Ntakhara Heeni Ninnuupuwelela Mukonelo wa Apwiya

“Erani ela ekhale yokupuwelano yaka.”​—1 AKOR. 11:24.

MWAHAALA WAAKHULA HAI?

Ntakhara heeni nnaphwanelaahu wuupuwelela Mukonelo wa Apwiya?

Tiivi iri ineneeryo sa Mukonelo, nave inataphulela eheeni?

Akiristu anaakhulela hai ewehereryo aya yoorweela wa Muluku?

1, 2. Tiheeni Yesu enreiye mu ohiyu wa 14 a Nisani a 33 E.K? (Moone eruku yoopacerya.)

OHIYU onnapacerya, waarya wa mweeri onnoopela o Yerusalemu. Owo ohiyu wa 14 a Nisani a 33 E.K. Yesu ni oohuserya awe aamala ompaka Paskha yoowo uupuxerya ovuluxiwa wa Aisarayeli wookapuroni o Yiikuputu mu iyaakha 15 oculi. Ni arummwa awe oororomeleya 11, Yesu aatikitherya mukonelo wavameekhaaya​—yoowo waahaala wuupuwelelaka okhwa wawe mu nihiku nenle.a​—Mat. 26:1, 2.

² Yesu aareeliha ephaawu yoohiruruvalihiwa nave aahaakawela arummwa, ariki: “Kushani, lyani.” Aakuxa ekahi ya eviinyu, aathamalela tho, nave aloca: “Muwurye ela nyuwo othene.” (Mat. 26:26, 27) Yesu haahaala waavaha echu ekina yoolya, nyenya owo aakhalano ichu sincipale wi aaleele oomuchara awe oororomeleya mu ohiyu yoole otokweene.

3. Makoho taani anahaala othokororyiwa mmwaha yoola?

³ Mmukhalelo yoowo Yesu aatikitherya yawuupuxerya ya okhwa wawe, eniichaniwa tho “Mukonelo wa Apwiya.” (1 Akor. 11:20) Vooloca sa yeeyo, akhweya akina ananwerya okoha: Ntakhara heeni wuupuwelela okhwa wa Yesu? Teevi eri yootaphulela ya ephaawu ni eviinyu? Nnii nirehererye hai ntakhara Mukonelo? Taani onaphwanela opaka makupa? Nave Akiristu anaakhulela hai yeeyo Soorempwa inalocaaya sa ewehereryo aya?

NTAKHARA HEENI NINNUUPUWELELA OKHWA WA YESU

4. Tiheeni eri yooweryeya nthowa na okhwa wa Yesu?

⁴ Ntoko anamwane a Aatamu, hiyaano noorava yoocheka ni okhwa. (Arom. 5:12) Haavo muchu oohiphaameya onawerya omvaha Muluku mukucho ntakhara okumi awe ni okumi wa akina. (Sal. 49:6-9) Moorweela wa okhwa wawe, Yesu oolivela esisapo yawoopola yaweemereryeya​—mwiili woophaameya nnikhami nawe. Moorweela wa otheteya esisapo ya mukucho awe wa Muluku, Yesu oheeriha wi okhale wooweryeya ovuluxiwa mu yoocheka ni okhwa ni waakhela yamahala ya okumi woohimala.​—Arom. 6:23; 1 Akor. 15:21, 22.

5. (a) Nnasuwela hai wi Muluku ni Kiristu annaasivela achu? (b) Ntakhara heeni nnaphwanelaahu ophiya va mukonelo wa okhwa wa Yesu?

⁵ Yamahala ya yawoopola ennooniherya wi Muluku onnasivela elapo ni achu. (Yoh. 3:16) Mukucho wa Yesu yawooniherya wi owo tho onnansivela. Ti nthowa nene, vaavaa aareiye “mulipa óteka” a Muluku aahaakumve okhala ntoko muchu, Yesu aanahakalala “okhala n’atxhu”! (Masi. 8:30, 31, BNM) Othamalela wa Muluku ni Mwanawe onaphwanela oneeriha ophiya va mukonelo wa okhwa wa Yesu, niiwelelaka nlamulo nla: “Erani ela ekhale yokupuwelano yaka.”​—1 Akor. 11:23-25.

