Alaleeryi a Michaka Saphaama

YEHOVA oonivaha Mwanawe, Yesu Kristu wi ncharihe yootakiherya awe yoophaameya. (1 Ped. 2:21) Vaavaa muchu onakhaleiye oomuchara a Yesu, owo onnalaleerya michaka saphaama ntoko mmoha a arummwa a Muluku. Ooniheryaka wi eyo yaahaala okhala wiichuuwiha woomunepani, Yesu aariye: “Rwaani wa miyo oothene nyuwo nvenle munyokoliwa, miyo kinamuwiichuuwihaani. Teeshani murici aka, huseryani wa miyo, kiri ooreera murima ni awiiyeviha nave munamphwanya wiichuwa wa okumi anyu.” (Mat. 11:28, 29) Yoororomeliha awe henakuvya wa yoole onaakhulela nwopelo awe!

² Ntoko Murummwa Mutokweene a Muluku, Yesu aahaawopa achu akina wi ekhale oomuchara awe. (Mat. 9:9; Yoh. 1:43) Owo aahaavyakiha mmuteko woolaleerya nave aaruma wi epake muteko mmohamoha yoowo aapakeiye. (Mat. 10:1–11:1; 20:28; Luka 4:43) Voocharela, owo aahaarumiha makhumi mathanu napiili wi yalaleerye michaka saphaama vooloca sa Omwene wa Muluku. (Luka 10:1, 8-11) Vaavaa Yesu aaruminheiye oohuserya yaale, owo aahaaleela ariki: “Arummwa nyu, yoowo onii aweemererekeeni, onakeemererya miyo nave onii ookhoocekeeni, onakikhooca miyo. Onakikhooca miyo, onamukhooca yoowo okirumme.” (Luka 10:16) Mmukhalelo yoola, Yesu aahooniherya ochuneya wa murici yoowo aavanheiye oohuserya awe. Awo yaamweemelela Yesu ni Muluku a Owerya Woothene! Ela enahaala okhala emohamoha olelo wa oothene yaale aneemererya nwopelo wa Yesu: “Orwe, okichareke.” (Luka 18:22; 2 Kor. 2:17) Oothene yaawo aneemererya, aakhalano nlamulo noomuluku na olaleerya michaka saphaama sa Omwene ni waapaka oohuserya.—Mat. 24:14; 28:19, 20.

³ Vaavaa nneemereryaahu nwopelo wa Yesu wa omuchara owo, ninnakhalano mareeliho a ‘omusuwela’ Yehova Muluku ni Yesu Kristu. (Yoh. 17:3) Ninnaahusiha iphiro sa Yehova. Nnikhaviheryo nawe, ninnarehererya muupuwelo ahu, onwara muchu a hiihaano, ni wiiwananiha makhalelo ahu ni malakiheryo eekhaikhai a Yehova. (Aro. 12:1, 2; Éfe. 4:22-24; Kol. 3:9, 10) Othamalela wahu ni murima woothene onnanceenyerya oveleela okumi ahu wa Yehova ni wooniherya wiiveleela yoowo mu opatiso. Vaavaa nnapatisiwaahu, ninnakhala ntoko alapeli.

⁴ Ilukuluku soothene muupuwele wi muteko ahu wa Muluku onaphwanela weeriwano ni mata oohicheka, ni murima waphaama. (Sal. 24:3, 4 BNM; Isa. 52:11; 2 Kor. 6:14–7:1) Okhalano nroromelo mwa Yesu, onnanivaha yawuupuxerya ya murima yaphaama. (Ahe. 10:19-23, 35, 36; Wup. 7:9, 10, 14) Murummwa Paulo aahaalopola Akristu wi yeereke ichu soothene wi emucicimihe Muluku ohiya waakwaculiha akina. Murummwa Petro aacicimiherya ochuneya waya meecelo aphaama woona wi onnaweeriha ale ahiri mweeparipari weemererya eparipari. (1 Kor. 10:31, 33; 1 Ped. 3:1) Muni mmukhaviherye hai muchu ophwanelela okhala ni hiyo ntoko mulaleeryi a michaka saphaama?

