Mphure Vancipale mu Omwaalakhanya Wanyu Piipiliya

1. Tiheeni yooniherya wi Soorepa saari soochuneya wa Yesu?

MWAANYIHERYE mukhalelo waaryaaya onwiriyana Yesu ahusihaka. Owo wiiliwiili aanaromola Soorepa Saweela aareiyeno mmuupuweloni! Mweeparipari, masu awe oopacerya amanle opatisiwa ni masu awe ookuchula ahaakumve okhwa, aahipharihela Soorepa.b (Malam. 8:3; Sal. 31:5; Luka 4:4; 23:46) Nave variyari va iyaakha raru ni emeya mu saweereya seiha Piili, Yesu wiiliwiili aanaromola, anaalakhanya nave aanathariha Soorepa wa achu ancipale.—Mat. 5:17, 18, 21, 22, 27, 28; Luka 4:16-20.

2. Vaavaa unnuweiye, tiheeni yaamukhavihenrye Yesu osuwela phaama Soorepa? (Moone eruku ya ekaapa.)

² Mu iyaakha ahaakumve opacerya orummwa awe, Yesu aanaalakhanya ni owiriyana Masu a Muluku wiiliwiili. Owaani, moohikhwa minikwa owo aananwiriyana Mariya ni Yosefe epharihelaka Soorepa variyari va ochekulela waya ntoko emusi nihiku nnihiku.c (Malam. 6:6, 7) Nnanwerya ororomela wi Yesu aanaya o Sinakooka Asapata oothene ni emusi awe. (Luka 4:16) Ari weiwo, aanawiriyana moomaaleleya vaavaa saalakhanyiwaaya Soorepa. Mu elukuluku aya, Yesu aanahuserya waalakhanya Soorepa seiha Saweela mukhateiye. Ntoko yookhumelela, tahi wi pahiru Yesu aasuwela phaama Soorepa, nyenya tho aanasivela seiho nave aaneemererya wi iho ivolowele saweera sawe. Ntoko yootakiherya, muupuwele yeeyo yeeren’ye mu empa ya Muluku vaavaa Yesu aareiyeno pahiru iyaakha 12. Ahusiha yaawo yaasuwenle phaama Nlamulo na Mose “yaanatikhina ni osuwela [wa Yesu] vamoha ni maakhulo awe.”—Luka 2:46, 47, 52.

3. Tiheeni nnahaalaahu othokororya mmwaha yoola?

³ Hiyaano tho ninnamusuwela Muluku ni osivela Masu awe vaavaa nnaalakhanyaahu moohihiyererya Soorepa. Vano ti mwawiihai nneeraahu niphure vancipale mu yeeyo nnaalakhanyaahu? Nnanwerya ohuserya orweela mu yeeyo Yesu aalonceiye wa yaale yaasuwenle phaama Malamulo, ophitaanyerya alipa oorepa, Afarisi ni Asatuki. Ahooleli yaale a malapelo yaanaalakhanya Soorepa wiiliwiili, nyenya awo hiyaaphura orweela wa yeeyo yaalakhanyaaya. Yesu aahooniherya mikhalelo miraru seiho alopwana yaale yaaphwanelaaya okhalano wi ephure vancipale orweela wa Soorepa. Masu awe wa yaawo enamunikhaviherya wunnuwiha mavyakelo ahu (1) a wiiwexexa yeeyo nnaalakhanyaahu, (2) a ophwanya muhakhu woomunepani, ni (3) a weemererya wi Masu a Muluku enuupe.

