Mucicimihe Mapuro Ahu a Malapelo

“Mvai wa va empa’nyu wokilya miyo.”​—YOH. 2:17.

MACIPO: 127, 118

MWAHAALA WAAKHULA HAI?

Nnii nooniherye hai ncicimiho ntakhara mithukumano sahu Seekiristu?

Onaweryeya hai otekiwa Ipa sa Omwene sincipale?

Ntakhara heeni orehererya ni ophwaneliwa wa Ipa sa Omwene ti woochuneya?

1, 2. (a) Mapuro taani a malapelo akapuro a Yehova yaapharihelaaya khalai? (b) Yesu oona hai empa ya Muluku o Yerusalemu? (c) Teevi ekhanle yoolakelela ya mwaha yoola?

OPACERYA khalai, akapuro a Muluku annakhalano mapuro anapakaayamo malapelo aweela. Haavele akhweya aapharihela eyuupo wi avahe mukucho wa Muluku. (Map. 4:3, 4) Piipiliya onnaloca wi Noowa, Aaparahamu, Isaki, Yakopo ni Moose yaateka iyuupo. (Map. 8:20; 12:7; 26:25; 35:1; Muk. 17:15) Yiiwelelaka nlamulo na Yehova, Aisarayeli yaampaka tapernaakulu. (Muk. 25:8) Ohoolo waya, yaateka empa ya omulapela Yehova. (1 Mam. 8:27, 29) Emanle ochika wookapuroni o Paapulu, Ayuuta moohihiyererya yaanathukumana mu asinakooka. (Mar. 6:2; Yoh. 18:20; Saw. 15:21) Akiristu a nsana noopacerya yaanathukumana vaate va mmoha a mmulokoni. (Saw. 12:12; 1 Akor. 16:19) Olelo, achu a Yehova annathukumana wi ehusihiwe ni omulapela Muluku mu Ipa sa Omwene macikhwi macikhweene orukurerya elapo.

² Osivela ni ncicimiho Yesu aareiyeno ntakhara empa ya Yehova saari sawooneya ophiyerya wi namichaka mmoha aapharihela wa yoowo masu ala ooloherya: “Mvai wa va’mpa anyu wokilya.” (Sal. 69:9; Yoh. 2:17) Hiyaavo Empa ya Omwene enaphwanela wiichaniwa “mpa mwa Muluku” ntoko yiichaneliwaaya empa ya malapelo o Yerusalemu. (2 Math. 5:13; 33:4, BNM) Naamwi hiiha, Piipiliya ookhalano malakiheryo ananihusiha mukhalelo wa opharihela mapuro ahu a malapelo ni ocicimiha. Yoolakelela ya mwaha ola ori wuupuxerya malakiheryo yaawo ni othokororya mukhalelo Ipa sahu sa Omwene inaphwanelaaya othokororyiwa, oliveliwa ni okhapeleliwa.a

OCICIMIHA MALAPELO AWEELA

3-5. Teevi ekhanle yoolakelela ya Empa ya Omwene, nave eyo enaphwanela ovolowela hai moonelo ahu vooloca sa mithukumano?

³ Empa ya Omwene nipuro na malapelo aweela va muceche ahu. Mukhalelo mmoha Yehova onaphariheleiye wi anilyihe omunepani ori moorweela wa mithukumano sa va esumana seiyo ineeriwano mu Empa ya Omwene. Ti mwemmo nnaakhelaahu sooleeliherya ni olipiha woomunepani moorweela wa marehereryo awe. Oothene yaawo anaphwanyeya mmithukumano ari ntoko alipa oowompwa a Yehova ni Mwanawe. Eparipari wi ninnawompwa ikwaha sincipale wi nilye “o’hasarini wa Apwiya [Yehova],” nyenya hannaphwanela ohiya ocicimiha nwopelo yoola.​—1 Akor. 10:21.

⁴ Ilukuluku seiyo sa malapelo ni olipihana ti soochuneyaxa wa Yehova ophiyerya onceenyerya othukumana moohihiyererya, ntoko erempwaaya ni Paulo. (Mwaalakhanye Ahepri 10:24, 25.) Apwanne naahaala wooniherya ncicimiho wakhala wi ninnacompela mithukumano ni mathowa oohisuwanyeya ene? Ninnooniherya wi ninnamucicimiha Yehova moorweela wa wiirehererya wi niye mmithukumano ni ovaha maakhulo ahu ni murima woothene.​—Sal. 22:22.