YOOTAPHULELA YA INENEERYO

6. Nnaphwanela woona hai ephaawu ni eviinyu ya Mukonelo?

⁶ Vaavaa aatikithenryeiye Mukonelo, Yesu haatatunxe mootikhiniha mwiili awe okhala ephaawu naari nikhami nawe nikhala eviinyu. Ohiya yeeyo, owo aaloca sa ephaawu: “Ela enataphulela mwiili aka.” Vooloca sa eviinyu, aahi: “Ela enataphulela nikhami naka na nlakano nenlo nnahaala oyeehiwa ntakhara achu ancipale.” (Mar. 14:22-24; Tradução do Novo Mundo, NM) Chiryene, ephaawu ni eviinyu saaphwanela wooniwaka ntoko sawooniherya, naari ineneeryo.

7. Ephaawu yaaphariheliwe va Mukonelo enataphulela eheeni?

⁷ Mweelukuluku yeele yoochuneyaxa ya 33 E.K., Yesu aapharihela ephaawu yoohiruruvalihiwa yoohalela ya Paskha. (Muk. 12:8) Mu Soorempwa, yooruruvaliha enooniherya ohiroromeleya naari yoocheka. (Mat. 16:6, 11, 12; Luka 12:1) Hiiha, Yesu opharihela wawe ephaawu yoohiruruvalihiwa yaakhalano yootaphulela etokweene ntakhara eyo yaataphulela mwiili awe woohicheka. (Ahe. 7:26) Nthowa na yeeyo va Mukonelo enaphariheliwa ephaawu ya mukhalelo yoowo.

8. Ekahi ya eviinyu ya Mukonelo enataphulela eheeni?

⁸ Eviinyu Yesu aapharihenleiye 14 a Nisani a 33 E.K., eneemelela nikhami na Yesu, hiiha ntoko ekahi ya eviinyu olelo. O Kolokota, okhwipi wa Yerusalemu, nikhami nawe naayeehiwa ni “ovíha’vo sotcheka.” (Mat. 26:28; 27:33) Ti woophwanelela wiirehererya wa Mukonelo wa Apwiya wa vayaakhani ntakhara wi ephaawu ni eviinyu ya Mukonelo enataphulela esisapo ya mukucho wa Yesu wa achu awiiwelela, nave hiyaano ninnathamalela yamahala yeela yoosivela.

MAKHALELO A WIIREHERERYA

9. (a) Ntakhara heeni ti woochuneya ochariha marehereryo a Mukonelo a waalakhanyiwa wa Piipiliya? (b) Munoona hai vooloca sa woopola?

⁹ Moorweela wa ochariha marehereryo a Mukonelo a waalakhanyiwa wa Piipiliya anaphwanyeya mu Examine as Escrituras Diariamente, nnahaala owerya wuupuwelela yeeyo Yesu enreiye ahaakumve okhwa. Ntoko yookhumelela, ela enahaala onikhaviherya orehererya murima ahu ntakhara Mukonelo wa Apwiya.b Murokora mmoha aarepa: “Ninnaweherya Mukonelo. Enakhala echu ya vameekhaaya eyaakha ti eyaakha. Kinnuupuwela kiri va makhwelo . . . kaavareryaka apapa aka nave kuupuwelelaka esisapo ya woopola. . . . Miyaano kaasuwela soorepa ni mukhalelo wa othariha! Nave vaavaa konnaaka ohiciha wa okhwa murima aka waasareya othamalela wa yeeyo mukucho onahaalaaya weera ntakhara hiyaano.” Mweeparipari, vaavaa nniireheryaahu wa Mukonelo, ti yaphaama wuupuwelela mukhalelo mukucho wa Yesu onanoopolaaya mu okapuro wa ocheka ni okhwa.

