Achu a Yehova Annasivela Wookololowa

1. Yaweeha taani Yosefe aahoolenleiye nave aakhulenle hai?

MWAANA a Yakopo, Yosefe, aahihoolela yaweeha yoovila. Muthiyana mmoha aaloca ni yoowo: “Orwe, okone ni miyo.” Muthiyana aalonce yeela, aari mwaara a pwiyawe, Potifare. Yosefe aahikhooca yoovaha awe. Mmahiku ahu yaala muchu onanwerya wiikoha: ‘Ntakhara heeni Yosefe aawerya ovootha yaweeha yeele?’ Potifare aahipwahavo. Opwaha yeeyo Yosefe aari kapuro a vaate; muthiyana yoola aanwerya okacamiha okumi wa Yosefe nthowa na okhooca yoovaha awe. Naamwi hiiha Yosefe aahititelela okhooca okhinyererya wawuuluulela wa opaka mararuwo ni yoowo. Ntakhara heeni? Owo aaloca: “Kinii kiwerye hai weera echu yoonanarasha yawiihiiha, wi kimuchekele Muluku?”—Map. 39:7-12.

2. Yosefe aasuwenle hai wi mararuwo yaari yoocheka etokweene vamiithoni va Muluku?

² Yosefe aasuwenle hai wi Muluku awe aahaala woona mararuwo ntoko “echu yoonanarasha”? Aisarayeli yaakhenle Nlamulo na Mose nawi “Ohiraruwe” ivinrevo iyaakha masana meeli. (Muk. 20:14) Naamwi hiiha, Yosefe aahimusuwela phaama Yehova ophiyerya wi aahisuwela mukhalelo Owo aahaaleiye woona mwaha wa mararuwo. Ntoko yootakiherya, Yosefe aasuwela phaameene wi yoolakelela ya Yehova yaari yawi othela okhale variyari va mulopwana ni muthiyana mmoha. Nave woonaru Yosefe aahiiwa mukhalelo Yehova aakhapelenleiye apisavo awe Sara mu ikwaha piili vaavaa yaaryaaya va yawoopiha ya okusiwa ni mulopwana mukina. Mmukhalelo woolikana, Muluku aaheeravo echu wi amukhapelele Rapeka, mwaara a Isaki. (Map. 2:24; 12:14-20; 20:2-7; 26:6-11) Vaavaa Yosefe uupuwelenleiye miyaha seiha, owo aahisuwela teevi yaari yaphaama ni yoonanara vamiithoni va Muluku. Woona wi Yosefe aanamusivela Muluku awe, owo tho aanasivela malamulo awookololowa nave aari oolakelela opaka yeeyo Yehova aachuneiye wi owo apake.

3. Tiheeni nnahaalaahu othokororya mmwaha yoola?

³ Apwanne nyuwaano munnasivela wookololowa? Moohikhwa minikwa munnasivela. Nyenya oothene ahu naachu oohiphaameya, nave wakhala wi hanniikasoopa, moonelo wa elapo vooloca sa wookololowa onanwerya onivolowela mookhweya. (Isa. 5:20; Aro. 12:2) Mwawiihiiha mmwaha yoola nnahaala othokororya wookololowa tiheeni ni mukhalelo nnaphuraahu moorweela wa osivela yeeyo eri yawookololowa. Voocharela nnahaala othokororya ichu raru seiho nnaphwanelaahu weera wi sinikhaviherye wunnuwiha osivela wahu ntakhara malamulo a Yehova.

WOOKOLOLOWA TIHEENI?

4. Moonelo taani wooheseya achu aryaayano vooloca sa wookololowa?

⁴ Achu akina anuupuwela wi muchu awookololowa ti yoole ori awiirumiha, onaathoriha akina naari yoowo onuupuwela wi yene toophwanelela waapwaha akina. Nyenya Muluku hanasiveliwa ni makhalelo si yaawo naari vakhaani mano. Vaavaa Yesu aareiye veelaponi yavathi, aahaavaanya moolipa ahooleli a malapelo a mmahiku awe wa nthowa na otikitherya malamulo aya vooloca sa yeeyo yoonaaya okhala yawookololowa. (Ekle. 7:16; Luka 16:15) Muchu yoowo onapaka yeeyo Yehova onaloceiye wi ti yaphaama hanuupuwela wi yene toophwanelela waapwaha akina.