ALALEERYI AVYAANI

⁵ Elukuluku muneecihaanyu yoohuserya ya Piipiliya wa muchu orino nchuno, mmuceenyerye waaleela akina yeeyo onahusereiye. Owo onanwerya oloca ni amusi awe, asinthamwene, akhwaawe o muteko ni akina mmukhalelo wookhweya. Ela echu yoochuneya vaavaa nnaahusihaahu avyaani okhala oomuchara a Yesu Kristu ntoko alaleeryi a michaka saphaama. (Mat. 9:9; Luka 6:40) Vaavaa muchu onannuweiye omunepani nave iikhoveleliha olaleerya woohilakelela, owo onahaala wooniherya nchuno na oya mmuteko woolaleerya.

WAAKHWANIHERYA MIKHALELO SIRI SOOCHUNEYA

⁶ Muhaakumve onwopa muchu oya olaleerya empa ni empa mu ekwaha yoopacerya, munaphwanela ororomela wi owo onnaakhwaniherya mikhalelo siri soochuneya. Muchu yoowo nnachaananaahuno mmuteko woolaleerya onniisooneiha vanlakani ni Anamoona a Yehova. Eyo enakhala yawooneya wi owo ohiiwananiha okumi awe ni malakiheryo eekhaikhai a Yehova nave onanwerya okhala mulaleeryi oohipatisiwa.

⁷ Vaavaa munamuhusihaanyu muchu ni othokororya malakiheryo a Piipiliya ni yoowo, akhweya munahaala osuwela mikhalelo sawe. Munahaala woona wi owo onnakhala mwawiiwanana ni yeeyo ohusenryeiye. Nyenya sookhalavo ichu ikina vooloca sa okumi wa oohuserya seiyo atokweene anahaalaaya ochuna othokororya ni yene vamoha ni nyuwo.

⁸ Muhooleli a nikhuuru na atokweene onahaala owaavya atokweene eeli (mmoha oni akhale a nikhuuru na muteko) wi ethokororye miyaha seiya ni nyuwo vamoha ni oohuserya a Piipiliya. Mu miloko seiyo orimo atokweene vakhaani, mutokweene ni murummwa oorumeela a mavyakelo ananwerya weerano yeela. Anna yaawo athanliwe anaphwanela weerano vahilekenle. Ntoko yootakiherya, wakhala wi awo aleeliwe omithukumanoni, akhweya onamukhala wooweryeya wa yaawo othokororya ni nyuwo vamoha ni oohuserya anyu imanle mithukumano. Ochekulela onaphwanela okhala woomaaleleya. Ahaakumve weemereryiwa okhala mulaleeryi oohipatisiwa, atokweene anaphwanela osuwela waakhanle wi:

1. (1) Owo onnaroromela wi Piipiliya, Masu ooveereliwa ti Muluku.—2 Tim. 3:16.

2. (2) Owo onnasuwela nave onnaroromela mahusiheryo ari mathipelo a mu Soorempwa, wakhala wi oopakeliwa makoho, onahaala waakhula mwawiiwanana ni Piipiliya, ohiya mwawiiwanana ni mahusiheryo atheru a malapelo naari miruku sawe.—Mat. 7:21-23; 2 Tim. 2:15.

3. (3) Owo onniiwelela nlamulo na othukumana vamoha ni achu a Yehova mmithukumano sa muloko wakhala wi ori mmukhalelo waphaama.—Sal. 122:1; Ahe. 10:24, 25.

4. (4) Owo oosuwela yeeyo Piipiliya onahusiheiye vooloca sa mararuwo, ophitaanyerya weeca pure naari ocapaheya, waaceya, ni okonihana wa achu oophwanaphwana mwiikho, nave onnakhala mwawiiwanana ni mahusiheryo yaala. Waakhala wi onakhala ni muchu oohiyana mwiikho ehipanke othela, awo anaphwanela orepiha othela.—Mat. 19:9; 1 Kor. 6:9, 10; 1 Tim. 3:2, 12; Ahe 13:4.

5. (5) Owo onniiwelela nlamulo na Piipiliya nnawatiiha ohapaliwa nave onnasepa meerelo oothene a olya mirece ihineemereryiwa, naari sinnanariha muupuwelo.—2 Kor. 7:1; Éfe. 5:18; 1 Ped. 4:3, 4.

