Yehova Onooniherya Hai wi Onnanisivela?

“Onani noneiho nokhwela Atithi anivanhaya”.​—1 YOHANI 3:1.

MACIPO: 91, 13

MUNANWERYA OTHARIHA?

Ntakhara heeni ti woovila wa akina woona wi Yehova onnaasivela?

Yehova onooniherya hai wi onnanisivela?

Nnoona hai osivela wa Yehova vaavaa onanihooleleiye ni onookolola?

1. Tiheeni murummwa Yohane onanceenyeryeiye wuupuwelela, nave ntakhara heeni?

MURUMMWA Yohane onnanceenyerya wuupuwelela osivela otokweene wa Yehova. Mu 1 Yohani 3:1 ninnaalakhanya: “Onani noneiho nokhwela [na osivela] Atithi anivanhaya”. Vaavaa nnuupuwelelaahu osivela wa Yehova ni mukhalelo onooniheryeiye, ninnakhala awaataana ni yoowo nave ninnamusivela vancipale.

2. Ntakhara heeni ti woovila wa akina wiiwexexa mukhalelo Muluku onaasiveleiye?

² Moohiciha, achu akina hanoona mukhalelo Muluku onaasiveleiye. Awo anuupuwela wi Muluku hanaaphwacha achu. Aneemererya wi Muluku pahiru otikithenrye malamulo wi aahooxeke yaale ahinamwiiwelela. Nthowa na mahusiheryo atheru, akina annaphiyerya wuupuwela wi Muluku tawuuma murima nave wi ti woohiweryeya waataanano. Akina anuupuwela wi Muluku onnaasivela achu oothene moohipwacha saweera saya. Nyenya Piipiliya ohookhaviheryaani osuwela eparipari vooloca sa Yehova. Moosuwela wi osivela mukhalelo mutokweenexa wa Muluku nave wi oomvaha Mwanawe ntoko mukucho ntakhara nyuwaano. (Yohani 3:16; 1 Yohani 4:8) Naamwi hiiha, nthowa na mukhalelo anyu wa ophwiiwa, akhweya onamukhala woovila woona mukhalelo Yehova onoosiveleiyeeni.

3. Tiheeni enahaala onikhaviherya wiiwexexa osivela wa Yehova ntakhara hiyo?

³ Wi niiwexexe osivela wa Yehova, nnaphwanela opacerya wiiwexexa wi ti Yehova yoowo onipatunxe. Owo oonivaha okumi. (Mwaalakhanye Salumu 100:3-5.) Ti nthowa nene Piipiliya onaloceiye wi mulopwana oopacerya aari “mwana a Muluku.” (Luka 3:38) Nave Yesu oonihusiha omwiichana Yehova ntoko “Atithihu muri wirimu.” (Mateu 6:9) Mwawiihiiha, Yehova Tiithi ahu, nave owo onnanisivela hiiha ntoko tiithi aphaama onaasiveleiye anamwane awe.

4. (a) Yehova Tiithi a mukhalelo taani? (b) Tiheeni nnahaalaahu othokororya mmwaha ola ni onacharela?

⁴ Ti woovila wa akina omoona tiithi ntoko muchu oosivela. Awo akhweya ananwerya wuupuwela ichu soonanara vooloca sa ophuiwa waya nthowa na okhalano tiithi yoowo aahooxa. Yehova harwa eerano yeeyo wa anamwane awe. Owo Tiithi aphaamaxa nryaahuno. (Salumu 27:10) Owo onnanisivela nave onnanikhapelela mmikhalelo soohiyana hiyana. Vaavaa nnoonaahu wi Yehova onnanisivela, nnahaala ochuna tho omusivela yoowo. (Tiyako 4:8) Mmwaha yoola, nnahaala othokororya makhalelo maxexe Yehova onooniheryeiye osivela wawe ntakhara hiyo. Nave mmwaha onacharela, nnahaala woona makhalelo maxexe a wooniherya osivela wahu wa yene.

YEHOVA TOOSIVELA NI OOVAHA

5. Tiheeni Muluku onaavaheiye achu oothene?

⁵ Vaavaa murummwa Paulo aareiye o Atena elapo ya Kresiya, owo aahoona wi saakhalawo soophwaniherya sincipale nave achu yaaneemererya wi miluku saya saanaavaha okumi. Mwawiihiiha owo aahaaleela sa “Muluku opatunse elapo ni sothene iri mwemmo.” Owo aaloca wi Muluku “onàvaha okumi atxhu othene, onàvaha omumula ni ikina sothene” nave wi “ti mwa yowo nnakhalahuno ekumi ni ti mwa yowo nnetxahu ni nnakhalahu.” (Saweriwa T’arummwa 17:24, 25, 28) Yehova oonivaha soothene nnachunaahu wi nikhale nave nipuhe okumi. Muupuwele ichu onivanheiye nthowa na onisivela wawe.

