Mutitelele Okhala Mmarehereryo a Yehova

MURUMMWA Tiyako oorepa: “Mwaacameleeni Muluku, yoowo onarwa awaacamelaani nyuwo.” (Tiy. 4:⁠8) Ela enooniherya wi, moohipwacha ohiphaameya wahu, Yehova tahi awiikusererya naari okhala ociiwene ophiyerya ohiwiriyana mavekelo ahu. (Saw. 17:​27) Nni niwerye hai omwaacamela Muluku? Nnanwerya weerano yeela moorweela wa wunnuwiha onthamwene wahu wawaacameleya ni Yehova, yeeyo enavolowela ovekela wa yoowo ni murima woothene. (Sal. 39:​12) Nnanwerya wunnuwiha onthamwene ni Muluku moorweela wa ohuserya moohihiyererya Masu awe, Piipiliya. Weerano hiihaa, ninnaphiyerya omusuwela Yehova Muluku, soolakelela sawe ni yookhwela awe ntakhara hiyo. (2 Tim. 3:​16, 17) Hiiha, ninnahuserya mukhalelo wa omusivela ni wunnuwiha woova woophwanelela wi nihimuthananihe.​—⁠Sal. 25:⁠14.

² Nto ti wooweryeya pahiru omwaacamela Yehova moorweela wa Mwaana awe, Yesu. (Yoh. 17:⁠3; Aro. 5:​10) Haavo muchu oomwiilini aahaala oniiwexexiha phaama vooloca sa muupuwelo wa Yehova omuhiya Yesu. Owo aanaasuwela phaama Atiithi awe ophiyerya oloca: “Haavo omusuwenle mwaana wi taani, voohikhala atiithi nave haavo tho aasuwenle atiithi wi taani, voohikhala mwaana ni muchu yoole mwaana onachuneiye omuupululela.” (Luka 10:​22) Mwawiihiiha, vaavaa nnaahuseryaahu aliivuru a Michaka wi nisuwele mukhalelo wa wuupuwela ni moonelo wa Yesu, ninnasuwela tho mukhalelo wa wuupuwela ni moonelo wa Yehova. Masuwelelo yaala annaneeriha omwaacamela Yehova.

³ Moorweela wa ohoolela wa Mwaana a Muluku, ninnannuwiha waataana ni Yehova moorweela wa otitelela okhala mmakupa awooneya a marehereryo awe, yaawo ananikhaviherya osuwela weerano yookhwela ya Yehova. Ntoko yaaloheryiwaaya mu Mateu 24:​45-​47, Pwiya, Yesu Kristu, oomunnyererya “namuteko oororomeleya ni a miruku” wi avahereryeke “yoolya mu elukuluku yoophwanelela” wa emusi ya nroromelo. Olelo, namuteko yoola onnavahererya yoolya yincipale yoomunepani. Moorweela wa ephiro yeela, Yehova onnanceenyerya waalakhanyaka Masu awe mahiku oothene, ophiyaka mmithukumano moohihiyererya ni okhaviherya mwaphaama muteko wa olaleerya ‘michaka saphaama sa Omwene.’ (Mat. 24:​14; 28:​19, 20; Yos. 1:⁠8; Sal. 1:​1-⁠3) Hannaphwanela okhalano moonelo woomwiilini vooloca sa namuteko oororomeleya. Nnaphwanela wiilipixerya otitelela okhala mmakupa awooneya a marehereryo a Yehova ni ochariha sooleeliherya saya. Eyo enamunaacameliha wa Muluku ahu, Yehova, nave enamunilipiha ni onikhapelela vaavaa nnahoolelaahu saweeha.

NTAKHARA HEENI SAWEEHA INAMVIRA SAACAKA?

