Apwanne Muri Oorehereya ‘Wiiwelela?’

1. Ntakhara heeni ikwaha ikina ninnoona okhala woovila wiiwelela?

APWANNE ikwaha ikina munnoona okhala woovila wiiwelela? Mwene Tavite oona tho hiihaa, ti nthowa nene owo aavekenleiye wa Muluku: “Mukivahe munepa wawiiwelela.” (Sal. 51:12, PMM) Tavite aanamusivela Yehova. Naamwiihiiha, ikwaha ikina, owo aanoona okhala woovila omwiiwelela nave eyo enneereya tho ni hiyaano. Ntakhara heeni? Yoopacerya, nthowa nawi na achu oohiphaameya, nave niyariwe ni mathitimanelo a ohiiwelela. Yanaawiili, nthowa nawi Satana ikwaha sincipale onneererya oneeriha okhala ntoko yoowo, wi nivaanyihaneke ni Yehova hiihaa ntoko owo. (2 Ako. 11:3) Yaneeraru, hiyaano nrukureryiwe ni meecelo oomwaryeya a elapo yeela, “munepa yoowo vano onalapa mwa anamwane oohiiwelela.” (Aef. 2:2) Nnaphwanela wiilipixerya wi niwanihe ni mathitimanelo a yoocheka ni okhinyererya wa Satana ni elapo awe enaneeriha okhala oohiiwelela. Ninneerano yeela wi nimwiiwelele Yehova ni achu yaawo aathanlileiye wi enilamuleleke.

2. Enataphulela eheeni okhala muchu oorehereya ‘wiiwelela’? (Tiyaku 3:17)

² Mwaalakhanye Tiyaku 3:17. Namarepa Tiyaku, mooveereliwa aahiloca wi achu amiruku ari ooreheryeya ‘wiiwelela.’ Tiheeni masu yaala enataphulelaaya? Enataphulela wi nnaphwanela owiiwelela yaale Yehova aavanheiye owerya. Nyenya ti yookwakwaleya wi Yehova hanaweherya wi niwiiweleleke yaale ananiveka opaka echu yeeyo ehiniiwanana ni malamulo Awe.—Saw. 4:18-20.

3. Ntakhara heeni ti woochuneya wa Yehova owiiwelela yaale owo aavanheiye owerya?

³ Ti yookwakwaleya wi ti wookhweya omwiiwelela Yehova ohiya omwiiwelela muchu. Moohikhwa minikwa, Yehova ilukuluku soothene onnavaha ohoolela woophaameya. (Sal. 19:7) Woona wi achu arino owerya toohiphaameya, awo hanavaha ohoolela waphaama ilukuluku soothene. Mwawiihiiha, Yehova oovaha mphimo wa owerya wa asitiithi, atokweene a muloko ni alamuleli a elapo. (Mas. 6:20; 1 Ate. 5:12; 1 Pet. 2:13, 14) Vaavaa nnawiiwelelaahu yaawo, mweeparipari nnamwiiwelela Yehova. Mmwaha yoola, nnahaala ohuserya mukhalelo wa owiiwelela achu yaawo Yehova aavanheiye owerya wa olamulela, naamwi ikwaha ikina okhalaka woovila weemererya ohoolela waya.

NWIIWELELEKE ASITIITHI ANYU

4. Ntakhara heeni anamwane ancipale hanawiiwelela asitiithi aya?

⁴ Amiravo arukureryiwe ni asinthamwene yaawo eri “oohiwiiwelela awaayara.” (2 Tim. 3:1, 2) Ntakhara heeni amiravo ancipale aryaaya oohiiwelela? Amiravo akina anoona wi asitiithi aya annaaveka ichu seiho ahinaweryaaya weerano. Amiravo akina anoona wi elapo yootorokeya vancipale, nyenya muupuwelo wa asitiithi aya woovireliwa, ikano saya hasinaphariheleya olelo naari wi awo annaviliha ichu. Apwanne nyuwaano munuupuwela hiihaa? Ancipale annoona okhala woovila opharihela ekano Yehova ohin’yeiye mu Aefesu 6:1: “Nwiiweleleke yaawo ooyanreeni mwawiiwanana ni Apwiya, woona wi ela ti yawookololowa.” Tiheeni enahaala wookhaviheryaani weerano yeela?

