Olipa Murima wa Yohiyata

Yesapeli aakhalano mwaana amwaamuthiyana awiichaniwa Ataliya yoowo aari awuuma murima ntoko amannya. Ataliya aatheliwe ti mwene o Yuteya. Vaavaa iyawe aakhwileiye, mwanawe amwaamulopwana aakhala mwene. Nyenya vaavaa mwanawe aakhwileiye, Ataliya aahipaka okhala mwene o Yuteya. Owo aawiipha achu oothene a nihimo nawe wi ahikhale oni akhale mwene omuhiya yene. Achu oothene yaanamoova.

Namukucho Yohiyata ni mwaariye Yehosepa yaahoona wi yeeyo Ataliya eereiye yaari yoonanara. Awo yaamwiipithiha mwaana mmoha yoowo aari musulwa a Ataliya nsina nawe Yehowasi. Awo yaamphuwa mu empa ya mithukumano.

Vaavaa Yehowasi aareiyeno iyaakha thanu napiili, Yohiyata aahaathukumanya asitokweene ni Alevi nave aahaaleela masu ala: ‘Mulipeleleke mikhora nave ahikhale ani avolowe.’ Voocharela, Yohiyata aamuthanla Yehowasi wi akhale mwene o Yuteya nave aanwariha korowa. Achu o Yuteya yaakhuwela: “Ekumi ekhale ni mwene ahu!”

Mwene a mwaamuthiyana Ataliya aahiiwa okhuwela wa achu nave aachimakela mu empa ya mithukumano. Vaavaa aamonneiye mwene muvyaani, owo aakhuwela: ‘Koorukunuweliwa! Koorukunuweliwa!’ Asitokweene yaamphara Ataliya, emukeriha vaate nave yaamaliha okumi awe. Vano hanka vooloca sa ichu soonanara seiho enreiye?

Yohiyata aakhaviherya nloko opaka nlakano ni Yehova eroromelihaka omurumeela yooworu. Yohiyata aahaalamulela okumula miconco sa Pala ni onyaanya iruku soopachiwa. Aahaathanla anamukucho ni Alevi wi erumeeleke mu empa ya mithukumano wi achu ekookele omulapela Muluku. Aahaathanla tho alipeleli a mukhora wi ahivolowe muchu ooriipiheya. Vookuchulani Yohiyata ni asitokweene yaamukuxa Yehowasi emukeriha mu empa ya mwene wi akhaleke va munyukhu nave achu o Yuteya yaanahakalala. Vano awo yaanamulapela Yehova ohirivo ovolowela wa Ataliya ni malapelo a Pala. Onnawerya woona ti mwawiihai olipa murima wa Yohiyata waakhavihenryaaya achu ancipale?