MWAHA WA EKAAPA | MUNANWERYA OMWIIWEXEXA PIIPILIYA
Ophwanya Nikhaviheryo na Omwiiwexexa Piipiliya
Mwaanyiherye wi muneecelela elapo yookhopela mu ekwaha yoopacerya. Munnaaphwanya achu, sookhovelela, yoolya, ni ikhorowa muhisuwenlaanyu. Moohikhwa minikwa, munahaala okhala ookacamiheya.
Munamwiisoona hiiha mu ekwaha yoopacerya munamwaalakhanyaanyu Piipiliya. Vaavaa muneeraanyu hiiha, onakhala ntoko munakookela elapo yakhalai yeeyo enakhala ntoko ti yookhopela wa nyuwo. Weiwo, munnawoona achu aniichaniwa Afilisti, ni sookhovelela ntoko ‘wàhula sowara,’ naari munnahuserya vooloca wa yoolya eniichaniwa mana ni ikhorowa iniichaniwa icarama. (Mukwaha 16:31; Yosuwa 13:2; 2 Samuwele 3:31; Luka 15:9, Nlakano Nahihano) Ichu soothene seiya inamookacamihaani. Mmukhalelo mmohamoha wa weecelela elapo yookhopela, apwanne himwaahaala oveka nikhaviheryo wa muchu wi ooleeliheeni ichu?
NIKHAVIHERYO NA KHALAI
Ovinyerya vaavaa Soorepa saweela saapacenryaaya orempwa mu nsana 16 E.E.K., ninnaphwanyeya nikhaviheryo wi achu emwiiwexexe Piipiliya. Ntoko yootakiherya, Moose, yoowo aari muhooleli oopacerya a nloko na Isarayeli, “àpatxerya otaphulela” yeeyo yaarempwe.—Malamulo 1:5.
Ahusiha oophwanelela a Soorepa yaakhumelela iyaakha ekonto ohoolo waya. Mu 455 E.E.K., nikhuuru ntokweene na Ayuuta ophitaanyerya anamwane ancipale yaanathukumana vamoha va nipuro na vanlakani mu epooma ya Yerusalemu. Ahusiha a Piipiliya yaanayawo ‘omwalikhanya livuru [a soorepa saweela].’ Nyenya awo yaaneera echu ekina. “Yànataphulela ni yànàleliha atxhu othene wi ewiweke phama.”—Nehemiya 8:1-8.
Iyaakha masana mathanu ohoolo waya, Yesu Kiristu aaphara muteko mmohamoha wa ohusiha. Mweeparipari, owo aasuweliwa ntoko muhusiha. (Yohani 13:13) Owo aanahusiha miloko sa achu ophitaanyerya achu vakhaani. Mu ekwaha emoha, aaloca wa muloko mutokweene, alocaka Mwaha wa Vamwaako, nave “atxhu antxipale yàri òtikhina mahusiho awe.” (Mateu 5:1, 2; 7:28) Mu 33 E.K., Yesu aaloca ni arummwa awe apiili yeecaka mphironi waacamela Yerusalemu, owo “àhatharihela phama itxhu sothene sarempwe.”—Luka 24:13-15, 27, 32.
Arummwa a Yesu yaari tho ahusiha a Masu a Muluku. Ekwaha emoha nahota a Etiopiya aanaalakhanya makupa a Soorepa. Murummwa awiichaniwa Filipi aamwaacamela nave aamukoha: “Onniwa phama onalakhanyawe?” Nahota owo aahaakhula: ‘Owerya kini kere hai kihimonne oni akitaphulele?’ Filipi aamutharihela yootaphulela ya yeeyo aalakhanyeiye.—Saweriwa T’arummwa 8:27-35.
NIKHAVIHERYO NINNAPHWANYEYA OLELO
Moolikana ni ahusiha a Piipiliya a khalai, Anamoona a Yehova olelo annaphara muteko wa omuhusiha Piipiliya mu ilapo sawaakhwana 239. (Mateu 28:19, 20) Isumana soothene, awo annaakhaviherya achu macikhwi mathanu naxexe omwiiwexexa Piipiliya. Ancipale a yaawo hiyaari Akiristu. Ohuserya weiwo ti wa mahala nave onneeriwano vaate va muchu naari nipuro nikina noophwanelela. Akina annahuserya moorweela wa telefone naari interneti, epharihelaka ekhankoonya.
Ninnoovekaani wi muloce ni Anamoona a Yehova wi musuwele sooleeliherya sincipale vooloca sa mphurelo wa marehereryo yaala. Nyuwaano munahaala woona wi Piipiliya liivuru yoowo onawerya “ohusiha, ovanya sawotha, otxharusa ni ohusiha n’wokololani,” wi nyuwaano mukhale “awakhwanelela ni awireherya wera saphama sothene.”—2 Timóteo 3:16, 17.
Moone eviitiyu Ntakhara Heeni Omuhuserya Piipiliya? mu www.jw.org/ngl
Moone eviitiyu O que é um estudo bíblico? mu www.jw.org/pt
[Ekaaxa va epaaxina 7]
Nikhaviheryo mu jw.org
Munnachuna omuhuserya Piipiliya? Wi mpacerye, muye mu interneti mu jw.org. Site ola ookhalano sooleeliherya sa Piipiliya mu ilocelo soopwaha 700. Munamusiveliwa ohuserya miyaha iha:
Makoho achu anapakaaya
▪ Teevi eri yoolakelela ya okumi?
▪ Ntakhara heeni achu annakhwa?
▪ Tiheeni eneereya muchu akhwa?
(Muye va ENSINOS BÍBLICOS > PERGUNTAS BÍBLICAS RESPONDIDAS)
Miyaha sa muchu mukhateiye
▪ Tiheeni munaphwanelaanyu weera vaavaa munakhalaanyu awuukhuwa
▪ Makacamiho a ikhorowa ni osiyaara
(Muye va ENSINOS BÍBLICOS > PERGUNTAS BÍBLICAS RESPONDIDAS)
Nikhaviheryo wa imusi
▪ Munii nwerye hai ohiya waakhulana
▪ Mukhalelo wa waaphuwa phaama anamwane
▪ Okhalano meecelo aphaama
(Muye va ENSINOS BÍBLICOS > CASAIS E PAIS)
Ikano wa amiravo
▪ Mukhalelo wa osepa okhinyererya opaka mararuwo
▪ Echu yaweera vaavaa munaphuciwaanyu
▪ Mukhalelo wa ovilela ni omeekha
(Muye va ENSINOS BÍBLICOS > ADOLESCENTES)