6. Yehova onivanhe echoko ya mukhalelo taani? (Moone eruku yoopacerya.)

⁶ Ntoko yootakiherya, Yehova oorehererya echoko yooreera wa hiyo. (Salumu 115:15, 16) Elapo yavathi ti yavameekhaaya moohiyana ni ilapo ikina seiyo opatunxeiye. Alipa oohuserya aatholathola nave aaphwanya ilapo sincipale, nave awo nlelo haphwannye elapo ekina erino yeeyo achu anachunaaya wi ekhaleno okumi. Tahi wi pahiru Yehova onivanhe ichu wi nikhaleno okumi, owo tho oopaka elapo yavathi okhala yooreera, nipuro noophwanelela opuha okumi. (Isaiya 45:18) Vaavaa nnuupuwelaahu sa echoko yeela Yehova onivanheiye, chiryene ninnawerya woona osivela wawe ntakhara hiyo.​—Mwaalakhanye Yobi 38:4, 7; Salumu 8:3-5.

7. Mukhalelo Yehova onipatunxeiye, onooniherya hai wi onnanisivela?

⁷ Mukhalelo mukina Yehova oonihenryeiye osivela wawe ori orweela wa onipatuxa ni owerya omutakiherya. (Maphatxuwelo 1:27) Ela enataphulela wi nnanwerya woona osivela wawe wa hiyo ni wooniherya tho omusivela wahu. Owo oosuwela wi ti yeela enaneeriha okhala oohakalala. Mweeparipari, anamwane annatepa ohakalala vaavaa anoonaaya wi asitiithi aya annaasivela. Nave muupuwele wi Yesu oonihusiha wi nnahaala okhala oohakalala wakhala wi nohaataana ni Tiithi ahu, Yehova. (Mateu 5:3) Owo oonivaha “itxhu saphama mwawatxa, wi nihakalaleno.” Chiryene, owo toovaha nave onnanisivela vatokovene.​—1 Timóteo 6:17; Salumu 145:16.

YEHOVA ONNANIHUSIHA EPARIPARI

8. Ntakhara heeni ninnachuna wi Yehova anihusihe?

⁸ Asitiithi annaasivela anamwane aya nave hanachuna wi awo ewokiwe naari ehuwelihiwe. Nyenya asitiithi ancipale olelo haneemererya malakiheryo a Piipiliya vooloca sa yaphaama ni yoonanara. Mwawiihiiha, awo hanawerya waahoolela phaama anamwane aya, ekumiheryaka othanana ni ohiiwanana. (Masiposipo 14:12) Moohiyana, Yehova onnaavaha anamwane awe ohoolela waphaamaxa nthowa nawi owo “Muluku òroromeleya.” (Salumu 31:6) Owo onnasiveliwa onihusiha eparipari vooloca sa yoowo. Onnanihusiha tho mukhalelo wa omulapela ni onnanooniha mukhalelo waphaamaxa wa okumi. (Mwaalakhanye Salumu 43:3.) Vano, tiheeni Yehova onihusinheiye enooniherya wi onnanisivela?

9, 10. (a) Ntakhara heeni Yehova onnanleela vooloca sa yene mukhateiye? (b) Tiheeni onanihusiheiye vooloca sa yoochuna awe ntakhara hiyo?

⁹ Opwaha soothene, Yehova onnanleela sa yoowo. Onachuna wi nimusuwele. (Tiyako 4:8) Owo oonileela nsina nawe. Mweeparipari, Piipiliya onnaromola nsina nawe ikwaha sincipale opwaha nsina nikina. Yehova tho onnanleela omuchu awe. Vaavaa nnavareryaahu ichu opatunxeiye, ninnahuserya wi owo toowerya ni amiruku. (Aroma 1:20) Nave vaavaa nnamwaalakhanyaahu Piipiliya ninnoona wi owo teekhaikhai ni osivela wawe otokweene ntakhara hiyo. Vaavaa nnasuwelaahu mikhalelo sootikhiniha sa Yehova, ninnaataana ni yoowo.

