Wunnuwiha Mavyakelo Ahu mu Orummwa—Ovaha Onamoona wa Muchu Onaloca Elocelo Ekina
Ntakhara Heeni ti Yoochuneya: Yehova onnapwacha okhala phaama woomunepani wa achu “m’maloko othene.” (Saw. 10:34, 35) Mwawiihiiha, Yesu aahooniherya wi Michaka sa phaama sahaala olaleeryiwa “wa atchu a maloko othene.” (Mat. 24:14) Sakariya aaloherya wi achu “a ilothxelo sòhiyana-hiyana yaahaala waakhulela.” (Zak. 8:23, BNM) Mwawiiwanana ni ya miririmo ya murummwa Yohane, yaale anahaala ovuluwa mu yoohooxa etokotoko anahaala ophitaanyerya achu a “maloko othene, ni mahimo, ni atchu, ni ilochelo.” (Yaw. 7:9, 13, 14) Mwawiiwanana ni yoorepa ela, vaavaa nnamphwanyaahu muchu mu ekulucu ahu onaloca elocelo ekina, nnaphwanela wiilipixerya omvaha onamoona.
Mukhalelo wa Weerano Yeela:
• Mukhale ooreheryeya. Mukuxe mmurupa mwanyu wa olaleerya efolyeto Boas Novas para Pessoas de Todas as Nações. Mwiikhovelelihe ni sooleeliherya sirino muru “Como ajudar quem fala outra língua,” inaphwanyeya omapacereryo wa efolyeto. Mwiirehererye woosiilo wa ilocelo munahaalaanyu ophwanya, nave mukumihe eviitiyu naari yoolaleeryiwa mu ilocelo seiho mu jw.org wi moonihe mu ekhankoonya anyu. Muthokororye mmupharihelaka JW Language app wi muhuserye masu vakhaani. Wakhala wi miloko sa ilocelo soohiyana sinalaleerya mu ikulucu sawaacamana, mukuxe pahiru soolaleeryiwa sa elocelo ya muloko anyu vaavaa munayaanyu mmuteko wa empa ni empa. Mwawiihiiha, vaavaa munavahaanyu onamoona wa vanlakani mu ikulucu sa ilocelo sincipale, mukhaleno soolaleeryiwa sa ilocelo sa achu munahaalaanyu waaphwanya.
• Vaavaa munamphwanyaanyu muchu ohinaloca elocelo anyu, mwiilipixerye wi muuke “sotikiniha sa Muluku” mu elocelo awe. (Saw. 2:11, BNM) Mmoonihe jw.org wi akhaleno sooleeliherya sincipale mu elocelo awe. Wakhala wi owo ohooniherya nchuno, mwawaakuveya mpake yoorepela Queira Visitar (S-43) nave mveleele wa namarepa a muloko. Mutitelele waaceererya nchuno na namakhala ophiyerya orwa mulaleeryi onaloca elocelo awe.
Mweererye Ela Variyari va Mweeri:
• Mu ohiyu wa malapelo anyu a echoko anacharela, mukhaleno makupa oophara muteko, mvahaka onamoona wa muchu ohinaloca elocelo anyu.