MWAHA WA EKAAPA | NTAKHARA HEENI OKHALA OOROROMELEYA?

Apwanne ti Yaphaama Okhala Oororomeleya?

“Hiyano ninnupuwela wi murima ahu ti waphama, wona wi ninnakhwela wetxa ni wokololowa mwa sothene.”—Ahebri 13:18.

Mpiipiliya, nsu noopacerya na Ekriki nnataphuleliwa “wokololowa” nnataphulela echu eri yaphaama. Nno tho nnataphulela echu erino makhalelo aphaama.

Akiristu annachariha masu ooveereliwa a murummwa Paulo: “Ninnakhwela wetxa ni wokololowa mwa sothene.” Eyo enaphitaanyerya eheeni?

OWANIHA

Achu ancipale anniivarerya va eweheryo ehaakumve weeca mmapuro awaaciwamo. Ntakhara heeni? Nthowa nawi anachuna woona oreera waya. Nyenya yookhalavo echu yookhweleyaxa opwaha okhalano esipanti naari yoowara evyaani. Opwaha yeeyo, omuchu ahu wa mpuwa onanwerya oreeriha naari onanariha omuchu ahu wa vaate.

Mweeparipari Masu a Muluku annaloca wi nthitimanenle weera yeeyo eri yoonanara. Maphatxuwelo 8:21 enii: “Txhiri ovinya momiravoni murima wa mutxhu onnasiveliwa ni itxhu sonanara”. Mwawiihiiha, naariki nikhale oororomeleya nnaphwanela owaniha ni sooceecheya sahu. Murummwa Paulo ooloca owaniha wawe ni yoocheka aariki: “Mmurimani mwaka miyo kinnahakalala ni nlamulo na Muluku, nto kinnona mwa sammwilini saka nòkhalamo nlamulo nikina nnawana ni miruku saka. Ti yeyo enakikhaliha kapuro a nlamulo na yotxheka nri mwa sammwilini mwaka.”—Aroma 7:22, 23.

Ntoko yootakiherya, moohipwacha waakhanle wi murima ahu naari mathitimanelo ahu a ohiroromeleya sinnanceenyerya weera yoonanara, iho hinnikhinyererya weera yoonanara. Nlelo hiyaano nookhalano yoothanla mmwaha yoowo. Wakhala wi nookhooca muupuwelo woonanara, nnanwerya otitelela okhala oororomeleya naamwi nrukureryiwe ni makhalelo oohiroromeleya.

OVOOTHA

Wi nikhale oororomeleya, ninnachuna meerelo a meecelo oophara muteko. Moothananiha, achu ancipale annamaliha elukuluku yincipale yuupuwelelaka ‘mawarelo’ ohiya wuupuwelela meerelo a meecelo. Ntoko yookhumelela, analoca wi waaceereryeya wa ohiroromeleya onahaala okhwaaniherya yookhwela aya. Liivuru The (Honest) Truth About Dishonesty (Eparipari Vooloca sa Ohiroromeleya) onnaloca ohiroromeleya mmukhalelo ola: “Chiryene, ninnootha ophiyerya mweeryo onaneeriha okhapelela omuchu ahu ntoko achu oororomeleya.” Apwanne nookhalavo nlakiheryo noophwanelela nnahaala onikhaviherya okhala oororomeleya, naamwi ohiroromeleya ori wawunlaana? Chiryene nookhalavo.

Macikhwi a achu orukurerya elapo, ahoona wi Piipiliya onnaphariheleya mmukhalelo yoowo. Piipiliya ookhalano meecelo a vasulu yaawo ahinalikana ni echu ekina. (Salumu 19:7) Piipiliya onnanivaha ohoolela woophwanelela mmiyaha soohiyanahiyana sa okumi, muteko, meecelo, ni makhalelo oomunepani. Piipiliya ookhala mu elukuluku yincipale. Malamulo ni malakiheryo awe annaphariheleya wa maloko oothene, mahimo ni ilocelo. Moorweela wa omuthokororya Piipiliya, wuupuwelela yeeyo onahusiheiye, ni opharihela ikano sawe, nnanwerya ovyakiha murima ahu wi okhale woororomeleya ni wawookololowa.

Tahi wi pahiru nnachuneya nsuweliho neeparipari na Piipiliya wi nivoothe ohiroromeleya. Opwaha soothene, nnakhala mu elapo yoonanara yeeyo enanikhinyererya weemererya meerelo aya oonanara. Ti nthowa neni oryaaya woochuneya ovekela wa Muluku nivekaka nikhaviheryo ni okhapelela. (Filipi 4:6, 7, 13) Moorweela wa weerano hiiha, nnahaala okhala olipa murima wa yeeyo eri yawookololowa nave nnahaala okhala oororomeleya mu ichu soothene.

