MWAHA WA EKAAPA | OMWENE WA MULUKU​—ONATAPHULELA EHEENI WA NYUWO?

Omwene Wa Muluku​—Onataphulela Eheeni wa Yesu

Variyari va orummwa wawe veelapo yavathi, Yesu aaloca miyaha sincipale. Ntoko yootakiherya, aahaahusiha oomuchara awe mukhalelo wa ovekela, omuhakalaliha Muluku, ni mukhalelo wa ophwanya ohakalala weeparipari. (Mateyu 6:5-13; Marko 12:17; Luka 11:28) Nyenya mwaha Yesu aaloceiye vancipale opwaha mukina​—mwaha wa vamurimani vawe—​waari Omwene wa Muluku.​—Luka 6:45.

Ntoko noonnaahu mmwaha ovinre, Yesu aaweiwa ni olaleerya “mitchaka yaphama ya Omwene wa Muluku.” (Luka 8:1) Aahiilipixerya vancipale, weeca masana a ikilomeeturu ocai wa elapo ya Isarayeli wi aahusihe achu Omwene wa Muluku. Orummwa wa Yesu woorempwa mu aliivuru a michaka axexe, mwemmo onaphwanyeyamo soothoonyerya sa Omwene opwaha ikwaha 100. Soothoonyerya sincipale inaphwanyeya mmasu a Yesu, nave naamwi hiiha, awo makupa vakhaani a yeeyo aalonceiye sa Omwene wa Muluku!​—Yohane 21:25.

Ntakhara heeni Omwene waakhalano yootaphulela etokweene wa Yesu vaavaa aareiye veelaponi yavathi? Mu nthowa nimoha, Yesu aasuwela wi Muluku aamuthanla wi akhale Mulamuleli. (Yesaya 9:6; Luka 22:28-30) Nyenya Yesu haari ooteteiwa ophwanya owerya naari ovuwa wa yene mukhateiye. (Mateyu 11:29; Marko 10:17, 18) Owo aavuwiha Omwene ohiya nthowa na mphurelo awe. Woopaceryani, Yesu nlelo onnathokororya Omwene wa Mulukua nthowa na yeeyo onahaalaaya weera wa yaale onaasiveleiye​—tiithi awe a wirimu ni oomuchara awe oororomeleya.

YEEYO OMWENE ONAHAALAAYA WEERA WA TIITHI A YESU

Yesu ookhalano osivela otokweene wa Tiithi awe a wirimu. (Masiposipo 8:30; Yohane 14:31) Owo onnatikhina makhalelo a Tiithi awe, ntoko, osivela, ikharari, ni ekhaikhai Awe. (Malamulo 32:4; Yesaya 49:15; 1 Yohane 4:8) Chiri, Yesu onniica wootha yoowo onamwaramwaxiwa vooloca sa Tiithi awe​—wootha ntoko wi Muluku hanapwacha makacamiho aachu nave wi Muluku onachuna wi nihooxeyeke. Nla nthowa nimoha naamweerinhe Yesu wiilipixerya olaleerya “mitchaka yaphama ya Omwene”​—owo aasuwela wi mu elukuluku aya Omwene waahaala weeliha ovuwa wa Tiithi awe. (Mateyu 4:23; 6:9, 10) Onahaala weerano hai?

Orweela wa Omwene owo, Yehova onahaala weeravo echu aakihaka emusi ya achu. “Anarwa-avuta mithori yothene” mmeethoni wa achu oororomeleya. Yehova onahaala omaliha heiho inatannya miithori, woona wi “hevarwa-vakhalatho okhwa; nave hevarwa-vakhalatho iyinlo, naari wunla, nari sawichela, ntakhara sopacherya iho sóvira.” (Yawupulula 21:3, 4) Orweela wa Omwene, Muluku onahaala omaliha makacamiho oothene aachu.b

Hiwaavo minikwa wi Yesu aahiilipixerya waaleela achu vooloca sa Omwene! Owo aasuwela wi Omwene waahaala wooniherya owerya ni ikharari sa Tiithi awe. (Yakopo 5:11) Yesu aasuwela tho wi Omwene waahaala waavaha mphurelo yaale onaasiveleiye​—achu oororomeleya.

YEEYO OMWENE ONAHAALAAYA WEERA WA ACHU OOROROMELEYA

Ahaakumve orwa veelaponi yavathi, Yesu aakhala wirimu ni Tiithi awe. Tiithi aampharihela mwaana wi apatuxe ichu soothene​—opacerya erimu ni itheneeri saya soohaalakhanyeya ophiyerya elapo ahu yaphaama ni ikumi soohiyana hiyana inakhala mwemmo. (Akolose 1:15, 16) Opwaha soothene, Yesu aakhala “ohakalala” ni achu.​—Masiposipo 8:31, Bibiliya Nsu na Muluku, (BNM.)

