MWAHA 44
Apwanne Ifesta Soothene Sinnamuhakalaliha Muluku?
Yehova onachuna wi hiyaano nipuhe okumi ophiyerya tho opaka ifesta ilukuluku ikina. Nyenya apwanne ifesta soothene sinnamuhakalaliha owo? Nni nooniherye hai wi ninnamusivela Yehova mmwaha yoola?
1. Ntakhara heeni ifesta sincipale hasinamuhakalaliha Yehova?
Nyuwaano akhweya munanwerya otikhiniheya vaavaa muneeraanyu musuwele wi ifesta sincipale sinathipeleya mmahusiheryo yaawo ahiniiwanana ni yeeyo Piipiliya onaloceiye, naari wi siniiwanana ni malapelo atheru. Ifesta seiha akhweya inanwerya wiiwanana ni onamulosiwe, naari inathipeleya mmoonelo wawi yookhala ehinakhwa muchu amanle okhwa. Ifesta ikina siniiwanana ni ichu sa malavi ni othuperiwa. (Isaiya 65:11) Yehova onnaaleela alapeli awe: “Mukhumevo veeri vaya nave mmwalane ni yaawo . . . muhiphareru echu yoothanyeya.”—2 Korinto 6:17.a
2. Ti mwawiihai Yehova onooneiye vooloca sa ifesta seiho sinaacicimihaxa achu?
Yehova onnanleela wi nihimorele mmuraakho wa ‘waaroromela achu.’ (Mwaalakhanye Yeremiya 17:5.) Ifesta ikina itikitheryiwe wi saacicimiheke achu, ntoko anakhoco naari alamuleli. Ifesta ikina sinavuwiha elapo. (1 Yohani 5:21) Nave tho ikina sinavuwiha miyoonelo sa ipoliitika naari makhuuru awiiwanana. Munoona wi Yehova aahaala wiisoona hai waakhanle wi ninnapaka makupa mu ifesta seiyo sinaacicimiha achu naari marehereryo yaawo enaceenyerya ichu seiho sihiniiwanana ni yoochuna Awe?
3. Apwanne mukhalelo achu anapakaaya ichu mu ifesta sammoori ti waweereryeya?
Piipiliya onnakhwatiiha ‘ohapaliwa, olyavosha, [ni] owuryasha.’ (1 Pedro 4:3) Mu ifesta ikina, achu annakhala oohiivareryela nave annapaka ichu mmukhalelo woohiphwanelela. Wi ntitelele okhala asinthamwene a Yehova, nnaphwanela ohiya meerelo yaala ooriipiheya.
OHUSERYA MWAWIISEELA
Moone mukhalelo muneeraanyu mmuhakalalihe Yehova ni opaka soolakelela saphaama vooloca sa opaka makupa naari ohipaka makupa mu ifesta sammoori.
4. Mukhooce ifesta seiho sihinamuhakalaliha Yehova
Mwaalakhanye Éfeso 5:10, nave voocharela muthokororye makoho ala:
Tiheeni nnaphwanelaahu wuupuwelela vaavaa nnalakelelaahu olya efesta yammoori?
Ifesta taani siri sawunlaana mmukuma munakhalaanyuwo?
Apwanne munoona wi ifesta seiho sinnamuhakalaliha Yehova?
Ntoko yootakiherya, apwanne mohintoko wiikoha ti mwawiihai Muluku onooneiye vooloca sa ochapela nihiku na oyariwa? Piipiliya hanaloca wi aahikhalavo kapuro a Yehova yoowo aachapela nihiku nawe na oyariwa. Nyenya Piipiliya onnaloca ifesta piili sa ochapela nihiku na oyariwa seiho seeriweno ni achu yaawo yahaamulapela Muluku. Mwaalakhanye Maphatxuwelo 40:20-22 ni Mateu 14:6-10. Voocharela muthokororye makoho ala:
Tiheeni enalikana mu ifesta seiha piili sa ochapela nihiku na oyariwa?
Mwawiiwanana ni soorepa seiha, munuupuwela wi Yehova onoona hai vooloca sa ochapela nihiku na oyariwa?
Akhweya munanwerya wiikoha: ‘Apwanne Yehova chiryene onnapwacha waakhala wi kinnachapela nihiku na oyariwa naari efesta yammoori yeeyo ehiniiwanana ni yeeyo Piipiliya onahusiheiye?’ Mwaalakhanye Mukwaha 32:1-8. Voocharela, moone EXILEMA nave muthokororye makoho anacharela.
Ntakhara heeni ti woochuneya osuwela yeeyo enamuhakalaliha Yehova?
Nni neereno hai yeela?
Nni niwerye hai osuwela waakhanle wi efesta yammoori henamuhakalaliha Muluku?