5. Ntakhara heeni Yesu yootakiherya yaphaama ya mwaana aawiiwelenle asitiithi awe? (Luka 2:46-52)

⁵ Munanwerya ohuserya okhala awiiwelela moorweela wa ochariha yootakiherya yaphaama ya Yesu. (1 Pet. 2:21-24) Owo aari muchu oophaameya, nyenya asitiithi awe yaari oohiphaameya. Naamwiihiiha, Yesu aanaacicimiha asitiithi awe naamwi awo yaahesa naari wi yaahaamwiiwexexa. (Muk. 20:12) Moone yeeyo yeeren’ye vaavaa Yesu aareiyeno iyaakha 12. (Mwaalakhanye Luka 2:46-52.) Owo ni emusi awe yaaya o Yerusalemu, nyenya vaavaa awo yaakookelaaya owaani, hiyaasuwela wi Yesu haari ni yaawo. Yosefe ni Mariya yaamwaasa Yesu, nave vaavaa yaamphwannyaaya, Mariya aahimukhupanya nthowa na waahiya asitiithi awe eri awuukhuwa! Yesu aanwerya oloca wi eyo yaari yoohookololowa, woona wi, waari murici wa asitiithi osuwela waakhanle wi anamwane oothene eri vamoha ehaakumve opacerya mukwaha wa okookela owaani. Nto ohiya yeeyo, Yesu aahaakhula mmukhalelo wookhweya ni mwa ncicimiho. Nyenya Yosefe ni Mariya “hiyiiwexexa yeeyo aaleeleiye.” Moohipwacha yeeyo, “aanawiiwelela yaawo.”

6-7. Tiheeni enahaala waakhaviherya amiravo owiiwelela asitiithi aya?

⁶ Hanka nyuwaano, apwanne munnoona okhala woovila owiiwelela asitiithi anyu vaavaa awo anapakaaya yoohesa naari wi ahinawiiwexexaayaani? Tiheeni enahaala wookhaviheryaani? Yoopacerya, muupuwele mukhalelo Yehova oniisooneiye. Piipiliya olonce wi vaavaa munawiiwelelaanyu asitiithi anyu, “ela ennaahakalaliha Apwiya.” (Ako. 3:20) Yehova oosuwela wi ikwaha ikina asitiithi anyu ananwerya ohiwiiwexexaani phaama naari akhweya anahaala otikitherya malamulo yaawo anooneya wi toohiiwexexeya. Nyenya, vaavaa munawiiwelelaanyu asitiithi anyu, munnamuhakalaliha Yehova.

⁷ Yanaawiili, muupuwele mukhalelo asitiithi anyu aniisoonaaya. Vaavaa munawiiwelelaanyu asitiithi anyu, awo annakhala oohakalala nave annoororomelaani. (Mas. 23:22-25) Ohiya yeeyoru, munahaala okhala awaacameleyaxa ni yaawo. Mmiravo mmoha o Pelxika awiichaniwa Alexandre, ooloca: “Vaavaa kaapacenryaaka owiiwelela asitiithi aka, onthamwene ahu waahitorokeya, naahikhala awaacameleya mukina ni mukhwaawe nave naahikhala oohakalalaxa.”b Yaneeraru, muupuwele wi wiiwelela hiihaano, onanwerya wookhaviheryaani muhoolo. Paulo, yoowo onakhala o Prasili, ooloca: “Ohuserya owiiwelela asitiithi aka wookikhaviherya omwiiwelela Yehova ni akina arino owerya.” Hiihaa ntoko Piipiliya onaloceiye, mookhalano mathowa matokweene a owiiwelela asitiithi anyu. Aefesu 6:2, 3 oni: “Wi soothene iweecele phaama, nave olekele mahiku mancipale veelaponi yavathi.”

8. Ntakhara heeni amiravo ancipale alakelenlaaya owiiwelela asitiithi aya?

⁸ Amiravo ancipale ahiiwexexa wi echu yaphaama weera ori owiiwelela asitiithi aya. Luisa, yoowo tho onakhala o Prasili, woopacerya aanoona okhala woovila wiiwesesa ntakhara heeni haaphwanela okhalano telefoni. Owo aanaloca wa asitiithi awe wi achu ancipale a iyaakha sawe yaakhalano telefoni. Nyenya voocharela, aahoona wi asitiithi awe mweeparipari yaachuna omukhapelela. Owo ooloca: “Miyaano kinoona wi owiiwelela asitiithi hori ntoko owara maleya oonyimuwa, nyenya ori ntoko esinto yookhapelela yeeyo enawerya ovuluxa okumi aka.” Namwali onakhala o Estatu Unitu awiichaniwa Elisapeti olonce wi onnakhala woovila wa yoowo owiiwelela asitiithi awe mu ikwaha ikina. Owo oriye: “Vaavaa kihiniiwexexaaka ntakhara heeni asitiithi aka anatikitheryaaya nlamulo vyakala, kinneererya wuupuwelela ikwaha seiho malamulo aya akikhapelenlaaya.” Monika, yoowo onakhala o Armeniya, oophiyerya makuchuwelo awi ichu saanamweecela phaama vaavaa aawiiweleleiye asitiithi awe.

