Khalani a Wiiweherya Satana Onachuna Woomiryaani!
“Weheryani; mwichani anyu musaserya, ntoko mwacho awunla, annechécha ni omwavyavya mukina wi ammirye.”—1 PET. 5:8.
SATANA ONOONIHERYA HAI WI . . .
toowerya?
tawoopiha?
toowoka?
1. Mutharihe ti mwawiihai yoopatuxiwa yoomunepani yaakhanlaaya Satana.
KHALAI, owo aakhalano onthamwene waphaama ni Yehova. Moovira wa elukuluku, yoopatuxiwa ela yoomunepani yaapacerya ochuna othamaleliwa ni achu. Ohiya okwatelela yoochuna eyo, owo aahunnuwiha ophiyerya ekumiherya yoocheka. (Yak. 1:14, 15) Hiyaano noosuwela wi yoopatuxiwa eyo eniichaniwa Satana, owo “hémenle mu eparipari.” Aammwareela Yehova nave aakhala “atithinnya a wotha.”—Yoh. 8:44.
2, 3. Masu awi “Satana,” “Musaserya,” “enowa,” ni “enowa yawuluvala” anooniherya eheeni vooloca sa mwiicani mutokweene a Yehova?
2 Opacerya vaavaa aamwaren’yeiye, Satana mwiicani mutokweene a Yehova nave tahi nthamwene aachu. Masina yaawo Satana oniichaneliweiye annooniherya onanara wa mukhalelo awe. Satana enataphulela “Mwiicani,” yooniheryaka wi yoopatuxiwa ela henakhaviherya olamulelo wa Muluku. Moohiyana owo onniica olamulelo wa Muluku nave onnaakaaha. Opwaha echu ekina, Satana onachuna woona olamulelo wa Yehova okuchunwe ene.
3 Ntoko enooniheryiwaaya mu Yawupulula 12:9, Satana oniichaniwa Musaserya, enataphulela “Nawoothe.” Ela ennanuupuxerya wi Satana aamunyemula Yehova moorweela wa omweera mulipa a wootha. Masu awi “enowa etokwenesha” annanuupuxerya nihiku nenle noothananiha o Eeteni vaavaa Satana aapharihenleiye enowa wi anwoke Haava. Masu “enowa yawuluvala” annaneeriha omwaanyiherya mwaaxinama a mutakhwani nave ela enniiwanana ni olakelela otokweene Satana oreiyeno wa onanariha yoochuna ya Yehova ni waatoloxa achu Awe.
4. Tiheeni nnahaalaahu othokororya mmwaha yoola?
4 Chiryene, Satana onnateteiwa ni nroromelo nahu. Nthowa na yeeyo, Piipiliya onnanlopola: “Khalani awikhapelela, weheryani; mwichani anyu musaserya, ntoko mwacho awunla, annechécha ni omwavyavya mukina wi ammirye.” (1 Pet. 5:8) Mwawiiwanana ni olopola yoola, mwaha ola onahaala othokororya mikhalelo miraru sa Satana inooniherya ochuneya waya okhala a wiiweherya ntakhara mwiicani yoola a Yehova ni aachu Awe.
SATANA TOOWERYA
5, 6. (a) Muloce sootakiherya inooniherya wi ankeelo aakhalano “ikuru sawupa.” (b) Mmukhalelo taani Satana oreiyeno “ikuro sa okhwa”?
5 Soopatuxiwa soomunepani iniichaniwa ankeelo sookhalano “ikuru sawupa.” (Sal. 103:20) Awo ta waapwaha achu nave mwawiihiiha aakhalano miruku ni ikuru itokweene. Ankeelo oororomeleya annapharihela ikuru saya mwaphaama. Ntoko yootakiherya, nihiku nimoha munkeelo a Yehova aawiipha anakhoco 185.000 a Asiiriya—ela hiyaahaala okhala yooweryeya weeriwano ni muchu mmoha naari nikhuuru na anakhoco. (2 Mam. 19:35) Mweelukuluku ekina munkeelo mmoha aapharihela ikuru sawe wi awoopole arummwa a Yesu mu kariposo. Munkeelo owo aawoopola arummwa, ahula masele, aakumiha arummwa nave awala masele—ela yeeren’ye alipa oolipelela yeemenle vakhiviru—Saw. 5:18-23.
