Mmutakiherye Yoowo Ororomelinhe Okumi Woohimala

“Khalani ótakiherya a Muluku, ntoko anamwane ósiveliwa.”​—AEF. 5:1.

MUNANWERYA OTHARIHA?

Yesu oonihenryeiye hai mikhalelo sa Yehova?

Nnii ntakiherye hai mikhalelo sa Muluku, ntoko osivela wawe?

Ntakhara heeni nnaphwanela wiilipixerya ovareryela muupuwelo ahu?

1. Mavyakelo taani anahaala onikhaviherya otakiherya makhalelo a Muluku?

YEHOVA oonivaha mavyakelo a owerya wiihela mu nipuro na akina. Ninnawerya wiiwexexa yaweereya nihintonkaahu okumanano. (Mwaalakhanye Aefeso 5:1, 2.) Nnii nipharihele hai yamahala yeela ya Muluku mwa miruku? Tiheeni nnaphwanelaahu weera wi yamahala eyo ehinipahule?

2. Yehova onoona hai vooloca sa sawuukhula sahu?

² Chiryene, ninnahakalala wi Muluku oororomeliha okumi woohikhwa wirimu wa awoocihiwa oororomeleya ni okumi woohimala veelaponi ya vathi wa “ipuchepuche sikina” sa Yesu. (Yoh. 10:16; 17:3; 1 Akor. 15:53) Mweeparipari, haavo onahaala ohooxeyaka ni makacamiho awunlaana olelo wa yaale a okumi woohikhwa wirimu naari a okumi woohimala veelaponi ya vathi. Yehova oosuwela wiicela nnakumanaahuno, hiiha ntoko iiwexenxeiye ohooxeya wa Aisarayeli ntoko akapuro o Yiikuputu. “Apwiya àwopola yawo mohosiwani mwaya.” (Isa. 63:9, BNM) Iyaakha ohoolo waya, Ayuuta yaathanana nthowa na amwiicani yaawo yaawatiiha otekiwa wa empa ya Muluku, nyenya Yehova aaloca: “Yoowo onootannyaani onatannya niitho naka.” (Sak. 2:8, NM) Hiiha ntoko maai onathokororyeiye nikwiya nawe, Yehova onneeravo echu moosivela awaakihaka achu awe. (Yes. 49:15) Mmukhalelo yoowo, Yehova onanwerya wiihela mu nipuro na akina, nave oonivaha mavyakelo yaawo.​—Sal. 103:13, 14.

YESU AATAKIHENRYE HAI OSIVELA WA MULUKU

3. Tiheeni enooniherya wi Yesu aari eepewe?

³ Yesu aanasooseya ni ohooxeya wa akina, ophitaanyerya mikhalelo seiyo aahintonkweiye okumanano. Achu yaanawoova ahooleli a malapelo, yaawo yaawoka ni waahooxa ni malamulo aachu. (Mat. 23:4; Mar. 7:1-5; Yoh. 7:13) Yesu haari awoopopiha naari oowoka, owo aanawerya wiiwexexa nikacamiho nenlo aahintonkweiye okumanano. Mwawiihiiha, “vawona miloko eyo ya atchu, áthanana m’murimani ntakhara a yawo, vawi yári ómwaryeya ni ómwalamwala ókhala ntoko ipuchepuche sohikhala ni mukukhula.” (Mat. 9:36) Moolikana ni Tiithi awe, Yesu aari oosivela ni eepewe.​—Sal. 103:8.

4. Yesu oona hai vooloca sa ohooxeya wa akina?

⁴ Vaavaa Yesu aawooneiye achu ehooxeyaka, owo aanakuxeya murima waakhaviherya. Mwawiihiiha, owo aatakiherya osivela wa Tiithi awe. Amanle olaleerya nihiku nanteero, Yesu ni oohuserya awe yaachuna oya okhwipi wi yiichuuwe. Nthowa na ikharari aareiyeno wa achu yaawo yaamuweherya, Yesu aapacerya “wahusiha itchu sinchipale.”​—Mar. 6:30, 31, 34.

NNII NTAKIHERYE HAI OSIVELA WA YEHOVA

5, 6. Wi ntakiherye osivela wa Muluku, nnaphwanela waakhalihaka hai akina? Mooniherye. (Moone eruku yoopacerya.)