6. (6) Owo onnoona ochuneya waya osepa onthamwene woonanara.—1 Kor. 15:33.

7. (7) Owo oohiya moomalela waataana ni marehereryo oothene a malapelo atheru weiwo aakhaleiyewo. Owo oohiya opaka makupa mu saweera saya naari okhaviherya miteko saya.—2 Kor. 6:14-18; Wup. 18:4.

8. (8) Owo onnasepa wiivoliiherya mu miyaha sa ipoliitika sa elapo.—Yoh 6:15; 15:19; Tiy. 1:27.

9. (9) Owo onnaroromela nave onnakhala mwawiiwanana ni yeeyo enalociwa mu Isaiya 2:4 vooloca sa owanawana wa maloko.

10. (10) Owo chiryene onnachuna okhala mmoha a Anamoona a Yehova.—Sal. 110:3.

⁹ Wakhala wi atokweene aakhalano minikwa mukhalelo oohuserya aakhulenleiye vooloca sa mwaha vyakala wa seiha, awo anaphwanela omukoha, akhweya epharihelaka soorepa seiya ntoko mathipelo a ovaanela. Ti wookhweleya wi owo iiwexexe wi yaale anapaka makupa ni Anamoona a Yehova mmuteko aya wa olaleerya okumi awe anaphwanela okhala mwawiiwanana ni mikhalelo siri soochuneya sa mu Soorempwa. Yeeyo owo onahaaleiye oloca enamwaakhaviherya atokweene olakelela waakhanle wi oosuwela echu enawehereryeya wa yene nave waakhanle wi onnaphwanelela murici yoola wa opaka makupa mmuteko woolaleerya.

¹⁰ Mwawaakuveya atokweene anaphwanela omuleela oohuserya waakhanle wi onnaphwanelela. Wiiliwiili, eyo eneereya omakuchuwelo wa ovaanela. Wakhala wi oophwanelela, atokweene anaphwanela omwaakhela owo ntoko mulaleeryi. (Aro. 15:7) Owo onaphwanela oceenyeryiwa opacerya oyaaka mmuteko woolaleerya ni oveleela yoolokoha ya iwora sa muteko woolaleerya omakuchuwelo wa mweeri. Atokweene anaphwanela omutharihela wi vaavaa oohuserya a Piipiliya onaphwaneleleiye ntoko mulaleeryi oohipatisiwa nave aveleela yoolokoherya ya muteko woolaleerya mweeri woopacerya, Yoorepela ya Mulaleeryi a Muloko ennapakiwa mu nsina nawe ni okuhiwa mu arkivo a muloko. Atokweene annakusa sooleeliherya seiya orweela wa mulaleeryi wi marehereryo ewerye okhapelela miteko sa malapelo a Anamoona a Yehova orukurerya elapo nave wi mulaleeryi awerye waakhela nikhaviheryo noomunepani. Mwawaaceererya, atokweene anammuupuserya mulaleeryi muvyaani yooleeliherya vyakala ya muchu enapakiwa mwawiiwanana ni Política global das Testemunhas de Jeová sobre proteção de informações onaphwanyeya mu jw.org.

¹¹ Okhalano onthamwene wawaacameleya ni mulaleeryi muvyaani ni wooniherya opwacha wa yeeyo onapakeiye enanwerya omukhaviherya. Eyo enammuceenyerya oveleelaka yoolokoha ya muteko woolaleerya mweeri ti mweeri ni owetha omurumeela Yehova.—Fil. 2:4; Ahe. 13:2.

¹² Woona wi atokweene aalakelela wi oohuserya a Piipiliya onnaphwanelela oyaaka mmuteko woolaleerya, owo onaphwanela omwaakhela liivuru Ooreheryeya wi Yeereno Yookhwela ya Yehova. Amanle oveleela yoolokoherya ya muteko woolaleerya ekwaha yoopacerya, enahaala opakiwa yoolokoha yawaakuveya mmulokoni wi owo mulaleeryi muvyaani oohipatisiwa.

