Meerelo a Waaceererya Omurumeela Wanyu Yehova

VAAVAA yaaphin’yaaya elukuluku wi Yesu aarumihe oohuserya awe ntoko alaleeryi a Omwene, owo aaloca ni yaawo: “Muteko woohepha wohinnuwa, nto anamuteko ari vakhaani.” Waakhalavo muteko mutokweene, mwawiihiiha owo ahaaceererya: “Mumveke mwaneene eemaca wi aarumihe anamuteko mmacani mwawe.” (Mat. 9:37, 38) Yesu ahaaleela oohuserya awe mukhalelo wa ophara muteko yoola. Masu awe, yaanooniherya wi waanachuneya okhala a mvai, vaavaa aalonceiye ariki: “Himmaliha oviravira ipooma sa Isarayeli, ahiphin’ye mwaana a muchu.”—Mat. 10:23.

² Mmahiku ahu tho, wookhalavo muteko mutokweene wa ophara. Michaka saphaama sa Omwene inaphwanela olaleeryiwa ehakumve ophiya makuchuwelo, nave elukuluku ehanlewo eri yavakhaani! (Mar. 13:10) Woona wi emaca eneemelela elapo, mukhalelo ahu onnalikanela vakhaani ni wa Yesu vamoha ni wa oohuserya awe, nyenya mmukhalelo wawaacaxa. Niilikanyihaka ni achu a elapo yoothene, hiyaano nri avakhaani pahi, nyenya nnaphwanela ororomela wi Yehova onahaala onikhaviherya. Michaka yaphaama ya Omwene inarwa ilaleeryiwa veelaponi yoothene yavathi, nave mu elukuluku ya Yehova, makuchuwelo anahaala ophiya. Apwanne nnahaala okuha Omwene wa Muluku mu nipuro nopacerya mu okumi ahu wi niwerye waakhwaniha phaama murici ahu yoola wa olaleerya? Soolakelela taani soomunepani nnaphwanelaahu okhalano wi naakhwanihe murici ahu yoola?

³ Alocaka sa yeeyo Yehova onavekeiye wa alapeli Awe, Yesu aaloca: “Waakhweleke Apwiya Muluku aa ni murima aa woothene, ni okumi aa woothene, ni miruku aa yoothene, ni owerya waa woothene.” (Mar. 12:30) Nnaphwanela ophara muteko wa Yehova ni murima ahu woothene. Ela enataphulela wi, moorweela wa wiilipixerya mmuteko wa Yehova, ninnooniherya wi omulapa wahu onarweela vathi va murima nave ti weeparipari. (2 Tim. 2:15) Sookhalawo ikari sincipale wa oothene ahu, mwawiiwanana ni mavyakelo ni mikhalelo sa muchu ti muchu. Muthokororye ikari sa vakhaani sa seiho, nave muthanle soolakelela taani muneeraanyu mwiilipixerye okhalano wi mwaakhwanihe muteko anyu.

OKHALA MULALEERYI A MMULOKONI

⁴ Oothene yaale aneemererya eparipari aakhalano ekari ya olaleerya michaka yaphaama. Ola muteko woochuneya Yesu aavanheiye oohuserya awe. (Mat. 24:14; 28:19, 20) Mwawooneya, oohuserya a Yesu yaapacenrye oloca ni akina moohilekela ovinyerya vaavaa yiiwalaaya sa yeeyo. Ti yeeyo Antreya, Filipi, Korneliyu ni akina yeenraaya. (Yoh. 1:40, 41, 43-45; Saw. 10:1, 2, 24; 16:14, 15, 25-34) Apwanne ela enataphulela wi muchu onaphwanela olaleeryaka michaka yaphaama naamwi ahaakumve opatisiwa? Aai! Vaavaa muchu onaphwaneleleiye okhala mulaleeryi oohipatisiwa mmulokoni, owo ookhalano ekari ya opaka makupa mmuteko wa olaleerya empa ni empa. Nave tho, mwawiiwanana ni mavyakelo ni mikhalelo, owo onanwerya orumeela mmikhalelo mikina sa muteko woolaleerya.