5. Mwawiiwanana ni Piipiliya, wookololowa tiheeni? Mvahe sootakiherya.

⁵ Wookololowa mukhalelo waphaamaxa. Mookwasa, eyo enataphulela weera yeeyo eri yawookololowa vamiithoni va Yehova Muluku. Mpiipiliyani, masu awi “wookololowa” enataphulela okhala mwawiiwanana ni malamulo avasulu, eyo tiwi, malamulo a Yehova. Ntoko yootakiherya, Yehova aahilamulela wi alipa a maroca yaaphwanela opharihelaka ‘miphimo seekhayikhayi.’ (Malam. 25:15) Masu oopacerya Eehepiri ataphuleliwe wi “ekhaikhai” ananwerya tho otaphuleliwa wi “wookololowa.” Mwawiihiiha, Mukristu yoowo onachuna okhala awookololowa vamiithoni va Muluku onahaala okhala eekhaikhai moomalela mu anakoso awe oothene onaapakeiye. Muchu awookololowa onnasivela ekhaikhai nave hanasiveliwa vaavaa onamooneiye muchu mukina akhalihiwaka moonanara. Nave ‘wi amuhakalalihe Yehova mu soothene,’ muchu yoowo ori awookololowa chiryene onnathokororya mukhalelo Yehova onahaaleiye woona soolakelela seiho onapakeiye.—Kol. 1:10.

6. Ntakhara heeni nnanwerya ororomela malakiheryo a Yehova vooloca sa yeeyo eri yaphaama ni yoonanara? (Isaiya 55:8, 9)

⁶ Piipiliya onnamuthariha Yehova ntoko Mathipelo a wookololowa. Wa nthowa nenla, owo onniichaniwa “nipuro nawookololowa.” (Yer. 50:7, TNM.) Ntoko Mpatuxa, Yehova pahiru torino ophwanelela wa olakelela yeeyo eri yaphaama ni yoonanara. Woona wi Yehova toophaameya, moonelo awe vooloca sa yeeyo eri yaphaama ni yoonanara ti wavasuluxa opwaha wawihu, yoowo wiiliwiili onavoloweliwa ni ohiphaameya wahu ni yoocheka. (Masi. 14:12; mwaalakhanye Isaiya 55:8, 9.) Mwawiihiiha woona wi nipakiwe moophwanaphwana ni Muluku, nnanwerya opaka yeeyo owo onaloceiye wi ti yawookololowa. (Map. 1:27) Nave hiyaano ninnasiveliwa weerano yeeyo. Osivela wahu ntakhara Tiithi ahu onnanceenyerya omutakiherya yoowo nave ninnannuwiha makhalelo ahu aphaama.—Éfe. 5:1.

7. Ntakhara heeni oryaaya woochuneya ochariha malakiheryo yaawo atikitheriwe? Mphwanaphwanihe.

⁷ Hiyaano ninnaphura vaavaa nnakhalaahu mwawiiwanana ni malakiheryo a Yehova vooloca sa yeeyo eri yaphaama ni yoonanara. Munnasuwela ntakhara heeni? Mwaanyiherye yeeyo yaahaala weereya waakhanle wi epanku eri yoothene yootikitherya malamulo aya vooloca sa ikhorowa naari waakhanle wi empresa eri yoothene ya oteka yootikitherya malamulo aya. Yookhumelela ene yaahaala okhala yoowaawa. Naari waakhanle wi mameetiku hanachariha malakiheryo a oloola, alipa a wiiceliwa akina yaahaala okhwa. Chiryene, ochariha malakiheryo yaawo atikitheryiwe onnanikhapelela. Moolikana, malakiheryo a Muluku vooloca sa yeeyo eri yaphaama ni yoonanara annanikhapelela.