WAAKHAVIHERYA ANAMWANE

¹³ Anamwane tho ananwerya ophwanelela okhala alaleeryi a michaka saphaama. Yesu aanawaakhela anamwane nave aanaareeliha yaawo. (Mat. 19:13-15; 21:15, 16) Naamwi alipa ooyara erino murici wa waakhaviherya anaaya, akina mmulokoni akhweya anamuchuna omukhaviherya ponkwe naari nahano yoowo onakhalano nchuno mmuteko woolaleerya sa Omwene. Mwaari mulipa ooyara, yootakiherya anyu yaphaama mmuteko woolaleerya enamwaakhaviherya aniinyu okhala amvai mu omulapela waya Muluku. Wakhala wi mwaana ookhalano meecelo aphaama, onnaceenyeryeya ni murima woothene oloca sa nroromelo nawe wa akina, nikhaviheryo taani onaphwaneleiye ovahiwa?

¹⁴ Enamukhala yaphaama mulipa ooyara omwaacamela mmoha a atokweene a Nikhuuru na Muteko wa Muloko wi evaanele waakhanle wi mwaana owo onnaphwanelela okhala mulaleeryi. Muhooleli a nikhuuru na atokweene onahaala waathanla atokweene eeli (mmoha oni akhale a nikhuuru na muteko) wi ethokororye ni mwaana owo ni mulipa ooyara ori mmarehereryo. Wakhala wi ookhalano masuwelelo ari mathipelo a iparipari sa Mpiipiliya nave onnooniherya wi onnachuna oyaaka mmuteko woolaleerya, eyo yawooniherya yaphaama ya oya vahoolo. Emanle othokororya ichu seiha ni sikina soolikana ni seiyo sinaphariheleya waachu awunnuwa, atokweene eeli anamulakelela wakhala wi mwaana onamukhala mulaleeryi oohipatisiwa. (Luka 6:45; Aro. 10:10) Vaavaa anavaanelaaya ni mwaana, tahi woochuneya othokororya miyaha mikina sinaphariheleya wa awunnuwelavo.

¹⁵ Variyari va ovaanela, atokweene anaphwanela omuthamalela mwaana oya wawe vahoolo ni omuceenyerya okhalano yoolakelela ya opatisiwa. Woona wi alipa ooyara annawetha mu omuhusiha mwanaya, awotho anaphwanela othamaleliwa. Wi yaakhaviherye alipa ooyara omuceenyerya mwanaya, atokweene anaphwanela owooniha mwaha oni “Masu wa Asitiithi Eekristu,” onaphwanyeya mu ipaaxina 179-181.

WIIVELEELA NI OPATISO

¹⁶ Wakhala wi moomusuwela nave munnamusivela Yehova moorweela wa waakhwaniherya mikhalelo siri soochuneya ni oya mmuteko woolaleerya, munaphwanela olipiha onthamwene anyu ni yoowo. Mwawiihai? Moorweela wa oveleela okumi anyu wa yoowo ni wooniherya yeeyo moorweela wa opatisiwa mmaahini.—Mat. 28:19, 20.

¹⁷ Wiiveleela onataphulela okuha makupa aya ni yoolakelela ya weela. Wiiveleela wa Muluku onataphulela omwaacamela owo mu nivekelo ni opaka nlakano na vameekhaaya na opharihela okumi anyu mmuteko awe ni weeca mu iphiro sawe. Ela enataphulela omulapela yoowo okhala wookhala. (Malam. 5:9) Ela ti ya muchu mukhateiye, mwaha wa weephiini. Haavo muchu onaphwanela woopakelaani.

¹⁸ Nyenya, munaphwanela weerano sincipale, ohiya pahiru omuleela Yehova weephiini wi munachuna okhala awawe. Munaphwanela wooniherya wa akina wi mohiiveleela wa Muluku. Munnasuwanyeiha yeela moorweela wa opatisiwa mmaahini, hiiha ntoko Yesu enreiye. (1 Ped. 2:21; 3:21) Wakhala wi munnachuna omurumeela Yehova ni opatisiwa, tiheeni munaphwanelaanyu weera? Munaphwanela oloca yoolakelela anyu wa muhooleli a nikhuuru na atokweene. Owo onahaala opaka marehereryo wi asitokweene akina eloce ni nyuwaano nave eroromele wi munnaakhwaniherya mikhalelo siri soochuneya soomuluku vooloca sa opatiso. Wa sooleeliherya sincipale, moone “Masu wa Mulaleeryi Oohipatisiwa,” mu ipaaxina 182-184 mu liivuru yoola, ni “Makoho wa Ale Anachuna Opatisiwa,” mu ipaaxina 185-207.