⁵ Mulaleeryi amanle opatisiwa, moohikhwa minikwa owo onaphwanela wiilipixerya wi aakhaviherye achu akina ohuserya sa michaka yaphaama. Alopwana naari athiyana aakhalano ekari ya opaka makupa mmuteko woolaleerya. Ninnaakhela mareeliho mancipale mu ovaha nikhaviheryo na vakhaani ntakhara soochuna sa Omwene wa Muluku. Oothene yaale anawerya waaceererya muteko aya anahaala okhala oohakalala chiryene.

ORUMEELA WEIWO ORIWO OTHOWA OTOKWEENE

⁶ Akhweya ekulucu ya muloko anyu yootepa olaleeryiwa vancipale nave onamoona waphaama onnavahiwa weiwo. Yaari hiiha, akhweya munnuupuwela waaceererya muteko anyu moorweela wa othaamela weiwo oriwo othowa otokweene wa alaleeryi. (Saw. 16:9) Wakhala wi mwa mutokweene naari murummwa oorumeela, akhweya sookhalavo miloko mikina sahaala osiveliwa waakhela nikhaviheryo nanyu. Ooweherya anyu a ekulucu akhweya ookhalano sooleeliherya vooloca sa mukhalelo muneeraanyu mukhaviherye miloko mikina mu ekulucu anyu. Wakhala wi munnachuna orumeela mu elapo ekina, efiliyale anyu enanwerya woovahaani sooleeliherya soochuneya.

⁷ Apwanne munnachuna orumeela mu elapo ekina? Waakhanle wi munnachuna, woopaceryani munaphwanela wuupuwelela sa ichu inavolowela mu othaama yoola. Yaahaala okhala yamiruku ovaanela ni atokweene a mmulokoni mwanyu. Othaama wa mukhalelo yoola onanwerya woovolowelaani vancipale vamoha ni yoole ori ni nyuwaano. (Luka 14:28) Nyenya, wakhala wi yoolakelela anyu ori orumeela mu elukuluku yavakhaani, akhweya yaahaala okhala yaphaama olakelela orumeela nipuro nikina mu elapo anyu.

⁸ Mu ilapo ikina, anna yaawo anaphariheliwa wi ehooleleke, arino mavyakelo avakhaani. Mwawiiyeviha awo anneemererya wi atokweene arino mavyakelo yaawo athaamenle mmuloko aya ehooleleke. Mwawiihiiha, wakhala wi mwa mutokweene munakhaviherya mmuloko wa elapo muthaamenlaanyuwo, musuwele wi yoolakelela anyu tahi okuxa mirici soothene sa anna a vanipuroni. Nyenya, ori olapa vamoha ni yaawo. Mwaaceenyerye anna wi ekhaleno mavyakelo yaawo anahaala waakhaviherya waakhela mirici mmulokoni. (1 Tim. 3:1) Mukhale oopixa murima wakhala wi ichu hasineeca ntoko mwaakhovelenlaanyu mu elapo anyu. Mpharihele mavyakelo muryaanyuno ntoko mutokweene wi mukhale nikhaviheryo wa anna. Ohoolo waya, wakhala wi mookookela elapo anyu, atokweene a vanipuroni anahaala okhala ooreheryeya wi ekhapelele muloko.

⁹ Efiliyale ehaakumve omvahererya munna owo masina a miloko seiho sinachuna nikhaviheryo, Nikhuuru na Muteko na Muloko nnaphwanela ovahererya ekaarata enooniherya omweemererya munna owo. Ekaarata ela ti yoochuneya moohiphwacha waakhanle wi mwa mutokweene, murummwa oorumeela, piyoneero, naari mulaleeryi. Nikhuuru na Muteko na Muloko nnahaala ovonya ekaarata ela vamoha ni yooveka anyu mu efiliyale yeeyo munachunaanyu orumeelawo.

