MAKOHO A ALIPA WALAKHANYA

Taani Koki a Makoki yoowo oromoliwe mu liivuru a Esekiyeli?

▪ Mu iyaakha sincipale, soolaleeryiwa sahu saanaloca wi Koki a Makoki nsina nenlo nniichaneliwa Satana Musaserya amanle wiikariwa wirimu. Othariha ola waathipeleya mu liivuru a Yawupulula yoowo onamuthoonya Satana Musaserya ntoko muhooleli a ohipheliwa wa achu a Muluku elapo yoothene. (Yaw. 12:1-17) Yuupuweliwa wi Koki naari nsina nikina iichaneliwa Satana.

Nyenya, othariha yoola wookumiherya makoho oochuneya. Ntakhara heeni? Muthokororye ela: Alocaka sa elukuluku yeeyo Koki oneereiye avoothiwe, Yehova onii: “Mirutxhu sanyu inamuthumpwa ni ipalame s’sulu ni inama s’owali.” (Ezek. 39:4, BNM) Voocharela Yehova onnaaceererya: “Elukuluku eyo yaphiya kinamunvaha Gogi nipuro novithiwavo, w’Isarayele . . . Weiwo onammuvithawo Gogi ni muloko w’akhotxo awe.” (Ezek. 39:11, BNM) Nave onii oweryeye hai yoopatuxiwa yoomunepani ethumpwe ni “ipalame s’sulu ni inama s’owali”? Satana aahaala ovahiwa hai “nipuro novithiwavo” veelaponi ya vathi? Piipiliya mookwakwaleya onnooniherya wi Satana onahaala owaleliwa mu iyaakha 1.000, ohiya othumpwa naari ovithiwa.​—Yaw. 20:1, 2.

Ninnaleeliwa wi omakuchuwelo wa iyaakha 1.000, Satana onahaala otaphuliwa mu kariposo, nave “onamukhuma wi awoke maloko a mikuma misese sa elapo, Gog, ni Magog, nave onamwathukumanya wi ewanihe.” (Yaw. 20:8, BNM) Vano Satana anii awerye hai omuhuweliha Koki waakhanle wi yoowo ene ti Koki? Mwawiihiiha, “Gog [naari Koki]” hanaahiwa Satana mu yooloherya ya Esekiyeli naari mu liivuru a Yawupulula.

Vano, Koki a Makoki taani? Wi naakhule nikoho nenla, nnaphwanela otholathola Soorepa wi nsuwele taani onaahiphela achu a Muluku. Piipiliya hanaloca pahiru ohiphela wa ‘Gog, a Magog’ onnaloca tho ohiphela wa mamwene a “onakhumawo nsuwa” ni ohiphela wa “mamwene a elapo.” (Ezek. 38:2, 10-13; Dan. 11:40, 44, 45; Yaw. 17:14; 19:19, BNM) Apwanne ela enooniherya wi ohiphela woohiyana? Hooye. Piipiliya onaloca sa ohiphela omoha apharihelaka masina oohiyana. Ntakhara heeni nnaphiyaahu makuchuwelo yaala? Nthowa na wi Soorepa sinnanleela wi maloko oothene a veelaponi ya vathi anahaala wiivoliiherya mu ohiphela yoola wookuchula yoowo onahoolela o Armaketo.​—Yaw. 16:14, 16.

Vaavaa nnaalikhelaahu Soorepa soothene inaloca sa ohipheliwa wookuchula wa achu a Muluku, ennooneya wi nsina Koki a Makoki hanaahiwa Satana, nto nnaahiwa nikhuuru na maloko. Apwanne nikhuuru nenlo nnahaala ohooleliwa ni mwene oosiphela a “onakhumawo nsuwa”? Hannawerya oloca mookwakwaleya. Nyenya muupuwelo yoola onakhala ntoko onniiwanana ni yeeyo Yehova onaloceiye sa Koki: “Onamutximulawo w’elaponi wà, elapo eri okhomoni wa ota, ohoolelaka muloko mutokweene w’akhotxo a ilapo sohiyana-hiyana. Nyuwano othene munan’wela ikavalo ni munamukhala muloko mutokwene w’akhotxo.”​—Ezek. 38:6, 15, BNM.