SOOLOKOHA SA OYA VAHOOLO WA MUTEKO WOOLALEERYA

¹⁹ Moovira wa iyaakha, soolokoha vooloca sa waacereryeya wa malapelo aweela sinakhala ehime ya nlipiho wa alapeli a Yehova. Ovinyerya vaavaa Yesu Kristu aalonceiye wa oohuserya awe wi michaka saphaama saahaala olaleeryiwa veelaponi yoothene, Akristu eeparipari yaakhalano nchuno ntokotoko wi yoone mmukhalelo eyo yaahaalaaya waakhwanela.—Mat. 28:19, 20; Mar. 13:10; Saw. 1:8.

²⁰ Oomuchara oopacerya a Yesu yaahihakalala wiiwa soolokoha vooloca sa sookhumelela sa muteko woolaleerya. (Mar. 6:30) Mu liivuru a Saweriwa T’arummwa onnanleela wi achu nsana ni makhumi meeli yaahikhalavo vaavaa munepa waweela waayeheriwaaya wa oohuserya mu Pentekoste a 33 E.K. Moohilekela numero na oohuserya naahaacereryeya, ovinyerya amiili araru nave voocharela niphiyerya amiili athanu. Yoolokoha yaahooniherya wi “Apwiya yanawaacererya yaawo wi evulushiwe”, “nave alipa amukucho ancipale, yaaniiwelela nroromelo nlo.” (Saw. 1:15; 2:5-11, 41, 47; 4:4; 6:7) Soolokoha seiyo soolipiha saaheeriha waacereryeya wa oohuserya! Soolokoha seiho saahaaceenyerya oyano vahoolo muteko aya woomuluku, naamwi yiikariwa ni asitokweene a malapelo a Ayuta!

²¹ Ovinyerya mu eyaakha 60 ophiyerya 61 E.K., Paulo aahilokoha mu ekaarata awe wa Akolose wi michaka saphaama ‘saniima nave saninnuwa’ nave ‘sanalaleeryiwa wa soopatushiwa soothene sa vathi veerimu.’ (Kol. 1:5, 6, 23) Akristu oopacerya yaaniiwelela Masu, nave munepa waweela waanaavaha ikuru wi ekhwaaniherye muteko wootikhiniha wa olaleerya ehaakumve makuchuwelo a ichu mu elukuluku ya Ayuta mu 70 E.K. Yaari yoolipiha wa Akristu yaale oororomeleya wiiwa soolokoha wa echu yaakhwaniheren’ye!

²² Mmukhalelo woolikana, marehereryo a Yehova a mahiku yaala annatitelela orepela muteko onapakiwa mu waakhwanela wa yoorepa ya Mateu 24:14, eni: “Michaka yeela ya omwene enamulaleiwa mweelapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.” Ntoko alapeli awiiveleela a Muluku, nookhalano muteko wawaakuveya wa opaka. Nnaphwanela okhalano nchuno na woona wi muteko woolaleerya onnaakhwanela ehaakumve makuchuwelo ophiya. Yehova onahaala woona wi muteko yoola wohaakhwanela, nave wakhala wi noolaleerya, nnahaala waakhela weemereryiwa wa Yehova.—Ezek. 3:18-21.

YOOLOKOHERYA YA MUTEKO ANYU WOOLALEERYA

²³ Tiheeni xaxaxa nnalokohaahu? Yoolokoherya ya Muteko woolaleerya evahereryiwe ni marehereryo ennooniherya echu enaphwanela orepeliwa. Mwawiihiiha, sooleeliherya inacharela inamukhala sookhaviherya.