⁵ Nnanwerya omutakiherya Yehova mu waakhaliha wahu akina. Wi nlikanyihe: Muupuwele sa mmiravo ori Mukiristu oniichaniwa Alan, onamuupuwela munna awuuluvala orino makacamiho a waalakhanya nthowa na evaasi. Onnakhala woovila weeca empa ni empa mmuteko wa mmacani . Alan onnuupuwela masu a Yesu: “Nave ntoko munakhwelelanyu nyuwo wi atchu enarwa-ewerelani, muwerele yawo mwawihihá.” (Luka 6:31) Alan onniikoha: ‘Tiheeni kinachunaaka wi achu ekeereleke?’ Naakhulo nawe ti nawi: ‘Kinachuna wi achu enamvonya mphirya ni miyo!’ Nyenya munna ola awuuluvala hanawerya omvonya mphirya, onanwerya? Masu a Yesu anataphulela wi nnaphwanela wiikoha: ‘Tiheeni kaachunaaka weereliwa waakhanle wi kiri mmukhalelo ntoko yoowo?’

⁶ Alan huuluvanle nyenya onanwerya wiiwexexa mikhalelo ntoko seiya. Owo onnanweha munna awuuluvala anwiriyanaka mwawiichaalela. Vakhaani vakhaani, Alan onniiwexexa wuuluvala tiheeni yeeyo eneeriha wi okhale woovila omwaalakhanya Piipiliya ni weeca empa ni empa. Vaavaa Alan onuupuweleiye mukhalelo wookacamiha wa munna, owo onnawerya woona nikhaviheryo taani nnachuneya, nave onnachuna okhaviherya. Hiyaano nnaphwanela weera emohamoha. Wi ntakiherye osivela wa Muluku, nnaphwanela wihela mu nipuroni na akina.​—1 Akor. 12:26.

7. Nnii naasuwele phaama akina mwawiihai wi niwerye wiiwexexa osooseya waya?

⁷ Tahi wookhweya ikwaha soothene wiiwexexa osooseya wa akina. Achu ancipale annahooxeya ni makacamiho akhweya nihintonkaahu okumanano. Akina annahooxeya omwiilini nthowa na oruwaniwa, ereca naari wuuluvala. Akina anahooxeya ni makacamiho a mmuupuweloni ntoko wuukhuwa, nave ni sookhumelela sa wiikariwa. Nave akina anakhala mu emusi yookawanyeya malapelo naari mu emusi erino tiithi mmoha. Achu oothene annakumana ni makacamiho ammoori, nave akina annakumana ni makacamiho nihintonkaahu okhalano. Mmukhalelo yoowo, nnii ntakiherye hai osivela wa Muluku? Moorweela wa owiriyana phaama ophiyerya wiiwexexa moonelo wa akina. Ela enahaala onikhaviherya otakiherya osivela wa Yehova moorweela wa weeravo echu mwawiiwanana ni yoothowa. Soothowa ti soohiyana wa muchu ti muchu, nave nnanwerya ovaha nlipiho noomunepani nnikhaviheryo noophara muteko.​—Mwaalakhanye Aroma 12:15; 1 Petro 3:8.

MUTAKIHERYE EPEWE YA YEHOVA

8. Tiheeni yaamukhavihenrye Yesu wooniherya epewe?

⁸ Mwaana a Muluku aaloca: “Mtokotokosha owo . . . anerela sorera atchu óhithamala ni ónanara.” (Luka 6:35) Mweeparipari, Yesu aatakiherya epewe ya Muluku. Tiheeni yaamukhavihenrye weerano yeeyo? Owo aanaakhaliha achu mweepewe moorweela wa wuupuwelela ti mwawiihai masu ni saweera sawe saahaalaaya ovolowela moonelo wa akina. Ntoko yootakiherya, muthiyana yoowo aasuweliwe ntoko mulipa oocheka, aamwaacamela Yesu, anlaka nave anaanihaka inaani sawe ni miithori. Yesu aahoona wi muthiyana ole aacharuwa, nave aasuwela wi aahaala otepa othanana waakhanle wi haamweerenle epewe. Ohiya yeeyo, Yesu aamuthamalela nave aamukhurumuwela. Vaavaa Mfarisi aananariweiye ni yeeyo yeeren’ye, Yesu tho aaloca ni yoowo mweepewe.​—Luka 7:36-48.

9. Tiheeni enahaala onikhaviherya otakiherya epewe ya Muluku? Mvahe sootakiherya.

⁹ Nnii ntakiherye hai epewe ya Muluku? Murummwa Paulo oorepa: “Kapuro a Apwiya hanaphwanela okhala marápwa, nyenya akhale óphwanelela, épewe wa othene.” (2 Tim. 2:24) Achu eepewe annuupuwelela mukhalelo wa omaliha ohiiwanana wi esepe ophoreiha moonelo wa akina. Muupuwele mukhalelo wa wooniherya epewe mu saweereya iha: Omutekoni, mutokweene ahu hanaphara phaama muteko awe. Tiheeni mwaahaalaanyu weera? Munna onarwa mmuthukumanoni ekwaha emoha va mweeri. Nnii nloce eheeni wa yoowo? Mu olaleerya, namakhala onnaloca, “Kootepa oweiwa wi kiloce ni nyuwaano.” Nnahaala wooniherya ncicimiho? Owaani, oothelana ahu onnaloca, “Ntakhara heeni hiwaakileenle wi waahaala weerano yeela?” Apwanne nnahaala waakhula mweepewe? Wiihela mu nipuro na akina ni wuupuwelela ti mwawiihai masu ahu anahaalaaya waavolowela akina, nnahaala osuwela mukhalelo wa oloca ni weera mmukhalelo onooniherya epewe ya Yehova.​—Mwaalakhanye Masiposipo 15:28.

