MWAHA 52
Ntakhara Heeni Ninnaphwanela Othokororya Mawarelo Ahu ni Ophwaneliwa?
Mmoha ni mmoha ookhalano mukhalelo awe wa owara ni wiirehererya. Nyenya akhalavo malakiheryo a Mpiipiliyani anahaala onikhaviherya, owara yeeyo enansivela nihihin’ye omuhakalaliha Yehova. Hankooni noone malakiheryo makina a yaawo.
1. Tiheeni enahaala onikhaviherya olakelela mukhalelo nnahaalaahu owara ni wiirehererya?
Na alapeli a Yehova, nthowa na yeeyo ti woochuneya okhala eesipanthi ‘ni owara mmukhalelo woocicimiheya ni woophwanelela.’ Mmukhalelo yoola, ninnooniherya ‘wiiveleela [naari omulapa wahu] Muluku.’ (1 Timóteo 2:9, 10) Moone malakiheryo maxexe: (1) Soowara sahu inaphwanela okhala “soocicimiheya.” Akhweya mohoona mmithukumano sa achu a Yehova wi annawara soowara soohiyanahiyana. Nyenya soowara sahu ni mukhalelo wa orehererya miihi sinnooniherya wi ninnamucicimiha Muluku ahu, Yehova. (2) Soowara sahu sinaphwanela okhala ‘soophwanelela,’ eyo ti wi, soowara sahu hasinaphwanela waaruuhela moonelo wooheseya akina naari wiiruuhela ncicimiho mukhatiihu. (3) Ninnooniherya “miruku” vaavaa nihinacharihaahu mawarelo amutano a elapo. (4) Ilukuluku soothene mukhalelo ahu onaphwanela wooniherya ‘wiiveleela wahu wa Muluku,’ wooniheryaka mookwakwaleya wa akina wi nnamulapa Muluku eparipari.—1 Korinto 10:31.
2. Ti mwawiihai mukhalelo nnawaraahu onahaalaya waavolowela annihu?
Eparipari wi nnanwerya othanla yoowara taani nnahaalaahu owara. Nyenya nnaphwanela wuupuwela mukhalelo yoowara eyo enahaalaaya waavolowela akina. Ninnapaka owetha wahu wi nihanyenyeihe akina. Opwaha yeeyo, nnakhwela ‘waahakalaliha akhwiihu, naalipihaka ni seiyo iri saphaama.’—Mwaalakhanye Aroma 15:1, 2.
3. Ti mwawihai mawarelo ahu eneeraaya evahe onamoona waphaama vooloca sa Yehova?
Ninnachuna owara phaama ilukuluku soothene, nyenya xaxaxa vaavaa nnayaahu mmithukumanoni ni mmuteko woolaleerya. Hinnachuna wi yoowara ahu evahe onamoona woonanara, woona wi eyo enahaala weeriha wi achu ehiwiriyane muchaka nnalaleyaahu. Ohiya yeeyo, nnaphwanela owaraka mmukhalelo onahaala ‘oreerihaka soohusiha sa Muluku Mvulusha ahu,’ eweerihaka achu ohuserya sincipale sa Yehova.—Tito 2:10.
OHUSERYA MWAWIISEELA
Moone mukhalelo nnawaraahu ni nniirehereryaahu oneeraaya waakhaviherye akina woona wi na Akristu eparipari.
Mawarelo ahu ananwerya wooniherya waakhanle wi ninnaacicimiha yaawo arino ohoolela. Naamwi Yehova oonaka murima ahu, mawarelo ahu enaphwanela wooniherya ncicimiho wa yoowo
4. Owara mmukhalelo waphaama onnooniherya ncicimiho wa Yehova
Nthowa taani noochuneyaxa nnaneeriha okhala awuukhuwa ni mukhalelo ahu? Mwaalakhanye Salumu 47:2, voocharela muthokororye makoho ala:
Hiyo nnamweemelela Yehova. Ti mwawiihai eyo enaphwanelaaya ovolowela mukhalelo nnawaraahu?