²⁴ Makupa arempwe “Soolaleeryiwa (Sawimprimiiriwa ni Samukhankoonya)” inarepeliwa waaca wa soolaleeryiwa—saari sawimprimiiriwa naari samukhankoonya—seiyo mwaakawenlaanyu achu ahiri Anamoona oopatisiwa. Makupa ani “Ixilema Soonihiwe,” inarepeliwa ikwaha kavi mooninhaanyu ixilema sahu.

²⁵ Makupa ani “Sooxekurya” inarepeliwa ikwaha kavi mmusekunryaanyu muchu oonihenrye nchuno ohiri awiivelela, ntoko Namoona oopatisiwa. Oxekurya onanwerya weeriwano moorweela wa omuxekurya muchu, orepa ekaarata, olocano mu telefoni, orepa michaka naari emaili, naari omunnya yoolaleeryiwa. Ekwaha ti ekwaha eneecihiwaaya yoohuserya ya Piipiliya, oxekurya onaphwanela orepeliwa. Tiithi onanwerya orepela oxekurya esumana ti esumana vaavaa onahooleleiye malapelo eecheko elukuluku onakhaleiyevo mwaana ohipatisiwe.

²⁶ Naamwi yoohuserya ya Piipiliya wiiliwiili yeecihiwaka esumana ti esumana, eyo enarepeliwa ntoko yoohuserya emoha pahi vamweerini. Alaleeryi anaphwanela orepela waaca wa soohuserya sa Piipiliya soohiyana hiyana yeecinhaaya variyari va mweeri. Soorepela sa soohuserya sa Piipiliya enaphitaanyerya yaale nnaahusihaahu ahiri awiiveleela, ntoko Anamoona oohipatisiwa. Nyuwotho munanwerya orepela yoohuserya ya Piipiliya wakhala wi munna a nikhuuru na muteko ohoovekaani wi mmuhusiheke munna naari murokora oceechen’ye omunepani naari mulaleeryi opatisiwe hiihaanoru yoowo ohimmalinhe liivuru Tiheeni Piipiliya Onanihusiheiye ni “Mutitelele Omusivela Muluku.”

²⁷ Ti woochuneya orepelaka “Iwora” seeparipari. Eyo, elukuluku munamalihaanyu mmuteko woolaleerya empa ni empa, naari mpakaka sooxekurya, mweecihaka soohuserya sa Piipiliya, mvahaka onamoona woolakelela naari woohilakelela, wa achu ahiivelenle, ntoko Anamoona oopatisiwa. Wakhala wi alaleeryi apiili analapa vamoha, oothene anamurepela iwora, koma mmoha pahiru tonaya orepela sooxekurya naari soohuserya sawe sa Piipiliya yeecinhaaya. Alipa ooyara yaawo anaahusiha anaaya vamoha variyari va Malapelo Eechoko a ohiyu ananwerya orepela ewora emoha va esumana. Namaloca a mwaha wa vanlakani onanwerya tho orepela elukuluku omalinheiye. Mulipa ootaphulela mwaha onanweryatho orepela elukuluku omalinheiye. Sookhalavo miteko mikina sookhweleya ihinaphwanela orepeliwa iwora, ntoko wiirehererya ntakhara muteko woolaleerya, othukumana ntakhara muteko woolaleerya, othokororya miteko sawaakuveya, ni mikina.

²⁸ Mulaleeryi ti mulaleeryi onaphwanela ochariha yawuupuxerya-ya-murima awe evyakihiwe ni Piipiliya vaavaa onalakeleleiye echu enavolowela ewora emalihiwe mu olaleerya. Alaleeryi akina annalaleerya mmapuro awaaciwamo, akina analapa mu ikulucu ariwo achu avakhaani nave onnachuneya opaka mikwaha. Ikulucu ti soohiyana; alaleeryi annahiyana mmukhalelo anoonaaya muteko aya woolaleerya. Anna a Nikhuuru Noolamulela hanatikitherya malamulo mmilokoni wi echariheke yawuupuxerya-ya-murima aya, mmukhalelo wa orepela elukuluku emalihiwe mmuteko woolaleerya, nave haavo muchu oneemereryiwa otikitherya malamulo vooloca sa mwaha yoola.—Mat. 6:1; 7:1; 1 Tim. 1:5.