MUTAKIHERYE MIRUKU SA MULUKU

10, 11. Tiheeni enahaala onikhaviherya otakiherya miruku sa Muluku? Mvahe yootakiherya.

¹⁰ Mavyakelo ahu a owerya wiiwexexa saweereya nihintonkaahu okumanano annanikhaviherya tho otakiherya miruku sa Yehova ni woona sookhumelela sa saweera sahu. Miruku mukhalelo mmoha woochuneya wa Yehova, nave vaavaa onaphariheleiye, onnawerya woona mookwakwaleya sookhumelela sa meerelo ammoori. Hiyaano hannawerya woona ichu sa omwaahiyu, nyenya ti yaphaama wuupuwelela sookhumelela sa yeeyo nnachunaahu weera. Aisarayeli yaahesa wuupuwelela sookhumelela sa ohimwiiwelela waya Muluku. Moohipwacha soothene Muluku aaweerenleiye, Moose aanasuwela wi awo yaahala weera yoonanara vamiithoni va Yehova. Alocaka wa nloko noothene na Isarayeli, owo aaromola masu a ncipo ariki: ‘Atxhu òhìsuwela, ahisuwenl’etxhu. Yàri atxhu a miruku, yàmusuwela, yamusuwela otakhaliwa waya.’​—Malam. 31:29, 30; 32:28, 29, BNM.

¹¹ Wi ntakiherye miruku sa Muluku, nnaphwanela waanyiherya sookhumelela sa saweera sahu. Ntoko yootakiherya, wakhala wi nohaakamela, nnaphwanela wuupuwela yawoopiha ya ochuna opaka sa mwiikho. Nihirwe nipake marehereryo naari weera echu yaahaala onanariha onthamwene ahu wasisapo ni Yehova! Ohiya yeeyo, hankooni neerevo echu mwawiiwanana ni masu ala ooveereliwa: “Mutxhu a miruku, onnona yawopiha, ipitha, ohirino miruku onnaya oholo, ùwele motakhaliwani.”​—Masi. 22:3, BNM.

MUSEPE MUUPUWELO WOOPAHULA

12. Muupuwelo onawerya hai onipahula?

¹² Muchu a miruku onnasuwela wi muupuwelo ori ntoko mooro. Wakhala wi muupuwelo onnaphariheliwa phaama, ti wa mphurelo hiiha ntoko mooro onapakiwano yoolya. Nyenya wakhala wi mooro hothokororyiwe phaama, onneeyela empa nave onnawiipha achu. Moolikana, muupuwelo ti wa mphurelo vaavaa onanikhaviheryaaya omutakiherya Yehova. Nyenya, onanwerya okhala woopahula wakhala wi woosareya ni soochuna soonanara. Ntoko yootakiherya, wakhala wi nookhalano yookhovelela ya wuupuwela meerelo a yoocheka, eyo enahaala oneeriha weerano yeeyo. Mweeparipari, wuupuwelela ichu sa mwiikho, onnapahula makupa oomunepani!​—Mwaalakhanye Yakopo 1:14, 15.

13. Mukhalelo taani wa okumi Haava akhweya aanyihenryeiye?

¹³ Muthokororye ti mwawiihai muthiyana oopacerya Haava aannuwinheiye nchuno na olya yawiima yoowatiihiwa “mwiri yole onasuweliha yaphama ni yonanara.” (Map. 2:16, 17, BNM) Enowa yaaloca ni Hava: “Tahi eparipari wi mwalya munamukhwa, ti wi, Muluku òsuwela wi mwalya sawima iho mitho anyu anamuhuleya, munamukhala ntoko yowo: munamusuwelaka yorèra ni yonanara.” Hava “àhona wi sawima sa mwiri ole txhiri sàri sorèra olya; sorèra wona ni sorèra osuweliha miruku.” Teevi yaari yookhumelela ene? “Àrukula yawima emoha ni àlya. Ànvaha iyawe yawima eyo ni owo àlyatho.” (Map. 3:1-6, BNM) Wa Haava, yeeyo Satana aaloceiye yaakhala ntoko yaari yaphaama. Ohiya oleeliwa yaphaama naari yoonanara, Haava aanawerya olakelela mukhateiye. Muupuwelo awe waari woopahula! Moorweela wa iyawe Aatamu, “otcheka wávolowilaya mwilaponi ya vathi . . . ni okhwa mwa otcheka.”​—Arom. 5:12.