10. Wiirehererya wahu ntakhara Mukonelo onaphwanela ovolowela hai orummwa wahu?

¹⁰ Wiirehererya ntakhara Mukonelo onaphwanela ophitaanyerya marehereryo a waaceererya orummwa wahu, akhweya orumeela ntoko mapiyoneero ookhaviherya mu elukuluku ya Mukonelo. Vaavaa nnaawopahu oohuserya a Piipiliya ni akina wi erwe va Mukonelo wa Apwiya, ninnaphwanya ohakalala onarweela wa oloca sa Muluku, Mwanawe ni mareeliho iyaathiwe wa yaale anamwiiwelela ni omuhakalaliha Yehova.​—Sal. 148:12, 13.

11. Ti mwawiihai Akorinto akina yaapharihelaaya ineneeryo sa Mukonelo moohiphwanelela?

¹¹ Vaavaa muniirehereryaanyu ntakhara Mukonelo wa Apwiya, muthokororye yeeyo murummwa Paulo aarempeiye wa muloko Weekiristu wa Akorinto. (Mwaalakhanye 1 Akorinto 11:27-34.) Paulo aaloca wi muchu yoowo oni alye ni awuryele ekahi moohiphwanelela “anarwa-akhala ótchekela mwíli n’nikhami na Apwiya,” Yesu Kiristu. Mwawiihiiha muchu awoocihiwa onaphwanela wi “iweheryerye mekhiye” eerano hiiha apharihele ineneeryo iho. Moohiyana, ‘onalya ni onawurya yothoriha ya wa mekheiye.’ Nthowa na meerelo oohiphwanelela, Akorinto ancipale yaari ‘ochétcheya, awicheliwa, nave anchipale yanarupa’ omunepani. Akhweya, akina yaanalya nave yaanawurya vancipale ehakumve orwa naari variyari va Mukonelo ophiyerya wi hiyaari oolipelela mmuupuweloni naari omunepani. Opharihela ineneeryo mmukhalelo yoowo woohiphwanelela waanaweeriha oheemereryiwa ni Muluku.

12. (a) Paulo aalikanyinhe Mukonelo ni eheeni, nave olopola taani aavanheiye wa yaale anapaka makupa? (b) Yoole opanke yoocheka onaphwanela weera eheeni?

¹² Paulo aalikanyiha Mukonelo ni yoolya ya achu ancipale, nave aahaalopola yaawo anapaka makupa: “Hamuwerya owuryerya ekahi ya Apwiya, ni ekahi ya masololo; hamuwerya wakhela o’hasarini wa Apwiya, ni o’hasarini wa masololo.” (1 Akor. 10:16-21) Wakhala wi muchu yoowo onalya ineneeryo sa Mukonelo wa Apwiya oopaka yoocheka, onaphwanela waavya nikhavihero noomunepani. (Mwaalakhanye Yakopo 5:14-16.) Wakhala wi owo oovaha “sawima sophwanela otcharuwa murima,” owo onnooniherya ncicimiho wa mukucho wa Yesu moorweela wa opharihela ineneeryo sa Mukonelo.​—Luka 3:8.

13. Ntakhara heeni onahaala okhala wa mphurelo ovekela vooloca sa ewehereryo ahu yoorweela wa Muluku?

¹³ Vaavaa nniirehereryaahu, nnahaala woona okhala ya mphurelo wuupuwelela ni mavekelo ewehereryo ahu Muluku onivanheiye. Haavo mulapeli awiiveleela a Yehova ni oomuchara oororomeleya a Mwanawe aahaala ochuna onyemula mukucho wa Yesu moorweela wa opharihela ineneeryo sa Mukonelo aniiha ahirino yawooniherya wi owo Mukiristu awoocihiwa. Vano, munii musuwele hai waakhanle wi munnaphwanela opharihela ineneeryo naari hooye?

TAANI ONAPHWANELA OPHARIHELA?