²⁹ Elukuluku enamalihiwa mmuteko woolaleerya enaphwanela orepeliwa yoothene. Nto ti yoohiyana wakhala wi mulaleeryi ookhalano makacamiho, ntoko wuuluvala, hanawerya okhuma owaani, ori mu empa ya achu awuuluvala naari orino nikacamiho vyakala. Mulaleeryi si yoowo onanwerya orepela iwora sa aminutu 15. Naamwi alalenrye mu aminutu 15 variyari va mweeri, owo onaphwanela orepela. Owo nlelo onahaala wooniwaka ntoko mulaleeryi a Omwene ohinacompa. Marehereryo yaala annaphariheleya tho wa mulaleeryi orino makacamiho elukuluku tonto, akhweya hawenrye weeca variyari va mweeri naari nthowa na ereca etokweene naari ophoreya. Marehereryo yaala anaphariheleya pahiru wa yaale ari ookotakotasa mmuteko aya. Nikhuuru na muteko nnahaala olakelela wakhala wi mulaleeryi onnaphwanelela wa marehereryo yaala.

YOOREPELA YA MULALEERYI A VAMULOKONI

³⁰ Yoolokoha anyu ya muteko woolaleerya ya mweeri ti mweeri enarepeliwa va Yoorepela ya Mulaleeryi a Vamulokoni. Soorepela seiya inakhala sa muloko wa vanipuroni. Wakhala wi munuupuwela othaamela muloko mukina, mwaleele atokweene anyu. Namarepa onahaala weeriha wi soorepela sanyu sirumiheliwe muloko anyu muvyaani. Mmukhalelo yoowo, atokweene a muloko anyu muvyaani anahaala owaakhelani phaama ni woovahaani nikhaviheryo noomunepani. Wakhala wi muri ocai wa muloko anyu ohiya mu nyeeri miraru, khwoo mutitelele ovonya yoolokoha anyu ya muteko woolaleerya mmuloko mukhummanyuwo.

NTAKHARA HEENI NINNALOKOHA MUTEKO AHU WOOLALEERYA?

³¹ Apwanne ikwaha ikina munnacuwala oveleela yoolokoherya anyu ya muteko woolaleerya? Moohikhwa minikwa achu oothene ninnachuna wuupuseryiwa. Nto wakhala wi ninnannuwiha makhalelo aphaama a oveleela yoolokoha ni wiiwexexa ntakhara heeni weerano yeela oryaaya wookhweleya, enamukhala yookhweya wa hiyo wuupuwelela oveleela yoolokoherya ya muteko woolaleerya.

³² Akina anniikoha: “Woona wi Yehova oosuwela echu kineeraka mmuteko awe, ntakhara heeni kinaphwanelaaka oveleela yoolokoha mmulokoni?” Mweeparipari, Yehova oosuwela echu nnapakaahu, nave oosuwela waakhanle wi muteko ahu nneerano ni murima woothene naari hooye. Muupuwele wi, Yehova aahirepela waaca wa mahiku Nowa aamalinheiye ari mmwaaceya ni waaca wa iyaakha Aisarayeli yeencaaya mutakhwani. Muluku aanarepela waaca wa yaale yaari oororomeleya ni yaale yaari oohiiwelela. Owo aanarepela ovoothiwa wa elapo yo Kanani ni miteko sa athoriha oororomeleya a Aisarayeli. Chiryene, owo aahirepela ichu sincipale iniiwanana ni miteko sa alapeli awe. Owo aaveerela saweereya seiya wi sirempwe, sooniheryaka wa hiyo moonelo awe vooloca sa orepela ichu seeparipari.

³³ Orepeliwa saweereya sinaphwanyeya Mpiipiliyani sinnooniherya wi soolokoha seiyo seeriweno ni achu a Yehova ti seeparipari. Mmikhalelo mincipale, wiiwexexiwa wa saweereya sa Mpiipiliya hisaahaala otannyaka murima waakhanle wi hisilokohiwe waaca waya. Moone sootakiherya inacharela: Maphatxuwelo 46:27; Mukwaha 12:37; Amuthoriha 7:7; 2 Mamwene 19:35; 2 Matharihelo 14:9-13; Yohani 6:10; 21:11; Saweriwa T’arummwa 2:41; 19:19.

