ALIPA A WAALAKHANYA AHU ANNAKOHA . . . 

Ntakhara heeni Muluku onneemererya wi akuru yaahooxeke ooceecheya?

Piipiliya onnaloca saweereya sa achu akuru waahooxa ooceecheya. Yaweereya emoha ti ya Napoti.a Akape, mwene a Isarayeli mu nsana na neekhumi E.E.K, aaheemererya wi mwaariye, Yesapeli, amwiiphe Napoti ni anamwane awe wi mwene akuxe emaca ya mpesa ya mulopwana yoole. (1 Mamwene 21:1-16; 2 Mamwene 9:26) Ntakhara heeni Muluku onneemererya opharihela owerya moonyala yoola?

Hankooni nthokororye nthowa nimoha noochuneya: Muluku hanootha. (Tito 1:2) Ela eniiwanana hai ni ohooxiwa wa ooceecheya? Omapacereryo, Muluku aahaalopola achu wi ommwaryeela waahaala oruuha yookhumelela yoonanara​—okhwa. Ntoko Masu eeparipari a Muluku, okhwa onnapaka makupa a achu opacerya omwaryeya o emaca ya Eeteni. Muchu oopacerya okhwa, mweeparipari aakhwile nthowa na ohooxiwa​—vaavaa Kayine aamwiiphaleiye munna awe Haavele.​—Mapacereryo 2:16, 17; 4:8.

Elocaka sa mwaha wa achu opacerya yaweereya yeela, Masu a Muluku annaloca mmukhalelo ola: “Atxhu akina àkhalano otokwene, eniha akina ekhalaka òhosiwa.” (Eklesiyaste 8:9, BNM.) Apwanne masu yaala anneereya? Yehova aalopola nloko na Isarayeli, achu awe, wi awo yahaala waaphwanya mamwene aya oohooxa, eweerihaka achu okhuwela wa Muluku. (1 Samuwele 8:11-18) Soolomoni tho Mwene a miruku aanaaliviha vancipale achu awe. (1 Mamwene 11:43; 12:3, 4) Mamwene oonanara, ntoko Akape, yaatepa ohooxa. Muthokororye: Waakhanle wi Muluku onnaakiha saweera soothene soohooxa, haahaala chiryene weeriha masu awe okhala ntoko wootha?

Muupuwele tho wi, Satana aaloca wi achu anamurumeela Muluku ni mathowa a nrima. (Yupu 1:9, 10; 2:4) Waakhanle wi Muluku onnawaakiha arummwa awe oothene mu ohooxa woothene, apwanne hiwaahaala okhala okukuca yooloca ya Satana? Nave waakhanle wi Muluku onnaakiha makhalelo oothene a ohooxa wa achu oothene, apwanne haahaala okhala mwaneene a owoka otokweene? Vathi wa waakiha yoowo, ancipale yahaala wuupuwela wi achu annawerya wiilamulela phaama ahirivo Muluku. Nyenya Masu a Muluku analoca moohiyana—wi muchu hanawerya wiilamulela mukhateiye. (Yeremiya 10:23) Hiyaano ninnachuna wi Omwene wa Muluku orwe; owo pahiru tonahaala omaliha ohikhala ekhaikhai.

Eyo enataphulela wi, Muluku haneera echu ntakhara ohooxiwa? Hooye. Muthokororye ichu piili oneereiye: Yoopacerya, owo onnuupulula yookhumelela ya ohooxa. Ntoko yootakiherya, Masu awe annuupulula makhalelo oothene a marehereryo a Yesapeli ntakhara Napoti. Piipiliya onnaloca mwawaacererya wi saweera seiya soonanara sinahooleliwa ni olamulelo wakuru yoowo onachuna wiipithiha mukhalelo awe. (Yohane 14:30; 2 Akorinto 11:14) Piipiliya onnamuupulula owo ntoko Satana Musaserya. Moorweela wa wuupulula soonanara ni ohooxa vamoha ni ehime aya yeeparipari, Muluku onnanikhaviherya okhala ocai wa soonanara. Mwawiihiiha owo onnaakiha omwaahiyu ahu woohimala.

Yanaawiili, Muluku onnavaha ewehereryo yoolipa ya omala wa ohooxa. Mukhalelo yoowo aamuupulunleiye ni omuthoriha Akape ni Yesapeli—ni akina ntoko yaawo—ennanivaha nroromelo mu yoororomeliha awe ya waalaka oonanara oothene olelo. (Salmo 52:1-5) Muluku tho onnavaha ewehereryo yeeparipari ya wi moohilekela onahaala otoroka sookhumelela soonanara wa yaale anamusivela yoowo.b Napoti a nroromelo onahaala woona elukuluku yeeyo owo ni anamwane awe anahaalaaya okhala mparataiso a veelaponi yavathi okhala wookhala ootaphuwa ohikhala ekhaikhai.​—Salmo 37:34.

[Masu a vathi]

[Eruku va epaaxina 31]

“Atxhu akina àkhalano otokwene, eniha akina ekhalaka òhosiwa.”​—Eklesiyaste 8:9, BNM

“Muluku ahinótha.”​—Tito 1:2