Muchu ti Muchu Mmulokoni, Onanwerya Waakhaviherya Oohuserya a Piipiliya wi Epatisiwe

1-2. Taani onaphwanela omukhaviherya oohuserya a Piipiliya oya vahoolo ophiyerya opatisiwa?

AMY yoowo onakhala o Fixi aaloca: “Kaanasiveliwa ni yeeyo kaahuseryaaka mu yoohuseryaaka ya Piipiliya. Kaanasuwela wi yaari eparipari. Nyenya vaavaa kaapacenryaaka omaliha elukuluku ni anna ni arokora, yaakikhaviherya opaka matorokelo ophiyerya opatisiwa.” Yaweereya ya Amy ennanihusiha echu yoochuneyaxa: Oohuserya a Piipiliya onahaala oya vahoolo ophiyerya opatisiwa vaavaa onaakheleiye nikhaviheryo na akina a mmulokoni.

² Mulaleeryi ti mulaleeryi onanwerya waakhaviherya oohuserya a Piipiliya opaka makupa a muloko. (Éfe. 4:16) Piyoneera oniichaniwa Leilani, yoowo onakhala o Vanuatu, ooloca nsiposipo nni: “Muchu ti muchu vamucecheni onnakhaviherya wunnuwa wa mwaana. Kinoona wi ela tho ennaphariheleya vaavaa nnaapakaahu oohuserya; ninnachuneya nikhaviheryo na oothene mmulokoni wi muchu avolowe mu eparipari.” Asitiithi, amusi, asinthamwene, ahusiha oxikola, annamukhaviherya mwaana wunnuwa ophiyerya okhala mutokweene. Awo anneerano yeela moorweela wa omulipiha mwaana ni omuhusiha mahusiheryo oochuneya. Moolikana, alaleeryi ananwerya waahusiha, waalipiha, ni wooniherya yootakiherya yaphaama wa oohuserya a Piipiliya, yaakhaviheryaka oya vahoolo wi epatisiwe.—Masi. 15:22.

3. Tiheeni muhusenryaanyu ni masu alociwe ni Ana, Dorin, ni Leilani?

³ Ntakhara heeni mulaleeryi yoowo oneeciha yoohuserya ya Piipiliya onnaphwanela othamalela nikhaviheryo nenlo alaleeryi akina a mmulokoni anamvahaaya oohuserya? Moone yeeyo Ana, yoowo ori piyoneera avameekheiye o Moldova, olonceiye: “Enakhala yoovilasa muchu mmoha okhwaaniherya nchuno na oohuserya a Piipiliya vaava onapaceryeiye oya vahoolo.” Dorin, yoowo ori piyoneera avameekheiye onarumeela mu elapo emohamoha, ooloca: “Chiryene, alaleeryi akina annaloca echu yeeyo enatannya murima wa oohuserya, echu yeeyo kihintonkwaaka wuupuwela.” Leilani oothariha tho echu ekina: “Vaavaa oohuserya a Piipiliya onooneiye osivela ni opwacha yoowo onooniheryiweiye ni anna ni arokora akina, ennamukhaviherya wiiwexexa wi chiryene hiyaano naachu a Yehova.”—Yoh. 13:35.

4. Tiheeni nnahaalaahu othokororya mmwaha yoola?

⁴ Akhweya munniikoha, ‘Tiheeni kinaphwanelaaka weera wi kimukhaviherye oohuserya a Piipiliya oya vahoolo naamwi kiheecihaka yoohuserya ya Piipiliya?’ Hankooni nthokororye yeeyo nnaphwanelaahu weera, vaavaa muchu onaniwopeiye wi neecihe yoohuserya awe ya Piipiliya, nave tho vaavaa oohuserya a Piipiliya onapaceryeiye ophiya mmithukumano. Nnahaala tho woona mukhalelo atokweene eneeraaya emukhaviherye oohuserya a Piipiliya oya vahoolo ophiyerya opatisiwa.

VAAVAA MUNAWOMPWAANYU WI MUKHALE VA YOOHUSERYA YA PIIPILIYA

5. Tiheeni munaphwanelaanyu opaka vaavaa munawompwaanyu va yoohuserya ya Piipiliya?

⁵ Va yoohuserya ya Piipiliya, muhusiha torino murici mutokweene wa omukhaviherya oohuserya awe wiiwexexa Masu a Muluku. Vaava muhusiha onoowopeiyeeni ntakhara yoohuserya awe, nyuwaano munaphwanela wiisoonaka ntoko mukhaviheryi awe. Murici anyu ori omukhaviherya yoowo. (Ekle. 4:9, 10) Nyenya tiheeni munaphwanelaanyu weera wi mukhale mukhaviheryi aphaama variyari va yoohuserya ya Piipiliya?