⁴ Akhweya nyuwaano muri mu eparipari mu iyaakha sincipale. Waakhanle wi ti hiiha, moohikhwa minikwa moosuwela yootaphulela ya ohoolela saweeha sa ororomeleya. Nto, naamwi mmusuwenle Yehova hiihaanoru ni okhala vamoha ni achu awe, nyuwaano moosuwela wi Satana Musaserya, onnawiica oothene yaale aniiwelela otokweene wa Yehova. (2 Tim. 3:​12) Mwawiihiiha, naamwi muhoolenle saweeha sincipale, naari savakhaani, haavo mathowa awoova naari mano okhulumuwa. Yehova oororomeliha wi onahaala wookhaviheryaani ni woovahaani nivuluxo ni ekumi yoohimala.​—⁠Ahe. 13:​5, 6; Wup. 2:⁠10.

⁵ Oothene ahu nnanwerya ohooseya ni saweeha mmahiku yaala ookuchula a elapo yeela ya Satana. Ovinyerya vaavaa Omwene wa Muluku waatikitheryiwaaya mu 1914, Satana haneemereryiwa ophwanyeya vamiithoni va Yehova. Owo vamoha ni ankeelo awe oonanara aariheliwa veelaponi yavathi. Waaceereryeya wa otakhaliwa veelaponi yavathi, ophitaanyerya wiikariwa wa alapeli awiiveleela a Yehova, sookhumelela sa esara ya Satana nave eyo enooniherya wi nnakhala mmahiku ookuchula a olamulelo awe wootakhala variyari va achu.​—⁠Wup. 12:​1-​12.

⁶ Anyeenyen’ye ntakhara ovoothiwa wawe, Satana oosuwela wi elukuluku awe ti yavakhaani. Owo vamoha ni masololo awe, annapaka echu eri yoothene wi yaakanyerye muteko wa olaleerya Omwene ni omaliha wiiwanana wa alapeli a Yehova. Eyo ennanihela va nipuro na mukhico woomunepani yoowo otharihiwe wi “mukhico ahu hannawana ni achu a mwiili nnikhami, nto ni otokweene, owerya ni omwene wa elapo ela yeepiiphi, tiwi minepa soonanara soosulu.” Wi nikhumelele phaama, mmakupa a Yehova, hannaphwanela ohiya owaniha, nyenya okhapelela sawiisaakihano sahu soomunepani mmikhalelo saphaama. Nnaphwanela “ovaanya ovyaka” wa Musaserya. (Éfe. 6:​10-​17) Mwa yeeyo, nnaphwanela ovilela.

MUKHALELO WA WINNUWIHA OVILELA

⁷ Ovilela onataphulela “mavyakelo a ovilela sawuukhula naari makacamiho.” Mmoonelo woomunepani, onaahiwa mukhalelo wa weemeleleya mu opaka yeeyo eri yoophwanelela variyari va sawuukhula, wiiciwa, wiikariwa naari echu vyakala yaahaala oneeriha ochekela ororomeleya wahu wa Muluku. Ovilela Weekristu onaphwanela winnuwihiwa. Ennaviravo elukuluku. Mavyakelo ahu a ovilela anaaceereryeya vaavaa nnapwahiheryaahu oya vahoolo omunepani. Moorweela wa ovilela saweeha ikhaani sa nroromelo seiyo inakhumelela vaavaa nnakhalaahu Akristu, ninnakhala oolipa, awaakhwanela ovilela saweeha soovilaxa sinahaala okhumelela. (Luka 16:​10) Hannaphwanela omaala niweheryaka wi ipacerye toko okhumelela saweeha itokweene nivinyaka nlakelele okhala aweemeleleya mu nroromelo. Olakelela iwo onaphwanela weeriwano saweeha sihaakumve ophiya. Ooniheryaka wi ovilela onaphwanela winnuwihiwa vamoha ni mikhalelo mikina soomuluku, murummwa Petro oorepa: “Hiihaa, muukhuweke waaceererya makhalelo aphaama mu nroromelo nanyu; waaceererya osuwela mu makhalelo aphaama; waaceererya wiisuumaaliha mu osuwela; waaceererya nthiti mu wiisuumaaliha; waaceererya omucicimiha Muluku mu nthiti; waaceererya okhwelana mmulokoni mu omucicimiha Muluku; waaceererya osivela mu okhwelana mmulokoni.”​—⁠2 Ped. 1:​5-⁠7; 1 Tim. 6:⁠11.

