeeyo alipa oohocela anamuleelaaya wi eere. Onnasuwela tiheeni eneereya voocharela vaya?—

Mahiku vakhaani muhoolo, Aisarayeli annarukurerya epooma moomaaleleya. Mmahiku mathanu nammoha awo annarukurerya epooma, etila emoha khata nihiku. Nnya va nihiku naneethanu napiili, awo annarukurerya epooma itila thanu napiili. Vano oothene awo annakhuwela moovuwa. Yehova onneeriha wi ixiri sinarukurerya epooma suuwele vathi. Nnya empa erino mukoi woophilivila othomeiwe vaxanelani hiyuuwale! Onnawerya woona empa eyo va eruku?— Rahape ni amusi awe aavuluwa!

Tiheeni onaweryaawe ohuserya orweela wa Rahape?— Rahape aamuroromela Yehova nthowa na ichu soothene sootikiniha owo aahusenryeiye vooloca sa yoowo. We onnahuserya tho ichu sincipale sootikiniha vooloca sa Yehova. We onnamuroromela Yehova hiihaa ntoko Rahape enreiye?— Hiyaano ninnasuwela wi onnamuroromela Yehova!