14. Nlakano na hiihaano nnavaha onamoona taani mu opharihela ineneeryo sa Mukonelo?

¹⁴ Yaale anapharihela ineneeryo sa Mukonelo aalekecheya wi annapaka makupa a nlakano na hiihaano. Vooloca sa eviinyu, Yesu aahi: “Ekahi ela ti nlakano nahihano mu nikhamini mwaka.” (1 Akor. 11:25) Moorweela wa mulipa a miririmu Yeremiya, Muluku aaloherya wi Owo aahaala opaka nlakano na hiihaano noohiyana ni nlakano na Nlamulo nenlo naapakiwe ni Aisarayeli. (Mwaalakhanye Yeremiya 31:31-34.) Muluku oopaka nlakano na hiihaano ni Isarayeli oomunepani. (Akal. 6:15, 16) Nlakano nla nnatikitheryeya ni mukucho wa Kiristu nave ninnaphariheleya moorweela wa nikhami nawe. (Luka 22:20) Yesu tari Mulipa ootikitherya nlakano na hiihaano, nave awoocihiwa oororomeleya yaawo ari mu nlakano nenlo annaakhela muyareriwo wa wirimu.​—Ahe. 8:6; 9:15.

15. Taani ari mu nlakano na Omwene, nave ekari taani anaweheryaaya wakhala wi ahiikhalelaru oororomeleya?

¹⁵ Achu yaawo anapharihela ineneeryo sa Mukonelo aasuwela wi ari mu nlakano na Omwene. (Mwaalakhanye Luka 12:32.) Yaale anakhala oomuchara awoocihiwa a Yesu nave aniikhalelaru ni yoowo, yuukaka masooso awe, anahaala wuuka mu olamulelo awe wa wirimu. (Afil. 3:10) Nthowa na okhala mu nlakano na Omwene, awoocihiwa oororomeleya anahaala olamulela ni Kiristu ntoko mamwene a wirimu okhala wookhala. (Yaw. 22:5) Achu yaala moophwanelela annapharihela ineneeryo variyari va Mukonelo wa Apwiya.

16. Mookwasa mutharihe yootaphulela ya Aroma 8:15-17.

¹⁶ Pahiru yaale arino onamoona wa munepa wi awo anamwane a Muluku tanaphwanela opharihela ineneeryo sa Mukonelo. (Mwaalakhanye Aroma 8:15-17.) Moone wi Paulo aapharihela nsu na Aramaiko “Abba,” nenlo nnataphulela “Atithi!” Mwaana onnapharihela nsu nenla vaavaa onaloceiye ni tiithi awe, nla nsu nnooniherya osivela nnaphitaanyerya masu meeli, “papa” nnooniherya waataana, nave “tithi” nnooniherya ncicimiho. Yaale yaakhenle “munepa wokhaliha mwana” annakhala anamwane a Muluku awoocihiwa ni munepa. Munepa awe onnavaha onamoona ni munepa aya, yaalekechaka wi awo anamwane awoocihiwa a Yehova. Tahi wi awo hanachuna okhala veelaponi yavathi. Ari oolekecheya wi anahaala okhala asinthamwene a Yesu mu Omwene wa wirimu wakhala wi ahiikhalelaru oororomeleya ophiyerya okhwa. Olelo, pahiru oohalela vakhaani a 144.000 oomuchara a Kiristu, ti yaawo arino “wochihiwa worwela wa Awéla owo,” Yehova. (1 Yoh. 2:20; Yaw. 14:1) Woorweela wa munepa awe awo annakhuwela, “Abba, Atithi!” Awo aakhalano onthamwene wooreelihiwa ni Muluku!

