MWAHA 51
Muni Mmuhakalalihe Hai Yehova Mmalocelo Anyu?
Yehova oonivaha yamahala yootikhiniha: oloca. Mpwanne owo onnapwacha mukhalelo nnapharihelaahu yamahala yeela? Mweeparipari aai! (Mwaalakhanye Tiyako 1:26.) Vano nni nipharihele hai oloca mmukhalelo oni omuhakalalihe Yehova?
1. Mmukhalelo taani nnaphwanelaahu opharihelaka masu ahu?
Piipiliya onaloca wi “mulipihaneke ni otikitheryana mukina ni mukhwaawe.” (1 Tesalónika 5:11) Apwanne munnamuupuwela muchu yoowo onachuna olipihiwa? Tiheeni munaphwanelaanyu weera wi mmulipihe? Mmuleele wi owo toochuneya wa nyuwo. Akhweya munanwerya omuthamalela ntakhara mikhalelo sawe saphaama. Munoona hai opharihela yoorepa ya Mpiipiliyani wi mmulipihe? Sookhalavo soorepa sincipale nyuwaano munahaalaanyu othanla. Nave tho muupuweleke wi mukhalelo munalocaanyu onnaavolowela akina. Mwa yeeyo, ilukuluku soothene mweereryeke oloca mmukhalelo woomaaleleya ni mooreera murima.—Masiposipo 15:1.
2. Mukhalelo taani wa oloca nnaphwanelaahu osepa?
Piipiliya onii: “Mwaano mwaa, ohikhumekemo masu oonanara.” (Mwaalakhanye Éfeso 4:29.) Eyo enataphulela wi hannaphwanela oloca masu oonanara, oothanyeya naari oophuca wi nimunyeenyeihe mukina. Ohiya yeeyoru, nnaphwanela osepa waapa ni wootha.—Mwaalakhanye Masiposipo 16:28.
3. Tiheeni enahaala onikhaviherya opharihela phaama masu?
Wiiliwiili, yeeyo nnalocaahu, ennooniherya yeeyo eri mmuupuweloni ni mmurimani mwahu. (Luka 6:45) Mwa yeeyo, nnaphwanela wiilipiserya wuupuwelelaka ichu soophwanelela—sawookololowa, saphaama, sookhweleya nave soothene iri soothamaleleya. (Filipi 4:8) Wi neereno yeeyo, ti woochuneya othanla phaama mathatelo vamoha ni asinthamwene ahu. (Masiposipo 13:20) Nave ti yaphaama wuupuwela nihaakumve oloca. Muupuwele mukhalelo masu anyu anahaalaaya waavolowela akina. Piipiliya oni: “Muchu eemwaanomwaano, masu awe weetha ntoko nlema, nto masu a muchu a miruku, murece.”—Masiposipo 12:18.
OHUSERYA MWAWIISEELA
Muhuserye mukhalelo wa oloca yoowo onamuhakalaliha Yehova nave onaalipiha akina.
4. Mukhaleno ekaasoope ni yeeyo munalocaanyu
Ikwaha ikina, ninnaloca echu nave nikhalano ekeerelani. (Tiyako 3:2) Mwaalakhanye Galasya 5:22, 23, nave voocharela muthokororye makoho ala:
Wa mikhalelo seiya, mukhalelo taani munaphwanelaanyu omveka Yehova wi wookhaviheryeeni ovareryela malocelo anyu? Mikhalelo seiya inii sookhaviheryeeni hai?
Mwaalakhanye 1 Korinto 15:33, nave voocharela muthokororye nikoho nla:
Ti mwawiihai asinthamwene ni mukhalelo nnathanlaahu mathatelo ahu ineeraaya ivolowele malocelo ahu?
Tiheeni eni evolowele mukhalelo munalocaanyu?
Mwaalakhanye Eklesiyaste 3:1, 7, nave voocharela muthokororye nikoho nla:
Elukuluku taani nnaphwanelaahu okhala oomaala ni oweherya wi nloce?
5. Mwaaloceke akina mmukhalelo waphaama
Nni nsepe hai waanyeenyeiha akina ni ichu nnalocaahu? Moone EXILEMA, nave voocharela muthokororye makoho anacharela.
Mu exilema, ntakhara heeni munna yoola aahilakelela otoroka mukhalelo aaloceiye akina?
Tiheeni aapankeiye wi atoroke?
Mwaalakhanye Eklesiyaste 7:16, nave voocharela muthokororye nikoho nla:
Vaavaa nnasuwelaahu wi nnahaala waaloca akina moonanara, tiheeni nnaphwanelaahu wuupuwela?
Mwaalakhanye Eklesiyaste 7:21, 22, nave voocharela muthokororye nikoho nla:
Yoorepa ela eni yookhaviheryeeni hai ohikhala oonyeenyeya vaavaa akina anoolocaayaani moonanara?
6. Mukhale ooreera murima vaavaa munalocaanyu ni achu a veemusini vanyu
Yehova onachuna wi nipharihele masu oosivela ni anooniherya oreera murima wa achu a veemusini vahu. Moone EXILEMA, nave voocharela muthokororye nikoho nnacharela.
Tiheeni enahaala wookhaviheryaani oloca mooreera murima ni achu a veemusini vanyu?
Mwaalakhanye Éfeso 4:31, 32, nave voocharela muthokororye nikoho nla:
Nnachuna olocaka mmukhalelo onahaala oweerihaka achu a veemusini vahu wiisoonaka wi ninnaasivela yaawo. Nni neereno hai yeeyo?
Yehova aahooniherya mukhalelo ooneiye vooloca sa Mwanawe, Yesu. Mwaalakhanye Mateu 17:5, nave voocharela muthokororye nikoho nla:
Muni mmutakiherye hai Yehova vaavaa munalocaanyu ni achu a veemusini vanyu?
Mwaavye ikari sa waathamalela akina
ACHU AKINA ANI: “Kinaloca yeeyo kinuupuwelaka. Wakhala wi muchu hasiveliweno nikacamiho ti nawawe.”
Nyuwaano munneemererya yeeyo? Ntakhara heeni?
MUKWASU
Masu aakhalano owerya. Nnaphwanela okhalano ekaasoope wa yeeyo nnalocaahu, elukuluku ya oloca, ni mukhalelo wa oloca.
Makoho awuuluulela
Mmikhalelo taani muneeraanyu mpharihele masu wi mwaakhaviherye akina?
Mukhalelo taani wa oloca nyuwaano muhinachunaanyu opharihelaka?
Tiheeni enahaala onikhaviherya ilukuluku soothene okhala ooreera murima ni waalipiha akina moorweela wa masu ahu?
OTHOLATHOLA
Tiheeni enahaala onikhaviherya opharihela phaama masu?
Moone tiheeni enahaala wookhaviheryaani osepa oloca masu oophuca.
“Será que falar palavrões é tão ruim assim?” (Artigo do jw.org)
Moone mukhalelo muneeraanyu musepe waaloca akina moonanara.
Moone mukhalelo Yehova omukhavihenryeiye mulopwana mmoha ohiya oloca masu oophuca.
‘Comecei a pensar no rumo que minha vida estava tomando’ (A Sentinela, 1.º de agosto de 2013)