MWAALAKHANYEKE WI MWIIWEXEXE

4. Tiheeni Luka 10:25-29 onanihusiheiye vooloca sa waalakhanya Masu a Muluku?

⁴ Hiyaano ninnachuna wiiwexexa yootaphulela ya yeeyo nnaalakhanyaahu Mmasu a Muluku. Mmukhalelo mukina, akhweya nnanwerya ohiphura vancipale mu waalakhanya wahu. Ntoko yootakiherya, muthokororye ochekula wa Yesu ni “muhusiha mmoha a Malamulo.” (Mwaalakhanye Luka 10:25-29.) Vaavaa mulopwana ole aamukonheiye echu aaphwaneleiye weera wi aakhele ekumi yoohimala, Yesu aahimukhaviherya yoowo ophwanya naakhulo Mmasu a Muluku. Owo aahimukoha: “Tiheeni erempwe Mmalamulo? Onaalakhanya hai?” Mulopwana ole aahiwerya ovaha naakhulo naphaama moorweela wa oromola soorepa vooloca sa omusivela Muluku ni mwaacamani. (Onam. 19:18; Malam. 6:5) Nyenya moone yeeyo owo aalonceiye voocharela: “Taani chiryene ori mwaacamani aka?” Mulopwana ole aahooniherya wi hiiwexexa yootaphulela yeeparipari ya yeeyo aalakhanyeiye. Ntoko yookhumelela, owo haasuwela mukhalelo wa opharihela soorepa seihe moophwanelela mu okumi awe.

5. Ti mwawiihai ovekela ni waalakhanya vakhaani-vakhaani onanikhaviheryaaya wiiwexexa phaama yeeyo nnaalakhanyaahu?

⁵ Hiyaano nnanwerya wiiwexexa phaama Masu a Muluku wakhala wi nootikitherya sookhovelela saphaama sa waalakhanya. Sookhalavo sooleeliherya ikina sinahaala wookhaviheryaani. Mvekeleke muhipacenrye waalakhanya. Ninnachuna nikhaviheryo na Yehova wi niiwexexe phaama Soorepa, mwawiihiiha, nnaphwanela omveka munepa awe waweela wi onikhaviherye otikitheryeya mwa yeeyo nnaalakhanyaahu. Voocharela, mwaalakhanyeke vakhaani-vakhaani. Ela enahaala wookhaviheryaani wiiwexexa phaama yeeyo munaalakhanyaanyu. Nyuwaano munanwerya ophwanya mphurelo moorweela wa waalakhanya moovuwa naari mucharihaka waalakhanyiwa wa Piipiliya wookaravaariwa. Wakhala wi munnawiriyana ni ochariha Mpiipiliya anyu waalakhanyiwa wa Piipiliya wookaravaariwa, ela enamookhaviheryaani wiiwexexa, wuupuwelela ni ohuserya sincipale orweela wa yeeyo munaalakhanyaanyu Mmasu a Muluku. (Yos. 1:8) Mwakwaaxa waalakhanya, mvekele wanaawiili mmuthamalelaka Yehova ntakhara yamahala ya Masu awe nave mumveke wi ookhaviheryeeni opharihela yeeyo mwaalakhannyaanyu.

6. Ntakhara heeni wiipakela makoho ni orepela iponto soochuneya onookhaviheryaani wiiwexexa phaama yeeyo munaalakhanyaanyu? (Moone tho eruku.)

⁶ Sookhalavo sooleeliherya piili seiho sinahaala wookhaviheryaani omwiiwexexa phaama Piipiliya. Mwiipakeleke makoho vooloca sa yeeyo mwaalakhannyaanyu. Vaavaa munaalakhanyaanyu yaweereya ya Mpiipiliyani, mwiikohe: ‘Taani anatharihiwa mu yaweereya yeela? Taani onaloca? Onaloca wa aani nave ntakhara heeni? Ti woowi nave ti liini ela yeeren’yaaya?’ Makoho ntoko yaala anahaala wookhaviheryaani wuupuwelela ni ochariha sooleeliherya seiho soochuneya mwaalakhannyaanyu. Nave tho, murepeleke ichu soochuneya vaavaa munaalakhanyaanyu. Vaavaa munarepelaanyu yeeyo mmanlaanyu waalakhanya, munanwerya wuupuwelela vooloca sa yeeyo nave eyo enahaala wookhaviheryaani wiiwexexa phaama. Orepela tho onahaala wookhaviheryaani wuupuwelela yeeyo mwaalakhannyaanyu. Munanwerya orepela makoho, ichu mphwannyaanyu mpakaka otholathola, opaka mukwasu wa iponto soochuneya, woona mukhalelo munahaalaanyu opharihela yeeyo mwaalakhannyaanyu naari orepela mukhalelo muniisoonaanyu vooloca sa yeeyo mwaalakhannyaanyu. Munanwerya woona wi orepela inoota soochuneya onanwerya wookhaviheryaani woonaka Masu a Muluku ntoko muchaka wa nyuwaano.