8. Mareeliho taani anawehereryaaya yaale anapaka yeeyo eri yaphaama?

⁸ Yehova onnaareeliha yaale aniilipixerya ochariha malakiheryo awe. Owo oororomeliha: ‘Muluku onarwa aavaha awookololowa murima elapo yavathi, yiikhalelaru mummo okhala wookhala.’ (Sal. 37:29) Munnawerya waanyiherya wiiwanana, murecele, ni ohakalala oni okhalevo vaavaa muchu ti muchu oneereiye achariheke malakiheryo a Yehova? Yehova onachuna wi mpuhe mukhalelo yoola wa okumi. Mweeparipari, muchu ti muchu ookhalano mathowa aphaama a osivela wookololowa! Nni ninnuwihe hai osivela wahu ntakhara mukhalelo yoola? Hankooni nthokororye ichu raru seiho nnaphwanelaahu weera.

MUNNUWIHE OSIVELA WANYU NTAKHARA MALAKIHERYO A YEHOVA

9. Tiheeni enahaala onikhaviherya osivela wookololowa?

⁹ Echu yoopacerya: Mmusivele Yoole onatikitherya malamulo. Wi nsiveleke wookololowa, nnaphwanela omusivela Yehova yoowo onatikitherya malamulo vooloca sa yeeyo eri yaphaama ni yoonanara. Vaavaa nninnuwihaahu osivela wahu ntakhara Yehova, nchuno nahu na okhala mwawiiwanana ni malamulo awe awookololowa ninnannuwa. Mphwanaphwanihe: Waakhanle wi Atamu ni Eva yaanamusivela Yehova awo yaahaala wiiwelela nlamulo nawe nawookololowa.—Map. 3:1-6, 16-19.

10. Tiheeni Aparahamu eenreiye wi iiwexexe phaama moonelo wa Yehova?

¹⁰ Mweeparipari hinnachuna omorela mu yoocheka yeeyo Atamu ni Eva yaapankaaya. Nnanwerya osepa yoohesa yeela wakhala wi ninnatitelela ohuserya vooloca sa Yehova, othokororya mikhalelo sawe ni weererya wiiwexexa mukhalelo awe wa wuupuwela. Vaavaa nneeraahuno yeela, osivela wahu ntakhara Yehova onnannuwa. Muthokororye yaweereya ya Aparahamu. Owo aanamusivela Yehova mweeparipari. Naamwi waari woovila wa yene wiiwexexa soolakelela sa Yehova, Aparahamu haammwareenle yoowo. Moohiyana, owo aaheererya omusuwela phaama Yehova. Ntoko yootakiherya, vaavaa owo aasuwenleiye yoolakelela ya Yehova vooloca sa omutoloxa Sotoma ni Komora, Aparahamu wuupaceryani aahoova wi ‘Muthoriha a elapo yoothene yavathi’ aahaala waatoloxa achu awookololowa vamoha ni oonanara murima. Wa Aparahamu eyo yooneya okhala yoohiphwanelela, mwa yeeyo, mwawiiyeviha, aahimpakela Yehova makoho mancipale. Moopisa murima Yehova aahimwaakhula. Vookuchula, Aparahamu aahiiwexexa wi Yehova onnavareryela murima wa muchu ti muchu nave wi harwa aalaka aphaama vamoha ni oonanara murima.—Map. 18:20-32.