OLALEERYA MU ELOCELO EKINA

¹⁰ Wi nwerye waaceererya muteko anyu wa olaleerya, akhweya nyuwaano munanwerya ohuserya elocelo ekina, ophitaanyerya elocelo ya ineneeryo. Wakhala wi mookhalano yoolakelela yeela, ti yaphaama oloca ni atokweene a mmulokoni ni ooweherya a ekulucu. Awo anahaala woovahaani miruku ni nlipiho nenlo munachunaanyu. Moorweela wa ohoolela wa efiliyale, ikulucu ikina sinnakhalano marehereryo a waavyakiha alaleeryi vamoha ni mapiyoneero arino owerya olaleerya mu elocelo ekina.

OKHALA PIYONEERO

¹¹ Alaleeryi oothene anaphwanela osuwela ichu sinachuneya wi muchu awerye okhala piyoneero ookhaviherya, a elukuluku yoothene, piyoneero avameekheiye vamoha ni miteko mikina sa elukuluku yoothene. Piyoneero onaphwanela okhala mulaleeryi oopatisiwa onavaha yootakiherya yaphaama, yoowo mikhalelo sawe sinamweemererya wi amaliheke elukuluku enachuneya alaleeryaka michaka yaphaama. Nikhuuru na Muteko wa Muloko ninneemererya sooveka sa yaale anachuna okhala mapiyoneero ookhaviherya naari a elukuluku yoothene, nyenya mapiyoneero a vameekhaaya anathanliwa ni efiliyale.

¹² Mapiyoneero ookhaviherya ananwerya weemereryiwa wi erumeele mweeri mmoha, miyeeri mincipale, naari mu miyeeri soohaalakhanyeya, mwawiiwanana ni mikhalelo saya. Alaleeryi ancipale annasiveliwa orumeela ntoko mapiyoneero ookhaviherya mu ilukuluku savameekhaaya, ntoko elukuluku ya Mukonelo naari variyari va oxekurya wa ooweherya a ekulucu. Akina anathanla elukuluku ya iferiya. Alaleeryi akina oopatisiwa anakhala oxikola, annalakelela okhala mapiyoneero ookhaviherya vaavaa exikola enawaleliwaaya. Alaleeryi ananwerya okhala mapiyoneero ookhaviherya wi eveleele iwora savakhaani seiho sineemereryiwa mu miyeeri sa Marsu ni Apirili naari variyari va oxekurya wa ooweherya a ekulucu. Moohipwacha mikhalelo sanyu, wakhala wi nyuwaano mookhalano meecelo vamoha ni sookhovelela saphaama, nave munoona wi munanwerya waakhwaniha iwora sinachuneya wa piyoneero ookhaviherya, atokweene anahaala ohakalala othokororya yooveka anyu ya muteko yoola.

¹³ Wi mphwanelele okhala piyoneero a elukuluku yoothene, nyuwaano munaphwanela ororomela wi munahaala waakhwaniha soovekiwa sa iwora sa vayaakhani. Ntoko piyoneero a elukuluku yoothene, munaphwanela olapaka vakhiviru-khiviru ni muloko anyu. Mapiyoneero amvai mareeliho a muloko, mu wooniherya mvai mmuteko woolaleerya naari waaceenyerya akina ovolowa mmuteko woopiyoneero. Muhaakumve oveka okhala piyoneero a elukuluku yoothene, nyuwaano munaphwanela okhala mulaleeryi a ntakiheryo naphaama ni mmalinhe miyeeri mithanu nammoha mmanle opatisiwa.