¹⁰ Yehova tho onnanihusiha yoolakelela awe. Onnanleela wi ninnapaka makupa a emusi awe. Onnathariha tho yeeyo onachuneiye wa hiyo wi nlape mwawiiwanana ni mmurecele ni akina a emusi awe. Mwawooneya Piipiliya onnooniherya wi Muluku haanipatunxe wi nlakeleleke yeeyo eri yaphaama ni yoonanara. (Yeremiya 10:23) Yehova oosuwela yeeyo eri yaphaama wa hiyo. Nyenya moorweela wa weemererya olamulelo awe nnamukhalano okumi wa murecele ni woohakalaliha. Yehova onnanihusiha eparipari yeela yoochuneya nthowa na onisivela wawe.

11. Tiithi ahu oosivela onanleela eheeni vooloca sa omwaahiyu?

¹¹ Tiithi oosivela onnuupuwela mwawiiseela sa omwaahiyu wa anamwane awe. Owo onnachuna wi ekhaleno okumi woohakalaliha. Moothananiha, achu ancipale olelo annoova omwaahiyu, nave ancipale annalapa mwakuru wi ephwanye ichu sihinahaala olekela. (Salumu 90:10) Ninnathamalela woona wi Tiithi ahu Yehova oonihusiha okhalano okumi woohakalaliha ni oniroromeliha omwaahiyu wootikhiniha!

YEHOVA ONNAAHOOLELA NI WAALAKA ANAMWANE AWE

12. Yehova eerenrye hai omukhaviherya Kayine ni Parukhi?

¹² Vaavaa Yehova onneiye wi Kayine aahaala opaka echu yoonanara, aaheererya omukhaviherya moorweela wa omukoha: “Tiseni onanareliwawe? Wera yaphàma, txhiri ethoni à enamukhala yohakalala.” (Maphatxuwelo 4:6, 7) Kayine aakhooca nikhaviheryo na Yehova. (Maphatxuwelo 4:11-13) Mu elukuluku ekina, Yehova aahoona wi moonelo woonanara wa Parukhi waanamweeriha okhala oovelavela. Mwawiihiiha Yehova aamuleela Parukhi wi muupuwelo awe waari woonanara nave wi aanaphwanela otoroka. Parukhi aahiiwelela ekano ya Yehova, nave eyo yaavuluxa okumi awe.​—Yeremiya 45:2-5.

13. Tiheeni akapuro oororomeleya a Yehova yaahusenryaaya orweela wa makacamiho?

¹³ Yehova onnanihoolela ni onookolola nthowa na osivela wawe. Tahi wi onamoona onlaka wakhala woochuneya, owo tho onnanivyakiha. (Ahebri 12:6) Ninnaalakhanya mu Piipiliya sa akapuro oororomeleya yaawo Yehova aavyakinheiye wi ekhale achu aphaama. Ntoko yootakiherya, Yoosefe, Moose ni Tavite yaakumana ni makacamiho matokweene. Yehova aari ni yaawo mmakacamiho aya. Nave ichu yaahusenryaaya variyari va ilukuluku seiyo saahaakhaviherya vaavaa Yehova aavanheiye mirici mitokweene. Vaavaa nnaalakhanyaahu Mpiipiliya mukhalelo onaakhaliheiye achu awe, ninnoona wi Yehova chiryene onnanisivela.​—Mwaalakhanye Masiposipo 3:11, 12.

14. Wakhala wi noopaka yoonanara, Yehova onooniherya hai osivela?

¹⁴ Naamwi nipanke yoonanara, Yehova onnatitelela onooniherya osivela. Wakhala wi noohiiwelela olaka wawe nave ncharuwa, owo onahaala onikhurumuwela “ni murima wothene.” (Isaiya 55:7) Ela enataphulela eheeni? Masu a Tavite vooloca sa okhurumuwela wa Yehova annooniherya wi nookhalano Tiithi a ikharari: “Apwiya annalevelela sotxheka sà sòthene, annòpenusa wa sònanara sà sòthene. Annavulusa okhwatxini okumi à, nave annòwariha mahala ni ikharari. Ntoko orekamenlannaya onakhumawo nsuwa ni nnavolowayawo, hiha Apwiya annakakhela otxiwene wa hiyo sotxheka sahu.” (Salumu 103:3, 4, 12) Yehova onnanihoolela ni onlaka mmikhalelo soohiyana hiyana. Nyuwaano munnaakuvela opaka matorokelo? Elukuluku yoothene muupuwele wi Yehova onnanlaka nthowa nawi onnanisivela.​—Salumu 30:5.

