Apwanne Nyuwaano Munnawerya Ohiyaniha Eparipari ni Wootha?

1. Munoona hai vaavaa muhusenryaanyu eparipari?

NTOKO achu a Yehova hiyaano ninnasivela iparipari seiho iri Mpiipiliyani. Nave hiyaano ninnathipela nroromelo nahu mwemmo. (Aro. 10:17) Hiyaano noolekecheya wi Yehova ootikitherya muloko Weekristu ntoko “poco ni mwaakiha a eparipari.” (1 Tim. 3:15) Nave hiyaano ninnakhala oohakalala waakhaviherya ‘yaale anahoolela variyari vahu’, chiryene anna yaala annathariha iparipari sa Mpiipiliyani nave annanikhaviherya opaka yookhwela ya Muluku.—Ahe. 13:17.

2. Mwawiiwanana ni Tiyaku 5:19, tiheeni enahaala weereya nimanle ohuserya eparipari?

² Nyenya nimanle ohuserya eparipari ni weemererya wi ninnaphwanela ochariha ohoolela wa marehereryo a Yehova, nlelo nnanwerya okhala va Yawoopiha ya opheruwa. (Mwaalakhanye Tiyaku 5:19.) Satana aahaala ohakalala vancipale onoona niyeleelaka omuroromela Piipiliya ni marehereryo a Yehova.—Aef. 4:14.

3. Ntakhara heeni nnaphwanelaahu otitelela okhala oororomeleya? (Aefesu 6:13, 14)

³ Mwaalakhanye Aefesu 6:13, 14. Moohilekela Satana onahaala omwaramwaxa sawootha ni oweeriha achu a maloko owiica achu a Yehova. (Wup. 16:13, 14) Hiyaano tho noosuwela wi Satana onahaala opaka owetha wawe wi eererye waawoka achu a Muluku. (Wup. 12:9) Mwa yeeyo, ti woochuneya vancipale wiivyakiha hiihaano wi niwerye woona ohiyana orivovo variyari va eparipari ni wootha, wi niwerye otitelela okhala awiiwelela eparipari. (Aro. 6:17; 1 Pet. 1:22) Ovuluxiwa wahu mu yoohooxa etokotoko onahaala okhala moorweela mwa weerano yeeyo!

4. Tiheeni nnahaalaahu ohuserya mmwaha yoola?

⁴ Mu yoohuserya yeela nnahaala woona mikhalelo miili seiho nnapwanelaahu okhalano naachunaka woona eparipari yeeyo enarweela Mpiipiliyani ni weemererya ohoolela wa marehereryo a Yehova. Voocharela nnahaala othokororya ichu raru seiyo nnaphwanelaahu opaka wakhala wi ninnachuna otitelela okhala oohicikinyeya mu eparipari.

MIKHALELO SEIYO NNAPHWANELAAHU OKHALANO WAKHALA WI NINNACHUNA OSUWELA EPARIPARI

5. Ti mwawiihai omoova Yehova onahaalaaya onikhaviherya osuwela eparipari?

⁵ Omoova Yehova. Omoova Yehova onataphulela wi ninnamusivela owo nave wi hannachuna opaka echu yeeyo yaahaala omuhiciha. Mwa yeeyo, hiyaano nnachuna osuwela phaama ohiyana orivovo variyari va yeeyo eri yaphaama ni yoonanara, eparipari ni yawootha, wi niwerye weemereryiwa ni Yehova. (Mas. 2:3-6; Ahe. 5:14) Nave woona wi ichu seiho inaahakalaliha achu hasinamuhakalaliha Yehova, hiyaano hanirwa neemererya wi owoova achu ekhale echu etokweene opwaha osivela wahu ntakhara Yehova.