⁸ Tiyako ohooniherya ochuneya waya winnuwiha ovilela, vaavaa aarempeiye ariki: “Asinnaka, mweereke okhala woohakalalihasha, vaavaa munavolowaanyu mu weereriwani woohiyanahiyana. Moosuwela wi weehiwa wa nroromelo nanyu onnaruuha ovilela. Ovilela tho, okhwaanihereye, wi mukhale awinnuwa ni awaakhwanela, ehihanlevo echu ekina.” (Tiy. 1:​2-⁠4) Tiyako olonce wi Akristu anaphwanela weemererya saweeha ni ohakalalela seiyo nthowa nawi iho sinnakhaviherya winnuwiha ovilela. Apwanne munoona hiiha vooloca sa mwaha yoola? Voocharela Tiyako onnooniherya wi ovilela onnaphara muteko mwa hiyo, onikhaviheryaka orehererya omuchu ahu Weekristu ni oneeriha okhala awaakhwanela ni aweemereryiwa ni Yehova. Chiryene, ovilela wahu onnalipihiwa nihiku ti nihiku vaavaa nnahoolelaahu ni ovootha saweeha. Ovilela, omanle olipihiwa, onnakumiherya mikhalelo mikina saphaama seiho nnachunaahu.

⁹ Ovilela wahu onnamuhakalaliha Yehova; onammweeriha onivaha ekumi yoohimala. Tiyako aahaaceererya: “Ooreeriwa [naari oohakalala] muchu yoowo onavilelano weereriwa, ntakhara, awerya mu weehiwa wawe, onamuchuweliwa ni okumi, yoowo Muluku onaaroromeliheiye yaawo anamukhwela.” (Tiy. 1:​12) Chiryene, hiyaano ninnavilela niwehereryaka ekumi yoohimala. Ohirivo ovilela haniwerya otitelela okhala mweeparipari. Wakhala wi noovoothiwa ni okhinyererya wa elapo, nnahaala ochikela muculi. Ohirivo ovilela, nnahaala oyeleela munepa wa Yehova navetho hinivahaka sawiima saya mu okumi ahu.

¹⁰ Naariki ntitelele ovilela mu ilukuluku seiya sookacamiha, nnaphwanela wunnuwiha moonelo woophwanelela vooloca sa ohooxeya ntoko Akristu. Muupuwele wi Tiyako oorepa: “Moneke [saweeha] ntoko ohakalala wawàkhwanela.” Eyo heeni ekhale yookhweya weerano, woona wi enamvolowela makacamiho oomwiilini ni a mmuupuweloni. Nyenya muupuwele wi okumi ahu wa omwaahiyu ori va yawoopiha. Yeeyo yeeren’ye ni arummwa ennanikhaviherya wiiwexexa mukhalelo nneeraahu nikhale oohakalala naamwi nihoolelaka makacamiho. Yaweereya enaphwanyeya mu liivuru a Saweriwa T’arummwa, nave eyo enii: “Hiihaa yaawiichana arummwa, yaawashula, yaalamulela wi ehiloce tho mu nsina na Yeesu, yaarowiha. Hiihaa arummwa, yaavinyavo vanikhuceni ehakalalaka, vawi yaacicimiheya voonyemuliwa wa nthowa na nsina nlo.” (Saw. 5:⁠40, 41) Arummwa yaaniiwexexa wi makacamiho aya yaari yawooniherya wi yaaniiwelela nlamulo na Yesu navetho wi yaahaakhela weemereryiwa wa Yehova. Moovira wa iyaakha, arepaka ekaarata awe yooveereliwa yoopacerya, Petro aahiloca sa esisapo ya makacamiho yaala ntakhara ekhaikhai.​—⁠1 Ped. 4:​12-​16.

