Apwanne Muluku Ookhalano Niphwanya?

TIHEENI NNAHUSERYAAHU MOORWEELA WA MUKHALELO MULUKU ONIPATUNXEIYE?

Atisiyonaario ancipale analoca wi “mukhalelo wa wiihela vanipuroni na muchu mukina ni woona wiicela yoowo owo onooneiye” oniichaniwa niphwanya. Mwawiiwanana ni Totore Rick Hanson, yoowo oniiwexexa malapelo a muupuwelo, olonce wi niphwanya nri munikhamini mwahu, ela tiwi nnamuyariwano.

NKUUPUWELANI: Owerya achu aryaayano wa wooniherya niphwanya onneeriha wi awo ekhala oohiyana ni soopatuxiwa ikina irino ekumi. Ntakhara heeni nryaahuno mukhalelo yoola? Piipiliya onaloca wi Muluku onipatunxe moophwanaphwana ni yoowo. (Maphatxuwelo 1:26) Eyo enataphulela wi Muluku oonivaha makhalelo aphaama yaawo owo oreiyeno. Va nthowa na yeeyo, ninnawerya omutakiherya. Wakhala wi muchu onaathokororya akina onnaweerela ichu saphaama ni waakhaviherya, owo onamutakiherya Mpatuxa ahu Yehova Muluku.—Masiposipo 14:31.

TIHEENI PIIPILIYA ONAHUSIHEIYE?

Muluku onniihela mu nipuro nahu nave hanasiveliwa aanoonaka nihooxeyaka. Ntoko yootakiherya, mmahiku a khalai, Aisarayeli yaahooxeya ntoko akapuro Oyikuputu. Ohoolo waya, awo yaakumana ni makacamiho mancipale mu iyaakha 40 mutakhwani. Piipiliya onnaloca mukhalelo Muluku ooneiye: “Mwa soohoosa saya soothene, iho saanamuhoosatho.” (Isaiya 63:9, Tradução do Novo Mundo.) Tahi wi pahiru onne osuwela sa makacamiho aya, owo tho aanoona wiicela waya. Muluku aaloca: “[koosuwela] okhuwela waya.” (Mukwaha 3:7) Owo tho aaloca: “Muchu yoole oni ootannyeeni, onatannya niitho naka.” (Zakariya 2:8, TNM) Eyo enataphulela wi, vaavaa muchu onanihooxeiye, Muluku tho onnahooxeya.

Akhweya, nyuwaano munniithoriha mukhatiinyu nave munoona wi hamunaphwanela waakhela osivela wa Muluku. Nyenya Piipiliya onnanilipiha ariki: “Muluku t’ori mutokwene opwaha murima ahu, ni òsuwela sothene.” (1 Yohani 3:19, 20) Muluku onisuwela phaama opwaha hiyaano mukhatiihu. Owo oosuwela ichu soothene nnakumanaahuno, moonelo ahu ni muupuwelo ahu. Muluku onniihela mu nipuro nahu ophiyerya anawerya woona wiicela wahu.

Piipiliya onnanroromeliha

• “Hiihaatho, onarwa wiichana nave Yehova onarwa awaakhula; Wakhuwela, owo onarwa aloca ‘Miyo kiri va!’”—ISAIYA 58:9, TNM.

• “Miyano, Apwiya, kosuwela phama sa nyuwano. Nkinotha. ltxhu kinupuwelaka tahi sawohosani ntakhara kinatxhuna wovahani muretxele mahiku ammwahiyu. Vanonto munamukitxhana ni munamukivekela, miyano kinan’wiwani.”—YEREMIYA 29:11, 12.

• “Munnalokoha otchawatchawa waka: Khapelelani mithori aka mwitchupa anyu; Hekhalaru m’livro mwanyu?”—SALUMU 56:8, NLAKANO NAHIHANO.

MULUKU ONNANIIWEXEXA NAVE ONNOONA WIICELA NNOONAAHU

Ntoko nimanlaahu woona, Muluku ookhalano niphwanya. Apwanne osuwela yeeyo enamunikhaviherya ovootha makacamiho ahu? Moone yeeyo yeeren’ye ni Maria.

“Mwanaka aakhwile arino iyaakha 18, amanle ohooxeya mu iyaakha piili nthowa na ereca ya kanser. Kaapacerya wuupuwela wi ekumi tahi yeekhaikhai nave ti yoovila. Kaatepa onyeenyeya ni Yehova nthowa na ohimpenuxa mwanaka!

“Ivinrevo iyaakha thanu nammoha, kaamuleela nthamwene a mmulokoni mwaka mukhalelo koonaaka. Kaaloca ni yoowo wi Yehova haarino osivela wa miyaano. Owo aahooniherya wi aanakisivela ni okipwacha. Naamwi kaamalinhe elukuluku yincipale kilocaka, owo aakhala oomaaleleya ni okiwiriyana, nave aaromola yoorepa yeeyo yaatannyile murima aka. Yaari yoorepa ya 1 Yohani 3:19, 20, yeeyo eni: “Muluku t’ori mutokwene opwaha murima ahu, ni òsuwela sothene.” Nave voocharela aaloca wi Yehova onniiwexexa ohooxeya waka.

“Naamwi hiiha, waari woovila ohiya onyeenyeya waka! Elukuluku yeeyo kaahaalakhanya yoorepa ya Salumu 94:19, yeeyo eni: ‘Sotxhuna saka sakhala sintxipale, mahakalaliho anyu annakiriryiha murima.’ Yakhala ntoko wi yoorepa ela erempwe xaxaxa wa miyaano! Moovira wa elukuluku, kaawerya omuleela Yehova makacamiho aka. Keenraakano yeeyo kaataphuwa, kanaroromela wi owo onnakiwiriyana ni okiiwexexa.”

Ti yaphaama osuwela wi Muluku onnaniiwexexa nave onnoona wiicela nnoonaahu! Nyenya, orivo hiiha, ntakhara heeni aakhalavo makacamiho mancipale? Apwanne Muluku onamanlaka nthowa na soohesa sahu? Apwanne owo onahaala weeravo echu wi amalihe makacamiho? Makoho yaala anahaala waakhuliwa mu miyaha inacharela.