Makoho a Ekaaxa

◼ Alaleeryi anaphwanela ompharihela interneti wi evahe onamoona naari wi ehuserye ni muchu onakhala elapo ekina?

Alaleeryi akina annampharihela interneti wi ekhaleno soohuserya sa Piipiliya mu ilapo muteko ahu oryaaya woowatiihiwa naari oriwo alaleeryi vakhaani. Mmukhalelo mukina, sinnakhalavo sookhumelela saphaama. Naamwi hiiha, ori wawoopiha vaavaa mulaleeryi onavonyeiye michaka naari email wi aloce ni muchu a elapo ekina. (Moone Orummwa Wahu wa Omwene Yulyu a 2007, epaax. 3.) Woona wi interneti ori awaaceliwa ni achu anachuna osuwela michaka sa Omwene hiiha munna naari murokora onanwerya okhalano onthamwene woonanara naari waataana ni oomwaryeya. (1 Akor. 1:19-25; Akol. 2:8) Opwaha yeeyo, mu ilapo muteko wa Omwene oryaaya woowatiihiwa, michaka inanwerya ovonyeriwa alamuleli. Ovaanela wuuwu onanwerya waahela anna a nipuro nenle va yawoopiha. Mwawiihiiha, alaleeryi hanaphwanela waavya oloca ni muchu a elapo ekina wi elaleerye michaka saphaama.

Waahikhala wi nihooleliwe ni efiliyale ya vanipuroni, namvaha onamoona woohilakelela muchu onaxekurya arweelaka elapo ekina, hannaphwanela waaceererya nchuno nawe amanle orowa, nyenya nnaphwanela omooniherya mukhalelo wa ompharihela jw.org wi aphwanye miyaha sawaaceererya naari mukhalelo wa oloca ni efiliyale. Nnaphwanela tho omuceenyerya owo wi axekurye Empa ya Omwene eri vakhiviru vawe. Nyenya, ilapo ikina hisaamo Ipa sa Omwene. Wakhala wi, onnachuna oxekuryiwa ni mmoha a anamoona a vanipuro nnaphwanela opaka yoorepela Queira Visitar (S-43) nave niveleele wa namarepa a muloko, owo onahaala orumiha ampharihelaka jw.org. Efiliyale enaweherya muteko wa elapo yeeyo anakhalawo muchu oonihenrye nchuno aasuwela phaama mukhalelo wa elapo eyo nave enahaala ovaha nikhaviheryo noomunepani.​—Moone Orummwa Wahu wa Omwene Yunyu a 2014, epaax. 7, ni Orummwa Wahu wa Omwene Novempuru a 2011, epaax. 2.

Wakhala wi muchu nnamuxekuryaahu oothaamela elapo ekina naari wi nnahuserya ni muchu a elapo ekina nimusuwenlaahu pahiru mu interneti, nnaphwanela ochariha sooleeliherya inacharela. Nyenya, nnaphwanela otitelela waaceererya nchuno nawe ophiyerya mulaleeryi a vanipuro owerya weerano hiihaa. Naamwi hiiha, wakhala wi muchu onakhala elapo yeeyo muteko ahu oryaaya woowatiihiwa, nnaphwanela okhala awiikasopa vaavaa nnalocaahu michaka sa Mpiipiliyani orweela wa ekaarata, telefone, naari email.​—Mat. 10:16.