Waasivela achu waari wawooneya mu orummwa wa Yesu. Ovinyerya omapacereryo, owo aahiya vanlakani wi aaruule veelaponi yavathi wi alaleerye “mitchaka yaphama” wa oohaawa. (Luka 4:18) Nyenya Yesu aaheera sincipale opwaha oloca sa waakhaviherya achu. Wiiliwiili, ahooniherya osivela wawe wa achu. Ntoko yootakiherya vaavaa muloko waathukumannaaya wi onwiriyane, Yesu “ámorela yawo ikharari, apenusha awicheliwa’ya.” (Mateyu 14:14) Vaavaa mulopwana aarino ereca etokweene oonihenryeiye nroromelo wi Yesu aanwerya ompenuxa wakhala wi onnachuna, Yesu moosivela aaheeravo echu. Owo aampenuxa mulopwana ole, amuleelaka mwa ikharari: “Kinnakhwela, nkaryeheryeya.” (Luka 5:12, 13) Vaavaa Yesu aamonneiye nthamwene awe Mariya anlaka okhwa wa munna awe Lasaro, Yesu “áháha-iphumu,” “úkhuwa mwanene,” nave “áhinla.” (Yohane 11:32-36) Ohoolo waya aaheera echu yoohaanyiheryeya​—Yesu aamukookiherya Lasaro okumi naamwi yaavinre mahiku maxexe Lasaro akhwile!​—Yohane 11:38-44.

Chiryene, Yesu aanasuwela wi ohakararya yoowo aavanheiye waari wa elukuluku vakhaani. Owo aasuwela wi moohilekela, oothene yaawo aapenunxeiye yaahaala wiiceliwaka nave oothene aaviihaleiye mookhwani yahaala okhwa wanawiili. Nyenya, Yesu aanasuwela wi Omwene wa Muluku waahaala omaliha khuluwi makacamiho yaawo. Ti nthowa nene Yesu haapanke pahiru sootikhiniha; owo tho mwa mvai aalaleerya “mitchaka yaphama ya Omwene owo.” (Mateyu 9:35) Sootikhiniha sawe saahooniherya mmukhalelo mukhaani yeeyo Omwene wa Muluku onahaalaaya weera moohilekela veelapo yoothene yavathi. Muthokororye yeeyo Piipiliya onaroromeliheiye vooloca sa elukuluku eyo.

Ohikhalavo makacamiho a ekumi.

“Vanonto mitho a atxhu òhona anamuhuleya nave inamuhuleya iwaru s’atxhu òhiwa. Vanonto mutxhu òrakala oni atxupheke ntoko muheku nave nlumi na mutxhu òhilotxa nnamukhuwela ni ohakalala.” Mwawaaceererya, “havo oni ikhupanyeryeke wa nthowa na witxeliwa.”​—Isaiya 33:24; 35:5, 6, BNM.

Ohikhalavo okhwa.

“Ekhaikhai tiniriaya yakhele elapo ya vathi, yikhaleleru mummo okhala wookhala.”​—Salmo 37:29.

“Ananvuta mithori owanoni wa atxhu othene nave anan’wopola atxhu a nloko naya [mokhwani.]”​—Isaiya 25:8, BNM.

Yaale akhwile anamukookela okhala akumi.

“Othene ari m’mahiyeni enarwa yiwa masu awe, ekhuma.”​—Yohane 5:28, 29.

“Onarwa-okhala ovinya’tho.”​—Saweriwa Tarummwa 24:15.

Omala wa ohikhalano empa naari muteko.

“Atxhu aka anamuteka ipa ni anamukhalaka mwemmo, anamwála miri nave anamulya sawima saya sene. Herwaru eteka ipa, wi ekhalekemo atxhu akina, anamuhiya wala miri wi atxhu akina elyeke sawima saya sene . . . Òthanliwa aka anamulya ni opuha sothene analimaya.”​—Isaiya 65:21, 22, BNM.

Omala wa ekhoco.

“Onnahíha ekhocho omakutchuwelo elapo ya vathi.”​—Salmo 46:9.

“Maloko hekawana yawoyawo, nave achu herwaru enahuserya merelo a ekhotxo.”​—Isaiya 2:4, BNM.

Omala wa etala.

“Elapo ya vathi enarwa-evelela sawimma saya: Muluku, Muluku ahu anan’réliha.”​—Salmo 67:6.

“Munarwa-mukhala’mo olya muncipale vasulu va miyako.”​—Salmo 72:16.

Omala wa ohaawa.

“Mulipa-ohasuwa harwa-achiwaliwaru.”​—Salmo 9:18.

“Owo onamwiwa okhuwela wa atxhu òhàwa n atxhu othoiwa ahiri ni mukhaviherya, onamwamorela ikharari òtxetxheya ni òhàwa, nave onanvulusa ekumi ya atxhu òthoiwasa.”​—Salumu 72:12, 13, BNM.

Vaavaa munathokororyaanyu soororomeliha seiya vooloca sa Omwene wa Muluku, munnawerya woona ntakhara heeni Omwene waakhalano yootaphulela etokweene wa Yesu? Vaavaa aareiye veelaponi ya vathi aahiilipixerya oloca Omwene wa Muluku wa achu oothene yanwiriyana, woona wi aasuwela wi Omwene owo waahaala okuchula sawuukhula soothene nnoonaahu olelo.

Apwanne yoororomeliha ya Piipiliya vooloca sa Omwene ennoosivelaani? Wakhala wi aai, munii nwerye hai ohuserya sincipale vooloca sa Omwene yoowo? Nave tiheeni munaphwanelaanyu weera wi mwiiphwanyerye mareeliho aya? Nikupa nookuchula na mwaha yoola nnahaala waakhula makoho yaala.

[Masu a vathi]