NWIIWELELEKE ‘AHOOLELI ANALAMULA’

9. Tiheeni achu ancipale anuupuwelaaya vooloca sa wiiwelela malamulo a kuvernu?

⁹ Achu ancipale annasuwela wi ti waphaama okhalano “alamuleli” ni wiiwelela makina a malamulo yaawo atikitheryiwe ni yaawo. (Aro. 13:1) Nyenya achu ene yaawo annakhooca wiiwelela malamulo vaavaa ahinasiveliwaayano naari anoonaaya okhala oohookololowa. Ntoko yootakiherya, moone vooloca sa oliva musokho. Mu elapo emoha yo Europa, variyari va achu axexe, mmoha onnoona “okhala woohiphwanelela oliva musokho onooneya okhala woohookololowa.” Wanthowa na yeeyo, achu anakhala mu ilapo seiho hanaliva misokho soothene alamuleli anavekaaya.

10. Ntakhara heeni ninniiwelela ophiyerya malamulo yaawo nihinasiveliwaahuno?

¹⁰ Piipiliya onnaloca wi olamulelo woothene wa achu onavareryeliwa ni Satana, onnatannya makacamiho nave voohilekela onahaala otoloxiwa. (Sal. 110:5, 6; Ekl. 8:9; Luka 4:5, 6) Owo tho onnanleela wi “yoowo onavaanyihana ni alamuleli, onavaanyihana ni nlamulo ntikitheryiwe ti Muluku.” Wa hiihaano, Yehova onneemererya wi alamuleli ekhale wi etitelele orehererya ichu nave owo onaweherya wi hiyaano niwiiweleleke yaawo. Mwawiihiiha, nnaphwanela ‘waavaha oothene yeeyo enaaphwanela,’ ophitaanyerya oliva misokho, ncicimiho ni owiiwelela. (Aro. 13:1-7) Vakina vaya, nnanwerya woona wi nlamulo vyakala tahi noophwanelela, noohookololowa naari wi nnahaala onikumiherya yookhumelela yoowaawa. Nyenya hiyaano ninnamwiiwelela Yehova nave owo onnanleela wi nnaphwanela owiiwelela alamuleli. Mukhalelo mmoha nihinaphwanelaahu owiiwelela ori vaavaa awo ananivekaaya opaka echu vyakala ehiniiwanana ni malamulo a Yehova.—Saw. 5:29.

11-12. Tiheeni Yosefe ni Mariya yaapankaaya wi yiiwelele nlamulo nimoha, nave ni yookhumelela taani? (Luka 2:1-6) (Moone tho eruku.)

¹¹ Nnanwerya ohuserya orweela mu yootakiherya ya Yosefe ni Mariya, yaawo yaari ooreheryeya owiiwelela alamuleli, naamwi waakhala woovila wa yaawo weerano eyo. (Mwaalakhanye Luka 2:1-6.) Moone yaweeha ya wiiwelela yaahoolenlaaya vaavaa Mariya aarupanleiye. Mwene o Roma Akustu aahitikitherya nlamulo wi achu oothene ekookele mu ipooma saya wi yarepeliwe. Mwawiihiiha, Yosefe ni Mariya yaaphwanela oya o Petelehemu, mukwaha wa ikiloometru opwaha 150 yeecaka mu mphiro waasaren’yemo miyoko ni mikhuruwela. Mukwaha yoole hiwaahaala okhala wookhweya, xaxaxa wa Mariya yoowo aarino erukulu ya miyeeri 9. Hanka waakhanle wi erukulu yaahinyahuwa variyari va mukwaha? Akhweya awo yaatepa wuukhuwa ni okumi wa Mariya ni wa mwaana, yoowo aahaala okhala Mesiya omwaahiyu. Waakhanle wi awo yaanachuna, nla naari nthowa naahaala oweeriha ohiiwelela nlamulo.

¹² Yosefe ni Mariya hiyaatikitheren’ye mu wuukhuwa waya. Awo yaahiiwelela nlamulo. Yehova aahireeliha wiiwelela waya. Mariya aahiphiya mookhapeleleya o Petelehemu, voocharela aahimuyara mwaana yoowo aarino okumi waphaama nave ophiyerya wi aahikhaviherya mu waakhwanela wa yooloherya ya Mpiipiliyani!—Mik. 5:2.

