Ophariwa wa Yesu

Yesu ni arummwa awe yaaheeca ekhumaka o Muhice Setron eyaaka o Mwaako Olivera. Waari ohiyu eriyari, nave masuwa yaanaarya. Yaaphiyalaaya o emaca ya Ketsemani, Yesu aahaaleela: ‘Mukiraathi vaava nave muhirupe.’ Yesu aaya vahoolo nave aakokhora. Owo aavekela wa Yehova awuukhuweene ariki: ‘Weereye okhwela wanyu.’ Yehova aamuruma munkeelo wi amulipihe Yesu. Vaavaa Yesu aakookenleiye wa arummwa, aahaaphwanya erupaka. Owo aahi: ‘Vinyani! Ela tahi elukuluku yoophwanela orupa! Yoophiya elukuluku mwaana a muchu oneereiye aveleeliwe mmatani mwa amwiicani.’

Moohilekela, Yutasi aaphiya achariwaka ni muloko wa akhoco epharenle masipaaca ni ikopo. Yutasi aanasuwela weiwo Yesu aareiyewo ntakhara yaanaya vamoha mu emaca yeeyo. Yutasi aahaaleela anakhoco wi aahaala waathoonyerya Yesu. Owo aamulukama Yesu nave aahi: ‘Mooni muhusiha,’ nave aamvaha epeexo. Yesu aahi: ‘Yutasi, onakiveleela ni epeexo?’

Yesu aakoha wa muloko ariki: ‘Munamwaavya taani?’ Awo yaamwaakhula: ‘Yesu o Nasareti!’ Yesu aahi: ‘Ti miyaano,’ anakhoco yaakookela oculi yuuwela vathi. Yesu aahaakoha wanaawiili: ‘Munamwaavya taani?’ Yaamwaakhula tho: ‘Yesu o Nasareti.’ Yesu aahi: ‘Kohooleelani wi ti miyaano. Mwaahiye asinthamwene aka ala eroweke.’

Vaavaa Petro onneiye echu yeereya, owo aahulula nsipaaca nave aakwasa naaru na Malko yoowo aari mulapeli a namukucho. Nyenya Yesu aakuxa naaru nlo nave akookiheryavo. Voocharela aaloca ni Petro: ‘Kuha nsipaaca naa. Wawana ni nsipaaca onahaala tho okhwa ni nsipaaca.’ Anakhoco yaamphara Yesu emmaka miwono, nyenya arummwa yaachawa. Achu yaamukeriha wa Anasi, mutokweene a alipa eephepa. Anasi aamuthoriha Yesu nave aamukeriha vaate va Namukucho Mutokweene awiichaniwa Kayafa. Vano tiheeni yeeren’ye ni arummwa?