6. Vaavaa munawompwaanyu va yoohuserya ya Piipiliya, muni mpharihele hai nlakiheryo nnaphwanyeya mu Masiposipo 20:18?

⁶ Mwiirehererye ntakhara yoohuserya ya Piipiliya. Yoopacerya, mumveke muhusiha wi ooleeleeni savakhaani vooloca sa mulipa oohuserya. (Mwaalakhanye Masiposipo 20:18.) Munanwerya omukoha: “Tiheeni musuwenlaanyu vooloca sa oohuserya? Mwaha taani munayaanyu ohuserya ni yoowo? Tiheeni munachunaanyu wi oohuserya anyu ahuserye va yoohuserya yeela? Yookhalavo echu vyakala kinaphwanelaaka naari kihinaphwanelaaka weera naari oloca variyari va yoohuserya? Kini kimuceenyerye hai oohuserya wi aye vahoolo?” Mwawooneya, muhusiha hanahaala wooleela miyaha soovitheya vooloca sa oohuserya, nyenya yeeyo onahaaleiye wooleelaani enamookhaviheryaani vancipale. Misiyonaariya mmoha awiichaniwa Joy onnaaleela ichu soothene seiha yaale anamuhoola wa yoohuserya awe ya Piipiliya. Owo ooloca: “Sooleeliherya seiha sinnamukhaviherya nthamwene aka okhalano nchuno ni oohuserya ni osuwela echu yooloca variyari va yoohuserya.”

7. Ntakhara heeni munnaphwanela wiireherya wakhala wi moowompwa ntakhara yoohuserya ya Piipiliya?

⁷ Wakhala wi nyuwaano moowompwa va yoohuserya ya Piipiliya, enamukhala phaama wiireherya ntakhara mwaha yoowo onaya othokororyiwa. (Esd. 7:10) Dorin, munna yoowo olociwe woopaceryani, oriye: “Kinnathamalela vancipale vaavaa nthamwene aka oniirehereryeiye ntakhara yoohuserya. Ntakhara wi owo onanwerya ovahererya miyoonelo soophara muteko.” Mwawaaceererya, oohuserya onanwerya woona wi oopiili anyu mohiirehererya phaama, nave eyo enahaala okhala yootakiherya yaphaama wa yoowo. Naamwi muhiwenrye wiireherya phaama ntakhara yoohuserya, munanwerya omaliha elukuluku wi musuwele iponto soochuneya.

8. Muni muroromele hai wi nivekelo munapakaanyu variyari va yoohuserya ya Piipiliya nookhalano yootaphulela?

⁸ Nivekelo, echu yoochuneya wa nikupa ti nikupa na yoohuserya ya Piipiliya. Mwawiihiiha, muupuwele yeeyo munahaalaanyu oloca wakhala wi nthamwene anyu ohoovekaani wi mpake nivekelo. Voocharela nivekelo nanyu nnahaala okhalano yootaphulela. (Sal. 141:2) Hanae, yoowo onakhala o Xapau, onnuupuwela mavekelo yaapakiwa ni murokora yoowo aamuhoola muhusiha awe a Piipiliya. Owo oriye: “Kaanoona wi owo aakhalano onthamwene woolipa ni Yehova, nave kaanachuna kikhanle ntoko yoowo. Nave tho kaanoona wi aanakisivela vaavaa aaromoleiye nsina naka mmavekelo awe.”

9. Mwawiiwanana ni Tiyako 1:19, tiheeni munaphwanelaanyu weera wi mukhale mukhaviheryi aphaama va yoohuserya ya Piipiliya?

