Yesu ni Muthiyana Veehimeni

Aamanleiye Paskha, Yesu ni oohuserya awe yaapaka mukwaha ekookelaka o Kalileya. Waacamela epooma ya Sikar, Yesu aaheemela va ehime ya Yakopo nave oohuserya awe yaaya opooma okula yoolya.

Aarwa muthiyana wi arike maahi. Yesu aahi wa yoowo: ‘Kivahe maahi kiwurye.’ Owo aamwaakhula: ‘Ti wi hai nyuwaano munakiveka maahi? Miyaano ka Musamariya. Ayuta hanaloca ni Asamariya.’ Yesu aahi: ‘Waari omusuwela yoowo onooveka maahi we waaya okhala oopacerya omveka, nave aamoovaha maahi a okumi.’ Muthiyana aamukoha: ‘Enataphulela eheeni? Nyuwaano himwaano muno.’ Yesu aahi: ‘Muchu oni awurye maahi kineeraka kimvahe harwa akhalano nchanana.’ Muthiyana aahi: ‘Pwiya kivaheeni maahi yaawo.’

Yesu aaloca: ‘Wawiichane aiya erwe vaava.’ Owo aamwaakhula: ‘Nkaano iyaka.’ Yesu aahi: ‘Wooloca phaama wi nkaano iyaka. Ntakhara waakhalano alopwana athanu, nave ole oryaaweno tahi aiya.’ Muthiyana aahi: ‘Kinnoona wi mwa mulipa a miririmu. Makholo ahu yaanamulapa Muluku vamwaakoni va, vano nyu Ayuta muni onaphwanela olapeliwa o Yerusalemu.’ Voocharela, Yesu aamuleela echu yeeyo aahamulenleiye muchu mukina: ‘Mesiya ti miyo kinaloca ni weyaano.’

Muthiyana aachimakela opooma nave aahaaleela Asamariya ariki: ‘Murwe mwamoone mulopwana okileenle ichu kenraaka. Owo ti Mesiya!’ Awo yaamuchara eyaaka weehimeni nave yaawiriyana phaama mahusiho a Yesu.

Asamariya yaanwopa Yesu wi akhale mu epooma aya. Owo aahaahusiha mahiku meeli nave achu yaanamuroromela. Achu yaaloca wa muthiyana ole eriki: ‘Noheemererya ntakhara nrimwiiwa mukhatiihu, nave noosuwela wi ola ti mvuluxa a elapo.’