Ohusiha Mookhweya

Tiheeni Yesu Opankeiye?

EXILEMA: Yesu Onnapaka Niphwanaphwaniho wi Ooniherye Opwacha Yoowo Atiithi Ahu Aryaayano wa Hiyaano

1. Moone EXILEMA, naari mwaalakhanye Mateyu 6:25-27. Voocharela, mwaakhule makoho anacharela:

1. Ti mwawiihai Yesu olikanyinheiye opwacha wa Yehova ntakhara hiyaano?

2. Naamwi Yesu aasuwela sincipale vooloca sa ipalame, ntakhara heeni owo aatikitheren’yeiye mu sooleeliherya sookhweya? Ntakhara heeni ola waaryaaya mukhalelo waphaama wa ohusiha?

Tiheeni Nnahuseryaahu Orweela wa Yesu?

2. Vaavaa nnahusihaahu mmukhalelo wookhweya, achu annuupuwela yeeyo naahusinhaahu, nave tho ninnatannya mirima saya.

Mmutakiherye Yesu

3. Muhiloceke vancipale. Ohiya oloca soothene musuwenlaanyu vooloca sa mwaha owo, mutikitheryeyeke wa mwaha munathokororyaanyu mu yoolaleeryiwa munapharihelaanyu wa yoohuserya. Mmanle opaka nikoho, nweheryeke moopisa murima wi oohuserya anyu aakhule. Wakhala wi hanasuwela naakhulo naari ooloca echu yoohiyana ni yeeyo Piipiliya onaloceiye, mumpakele makoho awaaceererya wi mmukhaviherye wuupuwelela vooloca sa mwaha munathokororyaanyu. Wakhala wi oohuserya ohiiwexexa mwaha ene, muye mu epontu enacharela.

4. Mmukhaviherye oohuserya anyu wiiwananiha yeeyo ahusenryeiye khalai ni yeeyo onahuseryeiye hiihaano. Ntoko yootakiherya, muhaakumve opacerya oloca sa ovinya mookhwani, munanwerya wuuluulela mookwasa yeeyo oohuserya ohusenryeiye vooloca sa mukhalelo wa alipa ookhwa.

5. Musuwele opharihela phaama maphwanaphwaniho. Muhaakumve opharihela niphwanaphwaniho, mwiikohe:

1. ‘Apwanne niphwanaphwaniho nenla ti nookhweya?’

2. ‘Apwanne oohuserya aka onahaala owerya wiiwexexa nenlo mookhweya?’

3. ‘Apwanne nnahaala omukhaviherya wuupuwelela ipontu soochuneya? Naari pahiru onahaala wuupuwelaka sa niphwanaphwaniho?’