⁹ Mmukhaviherye muhusiha variyari va yoohuserya. Murokora awiichaniwa Omamuyovbi, onarumeela ntoko piyoneera avameekheiye o Nixeriya, ooloca: “Nthamwene onnawiriyana phaama variyari va yoohuserya nave onnakhaviherya moophwanelela nyenya hanaloca vancipale, woona wi owo onnasuwela wi muhusiha torino murici wa weeciha yoohuserya.” Mwawiihiiha elukuluku taani munaphwanelaanyu oloca echu, nave muni muloce hai? (Masi. 25:11) Muwiriyaneke phaama vaavaa muhusiha ni oohuserya analocaaya. (Mwaalakhanye Tiyako 1:19.) Pahiru mweerano hiiha munanwerya okhala ooreheryeya wi mukhaviherye mu elukuluku yoophwanelela. Mweeparipari, munaphwanela wuupuwelela phaama muhaakumve oloca. Ntoko yootakiherya, nyuwaano himunaphwanela oloca vancipale, omukwatelela muhusiha vaavaa onathariheiye echu ekina, nave tho himunaphwanela oloca echu ehiniiwanana ni mwaha yoowo. Nyenya ni masu awaakuveya, niphwanaphwaniho, naari nikoho, munanwerya okhaviherya wi mwaha wiiwexexeya phaama. Ilukuluku ikina, munanwerya woona wi hamunaphwanela oloca echu va yoohuserya. Nyenya wakhala wi moomuthamalela oohuserya nave mooniherya wi munnampwacha, munawerya omukhaviherya oya vahoolo.

10. Ti mwawiihai yaweereya anyu eneeraaya emukhaviherye oohuserya a Piipiliya?

¹⁰ Muloce yaweereya anyu. Wakhala woophwanelela, mwawaakuveya munanwerya omuleela oohuserya mukhalelo muhusenryaanyu eparipari, mukhalelo mvoonthaanyu saweeha, naari tho mukhalelo Yehova ookhavihenryeiyeni mookumini mwanyu. (Sal. 78:4, 7) Yaweereya anyu enanwerya okhala echu yeeyo oohuserya onachuneiye wiiwa. Eyo enanwerya olipiha nroromelo nawe naari oya vahoolo wi apatisiwe. Nave tho enanwerya omooniherya mukhalelo oneereiye avoothe makacamiho yaawo onahooleleiye. (1 Ped. 5:9) Gabriel, yoowo onakhala o Prasili nave onarumeela ntoko piyoneero, onnuupuwela yeeyo yaamukhavihenrye vaavaa aamuhuseryeiye Piipiliya. Owo ooloca: “Vaavaa kiiwaaka saweereya sa anna, kaanahuserya wi Yehova onnoona makacamiho yaawo nnahoolelaahu. Nave waakhanle wi awo yaavootha, mi tho kinanwerya ovootha.”

VAAVAA OOHUSERYA A PIIPILIYA ONAYEIYE MMITHUKUMANO

11-12. Ntakhara heeni ninnaphwanela omwaakhela phaama oohuserya a Piipiliya yoowo onaphiya mmithukumano?

¹¹ Wi oohuserya a Piipiliya aye vahoolo ophiyerya opatisiwa, owo onaphwanela ophiyaka mmithukumano sa muluku moohihiyererya navetho okumihavo mphurelo. (Ahe. 10:24, 25) Akhweya, muhusiha awe onammuwopa wi aphiye mmithukumano mu ekwaha awe yoopacerya. Vaavaa onaphiyeiye mmithukumano, oothene ahu, nnanwerya omuceenyerya wi atitelele ophiyaka mu Empa ya Omwene. Nni neereno hai yeela?

¹² Mmwaakhele phaama oohuserya. (Aro. 15:7) Wakhala wi noomweeriha oohuserya wiisoona okhala awaakheliwa phaama mmithukumano, onahaala otitelela orwaaka mu Empa ya Omwene. Ohiya oomweeriha okhala awuukhuwa, mumvahe mooni moohakalala, nave tho mmusuwanyeihe wa akina. Muloce ni yoowo, wakhala wi muhusiha awe haakumve ophiya naari wakhala wi ooweiwa ni ichu ikina mu Empa ya Omwene. Nave muwiriyaneke phaama yeeyo oohuserya onaloceiye, nave mooniherye ompwacha. Ti mwawiihai ompwacha wanyu oohuserya oneeraaya omukhaviherye? Moone yaweereya ya Dmitrii, yoowo opatisiwe mu iyaakha sahiihaanoru nave vano ori murummwa oorumeela. Uupuwelaka sa ekwaha awe yoopacerya mmithukumano, owo oriye: “Munna mmoha aakoona kiri awuukhuwa keemenle vaate va Empa ya Omwene nave mweepewe aarwa akikuxa nivolowa. Ancipale yaarwa ekixeleliha. Kaatikhiniheya vancipale. Kaatepa osiveliwa vancipale ophiyerya kinachuna wi mithukumano seereyeke nihiku ti nihiku. Nkaantonko woona echu ntoko yeela.”