⁵ Meecelo ahu anahaala wooniherya waakhanle wi ninnacicimiha Empa ya Omwene​—ocicimiha nipuro na malapelo ni miteko Seekiristu inapakiwa mwemmo. Annooniherya tho moonelo ahu vooloca sa nsina na Muluku, nenlo ikwaha sincipale nnarempwa va Empa ya Omwene.​—Moone 1 Mamwene 8:17.

6. Masu taani achu akina aloncaaya ntakhara Ipa sa Omwene ni achu anathukumana mwemmo? (Moone eruku yoopacerya.)

⁶ Achu ahiri Anamoona a Yehova annoona ncicimiho nahu ntakhara mapuro ahu a malapelo. Ntoko yootakiherya, mulopwana mmoha o Turkiya aaloca: “Ophwaneliwa ni oreheryeya wa Empa ya Omwene saakitikhiniha. Achu yaawara mwaphaama, yaari oohakalala nave yaanakixeliha monthamwene. Eyo yaakivolowela mwakuru.” Mulopwana owo aapacerya ophiya mmithukumanoni moohihiyererya nave moohilekela aapatisiwa. Mu epooma emoha o Intoneesiya, muloko mmoha waahaawopa alamuleli ni amwaacamani wi yoone Empa ya Omwene evyaani nihaakumve ophiya nihiku na ohuliwa waya. Musatoro aaphiya. Owo aatikhina otekiwa phaama wa Empa eyo, ophwanelela waya ni oreera wa kapinka. Owo aaloca: “Ophwaneliwa wa nipuro nla onnooniherya nroromelo neeparipari muryaanyuno.”

7, 8. Ichu taani yaale anaphiya mmithukumano anaphwanelaaya okhalano mmuupuweloni?

⁷ Omucicimiha wahu Muluku yoowo onaniwopa wi nthukumane​—onnooneya mmeecelo ni mawarelo ahu. Ncicimiho ninnanikhaviherya tho osepa ovirelela mphimo. Ennooneya wi naamwi akina yiikasoopaka vancipale mmukhalelo wa okhala mmithukumanoni, akina arino moonelo woohipwacha. Eparipari wi Yehova onachuna wi alapeli awe ni alipa oowompwa ekhaleke ootaphuwa mu Empa ya Omwene. Mweelukuluku emohamoha yaale anaphiya mmithukumanoni hanachuna onyemuliha mithukumano seiyo moorweela wa ohipwacha mawarelo, orumiha michaka, ochekula, olya, owurya ni weera echu ekina variyari va mithukumano. Asitiithi anaphwanela waavyakiha anamwane wiiwexexa wi Empa ya Omwene tahi nipuro na ochimaka naari othata.​—Ekle. 3:1.

⁸ Mweelukuluku emoha, Yesu aahaleeliheya ophiyerya owiikara achu yaapaka maroca mu empa ya Muluku. (Yoh. 2:13-17) Ipa sahu sa Omwene mapuro a malapelo aweela ni mahusiheryo oomunepani. Mwawiihiiha, mwaha vyakala wa maroca ohiniiwanana ni miyaha soomunepani onaphwanela weeriwano mu nipuro nikina.​—Moone Nehemiya 13:7, 8.

OTEKIWA WA IPA SA OMWENE

9, 10. (a) Marehereryo a Yehova analivela hai otekiwa wa Ipa sa Omwene, nave ni yookhumelela taani? (b) Nikhaviheryo taani noosivela wa miloko seiyo sahaahaala owerya oteka Empa ya Omwene mukhataaya?

⁹ Marehereryo a Yehova annawetha wi eteke nave elivele Ipa sa Omwene soophwanelela. Muteko wa olakelela, oteka ni orehererya oneeriwano ni achu awiiveleela. Ni yookhumelela taani? Opacerya 1 a Novempro a 1999, opwaha 28.000 mapuro mavyaani a malapelo aweela annapakiwa ntakhara miloko orukurerya elapo yoothene. Eyo enataphulela wi variyari va iyaakha 15 ivinre, ennaalakhanyeriwa wi mweelapo yoothene saanatekiwa Ipa sa Omwene soophiyerya thanu nihiku nnihiku.