13. Ti mwawiihai wiiwelela wahu onaavolowelaaya annihu?

¹³ Owiiwelela alamuleli ti wamphurelo wa hiyaano ni wa akina. Mwawiihai? Wi nipacerye, hiyaano hannalakiwa hiihaa ntoko achu akina ahiniiwelela malamulo. (Aro. 13:4) Nave tho wiiwelela wahu onanwerya ovolowela mukhalelo alamuleli anawoonaaya Anamoona a Yehova ntoko nikhuuru. Ntoko yootakiherya, mu iyaakha vakhaani muculi, o Nixeriya, anakhoco yaahivolowa mu Empa ya Omwene variyari va muthukumano ewaavyaka achu yaawo yaamwareela ekhoocaka oliva muxokho. Nto mutokweene a anakhoco aahaaveka anakhoco wi ekhume mu Empa ya Omwene, nave aaloca: “Anamoona a Yehova annaliva misokho ilukuluku soothene.” Ilukuluku soothene muniiwelelaanyu malamulo, meecelo a achu a Yehova annatitelela okhala phaama. Ti yawooneya wi, omwaahiyu, meecelo yaala ananwerya waakhaviherya annihu okhala ookhapeleleya.—Mat. 5:16.

14. Tiheeni emukhavihenrye murokora mmoha okhala ooreheryeya ‘owiiwelela’ alamuleli?

¹⁴ Nto, akhweya ilukuluku ikina onanwerya okhala woovila owiiwelela alamuleli. Murokora mmoha o Estatu Unitu awiichaniwa Joana, ooloca: “Wa miyaano, waari woovilaxa okhala awiiwelela, nthowa nawi akina a veemusini vaka yaahihooxeya ohookololowa mmatani mwa alamuleli.” Joana aahoona wi aanaphwanela otoroka moonelo awe. Woopaceryani, owo aahihiya waalakhanya yeeyo yaavuwihiwa mu interneti vooloca sa alamuleli. (Mas. 20:3) Yanaawiili, owo aahivekela wa Yehova avekaka nikhaviheryo wi amuroromele yoowo ni ohiwehererya matorokelo a olamulelo woomuchu. (Sal. 9:9, 10) Yaneeraru, owo aahaalakhanya mu soolaleeryiwa sahu miyaha saaloca sa wiivalaanya ni elapo. (Yoh. 17:16) Vano Joana olonce wi owiiwelela ni waacicimiha alamuleli onnamweeriha okhala mmurecele ni oomaaleleya.

MWIIWELELEKE OHOOLELA WA MAREHERERYO A YEHOVA

15. Ntakhara heeni ikwaha ikina ti woovila wa hiyo wiiwelela ohoolela wa marehereryo a Yehova?

¹⁵ Yehova onnaniveka wi ‘niwiiweleleke yaale anahoolela’ mmulokoni. (Ahe. 13:17) Naamwi Muhooleli ahu, Yesu, ari oophaameya, yaale onaaphariheleiye wi yaahooleleke achu awe veelaponi yeela yavathi, toohiphaameya. Ti nthowa nene, ilukuluku ikina onakhalaaya woovila owiiwelela xaxaxa vaavaa ananivekaaya opaka echu yeeyo nihinachunaahu opaka. Mu ekwaha ekina, Petru aahikhalano nikacamiho na okhala awiiwelela. Owo aahaakhela nlakiheryo noorweela wa munkeelo wi aakhuure axinama yaawo yaari oothanyeya mwawiiwanana ni Nlamulo na Mose, nave Petru aahikhooca wiiwelela, ohiya pahiru mu ekwaha emoha, nyenya mu ikwaha raru! (Saw. 10:9-16) Ntakhara heeni Petru aaheerano yeela? Wa yene ohoolela yoole ovyaani hiwiiwexexeya. Waari woohiyana ni yeeyo aapakeiye mu okumi awe woothene. Waakhanle wi Petru aahoona okhala woovila wiiwelela ohoolela wa munkeelo oophaameya, mwaanyiherye mukhalelo oryaaya woovila wa hiyo wiiwelela ohoolela wa achu oohiphaameya!