14. Piipiliya onanikhaviherya hai osepa meecelo oonanara?

¹⁴ Yoocheka ya Haava mu emaca ele hiwaari okonihana. Nyenya, Yesu oolopola vooloca sa waanyiherya ichu sa mwiikho. Owo aaloca: “Yowo óweha muthiana ni omukhalela nrima vavo arimraruwano hihano m’murimani mwawe.” (Mat. 5:28) Mwawaacererya, Paulo aalopola: “Muhupuwelele sa mwíli werano sokhwela saya.”​—Arom. 13:14.

15. Mukhalelo taani wa muhakhu nnaphwanelaahu wiithukumanyerya, nave ntakhara heeni?

¹⁵ Muupuwelo mukina wawoopiha ori waanyiherya muchu arino okumi waphaama aniiha ahimwiiwelelaka Muluku. Mweelukuluku yeela, okumi waphaama wa mulipa ooreela ori “ntoko esiri yolipihiwa [mmuupuweloni mwawe].” (Masip. 18:11, BNM) Yesu aapaka niphwanaphwaniho ooniheryaka mukhalelo wawoopiha wa “mutchu awithukumanyerya muhakhu mwanene mekhiye óhikhalano muhakhu wa wa Muluku.” (Luka 12:16-21) Yehova onnasiveliwa vaavaa nnapakaahu ichu inamuhakalaliha. (Masi. 27:11) Ninnatepa ohakalala vaavaa nneemereryiwaahu ti Muluku nthowa na ‘withukumanyerya muhakhu wirimu!’ (Mat. 6:20) Moohikhwa minikwa onthamwene waphaama ni Yehova muhakhu mutokweene nryaahuno.

OSEPA OKACAMIHEYA MMUUPUWELONI

16. Tuuvi ori mukhalelo mmoha wa osepa okacamiheya mmuupuweloni?

¹⁶ Mwaanyiherye mukhalelo naahaalaahu okhala awuukhuwa waakhanle wi ninniilipixerya othukumanya “muhakhu va elaponi ya vathi.” (Mat. 6:19) Yesu aapharihela niphwanaphwaniho wi ooniherye wi “wupuwelela wa elapo ya vathi, ni owoka wa muhakhu” enahaala onyoka masu a Omwene. (Mat. 13:18, 19, 22) Moohipwacha waakhanle wi anuukhuwa ni ikhorowa naari hooye, achu akina annuupuwela moohihiyererya ichu soonanara akhweya inahaala waaphacuwela. Okhalano muupuwelo woonanara onahaala onipahula omwiilini ni omunepani. Hankooni nimuroromele Yehova nave nuupuwele wi “okatxamiheya ti wawinniha murima, nsu norèra ninnahakalaliha murima.” (Masi. 12:25, BNM) Masu aphaama a muchu yoowo onniiwexexa anahaala ohakalaliha murima ahu. Waaveka nikhaviheryo asitiithi ahu, oothelana ahu, naari nthamwene a va murimani arino moonelo woomuluku, enahaala onikhaviherya ovukula okacamiheya wahu.

17. Yehova onanikhaviherya hai omaliha okacamiheya mmuupuweloni?

¹⁷ Haavo muchu onawerya wiiwexexa phaama okacamiheya wahu ompwaha Yehova. Paulo aarepa: “Muhúkhuweru mmurima; nyenya mu sothe sene n’nivekelo, ni ochichimiha, vamoha ni othamala, hiho munavekanyu sisuweliwe ti Muluku. Nave murechele wa Muluku wopwaha osuwelasha wothene, onarwa-okhapelela mirimányu ni sawupuwelela sanyu mwa Kristu Yesu.” (Afil. 4:6, 7) Muupuwele sa yaale ananikhaviherya osepa opahuwa omunepani—akhwiihu a mu nroromelo, atokweene, kapuro oororomeleya, ankeelo, Yesu ni Yehova.

18. Muupuwelo onanikhaviherya hai?

¹⁸ Ntoko noonnaahu, muupuwelo onnanikhaviherya otakiherya mikhalelo sa Muluku, ntoko osivela. (1 Tim. 1:11; 1 Yoh. 4:8) Nnahaala okhala oohakalala wakhala wi nohooniherya osivela weeparipari, ninnathokororya sookhumelela sa saweera sahu ni osepa okacamiheya mmuupuweloni yoowo waahaala onanariha ohakalala wahu. Hankooni nipharihele phaama yamahala yoorweela wa Muluku ya owerya waanyiherya ewehereryo ahu ya omwaahiyu ni otakiherya osivela, epewe, miruku ni ohakalala wa Yehova.​—Arom. 12:12.