Anna Amiravo, Munniilipixerya?
1. Ti liini munna mmiravo onaphwaneleiye opacerya opharihela yoohoolela enaphwanyeya mu 1 Timoteo 3:1?
1 “Mutchu átchunaka . . . onnakhwela muteko waphama.” (1 Tim. 3:1, 2) Masu ala ooveereliwa annaalipiha anna wi yiilipixerye wi ephwanelele mirici mmulokoni. Munaphwanela wunnuwa wi mweereno hiihaa? Chiryene, ti yaphaama opacerya wiilipixerya nlelo muri mmiravo. Mmukhalelo yoowo munanwerya ovyakihiwa ni wooniherya ophwanelela wi mwannuwa muthanliwe ntoko murummwa oorumeela. (1 Tim. 3:10) Wakhala wi mwa mmiravo oopatisiwa, munii muwerye hai wiilipixerya?
2. Muchu onawerya hai okhalano ni wooniherya munepa wa wiiveleela?
2 Wiiveleela: Muupuwele wi muniilipixerya wi mphare muteko waphaama, ohiya nsina. Mwawiihiiha, mukhaleno ochuna wi mwaakhaviherye anna ni arokora anyu. Mukhalelo mmoha wa weerano hiihaa ori wuupuwelela yootakiherya yaphaama ya Yesu. (Mat. 20:28; Yoh. 4:6, 7; 13:4, 5) Mumveke Yehova wi ookhaviheryeni wi munaapwacha akina. (1 Akor. 10:24) Mwanwerya waakhaviherya yaale a mmulokoni ari awunnuwela nari awiiceliwa? Munniiveleela mukhatinyu wi mukwase malaxi, okumiha maralala, nari othokororya makhalelo makina a orehererya Empa ya Omwene? Mwanwerya wiiveleela wi mperekhe mwaha wooraceela mu Exikola ya Orummwa WooMuluku? Munahaala woona wi wiiveleela mukhatinyu wi mwaakhaviherye akina onahaala wooruhelaani ohakalala.—Saw. 20:35.
3. Ti mwawiihai mukhalelo woomunepani oryaaya wookhweleya, nave muchu onawerya hai okhalano?
3 Mukhalelo Woomunepani: Ti wookhweleyaxa wa kapuro mmulokoni okhalano mukhalelo woomunepani ohiya okhalano osuwela wavameekhaaya nari owerya wooyariwano. Muchu oomunepani onneererya woona ichu hiihaa ntoko Yehova ni Yesu anoonaaya. (1 Akor. 2:15, 16) Owo onnooniherya “yawima ya munepa.” (Akal. 5:22, 23) Owo mulaleeryi a mvai onahela sookhwela sa Omwene va nipuro noopacerya. (Mat. 6:33) Nyuwano mwakhalano yookhovelela ya yoohuserya ya muchu mukhateiye munanwerya wunnuwiha mikhalelo soomunepani. Eyo yaahaala ophitaanyerya omwaalakhanya Piipiliya mahiku oothene, waalakhanya irevista A Sentinela ni Despertai!, orehererya ni ophiya mithukumano sa muloko. (Sal. 1:1, 2; Ahe. 10:24, 25) Amuceenyeryaka mmiravo Timoteo wi aye vahoolo mmukhalelo woomunepani, Paulo aarepa: ‘Owehererye . . . mahusiheryo aa.’ (1 Tim. 4:15, 16) Mwawiihiiha mulape mwakuru mu miyaha anyu mu Exikola ya Orummwa WooMuluku. Murehererye orummwa wanyu, nave munalaleerya moohihiyererya. Mukhaleno soolakelela soomunepani ntoko opiyoneero, muteko wa Beteli, nari ovolowa Exikola ya Piipiliya ya Anna Oohithela. Mukhalelo woomunepani onahaala wookhaviheryaani ‘otchawa minkhela yomiravo.”—2 Tim. 2:22.
4. Tiivi eri esisapo ya okhala oororomeleya?
4 Okhala Oororomeleya: Woona wi anna yaawo yaathanliwe wi ekawe yoolya wa aKiristu oothoiwa mu nsana noopacerya yaakhalano “ovuwa worera,” mwawooneya yaasuweliwa ntoko oororomeleya, arummwa hiyaari awoova wakhala wi muteko owo waahaala weeriwano. Eyo yaaheeriha wi arummwa ethokororye miyaha mikina sookhweleya. (Saw. 6:1-4) Mwawiihiiha, vaavaa munavahiwaanyu muteko mmulokoni, munaphara ni owerya wanyu woothene. Mmutakiherye Noowa, yoowo aachariha phaama sooleliherya aavahiweiye wi ateke mwaaceya. (Map. 6:22) Okhala oororomeleya ti wa esisapo vamiithoni va Yehova nave onnooniherya wiichwa mmunepani.—1 Akor. 4:2; moone ekaaxa “Mphurelo wa Ovyakiha.”
5. Ntakhara heeni anna amiravo annaphwanela wiilipixerya?
5 Ntoko eloheryiwaaya, Yehova onnaakuviha muteko wa othukumanya. (Yes. 60:22) Waalakhanyerya, achu macikhweene annapatisiwa khata eyaakha. Vawoona wi ancipale avyaani annavolowa mu eparipari, alopwana oomunepani oophwanelela annachuneya wi ethokororye mirici mmulokoni. Olelo, opwaha khalai, wookhalavo muteko muncipale wi neere mmuteko wa Yehova. (1 Akor. 15:58) Anna amiravo, munniilipixerya? Wakhala wi munniilipixerya, munnachuna chiryene muteko wookhweleya vancipale!
[Yooleeliherya va epaaxina 2]
Vawoona wi ancipale avyaani annavolowa mu eparipari, alopwana oomunepani oophwanelela annachuneya wi ethokororye mirici mmulokoni.
[Ekaaxa va epaaxina 3]
Mphurelo wa Ovyakiha
Anna amiravo oophwanelela annaphura vaavaa mansiau anavahaaya miteko ni waavyakiha. Ooweherya esirkwitu aari mukiraathi o palku amulipixaka mulaleeryi, omanle muthukumano. Ooweherya esirkwitu aahimoona mmiravo eemenle vakhiviru, nave aamukoha wakhala wi aawehererya wi aloceno. Munna mmiravo aahaakhula wi aavahiwa muteko wa ovela o palku wamala muthukumano ori woothene. Asitiithi awe yaachuna orowa, nyenya owo haachuna orowa ahiphanre muteko awe. Ooweherya esirkwitu moohakalala aakhumavo. Owo aahiloca: “Mansiau mmulokoni yaanavarerya wi yaavyakihe anna amiravo oophwanelela moorweela wa waavaha miteko mmulokoni. Ntoko yookhumelelavo, hiyaari yoovila wa yaawo omuthanla munna mmiravo wi akhale murummwa oorumeela vaavaa kaarumeelaaka muloko owo.”