6. Ti mwawiihai owoova achu waawerinhaaya Aisarayeli khumi ohiloca eparipari?

⁶ Wakhala wi owoova wahu achu otokweene opwaha omoova wahu Yehova, nnanwerya opheruwa mu eparipari. Moone yootakiherya ya Aisarayeli khumi napiili yaawo yaakele ohocela elapo yeeyo Yehova aaroromelinheiye waavaha achu o Isarayeli. Khumi a yaawo yaaheeriha wi woova wa Aisarayeli okhale otokweenexa opwaha osivela yoowo yoonaaya orweela wa Yehova. Awo yaahiloca wa Aisarayeli oothene: “Nihiyewo waarosha achu yaale! Ari akuru onipwaha hiyo.” (Nam. 13:27-31, PMM) Eparipari wi, mmoonelo woomuchu Akanani yaari akuruxa waapwaha—Aisarayeli. Nyenya ophiyerya makuchuwelo a oloca wi a Aisarayeli hiyaahaala owerya waavootha amwiicani aya, waari omuhiya Yehova moomalela okhwipi. Alopwana yaale khumi yaaphwanela otikitheryeya wa yeeyo Yehova aachuneiye wi Aisarayeli epake. Awo tho yaaphwanela wuupuwelela sa yeeyo Yehova aaweerenleiye. Mwawiihiiha, yaaphwanela wuupuwelela wi Akanani hiyaari echweenevo moolikana ni aikuru soothene Yehova. Nyenya moohiyana ni alopwana yaale, Yosuwa ni Kalepe yaanachuna weemereryiwa ni Yehova. Awo yaahiloca wa muloko woothene: “Apwiya yakhala ni hiyo anarwa enihoola ni onivaha elapo yeele.”—Nam. 14:6-9, PMM.

7. Ti mwawiihai nnahaalaahu olipiha omoova wahu Yehova? (Moone tho eruku.)

⁷ Wi nlipihe omoova wahu Yehova, ikwaha soothene nnapakaahu soolakelela, nnaphwanela wuupuwela wa yeeyo eni emuhakalalihe yoowo. (Sal. 16:8) Vaavaa munaalakhanyaanyu saweereya sa Mpiipiliyani, mwiikohe: Waakhanle wi miyaano kaari mmukhalelo yoowo, teevi yaahaala okhala yoolakelela aka?’ Ntoko yootakiherya, vaavaa Aisarayeli yaale khumi yaaloncaaya ichu seiye sawootha, nyuwaano mwaahaala oweemererya yaawo mukhalaka oowoova achu naari wi osivela wanyu ntakhara Yehova waahaala okhala otokweene? Aisarayeli hiyaaweemerenrye wi Yosuwa ni Kalepe yaaloca eparipari. Nave nthowa na yeeyo yaahiyeleela ekari ya ovolowa mu Elapo ya Nlakano.—Nam. 14:10, 22, 23.

8. Mukhalelo taani nnaphwanelaahu wunnuwiha, nave ntakhara heeni?

⁸ Wiiyeviha. Yehova onuupulula eparipari pahiru wa yaale ari awiiyeviha. (Mat. 11:25) Nave hiyaano mwa wiiyeviha, ninneemererya nikhaviheryo wi nihuserye eparipari. (Saw. 8:30, 31) Naamwi hiiha nnaphwanela okhalano ekaasoope wi nihikhale awiirumiha. Wakhala wi eyo yoheereya, hiyaano nnampacerya woona wi miyoonelo sahu ti samirukuxa opwaha soorepa sa Mpiipiliyani ni ohoolela wa mmarehereryo a Yehova.

9. Ti mwawiihai nnahaalaahu okhapelela wiiyeviha?

⁹ Wakhala wi ninnachuna otitelela okhala awiiyeviha, nnapwanela wuupuwelela wi, naawiilikanyihaka ni Yehova hiyaano tahi na echu enevo. (Sal. 8:3, 4) Nave tho nnaphwanela ovekela nimvekaka Yehova wi anikhaviherye okhala awiiyeviha ni weemererya ohusihiwa. Yehova onnanihusiha muupuwelo awe moorweela wa Piipiliya ni marehereryo awe, nave owo onahaala onikhaviherya ovaha esisapo yeeyo opwaha muupuwelo ahu. Vaavaa munamwaalakhanyaanyu Piipiliya, mweererye woona mukhalelo Yehova onasiveleiye wiiyeviha ni wiica wiirumiha. Nave tho mweererye okhala awiiyeviha wakhala wi mohaakhela murici wammori yoowo akhweya onahaala oweerihaani okhala muhooleli naari wooniwaka wiiliwiili ni akina.