WAAKHULELA EWEHERERYO ANYU YA MU SOOREMPWA

17. Teevi eri ewehereryo ya awoocihiwa, nave awo anoona hai?

¹⁷ Waakhanle wi nyuwaano mwa Mukiristu awoocihiwa, ewehereryo ya wirimu mwaha woochuneyaxa mmavekelo anyu. Vaavaa Piipiliya onaloceiye sa ororomelihiwa otheliwa ni mulipa oothela a wirimu, Yesu Kiristu, nyuwaano munnoona wi ennaphariheleya wa nyuwo, nave munnaweherya okhala nikupa na “mulipa-otheliwa” a Kiristu. (2 Akor. 11:2; Yoh. 3:27-29; Yaw. 21:2, 9-14) Vaavaa Muluku mu Masu awe onaloceiye osivela wawe wa anamwane awe oomunepani, nyuwo munnaloca, “Kinaahiwa miyaano.” Nave vaavaa Masu a Yehova anavahaaya ikano wa anamwane awe awoocihiwa, munepa waweela onnaweerihaani wiiwelela ni oloca mmurimani mwanyu, “Ela enaphariheleya wa miyaano.” Munepa wa Muluku ni munepa anyu onniiwanana mu ovaha onamoona wi mookhalano ewehereryo ya wirimu.

18. Teevi eri ewehereryo ya “ipuchepuche sikina,” nave munoona hai vooloca sa yeeyo?

¹⁸ Wakhala wi nyuwaano mwa “muloko mtokotoko” wa “ipuchepuche sikina,” Muluku ohoovahaani ewehereryo ya veelaponi yavathi. (Yaw. 7:9; Yoh. 10:16) Nyuwaano munnachuna wiikhalelaru mu Parataiso, nave munnahakalala wuupuwela yeeyo Piipiliya onaloceiye sa okumi wa omwaahiyu veelaponi yavathi. Munnaweherya opuha murecele wawaaca murukureryiwe ni emusi anyu ni achu akina eekhaikhai. Nyuwaano munnaweherya elukuluku yeeyo etala, ohaawa, ohooxeya, ireca ni okhwa ihinahaalaaya waahooxaka achu. (Sal. 37:10, 11, 29; 67:6; 72:7, 16; Yes. 33:24) Nyuwaano munamusiveliwa owaakhela ooviihiwa mookhwani ni ewehereryo ya okhala veelaponi yavathi mwawiikhalelaru. (Yoh. 5:28, 29) Nyuwaano munnathamalela ntakhara wi Yehova ohoorelihaani ni ewehereryo ya veelaponi yavathi! Naamwi muhipharihelaka ineneeryo, nyuwaano munnaphiya va Mukonelo ntoko yawooniherya ya othamalela wanyu woopola wa mukucho wa Yesu Kiristu.

MUNAHAALA ORWA?

19, 20. (a) Ewehereryo anyu yoorweela wa Muluku enii yeereye hai? (b) Munahaala orwa va Mukonelo wa Apwiya ntakhara heeni?

¹⁹ Moohipwacha ewehereryo anyu yaari ya veelaponi yavathi naari wirimu, eyo enahaala waakhwaniheryeya pahiru wakhala wi moohooniherya nroromelo wa Yehova Muluku, Yesu Kiristu ni woopola. Moorweela wa orwa va Mukonelo, munahaala okhalano ekari ya wuupuwelela ewehereryo anyu ni esisapo ya okhwa wa Yesu. Mulakelele okhala variyari va macikhwi a yaawo anahaala orwa va Mukonelo wa Apwiya oxekuwa wa nihiku Naneethanu, 3 a Apirili a 2015 mu Ipa sa Omwene ni mmapuro makina orukurerya elapo yoothene.

²⁰ Orwa va Mukonelo enahaala wunnuwiha othamalela wanyu mukucho wa woopola wa Yesu. Owiriyana phaama mwaha enahaala oweerihaani wooniherya osivela wa amwaacamani anyu moorweela wa wuuka ni yaawo yeeyo muhusenryaanyu sa osivela wa Yehova ni yoochuna awe ntakhara achu. (Mat. 22:34-40) Mweere yeeyo munaweryaanyu wi mphwanyeye va Mukonelo wa Apwiya.

[Masu a vathi]