16. Tiheeni Paulo eenreiye naamwi oonaka wi ohoolela aakhenleiye hiwaari wamphurelo? (Saweeriwa ti Arummwa 21:23, 24, 26)

¹⁶ Murummwa Paulo aari ooreheryeya ‘wiiwelela’ naamwi vaavaa aakheleiye ohoolela waahiiwexexeya. Akristu yaawo yaari Ayuta yaahiiwa sawootha seiho saaloca wi owo aalaleerya “maloko wi ehichariheke malamulo a Mose,” nave haacicimiha Nlamulo na Mose. (Saw. 21:21) Akristu yaahoolela o Yerusalemu yaahimuleela Paulo wi aakuxe alopwana axexe wi yiiseelihe mu empa ya Muluku. Mmukhalelo yoola, Paulo aahaala wooniherya wi aanacicimiha Nlamulo. Paulo aahisuwela wi Akristu hiyaaphwanela ocharihaka Nlamulo na Mose nave wi owo haapanke yoohesa. Naamwiihiiha, owo aahiiwelela mwawaakuveya. Paulo “aahaakuxa alopwana nave iiseeliha mwawiiwanana ni nlamulo vamoha ni yaawo.” (Mwaalakhanye Saweeriwa ti Arummwa 21:23, 24, 26.) Wiiwelela wa Paulo waahaakhaviherya anna okhala awiiwanana.—Aro. 14:19, 21.

17. Tiheeni muhusenryaanyu ni yootakiherya ya Estefaniya?

¹⁷ Murokora mmoha awiichaniwa Estefaniya aahikhalano nikacamiho na weemererya yoolakelela yeeyo yaapakiwe ni anna yaahoolela muteko mu elapo awe. Owo ni iyawe yaarumeela mu nikhuuru na elocelo yookhopela nave yaatepa ohakalala orumeela weiwo. Nyenya voocharela, Epeteli yaahimaaliha nikhuuru nenle nave mutheli ole aahiwompwa okookela orumeela mmuloko wa elocelo aya. Estefaniya onneemererya: “Kaahihica vancipale, miyaano koona wi mu ekulucu ya elocelo ahu, hiwaariwo othowa otokweene.” Naamwiihiiha, owo aahilakelela wiiwelela. Estefaniya ooloca: “Moovira wa elukuluku, kaahiiwexexa ntakhara heeni anna yaapankaaya yoolakelela yeele. Hiyaano naahikhala asitiithi oomunepani wa ancipale mmulokoni, yaawo amusi aya yahaari mu eparipari. Miyaano tho kinnahuserya ni murokora mmoha yoowo aari ooceecheya mu elukuluku aya. Nave tho olelo kookhalano elukuluku yincipale ya opaka yoohuserya aka ya muchu mukhateiye. Nave kookhalano yawuupuxerya-ya-murima yaphaama, nthowa nawi koosuwela wi koopaka owetha waka wi kikhale awiiwelela.”

18. Ntakhara heeni okhala awiiwelela ti waphaama wa hiyo?

¹⁸ Hiyaano nnanwerya ohuserya okhala awiiwelela. Yesu “aahuserya wiiwelela,” ohiya mmikhalelo sookhweya, nyenya “mwa ichu aahooxen’yeiyeno.” (Ahe. 5:8) Hiihaa ntoko Yesu, hiyaano wiiliwiili ninnahuserya okhala awiiwelela vaavaa nnahoolelaahu mikhalelo soovila. Ntoko yootakiherya, omapacereryo wa epahu ya Koronaviru, naahileeliwa wi nimaale othukumana mu Ipa sa Omwene ni olaleerya empa ni empa. Apwanne mwaahikhalano nikacamiho na wiiwelela oohoolela yoola? Nto wiiwelela wanyu wohookhapelelaani, wookhaviherya muloko otitelela okhala wawiiwanana nave woomuhakalaliha Yehova. Vano, oothene ahu nooreheryeya vancipale wi niiwelele ohoolela vyakala yoowo akhweya nnahaalaahu waakhela variyari va yoohoosa etokotoko. Nave wiiwelela ohoolela yoowo tonahaala ovuluxa okumi ahu!—Yupu 36:11.

19. Ntakhara heeni nyuwaano munnachuna okhala awiiwelela?

¹⁹ Nohoona wi okhala awiiwelela onnaruuha mareeliho mancipale. Nyenya nthowa noopacerya na omwiiwelela Yehova ti nawi ninnamusivela vancipale yoowo nave ninnachuna omuhakalaliha. (1 Yoh. 5:3) Hiyaano hinrwa niwerya omuliva Yehova wa ichu soothene saphaama onanipakeleiye. (Sal. 116:12) Nyenya nnanwerya omwiiwelela yoowo ni yaale anahoolela. Wakhala wi noheerano yeeyo, nnahaala wooniherya wi na achu amiruku. Nave muchu amiruku, onnahakalaliha murima wa Yehova.—Mas. 27:11.