6 Vaavaa ankeelo oororomeleya anapharihelaaya ikuru saya mwaphaama, Satana onapharihela ikuru sawe moonanara. Nave owo onnavolowela mwawooneya! Soorepa sinnamuromola ntoko “mutokwene a elapo ela ya vathi” ni “muluku a mahiku yala a vathi vano.” (Yoh. 12:31; 2 Akor. 4:4) Satana Musaserya ookhalano tho “ikuro sa okhwa.” (Ahe. 2:14) Ela henataphulela wi owo onnawiipha achu oothene. Nyenya minepa awe soonanara sinnavolowela elapo ela. Mwawaacererya, nthowa na Haava weemererya wootha wa Satana ni Aatamu omuchekela Muluku, yoocheka ni okhwa sohaaphiyerya achu. (Arom. 5:12) Mmukhalelo yoowo Musaserya ookhalano “ikuro sa okhwa.” Owo “mulipa-wipha” ntoko Yesu aamwichanneiye. (Yoh. 8:44) Satana mwiicani ahu oowerya!
7. Masololo anooniherya hai wi toowerya?
7 Vaavaa nnakhomaahu ni Satana, ninnakhala awiiciwa ti yoowo ni akhaviheryi awe mmwaha wa ophwanelela olamulela. Akhaviheryi awe anaphitaanyerya minepa mikina soomwaryeya, naari masololo. (Yaw. 12:3, 4) Ikwaha sincipale, masololo annooniherya ikuru saya yaaruuhelaka epahu yaale anaahooxaaya. (Mat. 8:28-32; Mar. 5:1-5) Muhicuwale wi ankeelo ala oonanara aakhalano ikuru ophitaanyerya “mwene a minepa yonanara.” (Mat. 9:34) Nihirino nikhaviheryo na Yehova, hinaahaala ovootha mu ekhoco ahu ni Satana.
SATANA TAWOOPIHA
8. (a) Tiivi ekhanle yoolakelela ya Satana? (Moone eruku yoopacerya.) (b) Mwawiiwanana ni yeeyo munoonaanyu, elapo ela enooniherya hai mukhalelo wa Satana?
8 Murummwa Petro aamulikanyiha Satana ni “mwacho awunla.” Mwawiiwanana ni yoothoonyerya emoha ya Ekiriki masu awi “awunla” anooniherya “murika wa mwaaxinama oowali.” Olikanyiha ola onniiwanana phaama ni woopiha wa Satana! Naamwi elapo yoothene ekonaka mmatani mwawe, Satana onachuna waamirya ancipale. (1 Yoh. 5:19) Wa yoowo, elapo eri ntoko “yoolya.” Satana onateteiwa ni awoocihiwa oohalela yaawo anakhaviheryiwa ni asinthamwene aya “ipuchepuche sikina.” (Yoh. 10:16; Yaw. 12:17) Satana ori oolakelela waamirya achu a Yehova. Wiikariwa wa oomuchara a Yesu yoowo Satana onahooleleiye ennooniherya wi owo tawoopiha.
9, 10. (a) Satana eerenrye hai onanariha yookhwela ya Muluku vooloca sa nloko na Isarayeli? (Mvahe sootakiherya.) (b) Ntakhara heeni Satana aakhalano nthowa ntokweene na oteteiwa ni Isarayeli akhalai? (c) Olelo Musaserya onoona hai vaavaa mulapeli a Yehova oneereiye yoocheka etokotoko?
9 Vaavaa oneereryeiye onanariha yookhwela ya Muluku, owo onnooneya okhala awoopiha mmukhalelo mukina. Mwaco oovoliwa hanamoriwa ikharari ni echu onaphwanyeiye. Hanamoriwa ikharari ahaakumve ohiphela nave amanle wiipha hanakhalano ekeerelani. Moolikana, Satana haanono ikharari wa yaale oneereryeiye waamirya. Ntoko yootakiherya, muupuwele mukhalelo Satana aavolowenleiye Aisarayeli wuuwela mu soocheka ntoko okonihana woohiphwanelela ni nrima. Vaavaa munaalakhanyaanyu sookhumelela sa meecelo oonanara a Sinri ni nrima na Kehasi, munnawerya “omoona” mwaco awunnla?—Nam. 25:6-8, 14, 15; 2 Mam. 5:20-27.
10 Satana aakhalano nthowa ntokweene na oteteiwa ni Isarayeli akhalai. Nthowa nimoha ti nawi nloko nenle naahaala omuyara Mesiya—yoowo aahaala omutoloxa Satana ni ovuwiha olamulelo wa Yehova. (Map. 3:15) Satana haachuna wi Aisarayeli ekhumelele phaama, nave aanawetha vancipale wi awuutuwele ni yoocheka. Muhuupuwele wi Satana aamoriwa ikharari vaavaa Tavite aapankeiye mararuwo naari vaavaa Moose aachenkeiye ahivolowa mu Elapo ya Nlakano. Moohiyana, Satana onnachapa vaavaa mulapeli a Yehova onavoloweliweiye ni yoocheka. Mweeparipari, Satana onnapharihela soocheka seiyo wi amuruwaneno Yehova.—Masi. 27:11.