Apwanne nyuwaano munoona wi ti woochuneya wuukhuwa ni mukhalelo nnawaraahu vaavaa nnayaahu mmithukumanoni naari mmuteko woolaleerya? Ntakhara heeni?
5. Mukhalelo wa opaka soolakelela saphaama vooloca sa owara ni wiirehererya
Soowara sahu hasinaphwanela okhala soowalamela, nyenya sinaphwanela okhala saphaama mwawiiwanana ni yaweereya. Mwaalakhanye 1 Korinto 10:24 ni 1 Timóteo 2:9, 10. Nave voocharela muthokororye ntakhara heeni hinnaphwanela owaraka soowara . . .
soohiphwanelela ni soopwaha mphimo.
soowomaanya, sawonela naari sinaaruhela akina moonelo wooheseya.
Khalai Yehova aahaavaha malamulo oohiyanahiyana achu awe orweela wa Mose. Akristu hari vathi va malamulo ene yaala nyenya malamulo ala annanihusiha ichu sincipale vooloca sa mukhalelo Yehova onuupuweleiye. Mwaalakhanye Malamulo 22:5, voocharela muthokororye nikoho nla:
Ntakhara heeni nnapwanelahu osepa soowara naari orehererya miihi mmukhalelo onamweeriha mulopwana wooneyaka ntoko muthiyana naari muthiyana ntoko mulopwana?
Mwaalakhanye 1 Korinto 10:32, 33 ni 1 Yohani 2:15, 16, voocharela muthokororye makoho ala:
Ntakhara heeni ti yaphaama wiikoha: ‘Apwanne mawarelo aka yaahala omunyeenyeiha mukina mmulokoni naari mmukuma kinakhalaakawo?’
Mukuma munakhalaanyuwo ti mwawihai achu anawaraaya ni wiirehererya?
Nyuwaano munoona wi waahaala okhala phaama Mukristu owara ni wiirehererya mmukhalelo yoowo? Ntakhara heeni?
Hiyaano nnanwerya owara mmukhalelo woohiyana hiyana nyenya naamwi hiiha nimucicimihe Yehova
ACHU AKINA ANI: “Nkinapwacha yeeyo achu anuupuwelaaya, miyaano kookhalano owerya wa owara yeeyo kinachunaaka.”
Nyuwaano munneemererya yeeyo? Ntakhara heeni?
MUKWASU
Vaavaa nnapakaahu soolakelela saphaama vooloca sa owara ni wiirehererya ninnooniherya ncicimiho wa Yehova ni akina.
Makoho awuuluulela
Ntakhara heeni mukhalelo nnawaraahu ni wiirehererya ti woochuneya wa Yehova?
Malakiheryo taani anahaala onikhaviherya olakelela mukhalelo wa owara ni wiirehererya?
Ti mwawihai mawarelo ahu eneeraaya evahe onamoona waphaama naari woonanara vooloca sa Yehova?
OTHOLATHOLA
Muthokororye yeeyo soowara sanyu inooniheryaaya vooloca sa nyuwo.
“O que o seu guarda-roupa diz sobre você?” (Artigo do jw.org)
Muthokororye ntakhara heeni eraaya yaphaama wuupuwelela muhakunve wiipopha naari orepa mwiili anyu.
Muthokororye malakiheryo makina yaawo enahaala wookhaviheryaani olakelela echu munapwanelanyu owara.
“Apwanne Mawarelo Anyu Annamucicimiha Muluku?” (Mulipeleli a Setempuru a 2016)
Moone ti mwawihai muthiyana mmoha ooreera murima eemerenryeiye mukhalelo achu anawaraaya.
“O modo de me vestir e arrumar era minha pedra de tropeço” (Despertai!, 22 de dezembro de 2003)