Wunnuwiha Mavyakelo Ahu mu Orummwa—Omvaha Liivuru Piipiliya Onahusiha
Ntakhara Heeni ti Yoochuneya: Liivuru Piipiliya Onahusiha ekaruma yoochuneya ya ikaruma sahu sa ohusiha. Mwawiihiiha, nihaakumve opacerya ohuserya ni muchu, liivuru ola onaphwanela okhala ni yoowo. Mwa yeeyo, oothene nnaphwanela wiilipixerya okhalano mavyakelo a omvaha liivuru Piipiliya Onahusiha mu orummwa. (Masi. 22:29) Aakhalavo meerelo mancipale, nave alaleeryi anaphwanela opharihela yaawo ari a mphurelo wa yaawo.
Mukhalelo wa Weerano Yeela:
• Mpake nikoho noochuneya nenlo nnahaala wookhaviheryaani othokororya mwaha ni namakhala mu liivuru. Akhweya enahaala okhala yaphaama othanla makoho ari woopaceryani wa mwaha. Mmanle owiriyana naakhulo na namakhala, mwaalakhanye yoorepa yoophwanelela, mmoonihe eparakrafo enaakhula mwaha nave muthokororye mwawaakuveya vamoha.
• Meerelo makina, ori opharihela makoho ari woopaceryani wa liivuru wi mutannye nchuno na namakhala nave voocharela mmoonihe nikupa na liivuru nnavaha naakhulo na Mpiipiliyani. Ntoko yootakiherya, munaphwanela oloca epahu yeeren’ye hiihaanoru naari elociwe mu raatio nave muloce wi ancipale annaavya maakhulo a makoho anaphwanyeya va epaaxina 3. Naari muloce: Nnaaxekurya amwaacamani wi nloce sa omwaahiyu woohakalaliha. Mmoonihe iruku inaphwanyeya va ipaaxina 4-5 nave mmukohe: “Mareeliho taani mwaachunaanyu woona yaakhwanenle?” Mukhalelo mukina ori oloca wi nnaaxekurya achu mwawaakuveya wi naakhaviherye ophwanya maakhulo a makoho matokotoko a okumi. Voocharela mmoonihe namakhala makoho anaphwanyeya va epaaxina 6, nave mmukohe tinivi onachuneiye osuwela naakhulo naya.
• Mpake mathipelo a opaceryiha yoohuserya ya Piipiliya. Akhweya muloce: “Nnawooniha amwaacamani ahu ekaruma ela ya omuhuseryano Piipiliya. Montoko omoona liivuru yoola? [Nweherye naakhulo.] Wakhala wi mookhalano elukuluku vakhaani, kaanachuna wooniherya mukhalelo wa weerano yeeyo nimpharihelaka Piipiliya anyu.”
Mweererye Ela Variyari va Mweeri:
• Mwiivyakihe variyari va malapelo anyu a echoko.
• Mu orummwa, muloce ni nthamwene anyu echu munayaanyu oloca. (Masi. 27:17) Mutoroke mapaceryiho anyu wakhala wi haano mphurelo.