11. Satana aachuna eheeni ni Saara?
11 Satana aateteiwa vancipale ni nihimo nenlo naahaala omuyara Mesiya. Ntoko yootakiherya, muthokororye yeeyo yeeren’ ye vaavaa Aaparahamu aaleeliweiye wi aahaala okhala “nloko . . . ntokotoko.” (Map. 12:1-3, BNM) Vaavaa Aaparahamu ni Saara yaaraaya o Yiikuputu, Farawo aamukuxa Saara amukeriha mpa mwawe—wi akhale mwaariye. Nyenya Yehova aaheeravo echu amoopola Saara. (Mwaalakhanye Mapacereryo 12:14-20.) Isaaki ahaakumve oyariwa, echu yoolikana yaaheereya o Xerari. (Map. 20:1-7) Apwanne Satana taahoolela saweereya seiya? Apwanne uupuwela wi Saara yoowo aahin’ye muhakhu o Ur wi akhaleke mmixakalani aahaala olekecheya ni oreela wa Farawo ni Apimeleki? Mano Satana uupuwela wi Saara aahaala omuchekela iyawe ni Yehova moorweela wa wiivoliiherya mu othela woohiphwanelela? Piipiliya hanaakhula, nyenya nookhalano mathowa a weemererya wi Satana aahaala ohakalala omweeriha Saara ohiphwanelela oyara evyo yeeyo yaalaiheryiwe. Satana hi asooseye waakhanle wi Saara oomuchekela Yehova moorweela wa onanariha othela ni meecelo awe. Chiryene Satana tawoopiha!
12, 13. (a) Satana oonihenrye hai okhala awoopiha amanle oyariwa Yesu? (b) Olelo, Satana onoona hai sa amiravo yaawo anamusivela Yehova ni wiilipixerya omurumeela?
12 Yesu aayariwa iyaakha masaneene ohoolo wa Aaparahamu. Muhuupuwele wi Satana aamoona mwaana ole okhala ooreera, ni asisapo. Hooye, nthowa na wi Satana aasuwela wi mwaana owo aahaala wunnuwa akhale Mesiya aalaiheryiwe. Yesu aakhala makupa oopacerya a evyo ya Aaparahamu, yoowo aahaala ‘opahula miteko ya Musaserya.’ (1 Yoh. 3:8) Apwanne Satana aahuupuwela wi omaliha ekumi ya nikwiya echu yawoopiha? Satana haneecela malamulo. Nave vooloca sa Yesu, Satana aaheeravo echu mwawaakuveya. Mwawiihai?
13 Mwene Herote aatepa onyeenyeya vaavaa alipa a miruku yaakonhaaya sa oyariwa wa “Mwene a aYuda,” nave owo aari oolakelela omwiipha. (Mat. 2:1-3, 13) Mwawiihiiha, owo aalamulela wi anamwane oothene oophiyerya iyaakha piili sa oyariwa a Petelehemu ni miceche saya yiiphiwe. (Mwaalakhanye Mateyu 2:13-18.) Yesu aakophola, nave ela enanihusiha eheeni vooloca sa mwiicani ahu Satana? Ennooneya wi Satana hanacicimiha ekumi ya muchu, ophitaanyerya ekumi ya mwaana. Chiryene Satana “mwacho awunla.” Muhicuwale woopiha wawe!
SATANA TOOWOKA
14, 15. Satana onruuhela hai “evasi maupuwelo aya a alipa-ohiroromela”?
14 Moorweela wa owoka Satana onnawerya waamwalanya achu ni Muluku oosivela, Yehova. (1 Yoh. 4:8) Moorweela wa owoka, Satana onnaweeriha achu ohithokororya ‘ohawa [waya] womunepani.’ (Mat. 5:3) Mwawiihiiha ‘onnárúhela evasi maupuwelo aya a alipa-ohiroromela, wi omwaleya wa Mitchaka Yaphama ya nchichimiho na Kristu, yowo ori eruku ya Muluku, ehámwaléle.’—2 Akor. 4:4.