11. Aparahamu oonihenrye hai wi aanamusivela ni omuroromela Yehova?

¹¹ Aparahamu aatepa otannyeya murima ni ovaanela yoowo aareiyeno ni Yehova vooloca sa ipooma sa Sotoma ni Komora. Moohikhwa minikwa osivela ni ncicimiho nawe ntakhara Yehova saahaaceereryeya opwaha khalai. Iyaakha ohoolo waya, Aparahamu omuroromela wawe Yehova waaheehiwa. Yehova aahimveka Aparahamu wi amveleele mwanawe oosiveliwa, Isaki, ntoko mukucho. Nyenya Aparahamu aahimwiiwexexa phaama Muluku awe, mwa yeeyo ekwaha ela haampakenle makoho. Pahiru Aparahamu eenreno yeeyo Yehova aamvenkeiye. Naamwiihiiha, mwaanyiherye mukhalelo eyo yaaryaaya yoosoosiha murima wa yoowo vaavaa iirehereryeiye wi aakhwaniherye murici yoowo! Woonaru Aparahamu aanuupuwela mwawiiseela yeeyo aahusenryeiye vooloca sa Yehova. Owo aahisuwela wi Yehova haahaala opaka echu yoohookololowa naari yoohisivela. Mwawiiwanana ni murummwa Paulo, Aparahamu aanaroromela wi Yehova aahaala omviiha mookhwani mwanawe oosiveliwa, Isaki. (Ahe. 11:17-19) Opwaha soothene, Yehova aahiroromeliha wi Isaki aahaala okhala tiithi a maloko aachu, nyenya mu elukuluku yeele Isaki haarino anamwane. Aparahamu aanamusivela Yehova, mwawiihiiha aanaroromela wi Tiithi awe aahaala opaka echu yawookololowa. Naamwi yaari yoovila, nroromelo nawe naahimuceenyerya omwiiwelela Yehova.—Map. 22:1-12.

12. Nni nimutakiherye hai Aparahamu? (Salumu 73:28)

¹² Nni nimutakiherye hai Aparahamu? Moolikana ni yoowo, nnaphwanela otitelela ohuserya sa Yehova. Vaavaa nneerahuno yeela, nnahaala omwaacamela Yoowo nave osivela wahu ntakhara yene onahaala winnuwa. (Mwaalakhanye Salumu 73:28.) Nnahaala ovyakiha yawuupuxerya ya murima ahu wi nooniheryeke muupuwelo wa Muluku. (Ahe. 5:14) Ntoko yookhumelela, vaavaa muchu onaneeheiye wi nipake echu yoonanara, nnahaala okhooca. Nnahaala okhooca muupuwelo vyakala wa opaka echu yeeyo enahaala omusoosiha murima Tiithi ahu ni onahaala onanariha onthamwene ahu ni yoowo. Ichu taani ikina nnaphwanelaahu weera wi nooniherye wi ninnasivela wookololowa?

13. Nni niwerye hai okhala awookololowa? (Masiposipo 15:9)

¹³ Echu yanaawiili: Mwiilipixerye winnuwiha osivela ntakhara wookololowa nihiku ti nihiku. Wakhala wi ninnachuna olipiha misiphe sahu, ninniilipixerya ovyakiha iho nihiku ti nihiku. Moolikana nnaphwanela wiilipixerya wi ninnuwihe osivela wahu ntakhara malamulo awookololowa a Yehova. Eyo tahi yoovilaxa wa hiyo weerano nihiku ti nihiku. Yehova toophimelela, owo harwa aniveka weera echu nihinaweryaahu opaka. (Sal. 103:14) Apwiya Yehova annaroromeliha wi “annamukhwela yole onalipiserya wera saphama.” (Mwaalakhanye Masiposipo 15:9, BNM.) Wakhala wi ninnachuna waakhwaniherya yoolakelela vyakala mmuteko wa Yehova, ninniilipixerya weerano yeeyo. Emohamoha tho enneereya vaavaa nnachunaahu opaka yeeyo eri yawookololowa. Nave Yehova onahaala onikhaviherya moopixa murima opaka matorokelo moovira wa elukuluku.—Sal. 84:5, 7.

14. “Yawisakihano ya wokololowa” tiheeni nave ntakhara heeni ti yoochuneya?