7. Mukhalelo taani nnachunaahu vaavaa nnaalakhanyaahu, nave ntakhara heeni? (Mateyu 24:15)

⁷ Yesu ooloca mukhalelo mmoha woochuneya yoowo nnachunaahu wi niiwexexe yeeyo nnaalakhanyaahu Mmasu a Muluku—masuwelelo. (Mwaalakhanye Mateyu 24:15.) Masuwelelo tiheeni? Eri mavyakelo a wiiwexexa mukhalelo yooleeliherya eniiwananaaya ni yooleeliherya ekina ni wiiwexexa ichu seiho mweeparipari ihiri sooluluwanyeya. Mwawaaceererya, ntoko Yesu otharinheiye, hiyaano ninnachuna masuwelelo wi noone saweereya sa sooloherya sa Mpiipiliyani seiho saakhwanenle. Ninnachuna tho mukhalelo yoola wi niwerye ophuravo orweela wa ichu seiho nnaalakhanyaahu Mpiipiliyani.

8. Ti mwawiihai nneeraahu naalakhanyeke ni masuwelelo?

⁸ Yehova onnaavaha alapeli awe masuwelelo. Mwawiihiiha mvekele wa yoowo, nave mumveke wi ookhaviheryeeni wunnuwiha mukhalelo yoola. (Mas. 2:6) Muni mulape hai mwawiiwanana ni mavekelo anyu? Muthokororyeke moopwacha yeeyo munaalakhanyaanyu, nave moone ti mwawiihai eyo eniiwananaaya ni ichu ikina musuwenlaanyu. Mphariheleke soolaleeryiwa sahu wi sookhaviheryeeni weerano yeela. Ntoko yootakiherya, munanwerya opharihela Yoohoolela ya Otholathola ya Anamoona a Yehova. Ikaruma seiha sinahaala wookhaviheryaani woona yootaphulela ya makupa a Mpiipiliyani ni woona mukhalelo muneeraanyu mpharihele seiho mu okumi anyu. (Ahe. 5:14) Vaavaa munaalakhanyaanyu ni masuwelelo, wiiwexexa wanyu Soorepa onahaala wunnuwa.

MWAALAKHANYEKE WI MPHWANYE MUHAKHU WOOMUNEPANI

9. Eparipari taani yoochuneya ya mu Soorempwa Asatuki yaheemereryaaya?

⁹ Asatuki yaahaasuwela phaama aliivuru athanu oopacerya a Soorepa sa Ehepiri, nyenya awo hiyeemererya iparipari soochuneya saaphwanyeya mu aliivuru yaawo ooveereliwa. Ntoko yootakiherya, muthokororye mukhalelo Yesu aakhunleiye vaavaa Asatuki yaamukonhaaya vooloca sa ovinya mookhwani. Owo aahaakoha: “Apwanne hamutonko waalakhanya mu liivuru a Mose, mu yaweereya ya mwiri waavarela, vaavaa Muluku aalonceiyevo ni yoowo, ariki: ‘Miyaano ka Muluku a Aparahamu, Muluku a Isaki, ni Muluku a Yakopo’?” (Mar. 12:18, 26) Naamwi Asatuki yaalakhanya ikwaha sincipale makupa yaala, nikoho na Yesu naahooniherya wi awo hiyeemererya eparipari yoochuneya ya mu Soorempwa—nihusiheryo na ovinya mookhwani.—Mar. 12:27; Luka 20:38.d

10. Nnaphwanela otikitheryeya mu eheeni vaavaa nnamwaalakhanyaahu Piipiliya?

¹⁰ Tiheeni nnahuseryaahuvo? Vaavaa nnaalakhanyaahu, nnaphwanela otikitheryeya mu ichu soothene eversikulu naari yaweereya ya Mpiipiliyani enanihusihaaya. Hannaphwanela wiiwexexa pahiru ichu sookhweya, nyenya tho iparipari ni malakiheryo makina awiiseela ni oovitheya.