15 Mukhalelo mmoha Satana onaphariheleiye ari malapelo oowoka. Owo onnatepa ohakalala vaavaa onawooneiye achu yaalapelaka makholo aya, axinama, naari echu ekina omuhiya Yehova yoowo okhanle “Muluku a ehatxe”! (Muk. 20:5, BNM) Ancipale yaawo analoca wi annamulapela Muluku mwaweemereryeya, ari oomakeya ni mahusiheryo atheru ni sookhovelela soohiphuculiha echu. Awo ari mmukhalelo woothananiha, oolikana ni yaale Yehova aalonceiye: “Muni muyeheryeni ikhorowa ni yolya yohivoniha? Munavaheryani sothene muryanyuno wa nthowa na itxhu ihinaphwara murima? Mukiwiryane nave munamulya phama, munamvona solya sosiva.”—Yes. 55:2, BNM.
16, 17. (a) Ntakhara heeni Yesu aaloca wa Petro: “Hawe ochuli waka Satana weyo”? (b) Satana onii aniwoke hai vooloca sa mvai?
16 Satana onnawerya waavolowela alapeli amvai a Yehova. Ntoko yawooniherya, muthokororye yeeyo yeeren’ye vaavaa Yesu aaleenleiye arummwa awe wi aahaala wiiphiwa. Ni mathowa aphaama murummwa Petro aamukeriha okhwipi nave aamulopola: “Vakhale ikharari va Nyuwo, Apwiya: herwa-yihihá wa Nyuwo hoe.” Naakhulo na Yesu wa Petro naari noolipa: “Hawe ochuli waka Satana weyo!” (Mat. 16:22, 23) Ntakhara heeni Yesu aamwiichana Petro ntoko “Satana”? Nthowa nawi Yesu aasuwela yeeyo yaahaala weereya. Elukuluku yaahaacamela yeeyo aahaaleiye okhwa ntoko mukucho wi ooniherye wi Musaserya nawoothe. Ele hiyaari elukuluku wi Yesu akhaleno “ikharari” wa yene mwaneene. Satana aachuna wi owo ahiye olipelela.
17 Vaavaa nnaacamelaahu makuchuwelo a mukhalelo ola wa ichu, nnakhala mweelukuluku yookacamiha. Satana onachuna wi nihiye olipelela nave wi nikhaleno “ikharari” wa hiyo aneene moorweela wa opaka makupa a elapo ela nikukucaka mvai ahu. Muheemererye wi eyo yeereye ni nyuwaano! Moohiyana, “lipelelani.” (Mat. 24:42) Muhirwe mweemererye wootha wa Satana wawi makuchuwelo ari ocai—naari wi makuchuwelo herwa ephiya.
18, 19. (a) Satana oneererya hai oniwoka vooloca sa mukhalelo nniisoonaahu? (b) Yehova onanikhaviherya hai okhala oothipeleya ni otitela okhala oolipelela?
18 Satana onneererya tho oniwoka mmukhalelo mukina. Onachuna nuupuweleke wi hinaano esisapo vamiithoni va Muluku nave wi soocheka sahu hasinakhurumuweleya. Ala makupa a michaka soowoka sa Satana. Opwaha soothene, taani chiryene ohirino esisapo vamiithoni va Yehova? Ti Satana. Taani chiryene ohinakhurumuweleya? Nlelo ti Satana. Nyenya Piipiliya onnanroromeliha: “Muluku hari óhikhalano ekhaikhai wi anachiwala muteko anyu, ni osivela iwo mónihalanyu va nsina nawe.” (Ahe. 6:10) Yehova onnathamalela wiilipixerya wahu omurumeela, nave muteko ahu tahi wa siiyo ene. (Mwaalakhanye 1 Akorinto 15:58.) Mwawiihiiha nihihuwelihiwe ni michaka soowoka sa Satana.
19 Ntoko noonnaahu, Satana takuru, tawoopiha ni toowoka. Nnii nivoothe hai ekhoco ahu ni mwiicani yoola? Yehova hananihiya nihirino naakiho. Masu Awe annanihusiha makhalelo a Satana nave “hanníkhalela óhisuwela ophyaka wawe.” (2 Akor. 2:11) Vaavaa nniiwexexaahu mavyakelo a Satana, ninnakhala ooreheryeya okhala oothipeleya ni otitelela okhala awiiweherya. Nyenya osuwela mavyakelo a Satana henaakhwana. Piipiliya onii: “Munakhoma ni Sàtana nave owo onamutxhawa wa nyuwo.” (Tiy. 4:7, BNM) Mwaha onacharela onahaala othokororya makupa mararu a owana ni Satana ni omvootha.