Apwanne eyo enathipeleya mmahusiheryo yaawo ahiniiwanana ni yeeyo Piipiliya onaloceiye? Wi mphwanye naakhulo, mweererye osuwela mapacereryo a efesta eyo.
Apwanne eyo ennaavaha ncicimiho noopwahererya achu, marehereryo naari elapo? Opwaha soothene, hiyaano ninnamucicimiha Yehova nave ninnaroromela wi owo onahaala orehererya makacamiho a veelaponi.
Apwanne yeeyo achu anapakaaya va efesta eyo ennahiyana ni yeeyo Piipiliya onaloceiye wi ti yaphaama? Nnaphwanela otitelela okhala aweela mmeecelo ahu.
5. Mwaakhaviherye akina ocicimiha soororomela sanyu
Onanwerya okhala woovila oloca wi hooye vaavaa akina anookhinyereryaayani wi mpake makupa mu ifesta seiho sihinamuhakalaliha Yehova. Mwaatharihele yoolakelela anyu mwa ncicimiho ni moopixa murima. Wi moone yootakiherya ya mukhalelo wa weerano yeela, moone EXILEMA.
Mwaalakhanye Mateu 7:12, nave voocharela muthokororye makoho ala:
Mwawiiwanana ni yoorepa yeela, apwanne munaphwanela weererya waakhinyererya amusi anyu ohilya efesta yammoori?
Muni nwooniherye hai amusi anyu wi, naamwi muhilyaaka ifesta sammoori ni yaawo, eyo henataphulela wi hamunaasivela?
6. Yehova onachuna wi nikhaleke oohakalala
Yehova onachuna wi nipuheke ilukuluku saphaama ni amusi vamoha ni asinthamwene ahu. Mwaalakhanye Eklesiyaste 8:15, nave voocharela muthokororye nikoho nla:
Ti mwawiihai yoorepa ela enooniheryaaya wi Yehova onachuna wi nikhaleke oohakalala?
Yehova onachuna wi achu awe ethateke ni epuheke ilukuluku saphaama vamoha. Moone EXILEMA wi moone mukhalelo ela enakhalaaya yawooneya mmithukumano sahu sa miceche sa elapo yoothene.
Mwaalakhanye Galasya 6:10, nave voocharela muthokororye makoho ala:
Apwanne nnaphwanela opaka makupa mu ifesta seiho achu anachapelaaya wi niwerye ‘oweerela saphaama’ akina?
Tiheeni yaahaala oweerihaani okhala oohakalala: Okhinyereryiwa ovaha yamahala nthowa na efesta naari ovaha yamahala nthowa nawi munnachuna weerano yeeyo?
Anamoona a Yehova ancipale annarehererya ifesta ikhaani ntakhara anaaya nave annaavaha samahala ehiweherenrye nihiku navameekhaaya wi yeereno. Waakhanle wi mookhalano anamwane, ichu taani savameekhaaya mwaahaalaanyu opaka wa yaawo?
ACHU AKINA ANI: “Osuwela mapacereryo a ifesta tahi woochuneya. Echu eri yoochuneya ori omaliha elukuluku ni amusi vamoha ni asinthamwene.”
Tiheeni mwaahaalaanyu oloca?
MUKWASU
Yehova onachuna wi nipuheke ilukuluku saphaama ni amusi vamoha ni asinthamwene ahu. Nyenya tho owo onachuna wi nihichapeleke ifesta seiho sihinamuhakalaliha.
Makoho awuuluulela
Makoho taani anahaala onikhaviherya osuwela waakhanle wi efesta yammoori henamuhakalaliha Yehova?
Ti mwawiihai nneeraahu naakhaviherye amusi ni asinthamwene ahu wiiwexexa ntakhara heeni nihinachapelaahu ifesta ikina?
Nnasuwela hai wi Yehova onnachuna wi nthateke nave nikhaleke oohakalala?
OTHOLATHOLA
Muthokororye ifesta ikina seiho Akristu eeparipari ahinachapelaaya.
“Ntakhara Heeni Anamoona a Yehova Ahinachapelaaya Iferiyatu?” (Mwaha wa mu jw.org)
Moone mathowa maxexe yaawo ananeeriha weemererya wi ochapela nihiku na oyariwa honamuhakalaliha Muluku.
“Ntakhara Heeni Anamoona a Yehova Hanachapela Mahiku a Oyariwa?” (Mwaha wa mu jw.org)
Moone mukhalelo anamwane anamusivela Yehova aneeraaya emuhakalalihe yoowo variyari va ifesta sa omakuchuwelo wa eyaakha.
Akristu eeparipari ancipale aalakelela ohimulya Nataale. Awo anoona hai yoolakelela yeela apankaaya?
“Eles encontraram algo melhor” (A Sentinela, 1.º de dezembro de 2012)
a Moone Yooleeliherya 5 wi muhuserye echu yaweera vaavaa achu akina anachapelaaya nihiku na ifesta.