¹⁴ Moosivela Yehova onnanuupuxerya wi tahi woovila opaka yeeyo eri yawookololowa. (1 Yoh. 5:3) Moohiyana, eyo ennanikhapelela nave ninnachuna okhapelela yoola nihiku ti nihiku. Nkuupuwelani ikaruma sawiisaakihano soomunepani seiho murummwa Paulo olonceiye. (Éfe. 6:14-18, BNM.) Yawiisaakihano taani yaakhapelela murima wa nakhoco? Yaari “yawisakihano ya wokololowa” yeeyo eneemelela malamulo awookololowa a Yehova. Moolikana hiiha ntoko yawiisaakihano enakhapelelaaya murima wa mukhoco, malakiheryo awookololowa a Yehova annakhapelela murima anyu woosiphela, eyo tiwi omuchu anyu wa mpuwa. Mmikhalelo soothene, muroromele wi mookhalano sawiisaakihano soothene ophitaanyerya yawiisaakihano yawookololowa!—Masi. 4:23.

15. Munawara hai yawiisaakihano yawookololowa?

¹⁵ Munawara hai yawiisaakihano yawookololowa? Nyuwaano munanwerya weerano yeeyo moorweela wa ochariha malakiheryo a Muluku vaavaa munapakaanyu soolakelela sa nihiku ti nihiku. Vaavaa munalakelelaanyu echu ya oloca, macipo munahaalaanyu owiriyana, exilema munachunaanyu woona naari liivuru munachunaanyu omwaalakhanya, voopacerya mwiikohe: ‘Tiheeni kinachunaaka ohela mmurimani mwaka? Apwanne Yehova onneemererya? Naari wi sinnavuwiha ocapaheya, nlala, nrima, ichu seiho sihiri sawookololowa vamiithoni va Yehova?’ (Fil. 4:8) Wakhala wi soolakelela sanyu sinniiwanana ni yookhwela ya Yehova munneemererya wi malamulo awookololowa a Yehova ekhapelele murima anyu.

16-17. Ti mwawiihai Isaiya 48:18 onanroromeliheiye wi nnanwerya okhala mwawiiwanana ni malakiheryo a Yehova okhala wookhala?

¹⁶ Apwanne munnakhala awuukhuwa waakhanle wi munahaala owerya okhala mwawiiwanana ni malakiheryo awookololowa a Yehova nihiku ti nihiku naari eyaakha ti eyaakha? Muthokororye niphwanaphwaniho Yehova opharihenleiye nnaphwanyeya mu Isaiya 48:18. (Mwaalakhanye.) Yehova oororomeliha wi wookololowa wahu onamulikanaka ni “macumusha a mphareya.” Mwaanyiherye wi muri muxerexere wa ephareya, moonaka ovilikeya wa macumuca. Mu nipuro nenla noohakalalihaxa, apwanne mwaahaala okhala awuukhuwa muupuwelaka wi vanihikuni macumuca anahaala omala? Hooye! Nyuwaano moosuwela wi macumuca anniirukurerya mu iyaakha macikhwi macikhwi ene nave awo chiryene anahaala otitelela okhala.

¹⁷ Wookololowa wanyu onanwerya okhala ntoko macumuca yaala a mphareya! Mwawiihai? Vaavaa munachunaanyu opaka yoolakelela, voopacerya muthokororye yeeyo Yehova onachuneiye wi mpake. Voocharela mweereno. Moohipwacha mukhalelo yoolakelela eyo eryaaya yoovila, Tiithi anyu oosivela ilukuluku soothene onahaala woovahaani ikuru ni wookhaviheryaani opaka yeeyo eri yawookololowa mahiku oothene.—Isa. 40:29-31.

18. Ntakhara heeni nnaphwanelaahu osepa waathoriha akina mwawiiwanana ni moonelo ahu?

¹⁸ Echu yaneeraru: Muhiye othoriha mmatani mwa Yehova. Vaavaa nnakhalaahu mwawiiwanana ni malamulo awookololowa a Yehova, nnaphwanela osepa waathoriha akina ni ohiya wiisoona okhala oophwanelelaxa waapwaha yaawo. Ohiya owoona akina mmukhalelo woohiphwanelela moohipwacha waakhanle wi nookhalano mathowa oophwanelela a waathoriha yaawo mwawiiwanana ni moonelo ahu, nnaphwanela wuupuwelaka wi Yehova tori ‘Muthoriha a elapo yoothene yavathi.’ (Map. 18:25) Yehova hanivanhe murici yoola wa waathoriha akina. Mweeparipari Yesu oonilamulela: “Muhithorihaneke wi muhithorihiwe.”—Mat. 7:1.b