Moolikana, mulipa miririmu Taniyeli, yoowo aakhanle elukuluku emohamoha ni Esekiyeli onnaloca sa mwene a onakhumawo nsuwa: “Nto inamphiya mitxhaka sa onakhumawo nsuwa ni ota ini imwinihe murima. Owo, ònyenyeya ene, onanvinya ni akhotxo awe, ayaka owipha atxhu antxipale. Onamwemesa misakala sawe veri va ephareya yo Mediterrâneo ni mwako worèlihiwa. Nto owo onamukhwa, nave havo oni amukhaviherye.” (Dan. 11:44, 45, BNM) Ela enniiwanana ni yeeyo liivuru a Esekiyeli onaloceiye sa miteko sa Koki.​—Ezek. 38:8-12, 16, BNM.

Tiheeni eneereya voocharela ntoko yookhumelela ya ohiphela yoola wookuchula? Taniyeli onnanleela: “Elukuluku yeyo onamoneya [mu Armaketo] munkelo Mikayele [Yesu Kiristu], mulipeleli a nloko na atxhu a Muluku [opacerya 1914]. Enaya okhala elukuluku ya sokatxamiha [yoohooxa etokotoko] ihitinko ophatxuwa ovinya wopatxeryani wa elapo. Nto elukuluku yeyo ananvuluwa atxhu othene a nloko na Muluku masina aya arempwe munlivuruni na Muluku.” (Dan. 12:1, BNM) Yaweera yeela ya Yesu ennalociwa tho mu Yawupulula 19:11-21.

Mano “Gog, ni Magog” oromoliwe mu Yawupulula 20:8 onaahiwa taani? Mu weehiwa wookuchula omakuchuwelo wa iyaakha 1.000, yaale anahaala ommwaryeela Yehova anahaala wooniherya mikhalelo soolikana ni ‘Gog, a Magog,’ maloko yaawo anahaala waahiphela achu a Muluku omakuchuwelo wa yoohooxa etokotoko. Nave makuchuwelo a makhuuru ala oomeeli anahaala okhala oolikana​—okhwa woohimala! (Yaw. 19:20, 21; 20:9) Enakhala wi ti yoophwanelela wi oothene yaale anahaala omwaryeya omakuchuwelo wa iyaakha 1.000 yiichaniwe “Gog, ni Magog.”

Ntoko oohuserya a Masu a Muluku, hiyaano ninnachuna woona taani omwaahiyu onahaala okhala mwene a “onakhumawo nsuwa.” Moohipwacha yoowo onahaala ohoolela nikhuuru nenla na maloko, ninnasuwela ichu piili: (1) Koki a Makoki ni anakhoco awe anahaala ovoothiwa ni otoloxiwa; nave (2) Mwene ahu Yesu Kiristu onahaala waavuluxa achu a Muluku ni waakeriha mweelapo yahiihaano ya murecele ni wiichaala weeparipari.​—Yaw. 7:14-17.

[Etapela va epaaxina 29]

OHIPHELA WA KOKI A MAKOKI (ESEK. 38:2, 10-13)

OPACERYA WA YOOHOOXA ETOKOTOKO

KOKI A MAKOKI:

Nikhuuru na maloko nenlo nnahaala weererya waatoloxa achu a Muluku

ARMAKETO:

▪ Yesu onnawaniha wi awaakihe achu a Muluku

▪ Koki a Makoki onnatoloxiwa (Yaw. 16:14, 16)

▪ Satana ni masololo annawaleliwa (Yaw. 20:1-3)

OPACERYA WA OLAMULELA WA KIRISTU WA IYAAKHA EKONTO

[Etapela va epaaxina 30]

OHIPHELA WA KOKI NI MAKOKI (YAW. 20:8, 9)

OKUCHUWA WA IYAAKHA 1.000

OHULELIWA WA SATANA

Onnaweeha achu wi emmwaryeele Yehova ni achu awe

KOKI NI MAKOKI:

Echunaka owiipha, alipa oomwaryeya anahaala waarukurerya achu eekhaikhai

OKUCHUWA WA ONANARA:

▪ Mooro wa wirimu onnamutoloxa Koki ni Makoki (Yaw. 20:9)

▪ Satana ni masololo annavonyeriwa mu eniya ya mooro (Yaw. 20:10)