¹⁰ Onnakhalavo wiilipixerya otokweene wi itekiwe Ipa sa Omwene mmapuro oothoiwa. Yoovaha yeela yoosivela enathipeleya mu nlakiheryo na Piipiliya nawi sookhalano sa akina inaphwanela okhwaaniherya othoiwa wa akina wi “vakhale wereryana.” (Mwaalakhanye 2 Akorinto 8:13-15.) Ntoko yookhumelela annatekiwa mapuro aphaama a malapelo aweela wa miloko seiyo sahaahaala owerya oteka Empa ya Omwene mukhataaya.

11. Tiheeni anna akina analocaaya ntakhara Empa aya ya Omwene evyaani, nave munoona hai sa yeeyo?

¹¹ Muloko mmoha wa Kosta Rika yoowo waakhaviheryen’ye ni yoovaha yeela waarepa: “Naawehaka Empa ahu evyaani ya Omwene, ntoko nnamuloha. Hannawerya weemererya. Empa ahu yaphaama yoomalela pahiru mmahiku mathanu nararu! Ela yooweryeya nthowa na mareeliho a Yehova, nthowa na muteko wa marehereryo awe nnikhaviheryo na annihu. Nipuro nla na malapelo chiryene yamahala yasisapo, yamahala yoorweela wa Yehova. Hannawerya wiipithiha ohakalala wahu!” Vaavaa muniiwaanyu masu oothamalela ntoko yaala, apwanne hamunatannyeya murima? Hamunahakalala osuwela wi macikhwi a anna orukurerya elapo aakhalano ohakalala yoowo? Muteko ola ti wa Yehova, woona wi vaavaa Ipa sa Omwene inakwaaxiwaaya, moohilekela annasareyamo achu a murima waphaama anachuna omusuwela phaama Mpatuxa ahu oosivela.​—Sal. 127:1.

12. Munii mukhaviherye hai otekiwa wa Ipa sa Omwene?

¹² Anna ni arokora ancipale annakhalano ohakalala otokweene moorweela wa opaka makupa a oteka Ipa sa Omwene. Naamwi nrino ekari yeeyo naari hooye, oothene hiyo nookhalano ekari ya okhaviherya marehereryo yaawo moorweela wa soovaha sahu. Achu yaawo yaarino mvai ntakhara malapelo aweela yaakhaviherya olivela otekiwa mapuro a malapelo mu elukuluku ya Piipiliya, nave emohamoha enneereya olelo​—mu ncicimiho na Yehova.​—Muk. 25:2; 2 Akor. 9:7.

EPEWE YA EMPA YA OMWENE

13, 14. Malakiheryo taani a Piipiliya anaphariheleya ni okhapelela Empa ahu ya Omwene okhala yoophwaneliwa?

¹³ Emanle otekiwa Empa ya Omwene, ti woochuneya okhapelela okhala yoophwaneliwa wi yooniherye mikhalelo ni omuchu wa Muluku nnamulapelaahu​—Muluku a murecele. (Mwaalakhanye 1 Akorinto 14:33, 40.) Piipiliya onnalikanyiha epewe yoomwiilini ni epewe yoomunepani. (Yaw. 19:8) Mwa yeeyo, wakhala wi muchu onnachuna weemereryiwa ni Yehova, onaphwanela okhala eepewe.

¹⁴ Vaavaa nnacharaahu malakiheryo yaawo, ninnakhala ootaphuwa waawopa achu ophiya mmithukumano sahu, ntakhara ninnaroromela wi oreheryeya wa Empa ya Omwene enahaala ocicimiherya michaka yaphaama nnalaleeryaahu wa yaawo. Awo anahaala woona wi nnamulapela Muluku aweela yoowo onahaala weeriha wi elapo ya vathi ekhale parataiso ehirino onyala vyakala.​—Yes. 6:1-3; Yaw. 11:18.