19. Yosefe oonihenrye hai wi aanaroromela othoriha wa Yehova?

¹⁹ Hankooni nthokororye wanaawiili yaweereya ya Mulopwana awookololowa Yosefe. Owo aahisepa waathoriha akina naamwi awo yaamukhaliha moonanaraxa. Asinnawe yaahimmaka, emutumiha ntoko kapuro nave yaahaalekecha apapa awe wi owo aahikhwa. Mu iyaakha ohoolo waya, Yosefe aahikookela okhala vamoha ni amusi awe. Vano, Yosefe ntoko mulamuleli oowerya, aanwerya waathoriha asinnawe moonanara ni wunla ikuhu ni yaawo. Asinnawe Yosefe yaanoova wi owo aahaala wunla ikuhu ni yaawo, naamwi yaacharunwe ni murima woothene wa ichu seiho yaapankaaya. Nyenya Yosefe aahaaroromeliha yaawo ariki: “Muhoove. Mano miyo kiri munipuroni na Muluku?” (Map. 37:18-20, 27, 28, 31-35; 50:15-21) Mwawiiyeviha, Yosefe aahiya othoriha mmatani mwa Yehova.

20-21. Nni nsepe hai wiisoona okhala awookololowaxa waapwaha akina?

²⁰ Ntoko Yosefe, ninnahiya othoriha mmatani mwa Yehova. Ntoko yootakiherya, hiyaano hinnavyaavya osuwela mathowa eweerinhe anna ni arokora ahu opaka echu mmukhalelo wammoori. Hiyaano hinnawerya waalakhanya mirima, “t’Apwiya [Yehova] pahi anathoriha mupuwelo.” (Masi. 16:2, BNM.) Owo onnaasivela achu a mikhalelo soothene yaawo anakhala mmapuro oohiyanahiyana ni sookhovelela soohiyana. Nave Yehova onnanceenyerya wi ‘ntaphule murima ahu.’ (2 Kor. 6:13) Ninnaavya waasivela amusi ahu oothene oomunepani ohiya waathoriha yaawo.

²¹ Ela tho enataphulela wi hannaathoriha yaawo ahiri a mmulokoni. (1 Tim. 2:3, 4) Apwanne mwaahaala omuthoriha muchu a veemusini yoowo ori oohiroromela mulocaka: ‘Ola harwa ahuserya eparipari’? Hooye, weerano yeela waahaala okhala wiisoona okhala awookolowaxa ompwaha yene. Nlelo Yehova onnaavaha “achu oothene a mapuro oothene” ekari wi echaruwe. (Saw. 17:30) Ilukuluku soothene muupuweleke wi wiisoona okhala awookololowaxa waapwaha akina, ori ohookololowa.

22. Ntakhara heeni muryaanyu oolakelela osivela wookololowa?

²² Osivela wahu malamulo awookololowa a Yehova onnaneeriha okhala oohakalala ni okhala yootakiherya yaphaama wa akina, enikhaviheryaka omwaacamela moopwahaxa Muluku ahu nave naakhaviheryaka akina weerano emohamoha. Nihirwe nihiye okhala “oovoliwa ni a nthanana nthowa na ochuna wookololowa.” (Mat. 5:6) Muroromele wi Yehova onnoona wiilipixerya wanyu nave owo ilukuluku soothene onnahakalala vaavaa onawooneiyeni mpakaka owetha wanyu wi mweereno yeeyo eri yawookololowa. Vaavaa achu a mweelaponi enamviraaya etepaka okhala oohookololowa, muhuukhuwe! Ilukuluku soothene muupuweleke wi Apwiya Yehova “annaakhwela awookololowa murima.”—Sal. 146:8.