Okawanyeya wa Omwene

Vaavaa Solomoni aamwiiweleleiye Yehova, Aisarayeli yaanakhalano murecele. Nto Solomoni aahaathela athiyana ancipale a ilapo ikina yaawo amuluku aya yaari oopachiwa. Solomoni aatorokeya vakhaani vakhaani nave aapacerya waalapela amuluku yaawo. Yehova aatepa onanariwa nave aamuleela Solomoni: ‘Kinanwaakha omwene ni kinammuvaha mulapeli aa. Kinamukawanya omwene mmakupa meeli, nave emusi aa eni enalamulela makupa makhaani a omwene.’

Yehova aahooniherya yeeyo aahaaleiye weera mmukhalelo mukina. Solomoni aakhalano mulapeli awiichaniwa Yeropowamu. Arikimweeca mphironi, Yeropowamu aakumana ni mulipa a miririmu Aiya. Aiya aahaahula malaya awe ikhala itapatha 12 nave aamuleela Yeropowamu ariki: ‘Okuxe itapatha iha khumi. Apwiya Muluku a Isarayeli aaloca eriki: Kinammwaakha Solomoni omwene ni kinamoovaha weyaano mahimo khumi.’ Vaavaa Solomoni iiwaleiye yeela aanachuna omwiipha Yeropowamu! Mwawiihiiha, Yeropowamu aachawela o Yikuputu. Ohoolo waya Solomoni aakhwa nave mwanawe Ropowamu aakhala mwene. Vanonto Yeropowamu aahoona wi aanaphwanela okookela o Isarayeli.

Asitokweene o Isarayeli yaamuleela Ropowamu eriki: ‘Waanaakhaliha phaama achu, awo anahaala owiiwelelaka mahiku oothene.’ Nto asinthamwene awe yaamulenle eriki: ‘Waahooxeke achu! Waarumeke olapa miteko soowalamela.’ Ropowamu aacharinhe ekano ya asinthamwene awe. Owo aanaahooxa achu nave awo yaammwareela. Vano mahimo 12 yaakawanyeya. Aathanliwa Yeropowamu wi akhale mwene a mahimo khumi a omwene wa Isarayeli. Ropowamu aari mwene a mahimo meeli o Yuteya, nave achu yaatitelela omwiiwelela.

Yeropowamu haachuna wi achu awe eyeeke o Yerusalemu wi evahe mukucho. Woosuwela ntakhara heeni? Yeropowamu oova wi achu yaahaala omuhiya wi emwiiweleleke Ropowamu. Mwawiihiiha owo aahaapaka asaana a emope a ewooro nave aahaaleela achu ariki: ‘Muhiye oya o Yerusalemu. Mwaalapeke amuluku ala awooponleeni o Yikuputu.’ Achu yaapacerya waalapela amuluku yaawo nave emucuwala Yehova.