11. Muni mpharihele hai yoorepa ya 2 Timotiyu 3:16, 17, wi mphwanye muhakhu woomunepani Mpiipiliyani?

¹¹ Muni mphwanye hai muhakhu woomunepani vaavaa munamwaalakhanyaanyu Piipiliya? Muthokororye yeeyo onaloceiye 2 Timotiyu 3:16, 17. (Mwaalakhanye.) Moone wi “Soorempwa soothene . . . ti samphurelo” mu (1) ohusiha, (2) osamela, (3) weereryanya ichu ni (4)  olaka. Munanwerya ophwanya miphurelo seiha mixexe naamwi mu aliivuru a Mpiipiliya yaawo muhinawaalakhanyaanyu wiiliwiili. Mwaalikheleke saweereya wi moone yeeyo enoohusihaayaani vooloca sa Yehova, yookhwela awe, naari vooloca sa malakiheryo a Mpiipiliyani. Muthokororye mukhalelo eyo enoosamelaayani. Mweereno yeela moorweela wa waalikhela mukhalelo iversikulu seiho inookhaviheryaayani woona ni okhooca mathitimanelo naari mikhalelo soonanara wi mutitelele okhala oororomeleya wa Yehova. Moone mukhalelo muneeraanyu mpharihele yoorepa wi mmweereryanye muchu, akhweya yoowo mumphwannyaanyu mmuteko woolaleerya orino moonelo woonanara. Nave mooneke olaka vyakala iversikulu inoovahereryaayani wi soovyakiheeni wuupuwelaka ntoko Yehova. Vaavaa munakhalaanyuno mmuupuweloni miphurelo seiha mixexe, munahaala ophwanya muhakhu woomunepani seiho sinahaala wookhaviheryaani ophuravo vancipale mu waalakhanya wanyu.

MWEEMERERYE WI WAALAKHANYA WANYU OWUUPEENI

12. Ntakhara heeni Yesu ahaakoha Afarisi ariki: “Hamwintonko waalakhanya?”

¹² Yesu tho aahipaka nikoho nla: “Hamwintonko waalakhanya?” wi ooniherye wi Afarisi yaahikhalano moonelo woonanara vooloca sa Soorepa. (Mat. 12:1-7)e Mu ekwaha yeele, Afarisi yaaloca wi oohuserya a Yesu yaanachekela nihiku na Sapata. Awaakhulaka, Yesu aahiloca sootakiherya piili sa mu Soorempwa nave aahipharihela eversikulu emoha ya Oseya wi ooniherye wi Afarisi hiyiiwexexa ntakhara heeni nlamulo na Sapata naatikitheryiwaaya nave wi awo hiyooniherya ikharari. Ntakhara heeni alopwana ale hiyaawuupiwe orweela wa yeeyo yaalakhanyaaya Mmasu a Muluku? Nthowa nawi awo yaalakhanya ni munepa woovaanyiha ni wa wiirumiha. Mukhalelo aya waanaahiiha wiiwexexa yeeyo yaalakhanyaaya.—Mat. 23:23; Yoh. 5:39, 40.

13. Moonelo taani nnaphwanelaahu okhalano vaavaa nnamwaalakhanyaahu Piipiliya, nave ntakhara heeni?

¹³ Masu a Yesu annanihusiha wi nnaphwanela omwaalakhanyaka Piipiliya ni moonelo woophwanelela. Moohiyana ni Afarisi, hiyaano nnaphwanela okhala awiiyeviha ni ooreheryeya ohuserya. Nnaphwanela ‘weemererya mwawiiyeviha masu aaliwe.’ (Tiy. 1:21) Wakhala wi naachu awiiyeviha, nnahaala weemererya wi Masu a Muluku etoroke omuchu ahu. Wakhala wi ninnasepa munepa wa wiirumiha ni woovaanyiha, nnahaala weemererya wi mahusiheryo a Mpiipiliyani vooloca sa ikharari, oreera murima ni osivela onivolowele.