YEHOVA ONNANAAKIHA

15. Tuuvi ori mukhalelo mukina wa Yehova wooniherya wi onnanisivela?

¹⁵ Tiithi oosivela onnaakiha emusi awe ntakhara yawoopiha. Ti yeeyo tho Tiithi ahu Yehova oneereiye. Namarepa a salumu aaloca sa Yehova: “Apwiya . . . anakhapelela ekumi ya atxhu aya, annawòpola yawo wa amwitxana aya.” (Salumu 97:10) Muupuwele ela: Hiiha ntoko munaakuvelaanyu wiikicha miitho anyu nthowa nawi tasisapo wa nyuwo, Yehova onnaakuvela owiikicha achu awe ntakhara tasisapo wa yene.​—Mwaalakhanye Zakariya 2:8.

16, 17. Yehova owaakinhe hai achu awe akhalai ni amutano?

¹⁶ Mukhalelo mmoha Yehova onawaakiheiye akapuro awe, ori moorweela wa ankeelo awe. (Salumu 91:11) Munkeelo mmoha aawiipha anakhoco 185.000 a Asiiriya mu ohiyu omoha nave aahaavuluxa achu a Muluku. (2 Mamwene 19:35) Mu nsana noopacerya, ankeelo yaamoopola Petro, Paulo ni akina mu karipooso. (Saweriwa T’arummwa 5:18-20; 12:6-11) Hiihaanoru, yaakhumelela ekhoco etokweene mu elapo emoha ya Afrika. Elapo eyo yaari yawoopiha nthowa na owanawana, wiiya, ni wiiphana. Naamwi haarivo munna aayeleenle okumi, ancipale yaayeleela ichu saya. Nyenya oothene yaahoona osivela wa Yehova nave yaasuwela wi owo aanaakhapelela. Moohipwacha soohooxa soothene, awo yaari oohakalala. Vaavaa anna a efiliyale ya Estatu Unitu yaaxekunryaaya ni waakoha anna ni arokora vooloca sa okumi aya, awo yaahaakhula: “Nnikhaviheryo na Yehova soothene sookhala phaama!”

¹⁷ Nyenya, alapeli a Yehova ntoko Stefano ni akina yaahiiphiwa nthowa na nroromelo naya. Yehova hanawiikicha akapuro awe mu ipahu soothene. Nyenya onnawaakiha achu awe ntoko nikhuuru moorweela wa waalopola vooloca sa mikhalelo Satana oneereryeiye waahuweliha. (Éfeso 6:10-12) Ninnaphwanya olopola yoowo Mpiipiliya ni soolaleeryiwa sa marehereryo a Yehova. Ntoko yootakiherya ninnahuserya vooloca sa woopiha wa Interneti, osivela ikhorowa, woopiha wa ixilema, aliivuru, ni mathatelo anavuwiha nlala ni ocapaheya. Chiryene, Yehova onnanisivela nave onnachuna onaakiha.

NCICIMIHO NTOKWEENE

18. Munoona hai vooloca sa osivela wa Yehova?

¹⁸ Vaavaa Moose uupuwenleiye iyaakha soothene aamurumenleiye Yehova, owo aalekecheya wi Yehova aanamusivela. Moose aaloca: “Wosiselo munivonihe ni mahala anyu: wi ntxhape ni nihakalale mahiku othene.” (Salumu 90:14) Nookhalano ekari ya wiiwexexa ni woona osivela wa Yehova. Ninnoona okhala oocicimiheya osiveliwa ti Yehova! Ninnoona ntoko murummwa Yohane, yoowo aariye: “Onani noneiho nokhwela [na osivela] Atithi anivanhaya”.​—1 Yohani 3:1.

[Ekaaxa va epaaxina 26]

MASU ATHARIHIWE

Yehova onnanisivela: Yehova onnasiveliwa opaka onthamwene ni hiyo ntakhara na anamwane awe. Nave owo oheera ichu sincipale wa hiyo wi anooniherye wi onnanisivela vancipale

Yehova onnanlaka: Yehova onnanihusiha, onihoolela ni onlaka. Owo onnanikhaviherya weera yaphaama. Wakhala wi Yehova ohoona mpuwa mwahu echu enaphwanela otorokiwa, owo onnanlopola nave onnanikhaviherya osuwela echu yoophwanela weera wi nikhale awaataana ni yoowo