¹¹ Yaweereya ekina enamvolowela Paulo ni Sila. Vaavaa yaapakaaya muteko aya wa omisiyonaario o Filipi, awo yaaphariwa nave esomeliwa wi yaanaakanyerya murecele mu epooma ni ovuwiha sookhovelela sooheemereryiwa. Ntoko yookhumelela, yaahiwasuliwa vancipale nave ewaleliwa mukariposo. Yaweereya ya Mpiipiliyani ennaloca wi vaavaa yaaryaaya mukariposo ehaakhenle nikhaviheryo ntakhara makhwaca aya, “ohiyu eriyari, Paawulu ni Siila yaanavekela yiipaka emuthamalaka Muluku, nave akhwaaya a mukaripooso yaanawiiwa.” (Saw. 16:​16-​25) Paulo ni nthamwene awe yoona ohooseya waya ntakhara Kristu ohiya pahiru ntoko yawooniherya ya ororomeleya waya wa Yehova ni achu, nyenyatho ntoko mukhalelo wa ovaha onamoona wa waaceereryeya wa yaale yaari ooreheryeya wiiwa michaka saphaama. Okumi wa akina waavoloweliwa. Ohiyu yoole, mutokweene o karipooso ni echoko awe yaawiriyana muchaka nave ekhala oohuserya. (Saw. 16:​26-​34) Paulo ni Sila yaahimuroromela Yehova, ikuru sawe, ni ochuna wawe waakhaviherya vaavaa yaahooseyaaya. Awo hiyaaceechen’ye.

¹² Olelo tho, Yehova onnavaha nikhaviheryo nawaakhwanela nenlo nnachunaahu mu ilukuluku saweeha. Owo onachuna wi nivilele. Yehova oonivaha Masu awe wi enihooleleke ni masuwelelo awaakhwanela vooloca sa yoochuna awe. Awo annalipiha nroromelo nahu. Nookhalano ekari ya okhala vamoha ni annihu a mu nroromelo ni olapa muteko waweela. Nave tho nookhalano ekari ya omwaacamela Yehova moorweela wa nivekelo. Owo onniiwa masu ahu oothamalela vamoha ni sooveka ntakhara nikhaviheryo wi ntitelele okhala aweela vamiithoni vawe. (Fil. 4:​13) Nave hannaphwanela ocuwala ikuru nnaakhelaahu vaavaa nnuupuwelelaahu ewehereryo ahu.​—⁠Mat. 24:​13; Ahe. 6:​18; Wup. 21:​1-⁠4.

OVILELA NI SAWEEHA SOOHIYANAHIYANA

¹³ Saweeha nnahoolelaahu olelo sinnalikana ni seiyo arummwa oopacerya a Yesu yaahoolenlaaya. Olelo, Anamoona a Yehova annakumanano makacamiho a ophuciwa ni ohooxiwa mmatani mwa amwiicani yaawo arino moonelo wooheseya vooloca sa hiyo. Hiihaa ntoko mmahiku a arummwa, wiica otokweene onatannyiwa ni ahooleli anacicimiheryaasa malapelo aya, yaawo mahusiho aya atheru ni soororomela saya sinuupululiwa Mmasu a Muluku. (Saw. 17:​5-9, 13) Vakina vaya, achu a Yehova annaphwanya otaphuwa moorweela wa oveka ophwanelela waweemereryeya yoowo otikitheryiwe ni alamuleli. (Saw. 22:​25; 25:​11) Nyenyatho ikwaha sikina alamuleli annatikitherya malamulo a owatiiha muteko ahu, ni yoochuna ya omaliha muteko ahu woolaleerya. (Sal. 2:​1-⁠3) Mmikhalelo ntoko seiha, ninnachariha moolipa murima yootakiherya ya arummwa oororomeleya, yaawo yaalonce: “Onnakhweleya omwiiwelela Muluku, opwaha achu.”​—⁠Saw. 5:⁠29.