PHATAMARI A OROROMELEYA

Hitoshi, olociwe omapacereryo wa mwaha, ookhalano mphurelo waphaama nthowa na okhala namalapa oororomeleya. Hiihaano owo onaalapa achu yaawo anathamalela ororomeleya wawe. Hitoshi onnaloca: “kinnathamalela woona wi vano koophwanya muteko yoowo onakeeriha okhalano yawuupuxerya-ya-murima yaphaama.”

Akina annakhalano mukhalelo mmohamoha. Muthokororye sootakiherya ikina sa yaawo anaphura moorweela wa opharihela malakiheryo a Piipiliya ‘yetxaka ni wokololowa mwa sothene.’

Yawuupuxerya-ya-murima Yaphaama

“Miyaano kihin’ye exikola kirino iyaakha 13 sa oyariwa wi kilapeke ni ampava. Ntoko yookhumelela, muhakhu aka muncipale kiphwannye mmukhalelo wa ohiroromeleya. Voocharela, kaatheliwa, nave naapacerya omuhuserya Piipiliya ni Anamoona a Yehova. Naahuserya wi Yehovaa Muluku onniica ohiroromeleya, mwawiihiiha naalakelela otoroka mukhalelo wa okumi ahu. (Masiposipo 6:16-19) Mu eyaakha ya 1990 naaveleela ikumi sahu wa Yehova nave naapatisiwa ntoko Anamoona a Yehova.

“Khalai, empa aka yaasareya ni ichu saphaama sawiiyiwa, nyenya vano eri yootaphuwa ni ichu seiyo; nave eyo ennakeeriha okhalano yawuupuxerya-ya-murima yaphaama. Kaawuupuwelaka iyaakha sincipale ivinre kiri oohiroromeleya, kinnamuthamalela Yehova nthowa na ikharari sawe itokotoko. Enakhala yoohakalaliha oya okona ohiyu ori woothene kisuwelaka wi Yehova vano onnahakalala ni miyaano.”—Cheryl, Irlanta.

“Vaavaa mutokweene aka aasuwenleiye wi kaakhooca makhwankwa a namathuma ookhweleya, owo aaloca wa miyaano: ‘Muluku aa ooweeriha okhala muchu oororomeleya! Ala chiryene mareeliho matokweene wa hiyo okhalano va mutekoni vahu muchu ntoko weyaano.’ Okhala oororomeleya mu ichu soothene onnakeeriha okhalano yawuupuxerya-ya-murima yaphaama vamiithoni va Yehova Muluku. Eyo tho ennakeeriha okhaviherya emusi aka ni akina weerano emohamoha.”—Sonny, Honk Konk.

Murecele wa Mmuupuweloni

“Miyaano kinalapa ntoko mukhaviheryi a nipuro na okuha ikhorowa na okhopela. Mmuteko yoowo, ororomeleya onnaheliwa okhwipi nthowa na ochuna ophwanya muhakhu. ‘Muupuwelo wa wunlaana ti wawi, hiyaavo yoonanara muchu okhala oohiroromeleya vakhaani, wakhala wi eyo ennooruuhela muhakhu’ Nyenya moorweela wa okhala oororomeleya, kookhalano murecele wa mmuupuweloni. Koolakelela otitelela okhala oororomeleya ni ovootha ohiroromeleya ori woothene onahaala okhumelela. Atokweene aka aasuwela wi nkirwa kaawoka naari owootherya.”—Tom, Estatu Unitu

Ncicimiho

“Mutokweene a muteko aka aakiceenyerya wootha elukuluku saarimenlaaya ichu omutekoni, nyenya kaakhooca. Vaavaa aaphwanyiweiye mulipa iiyale, mutokweene aka aakithamalela nthowa na okhala oororomeleya. Okhala oororomeleya mu elapo yeela yoohiroromeleya onachuneya olipa murima. Nyenya yookhumelela, onakhala ororomeliwa ni ocicimihiwa ni akina.”—Kaori, Xapau.

Yawuupuxerya-ya-murima yaphaama, murecele wa mmuupuweloni, ni ncicimiho—mweeparipari ichu iha sinnooniherya okhweleya waya okhala oororomeleya. Nyuwaano himuneemererya?

[Nsu na vathi]