13. Meecelo anyu eni emvolowele hai oohuserya a Piipiliya?

¹³ Mutikitherye yootakiherya yaphaama. Meecelo anyu ananwerya omukhaviherya oohuserya a Piipiliya olekecheya wi oophwanya eparipari. (Mat. 5:16) Vitalii, yoowo vano ori piyoneero o Moldova, ooloca: “Kaanoona mukhalelo akina a mmulokoni yaakhalaaya, yuupuwelaaya, ni mukhalelo yaapakaaya ichu. Eyo yaahikilekecha wi Anamoona a Yehova tari malapelo eeparipari.”

14. Ti mwawiihai yootakiherya anyu eneeraaya emukhaviherye muchu oya vahoolo?

¹⁴ Wi aphwanelele opatiso, oohuserya a Piipiliya onaphwanela opharihelaka yeeyo onahusereiye. Wiiliwiili ela tahi yookhweya. Nyenya vaavaa oohuserya onooneiye mukhalelo munaphuraanyu orweela wa opharihela malakiheryo a Mpiipiliyani, owo onanwerya oceenyeryeya wootakiheryaani. (1 Kor. 11:1) Muthokororye yaweereya ya Hanae, yoowo olociwe woopaceryani. Owo oothariha: “Anna ni arokora yaaneerano ichu seiho kaahuseryaaka. Kaahoona mukhalelo keeraaka kikhale oolipiha, oolevelela, ni mukhalelo kaahaalaaka wooniherya osivela. Awo ilukuluku soothene yaanaloca ichu saphaama vooloca sa akina. Kaanachuna waatakiherya.”

15. Masiposipo 27:17 onanikhaviherya hai woona ochuneya waya opaka onthamwene ni oohuserya a Piipiliya yaawo anaphiya mmithukumano moohihiyererya?

¹⁵ Mpake onthamwene ni oohuserya. Vaavaa oohuserya onatiteleleiye oya mmithukumano, mutitelele wooniherya opwacha ntakhara yoowo. (Fil. 2:4) Munaphwanela weererya omusuwela phaama yoowo. Munanwerya omuleela mukhalelo muryaanyu oohakalala, vaavaa munoonaanyu matorokelo yaawo onapakeiye. Munanwerya tho omukoha vooloca sa yoohuserya awe ya Piipiliya, amusi awe, ni muteko awe. Nyenya mukhaleno ephoole wi muhimpakele makoho yaawo anahaala omuuliha muru. Ochekulela wa mukhalelo yoola onanwerya weeriha wi mukhale asinthamwene. Vaavaa munapakaanyu onthamwene ni oohuserya, munnamukhaviherya oya vahoolo wi apatisiwe. (Mwaalakhanye Masiposipo 27:17.) Hanae vano onarumeela ntoko piyoneera ookilaatheya. Uupuwelaka elukuluku aapacenryeiye oya mmithukumano, owo oriye: “Vaavaa kaapankaaka asinthamwene mmulokoni, kaapacerya ophiya mmithukumano moohihiyererya nave kaanaphiya mmithukumano naamwi kivelavenle. Kaanapuha okhala vamoha ni asinthamwene aka avyaani, nave eyo yaakikhaviherya omaliha onthamwene ni yaale yahaamurumeela Yehova. Kaanachuna omwaacamela Yehova vamoha ni anna ni arokora. Voocharela, kaalakelela opatisiwa.”

16. Echu taani ekina munaphwanelaanyu weera wi mmukhaviherye oohuserya a Piipiliya wiisoona wi onnapaka makupa a muloko?

¹⁶ Vaavaa oohuserya onayeiye vahoolo ni opaka matorokelo, mmukhaviherye woona wi onnapaka makupa a muloko. Munanwerya weerano yeela moorweela wa okhala oowaakhela aleco. (Ahe. 13:2) Denis, yoowo onakhala o Moldova, onnuupuwela elukuluku aareiye oohuserya a Piipiliya, oriye: “Mu ikwaha sincipale, miyaano ni mwaaraka naanawompwa wi nachekule vamoha ni anna. Awo yaananleela mukhalelo Yehova aakhavihenryeiye. Eyo yaanilipiha. Naalekecheya wi naanachuna omurumeela Yehova nave wi naahaala okhalano okumi woohakalaliha wakhala wi noheerano.” Vaavaa oohuserya a Piipiliya onakhaleiye mulaleeryi, munaphwanela onwopa wi muye vamoha mmuteko woolaleerya. Diego, mulaleeryi o Prasili, ooloca: “Anna ancipale yaanakiwopa wi niye mmuteko woolaleerya. Owo waari mukhalelo woophwanelela wi kiwerye waasuwela phaama. Vaavaa keeraakano yeela, kaanahuserya sincipale, nave kaaniisoona okhala awaacameleya wa Yehova ni Yesu.”

