“Muupuweleleke Ichu Iha”

Ichu taani? Yoorepa ya Filipi 4:8 enaloca wi nuupuweleke ichu seiho iri seeparipari, soothene iri saphaama, sawookololowa, sooreera, sookhweleya, inavuwa mooreera, saweela ni soocicimiheya. Ela henataphulela wi Akristu anaphwanela ilukuluku soothene wuupuwelaka sa Piipiliya pahi. Nyenya, ichu seiho nnathanlaahu wuupuwelaka inaphwanela omucicimihaka Yehova. Hannaphwanela wuupuwelaka ichu inahaala onanariha ororomeleya wahu wa yoowo.—Sal 19:14.

Onamukhala woovila osepa mawuupuwelo oothene oonanara. Nnaphwanela owaniha ni ohiphaameya wahu vamoha tho ni osepa ovoloweliwa ni Satana yoowo ori “muluku eelukuluku yeela ya mutano.” (2Kor 4:4) Woona wi ti yoowo onalamula elapo, ichu sincipale inavuwihiwa mu TV, mu raatiyu, mu interneti, naari mu aliivuru inahooleliwa ni yoowo. Wakhala wi hinnathanlela ichu nnahelaahu mmuupuweloni mwahu, muupuwelo ahu onahaala wuutuweleya, nave moovira wa elukuluku onahaala ovolowela mukhalelo wa weerano ichu sahu.—Tiy 1:14, 15.

MOONE EXILEMA MUSEPE YEEYO ENAPAHULA OROROMELEYA—MATHATELO OOHIPHWANELELA, NAVE VOOCHARELA MWAAKHULE MAKOHO ALA:

• 

  Tiheeni munna ooneiye mu telefoni mwawe, nave eyo yamvolowenle hai?

• 

  Ti mwawiihai yoorepa ya Galasya 6:7, 8 ni Salumu 119:37 yaamukhavihenryaaya?