¹⁴ Mapiyoneero avameekhaaya wiiliwiili anathanliwa variyari va mapiyoneero a elukuluku yoothene yaawo yoonihenrye wi annakhumelela phaama mmuteko woolaleerya. Awo anaphwanela okhala awiiveleela orumeela nipuro vyakala nenlo efiliyale eneeraaya yaarumewo. Wiiliwiili, awo annarummwa mmapuro yaawo ohiriwo miloko wi yaaphwanye achu yaawo arino nchuno na eparipari ni otikitherya miloko mivyaani. Vakina vaya, mapiyoneero avameekhaaya annarummwa mmiloko seiho sinachuna nikhaviheryo wi simalihe ekulucu aya. Mapiyoneero avameekhaaya yaawo tho ari atokweene, annarummwa okhaviherya miloko mikhaani, naamwi ohirivo othowa otokweene wa alaleeryi. Mapiyoneero a vameekhaaya oothene annavahiwa ekhorowa yavakhaani wi yiikhaviheryekeno. Akina a yaawo anathanliwa wi erumeele mu elukuluku ya vakhaani.

OKHALA MISIYONAARIYO

¹⁵ Nikhuuru na Muteko mpuwa mwa Nikhuuru Noolamulela, ninnaathanla yaawo anahaala okhala mamisiyonaariyo, nave voocharela Efiliyale ya vanipuroni ennaaruma muceche awo anaphwanelaaya orumeelawo. Awo annakhaviherya vancipale otikitherya ni olipiherya muteko woolaleerya mmulokoni. Wiiliwiili, mamisiyonaariyo anakhala anna yaawo yaakhenle mavyakiheryo mu Exikola ya Alaleeryi a Omwene. Awo annaavyeriwa empa vamoha ni ovahiwa ekhorowa yavakhaani wi yiikhaviheryekeno.

OKHALA OOWEHERYA A EKULUCU

¹⁶ Nikhuuru Noolamulela nimanle omuthanla ooweherya a ekulucu, woopaceryani owo onnavyakihiwa moorweela wa orumeela ntoko oomuraceela a ooweherya a ekulucu. Anna ala annasiveliwa ni muteko wa olaleerya nave tho annaasivela anna. Awo mapiyoneero a mvai, anamahuserya a Piipiliya oowetha, anamaperekha phaama a miyaha ni ahusiha oophwanelela. Awo annooniherya sawiima sa munepa waweela, toophimelela, oowiiwexexa akina, ni a miruku. Wakhala wi munna oothela, mwaariye onnavaha yootakiherya yaphaama mmeecelo ni mukhalelo wa waakhaliha akina. Owo mulaleeryi aphaama. Owo tho onniiwexexa murici awe ntoko muthiyana awiiyeviha, oohaaloca moonanara naari waayeviha aiyawe. Ooweherya a ekulucu vamoha ni asaaraya annatepa waaceliwa, mwa yeeyo, yaale arino muteko yoola anaphwanela okhalano ekumi yaphaama. Mapiyoneero hanarepela epetisau wi ekhale ooweherya a ekulucu. Ohiya yeeyo, awo anaphwanela ochekula ni ooweherya a ekulucu vooloca sa yoochuna aya, nave ooweherya onnaavaha sooleeliherya.

IXIKOLA SA MAREHERERYO A YEHOVA

¹⁷ Exikola ya Alaleeryi a Omwene: Wookhalavo ochuneya wa alaleeryi ancipale a Omwene wi elaleerye mmapuro yaawo ohinalapiwawo wiiliwiili ni ovaha miloko nikhaviheryo noomunepani. Mwawiihiiha, anna ni arokora ari aciye, ni atheli ananwerya orepela epetisau wi evyakihiwe mu Exikola ya Alaleeryi a Omwene. Omakuchuwelo wa exikola, yaawo amalinhe annarumihiwa wi yarumeeleke ntoko mapiyoneero a elukuluku yoothene wiiwo oriwo othowa otokweene mu elapo aya. Nyenya, yaawo aniivaha ananwerya orummwa mu elapo aya naari mu elapo ekina. Avakhaani a yaawo annavahiwa ekari ya orumeela ntoko mapiyoneero avameekhaaya a elukuluku vakhaani naari a elukuluku yoothene. Mapiyoneero yaawo anachuna ovolowa mu exikola yeela anaphwanela osuwela soovekeya va muthukumano wa muceche.

