Wunnuwiha Mavyakelo Ahu mu Orummwa—Mwaavyakihe Oohuserya a Piipiliya Okhalano Yookhovelela Yaphaama ya Ohuserya
Ntakhara Heeni ti Yoochuneya: Wi ewerye wunnuwa omunepani, oohuserya a Piipiliya anaphwanela ohela masuwelelo mmuupuweloni ni mmurimani mwaya ohiya pahiru mahusiheryo ookhweya a Masu a Muluku. (Ahe. 5:12–6:1) Oohuserya onaphwanela wiilipixerya. Ela enavolowela wiiwananiha miyaha mivyaani ni seihe aasuwenleiye khalai nave wuupuwelela mukhalelo wa opharihela muteko. (Masi. 2:1-6) Ohuserya opaka otholathola mukhateiye onahaala omukhaviherya oohuserya ovaha maakhulo a makoho a Mpiipiliyani apharihelaka ikaruma sahu. Wiilipixerya iwo wa weera ichu mwawiiwanana ni yeeyo onahusereiye enahaala omukhaviherya okhala oolipa vaava onakumaneiye ni makacamiho ntoko Mukiristu.—Luka 6:47, 48.
Mukhalelo wa Weerano Yeela:
• Muthokororye ochuneya waya oveka nikhaviheryo na Yehova moorweela mu nivekelo muhaakumve opacerya yoohuserya.—Yoh. 14:26; 1 Kor. 2:10.
• Woopaceryani, muthokororye ni oohuserya anyu wi ti ya mphurelo wiirehererya ehaakumve yoohuserya ya Piipiliya. Mmoonihe liivuru anyu, nave mmuhusihe mukhalelo wa omuceka naari othokororya masu oochuneyaxa.
• Mmukhaviherye oohuserya anyu, wi avaheke maakhulo a makoho apharihelaka masu awe. Musepe okhala oohakalala ni maakhulo oohuserya onavaheiye moorweela wa waalakhanya xaxaxa yeeyo erempwe mu liivuru onamuhuseryeiye.
• Mmuceenyerye oohuserya anyu omwaalakhanya Piipiliya nihiku nnihiku. Mmoonihe yoochariha ya waalakhanyiwa wa Piipiliya mu jw.org naari mu Mulipeleli, a eekuhya a 1 a Akostu 2009, ipaaxina 15-18, aarino miyaha soophara muteko yeeyo oohuserya onaphwaneleiye weera. Okhalano yookhovelela ya omwaalakhanya Piipiliya nihiku nnihiku onachuneya wiilipixerya, nyenya wiilipixerya iwo onahaala oruha mphurelo.—Sal. 1:2, 3.
• Mmoonihe oohuserya anyu ti mwawiihai owo onahaaleiye ophwanya maakhulo a makoho a Mpiipiliyani ampharihelaka Watchtower Library, Watchtower ONLINE LIBRARY naari Guia de Pesquisa. Mmukhaviherye mukhalelo wa osuwela ineneeryo sa soolaleeryiwa seiho inaphariheliwa wiiliwiili mmithukumano sahu.
Mweererye Ela Variyari va Mweeri:
• Omakuchuwelo wa mwaha, mmukohe oohuserya anyu a Piipiliya wi aloce mookwasa yeeyo ohusenryeiye. Wakhala wi himwaano oohuserya, mwiivyakihe mukhatinyu mulocaka mookwasa makupa a Piipiliya naari makupa a Mulipeleli mmasu vakhaani wi mwaaceererye waalakhanya ni wiiwexexa wanyu.