15, 16. (a) Ntakhara heeni onamukhala woovila okhapelela ophwaneliwa wa Empa ya Omwene, nave ntakhara heeni ti woochuneya? (b) Orehereryiwa wa Empa anyu ya Omwene oneeriwano hai, nave ekari taani oothene hiyo nryaahuno?

¹⁵ Achu akina annacicimiherya epewe waapwaha akina. Moonelo ahu vooloca sa epewe onnavoloweliwa ni mukhalelo ahu wa ophwiiwa. Ancipale annunwe mmapuro yaawo iphiro inakhalaaya sa nchupi ni matope, naari mmapuro wahaariwo maahi naari ikaruma sa orapihano. Moohipwacha moonelo wa vanipuroni vooloca sa epewe, Empa ahu ya Omwene enaphwanela ovaha ntakiheryo naphaama mu ophwaneliwa, woona wi ennakuxa nsina na Yehova nave nipuro na malapelo aweela.​—Malam. 23:14.

¹⁶ Ophwaneliwa wa Empa ya Omwene honeereya mukhataaya. Nikhuuru na atokweene nnaphwanela opaka marehereryo ni ovareryela wi sikhalevo ikaruma sinachuneya wi nipuro na malapelo nikhale noophwanelela. Miteko mikina inaphwanela weeriwano omakuchuwelo wa muthukumano ori woothene, nave mikina hasineeriwano wiiliwiili; mwa yeeyo ti woochuneya okhalavo wiiwanana ni marehereryo aphaama wi ohikhale muteko onii ocuwaliwe. Achu oothene a muloko aakhalano ekari ya okhaviherya.

OREHERERYA EMPA YA MALAPELO

17, 18. (a) Yootakiherya taani ya Mpiipiliyani ya orehererya nipuro na malapelo aweela? (b) Ntakhara heeni Ipa sa Omwene inaphwanela okhala sookhapeleleya?

¹⁷ Alapeli a Yehova anniilipixerya tho orehererya mapuro aya a malapelo. Mwene o Yuteiya Yohasi aalamulela wi alipa a mukucho ephariheleke sooveleela sa empa ya Yehova wi ereheryeno makupa yaachuneya. (2 Mam. 12:4, 5) Ivinrevo iyaakha 200 ohoolo waya, Mwene Yosiya aapharihela tho sooveleela sa empa ya Muluku wi alivele oreheryiwa wa empa eyo.​—Mwaalakhanye 2 Matharihelo 34:9-11.

¹⁸ Soolokoha sa ifiliyale sinnooniherya wi mu ilapo ikina anna hanacicimiherya orehererya Ipa ni ikaruma. Akhweya anna ancipale mu ilapo seiyo haano masuwelelo naari ikaruma wi epharihele. Nyenya wakhala wi Empa ya Omwene hereheryiwe, enahaala opacerya onanara moohilekela, nave eyo hevaha onamoona waphaama va muceche. Moohiyana, vaavaa achu a muloko anawethaaya wi ekhapelele Empa ya Omwene, eyo ennaruuha ncicimiho wa Yehova nave henamaliha ikhorowa sincipale anna anavahaaya.

19. Tiheeni mulakelenlaanyu weera ntakhara mapuro a malapelo aweela?

¹⁹ Empa ya Omwene nipuro nenlo niveleeliwe wa Yehova. Mwawiihiiha, hori woophwanelela oloca wi eyo ti ya muchu mmoha naari muloko, moohipwacha yeeyo epaaxo enalocaaya. Mwawiiwanana ni malakiheryo a Piipiliya, nnaphwanela wiiwanana wi Empa eyo yaakhwaniherye yoolakelela etekeliwaaya. Achu oothene mmulokoni ananwerya okhaviherya moorweela wa wooniherya ncicimiho ntakhara mapuro ahu a malapelo moorweela wa opaka sooveleela wi ekhaviherye oteka, ni ovaha elukuluku ni ikuru wi ekhaviherye orehereryiwa wa Ipa sa Omwene seiyo itekiwe. Vaavaa nnakhaviheryaahu marehereryo yaawo ninnooniherya mvai ahu ntakhara mapuro a malapelo aweela a Yehova, hiiha ntoko Yesu enreiye.​—Yoh. 2:17.

[Nsu na vathi]