¹⁸ Exikola ya Piipiliya ya Kiliyati ya Torre de Vigia: Anna ni arokora ari aciye vamoha ni atheli yaawo anathanliwa ovolowa mu exikola yeela annaloca phaama Enklesi nave anarumeela ntoko arummwa a vameekhaaya a muteko wa elukuluku yoothene. Awo aakhalano murici wa otikitherya ni olipiherya muteko wa olaleerya naari marehereryo a efiliyale. Awo ahooniherya wi annasiveliwa waarumeela annaya nave wi anahaala waakhaviherya akina mmukhalelo waphaama ohuserya ni ochariha Soorepa vamoha ni ohoolela wa marehereryo. Efiliyale ya vanipuroni ennaawopa anna ni arokora anachuna wi erepele epetisau. Yaawo amalinhe exikola yeela annarumihiwa mmuteko woolaleerya naari mu efiliyale ya elapo ekina naari mu elapo aya.

ORUMEELA OPETELI

¹⁹ Orumeela Opeteli ekari yavameekhaaya. Nsina nawi Epeteli nnataphulela “Empa ya Muluku,” nave nsina nla ti noophwanelela nthowa na muteko onaphariwa weiwo. Anna ni arokora anarumeela Opeteli annaphara muteko woochuneya yoowo onavolowela otaphulela, opaka, ni okawa soolaleeryiwa sa marehereryo a Yehova. Muteko yoola ti woochuneya wa Nikhuuru Noolamulela, nenlo nnavahererya ohoolela miloko soothene orukurerya elapo yavathi. Mapetelita ancipale ari alipa ootaphulela, anakhala mmapuro yaawo enalociwawo elocelo yeeyo awo anataphulelaaya. Ela ennaakhaviherya wi enawerya wiiwa mukhalelo elocelo eyo enalociwaaya mu nihiku nnihiku. Awo tho annawerya woona meekhaaya mukhalelo achu aniiwexexaaya soolaleeryiwa seiho awo ataphulenlaaya.

²⁰ Miteko mincipale inaphariwa Opeteli sinachuneya ikuru. Nthowa na yeeyo, yaawo anawompwa wi erumeele Opeteli anaphwanela okhala anna oopatisiwa, amiravo yaawo arino ikuru soomwiilini. Wakhala wi wookhalavo othowa mu efiliyale yeeyo enahoolela elapo anyu nave nyuwaano munachuna orumeela Opeteli, munaphwanela ohuserya sincipale vooloca sa soovekeya moorweela wa atokweene a muloko anyu.

MUTEKO WA OTEKA

²¹ Oteka ipa sa marehereryo a Yehova makupa a omulapa wahu Muluku, woolikana ni muteko wa oteka empa ya Muluku weeriweno ni Solomoni. (1 Mam. 8:13-18) Anna ni arokora ancipale annooniherya wiiveleela waya ni mvai moorweela wa opharihela elukuluku ni sookhalano saya wi ekhaviherye muteko yoola.

²² Apwanne nyuwaano hamunachuna okhaviherya? Wakhala wi mwa mulaleeryi oopatisiwa nave munachuna opaka makupa mmuteko yoola, anna anahoolela muteko wa oteka a mukuma anyu, anahaala othamalela nikhaviheryo nanyu nave ari ooreheryeya wi yoovyakiheeni naamwi murino mavyakelo avakhaani. Mwaaleele atokweene a mmulokoni mwanyu wi muri ooreheryeya wi mukhaviherye. Alaleeryi akina oopatisiwa yaawo anaphwanelela waakhela muteko yoola anniiveleela wi ekhaviherye oteka ipa sa marehereryo a Yehova mu ilapo ikina.