¹⁴ Vaavaa munepa wa nthalu onaaceereryeyaaya veelaponi yoothene, alaleeryi a michaka saphaama annakhinyereryiwa ohiya muteko yoowo Muluku aavaherenryeiye. Eyo enneeriha wi alapeli oothene a Muluku yiiwexexe phaama ochuneya wa olopola onaphwanyeya mu Wupulula 14:​9-​12 vooloca sa omulapela “mwaashinama ni eruku awe.” Ninniiwexexa yootaphulela ya masu a Yohani: “Vaavanto tonooneyaayavo ovilela wa aweela murima aniiwelela malamulo a Muluku nave enakhala oororomeleya mwa Yeesu.”

¹⁵ Ikhoco, owanawana, wiikariwa wooluluwanya naari owatiihiwa muteko ahu ni alamuleli sinamweeriha okhala woovila opaka malapelo Eekristu mootaphuwa. Akhweya onamukhala woohiweryeya opaka mithukumano sa muloko. Olocihana ni Efiliyale onamukwateleliwa. Osekuryiwa ni ooweherya a ekulucu onanwerya omaalihiwa. Soolaleeryiwa hasinahaala ophiyaka. Wakhala wi yoheereya emoha ya ichu seiya, tiheeni munaphwanelaanyu opaka?

¹⁶ Naakhulo ti nawi, mpake yeeyo munaweryaanyu nave ophiyerya munaweryelaanyuvo mwawiiwanana ni mikhalelo sanyu. Yoohuserya ya muchu mukhateiye enahaala oweryeya. Wiiliwiili, makhuuru makhaani ananwerya othukumanaka mu ipa soovitheya. Soolaleeryiwa ihuseryiwe khalai vamoha ni Piipiliya inanwerya okhala mathipelo a mithukumano. Muhikhale awuukhuwa naari awoova. Nikhuuru Noolamulela wiiliwiili nnahaala otikitherya mukhalelo wa olocihana ni anna yaawo arino murici mu elukuluku yammoori.

¹⁷ Naamwi muri ocai ni anninyu oothene Eekristu, muupuwele wi hamuri ocai ni Yehova vamoha ni mwanawe, Yesu Kristu. Ewehereryo anyu enanwerya otitelela okhala yoolipa. Yehova nlelo onanwerya owiriyanaka mavekelo anyu, nave onamoolipihaani ni munepa awe. Mmwaacamele yoowo wi oohooleleni. Muupuwele wi nyuwaano mwa mulapeli a Yehova ni oohuserya a Yesu Kristu. Mwawiihiiha, mpharihele phaama ikari wi mvahe onamoona. Yehova onamureeliha wiilipixerya wanyu, nave mu elukuluku aya akina anamukhala ni nyuwaano mu malapelo eeparipari.​—⁠Saw. 4:​13-​31; 5:​27-​42; Fil. 1:​27-​30; 4:​6, 7; 2 Tim. 4:​16-​18.

¹⁸ Moolikana ni arummwa ni achu akina, waakhanle wi mohoopopihiwa wi mwiiphiwe, mmuroromele “Muluku yoowo onaaviiha achu wookhwani.” (2 Kor. 1:​8-​10) Nroromelo nanyu mu yoovaha awe ya ovinya mookhwaani nnanwerya wookhaviheryaani ovilela naamwi ni wiiciwa otokweene. (Luka 21:​19) Kristu Yesu oovaha yootakiherya; owo aahisuwela wi ororomeleya wawe variyari va saweeha waahaala waalipiha akina wi evilele. Nyuwaano munanwerya okhala ehime ya nlipiho wa anninyu, hiiha ntoko yoowo enreiye.​—⁠Yoh. 16:​33; Ahe. 12:​2, 3; 1 Ped. 2:⁠21.