³⁴ Naamwi soolokoha sahu mweeparipari sihiphitaanyeryaka soothene nnapakaahu mu omulapela wahu Yehova, sinnakhaviherya vancipale mmarehereryo a Yehova. Mu nsana noopacerya, vaavaa arummwa yaakoonkaaya mmukipici wa olaleerya, yaalokoha wa Yesu “soothene yeeraaya ni yaahusinhaaya.” (Mar. 6:30) Ikwaha ikina, soolokoha sinnooniherya wi mikhalelo mikina sa orummwa ahu sinnachuneya othokororyiwa. Soolokoha sinnooniherya waakhanle wi miteko mikina sinnaya vahoolo, ntoko waaceereryeya naari ovukuwa wa alaleeryi. Eyo ennakhaviherya osuwela waakhanle wi onnachuneya nlipiho naari wi waakhanle wi annaphwanela orehereryiwa makacamiho makina. Ahooleli a makhuuru a olaleerya anahaala okuxa soolokoha ni wiilipixerya orehererya echu vyakala yaahaala okookiherya oculi oya vahoolo wa anna naari muloko woothene.

³⁵ Soolokoha tho sinnakhaviherya marehereryo ovareryela makupa taani oriwo othowa otokweene wa alaleeryi. Makupa taani anakhumelela phaama? Ti woowi oya vahoolo oryaaya wa vakhaani? Soolaleeryiwa taani inachuneya wi saakhaviherye achu ohuserya eparipari? Soolokoha sinnakhaviherya marehereryo osuwela soolaleeryiwa taani siri soochuneya ntakhara muteko wa olaleerya mmakupa oohiyanahiyana a elapo. Hiihaa marehereryo ananwerya opaka soolaleeryiwa wi yaakhwaniherye yoothowa yeeyo.

³⁶ Wa ancipale a hiyo, soolokoha sinnavaha nlipiho. Apwanne hinnalipiheya vaavaa nniiwaahu vooloca sa muteko annihu anapakaaya mu olaleerya michaka saphaama elapo yoothene? Soolokoha vooloca sa waaceereryeya sinnanikhaviherya osuwela wunnuwa wa marehereryo a Yehova. Saweereya sinnatannya murima ahu ni oneeriha okhala amvai, sinceenyeryaka wuuka vamoha muteko woolaleerya veelapo yoothene. (Saw. 15:3) Oveleela soolokoha sahu sa muteko woolaleerya ti woochuneya nave onnooniherya waapwacha wahu anna ni arokora mmapuro oothene. Mmukhalelo yoola wookhweya, ninnooniherya wiiwelela wahu marehereryo a Yehova.—Luka 16:10; Ahe. 13:17.

OTIKITHERYA SOOLAKELELA SA MUCHU MUKHATEIYE

³⁷ Haavo mathowa a olikanyiha muteko ahu woolaleerya ni wa muchu mukina. (Gal. 5:26; 6:4) Mikhalelo sa muchu ti muchu ti soohiyana. Mmukhalelo mukina, nnawerya ophura moorweela wa otikitherya soolakelela sa muchu mukhateiye ntoko mathipelo a ophima oya wahu vahoolo mu orummwa. Waakhwaniherya soolakelela seiha onnanivaha ohakalala otokweene.

³⁸ Ela yawooniherya wi Yehova chiryene onnaakuviha waathukumanya yaale onahaaleiye waakhapelela “mmakacamiho matokotoko.” Nnakhala mu elukuluku enaakhwanelaaya yooloherya ya mulipa miririmu Yesaya: “Echoko ekhaani, ekaamukhalavo achu miile mmoha; achu tonto ekakhala muloko wawuupa. Miyo ka Apwiya; yaphiyerya elukuluku aya, kinamweerano vahilekenle.” (Wup. 7:9, 14; Isa. 60:22) Ekari etokweene okhala mulaleeryi a michaka saphaama variyari va mahiku yaala ookuchula!—Mat. 24:14.