14. Nni nsuwele hai waakhanle wi ninneemererya wi Piipiliya anuupe? (Moone tho iruku.)

¹⁴ Mukhalelo nnaakhalihaahu akina ennooniherya waakhanle wi ninneemererya wi Masu a Muluku enuupe. Afarisi hiyeemerenrye wi Masu a Muluku etannye mirima saya, nave ntoko yookhumelela, awo ‘yaanaathoriha achu yahaarino mathowa.’ (Mat. 12:7) Moolikana, mukhalelo nnawoonaahu ni waakhaliha akina ennooniherya waakhanle wi ninneemererya wi Masu a Muluku enuupe. Ntoko yootakiherya, apwanne nnatikitheryeya mmikhalelo saphaama sa akina, naari wi nnatikitheryeya wiiliwiili mu soohesa saya? Apwanne naachu a ikharari ni ooreheryeya okhurumuwela, naari ninnaaloca achu moonanara ni otitelela okhala oonyeenyeya ni yaawo wakhala wi aanichekela? Maakhulo ahu a makoho yaala anahaala wooniherya waakhanle wi ninneemererya wi yeeyo nnaalakhanyaahu evolowele muupuwelo, miyoonelo ni saweera sahu.—1 Tim. 4:12, 15; Ahe. 4:12.

MWAALAKHANYEKE WI MPHWANYE OHAKALALA

15. Ti mwawiihai Yesu ooneiye vooloca sa Soorepa Saweela?

¹⁵ Yesu aanasivela Soorempwa Saweela, nave mukhalelo iisooneiye wohooniheryiwa mwa miririmu Mmasu anaphwanyeya mu Salmu 40:8, TNM: “Onnakisivela weerano okhwela wanyu, Muluku aka, Nave malamulo anyu ari mpuwa mwa murima aka.” Ntoko yookhumelela, owo aanahakalala ni okhumelela phaama mu omurumeela Yehova. Hiyaano nnanwerya okhala oohakalala ni okhumelela phaama wakhala wi ninnaalakhanya Masu a Muluku ni ohuserya osivela yaawo.—Sal. 1:1-3.

16. Tiheeni munaphwanelaanyu weera wi mphure vancipale orweela mu waalakhanya wanyu Masu a Muluku? (Moone ekaaxa “Masu a Yesu Ananwerya Wookhaviheryaani Wiiwexexa Yeeyo Munaalakhanyaanyu.”)

¹⁶ Mwawiiwanana ni masu ni yootakiherya ya Yesu, hankooni ninnuwihe mavyakelo ahu a omwaalakhanya Piipiliya. Nnanwerya wunnuwiha omwiiwexexa wahu Piipiliya moorweela wa ovekela, waalakhanya vakhaani-vakhaani, wiipakela makoho, ni orepela inoota. Nnanwerya opharihela masuwelelo moorweela wa waalikhela moopwacha yeeyo nnaalakhanyaahu nnikhaviheryo na soolaleeryiwa inathipeleya Mpiipiliya. Nnanwerya ohuserya ompharihela phaameene Piipiliya, naamwi mu iversikulu seiho nihinaalakhanyaahu wiiliwiili, moorweela wa waavya muhakhu woomunepani onaphwanyeya mu iversikulu seiho. Nave nnanwerya weemererya wi Masu a Muluku enuupe moorweela wa otitelela okhalano moonelo woophwanelela vaavaa nnaalakhanyaahu. Vaavaa nnapharihelaahu mikhalelo seiha mookumini mwahu, nnahaala ophura vancipale mu omwaalakhanya wahu Piipiliya nave nnahaala omwaacamela vancipale Yehova.—Sal. 119:17, 18; Tiy. 4:8.