¹⁹ Ohiya wiikariwa ni wiiciwa, nyuwaano munahaala ohoolela mikhalelo mikina soovila. Ntoko yootakiherya, akina anamukhala ooceecheya nthowa na achu ohooniherya nchuno mu ekulucu aya. Akina annahoolela makacamiho a ireca sa mmwiilini ni mmuupuweloni, naari ovilela ni makacamiho anakhumelela wa nthowa na ohiphaameya wa achu. Murummwa Paulo aanahoolela yaweeha ntoko yeela, yeeyo yaakanyerya muteko awe naari weeriha okhala woovila mu ikwaha ikina. (2 Kor. 12:⁠7) Epafrotito, Mukristu o Filipi yoowo aakhanle mu nsana noopacerya, aahikhala ‘awuukhuwa vawi [asinthamwene awe] yaahiiwa sa wiiceliwa wawe.’ (Fil. 2:​25-​27) Ohiphaameya wahu ni wa akina onanwerya okumiherya makacamiho oovila ovilela. Onamukhalavo ohiiwanana ni Akristu akhwiihu naari ni amusi ahu nthowa na omuchu ahu. Nyenya makacamiho yaala ananwerya ovileliwa mwaphaama nave ananwerya ovoothiwa ni yaale anachariha ekano ya Masu a Yehova.​—⁠Ezek. 2:​3-⁠5; 1 Kor. 9:​27; 13:⁠8; Kol. 3:​12-​14; 1 Ped. 4:⁠8.

NILAKELELE OKHALA OOROROMELEYA

²⁰ Nnaphwanela omucharaka yoole Yehova omuthanlileiye ntoko muru wa muloko, Yesu Kristu. (Kol. 2:​18, 19) Nnaphwanela olapaka vakhiviru khiviru ni “namuteko oororomeleya ni a miruku” ni yaale athanliwe ntoko ooweherya. (Ahe. 13:​7, 17) Moorweela wa ochariha marehereryo oomuluku ni olapa ni yaawo anahoolela, nnamukhala ooreheryeya wi neereno yookhwela ya Yehova. Nnaphwanela opharihela phaama ekari ya nivekelo. Muupuwele wi naari ixiri sa ekalaposo naari owaleliwa nipuro noovitheya hinnahaala onihiiha olocihana ni Tiithi ahu awirimu naari waakanyerya wiiwanana nryaahuno ni annihu.

²¹ Ni yoolakelela ni ovilela, hankooni nipake soothene nnaweryaahu mwawiiwanana ni mikhalelo sahu wi nlaleerye, nivilelaka mmuteko yoowo Yesu Kristu, yoowo oviihiwe mookhwani otikithenryeiye wa hiyo: “Haweni wa achu a maloko oothene, mwaapakeke oohuserya aka, munaapatisa mu nsina na Atiithi, na Mwaana ni na Munepa Waweela, nave munaahusiha ochariha soothene koorummaakaani.” (Mat. 28:​19, 20) Hiihaa ntoko Yesu, hankooni nivilele. Hankooni nikhapelele ewehereryo ya Omwene nave ekari ya ekumi yoohimala ekhale yeeparipari wa hiyaano. (Ahe. 12:⁠2) Ntoko oohuserya oopatisiwa a Kristu, nookhalano ekari ya okhwaaniherya yooloherya awe vooloca sa “makuchuwelo a ilukuluku.” Owo aaloca: “Michaka yeela ya Omwene enamulaleiwa mweelapo yoothene yookhalamo achu wi iweerele onamoona maloko oothene. Vaavaa teneeraaya ephiye makuchuwelo.” (Mat. 24:​3, 14) Wakhala wi nohiivoliiherya ni murima woothene mmuteko yoola variyari va elukuluku yeela, nnamukhalano ohakalala wa okhala wookhala mu elapo evyaani yeekhaikhai ya Yehova!