²³ Sookhalavo ikari sincipale sa okhaviherya muteko wa oteka. Alaleeryi anavaha yootakiherya yaphaama yaawo apatisiwe arino mavyakelo, ananwerya okhaviherya miteko sooteka sa mukuma aya ntoko Nikhuuru Nooteka na Vanipuroni. Akina ari ooreheryeya olapa mmapuro oorakamela mu elukuluku vakhaani naari orumihiwa ni efiliyale ntoko awiiveleela a oteka mu isumana piili naari miyeeri miraru. Yaawo anathanliwa wi erumeele mu elukuluku yincipale aniichaniwa akhaviheryi a oteka. Mukhaviheryi a oteka yoowo onakerihiwa mu elapo yookhopela oniichaniwa mukhaviheryi a oteka mu ilapo sookhopela. Nikhuuru na Oteka nnaphitaanyerya anna awiivelela ni akhaviheryi an’yano vahoolo muteko wa oteka ehooleliwaka ni Nikhuuru Nooteka na Vanipuroni, ni anna a mmulokoni yaawo anakhaviherya muteko yoowo. Nikhuuru na Oteka ninnathaama nipuro nnipuro mpuwa mwa ekulucu ya efiliyale.

TISIVI IRI SOOLAKELELA SANYU SOOMUNEPANI?

²⁴ Waakhanle wi mooveleela ekumi anyu wa Yehova, yoochuna anyu ori omurumeela Yehova okhala wookhala. Vano, mmurumeelaka Yehova, tisivi iri soolakelela sanyu soomunepani? Okhalano soolakelela soomunepani sinahaala wookhaviheryaani opharihela ikuru ni mavyakelo anyu mwamiruku. (1 Kor. 9:26) Otikitherya soolakelela soomunepani, sinamookhaviheryaani winnuwa omunepani ni osuwela okuha ichu soochuneya mu nipuro noopacerya, vaavaa muneeraanyu mwiilipixeryeke ophwanya ikari ikina mmarehereryo a Yehova.—Fil. 1:10; 1 Tim. 4:15, 16.

²⁵ Murummwa Paulo oovaha yootakiherya yaphaama yeeyo nnaphwanelaahu ocharihaka mu omurumeela wahu Muluku. (1 Kor. 11:1) Paulo ahiilipixerya vancipale apharaka muteko wa Yehova. Owo aanasuwela wi Yehova aahimvaha ikari sincipale. Wa anna o Korinto, Paulo aahaarepela ariki: “Woohuleya mulako mutokweene wi kilape.” Apwanne ela henaphariheleya wa nyuwaano? Aai chiryene, sookhalavo ikari sincipale wa hiyaano wi nimurumeele Yehova vamoha ni muloko, xaxaxa mmuteko wa olaleerya michaka yaphaama ya Omwene. Nyenya wa Paulo, ovolowa “mulako mutokweene” waanaphitaanyerya okumana ni “achu oovaanya” ancipale. (1 Kor. 16:9) Paulo aaneemererya wiilaka mukhateiye. Moone yeeyo owo aalonceiye: “Kinnawitiraniha mwiili aka kipaka okapuro.” (1 Kor. 9:24-27) Apwanne nookhalano moonelo mmohamoha?

²⁶ Oothene ahu ninnaceenyeryiwa okhalano soolakelela soomunepani mwawiiwanana ni mikhalelo sa muchu ti muchu. Mmahiku ahu yaala, ancipale aavolowa mmuteko wa elukuluku yoothene, nthowa nawi yaapaka yoolakelela yeela woosiilo ene. Ovinyerya woonamwaneni, awo yaanaceenyeryiwa ni asitiithi aya vamoha ni anna akina weerano yeela. Vano, awo aakhalano ohakalala otokweene ovolowa mmuteko yoola emurumeelaka Yehova—ehirino ekeerelani. (Masi. 10:22) Soolakelela sikina saphaama ori olapa mmuteko woolaleerya isumana soothene, opaceryiha ni weeciha soohuserya sa Piipiliya, naari omaliha elukuluku yincipale nrehereryaka mithukumano. Echu yoochuneyaxa ori otitelela okhala oothipeleya ni waakhwaniha muteko ahu. Wakhala wi ninneerano yeela, nnahaala omucicimiha Yehova ni waakhwaniha yoolakelela ahu yoochuneyaxa, ori omurumeela Yehova okhala wookhala.—Luka 13:24; 1 Tim. 4:7b, 8.