ATOKWEENE ENI EKHAVIHERYE HAI?

17. Mmukhalelo taani atokweene eneeraaya yaakhaviherye oohuserya a Piipiliya?

¹⁷ Mmalihe elukuluku ni oohuserya a Piipiliya. Atokweene, vaavaa munooniheryaanyu osivela ni opwacha ntakhara oohuserya munanwerya waakhaviherya yaawo oya vahoolo wi epatisiwe. Apwanne mwanwerya alocaka wiiliwiili ni oohuserya a Piipiliya mmithukumano? Awo anahaala woona wi munnaapwacha wakhala wi munnuupuwelela masina aya xaxaxa vaavaa anapaceryaaya ovaha maakhulo mmithukumano. Apwanne mwanwerya waavya elukuluku wi mukhale vamoha ni mulaleeryi vaavaa oneeciheiye yoohuserya ya Piipiliya? Mweerano hiiha munanwerya omukhaviherya oohuserya a Piipiliya opwaha munaanyiheryaanyu. Piyoneera awiichaniwa Jackie, yoowo onakhala o Nixeriya, ooloca: “Oohuserya ancipale annatikhiniheya vaavaa anasuwelaaya wi munna yoowo okihonle va yoohuserya aya, mutokweene a mmulokoni. Oohuserya mmoha a Piipiliya aaloca: ‘Apastore aka hiyaahaala weerano yeela. Awo anaaxekurya pahiru yaale ari ooreela ni yaale yaalimve.’” Oohuserya yoola vano onnaphiya mmithukumano.

18. Atokweene eni epharihele hai yoorepa ya Saweriwa T’arummwa 20:28?

¹⁸ Mwaavyakihe nave mwaalipihe oohuserya a Piipiliya. Atokweene, nyuwaano mookhalano murici mutokweene wa waakhaviherya alaleeryi okhala a mavyakelo mmuteko woolaleerya ni okhala ahusiha aphaama a Piipiliya. (Mwaalakhanye Saweriwa T’arummwa 20:28.) Wakhala wi mulaleeryi onnuuliwa muru weeciha yoohuserya ya Piipiliya muri vaavaa, mwiivahe wi mweecihe. Jackie, yoowo olociwe mu eparakrafo evirale, ooloca: “Atokweene wiiliwiili annakikoha vooloca sa oohuserya aka a Piipiliya. Vaavaa kinahoolelaaka makacamiho mu weeciha yoohuserya ya Piipiliya, awo annakivaha miruku seiho inakikhaviherya.” Atokweene ananwerya opaka sincipale wi yaalipihe ni waaceenyerya alaleeryi okhala oovilela. (1 Tes. 5:11) Jackie ohaaceererya: “Kinnasiveliwa vaavaa atokweene anakilipihaaya navetho anakileelaaya wi annathamalela muteko aka wakuru. Masu ntoko yaala annariiryiha murima aka ntoko maahi ooriirya mu nihiku na oviha. Masu aya oosivela annakikhaviherya wiisoona wi kinnapaka muteko waphaama vaavaa kineecihaaka soohuserya saka sa Piipiliya nave kinnahakalala vancipale.”—Masi. 25:25.

19. Ohakalala taani oothene ahu nnakhalaahuno?

¹⁹ Naamwi hiihaano niheecihaka yoohuserya ya Piipiliya, nnanwerya omukhaviherya muchu wunnuwa omunepani. Naamwi nihilonce vancipale, nnanwerya wiirehererya wi nimukhaviherye muhusiha vaavaa oneeciheiye nikupa na yoohuserya. Nnanwerya okhala asinthamwene a oohuserya vaavaa awo anaphiyaaya o Empa ya Omwene, navetho nnamukhala yootakiherya yaphaama wa yaawo. Atokweene ananwerya waalipiha oohuserya a Piipiliya moorweela wa omaliha elukuluku ni yaawo nave tho ananwerya waakhaviherya ahusiha moorweela wa waavyakiha ni waathamalela. Chiryene, ninnahakalala vaavaa nnaweryaahu opaka echu vyakala, naamwi eri ekhaani, wi nimukhaviherye muchu omusivela ni omurumeela Yehova!