MUKHALELO NNEERAAHU NIPHAREXA EPARIPARI

10. Yehova ampharihenle taani wi avahe sooleeliherya ni ohoolela wa achu awe?

¹⁰ Muroromele marehereryo a Yehova. Khalai, Yehova aahimpharihela Mose nave voocharela Yosuwa wi evahererye sooleeliherya wa achu Aisarayeli. (Yos. 1:16, 17) Aisarayeli yaanareelihiwa vaavaa awo yaawoonaaya alopwana yaawo ntoko oohoolela a Yehova. Iyaakha masaneene ohoolo waya, vaavaa muloko Weekristu waatikitheryiwaaya, arummwa khumi napiili ti yaawo yaahoolela achu a Muluku. (Saw. 8:14, 15) Ohoolo waya, nikhuuru nenlo naahaaceereryeya nave naanaphitaanyerya atokweene akina o Yerusalemu. Moorweela wa ochariha ohoolela yoowo yaakhelaaya wa alopwana yaala oororomeleya, “miloko saanalipihiwa mu nroromelo nave nihiku nnihiku saanaaceereryeya.” (Saw. 16:4, 5) Mmahiku ahu, hiyaano tho ninnareelihiwa vancipale vaavaa nnacharihaahu ohoolela wa Yehova. Nyenya ti mwawiihai Yehova aahaaleiye woona wakhala wi hiyaano hanneemererya ohoolela wa alopwana yaawo owo aathanleleiye wi enihooleleke? Nnanwerya waakhula nikoho nenla noonaka yeeyo yeeren’ye ni Aisarayeli vaavaa yaaryaaya vamukwahani eyaaka mu Elapo ya Nlakano.

11. Tiheeni yaaweeren’ye ni yaale yaahimuciciminhe Yehova ni yaale owo aathanlileiye wi ehoolele nloko? (Moone tho eruku.)

¹¹ Ekwaha emoha, vaavaa Aisarayeli yaaryaaya vamukwahani eyaaka mu Elapo ya Nlakano, alopwana yaawo yaari oovuwa yaahimwaakaaha Mose vooloca sa murici yoowo Yehova amvaheiye yoowo. Awo yaahi: ‘Aisarayeli oothene [ohiya pahiru Mose] taweela mmoha ni mmoha, nave Apwiya ari veeri vaya.’ (Nam. 16:1-3, PMM) Naamwi yaari eparipari wi wa Yehova ‘muloko woothene waari waweela,’ Yehova aahimuthanla Mose wi avaheke ohoolela. (Nam. 16:28) Vaavaa yamvaanyaaya Mose, mweeparipari alipa oomwaryeya yaala yavaanyihana ni Yehova. Awo hiyaatikitheryen’ye wa yeeyo Yehova aachuneiye; awo yaatikitheryen’ye wa yeeyo awo yaachunaaya—okhala ooweryaxa ni oovuwa. Yehova aahaatoloxa alopwana yaale oothene nave tho ni mamilyawu aachu yaaweemererya yaawo. (Nam. 16:30-35, 41, 49) Mmukhalelo mmohamoha, olelo noosuwela wi Yehova hanaweemererya yaale ahinacicimiha ohoolela wa marehereryo awe.

12. Ntakhara heeni ilukuluku soothene nnaphwanelaahu ororomela marehereryo a Yehova?

¹² Ilukuluku soothene hiyaano nnaphwanela ororomela marehereryo a Yehova. Vaavaa enakhalaaya wi ti woochuneya opaka matorokelo mu wiiwexexa wahu wa eparipari ya Mpiipiliyani naari mukhalelo nnamurumeelaahu Yehova, yaale anahoolela hanuupuwela ikwaha piili wi epake matorokelo yaawo. (Mas. 4:18) Awo anneerano yeeyo nthowa nawi, opwaha soothene anachuna omuhakalaliha Yehova. Awo tho annapaka owetha waya wi epake soolakelela seiya piili sinathipeleya Mmasu a Muluku, nave eyo echu yeeyo alapeli oothene a Yehova anapwanelaaya opaka.

13. “Mooneiho wa masu aphaama” tiheeni, nave ti mwawiihai awo ananikhaviheryaaya opharaxa eparipari?

¹³ “Opharexa mooneiho wa masu aphaama.” (2 Tim. 1:13) “Mooneiho wa masu aphaama” enaahiwa mahusiheryo Eekristu yaawo nnaphwanyaahu Mpiipiliyani. (Yoh. 17:17) Ti yaawo enanivaha mathipelo wa soothene seiyo nneemereryaahu. Marehereryo a Yehova annanihusiha opharaxa mahusiheryo yaawo. Wakhala wi ninneerano yeeyo, nnahaala oreelihiwa.

14. Ti mwawiihai Akristu akina akhalai yaahin’yaaya ochariha “mooneiho wa masu aphaama”?

¹⁴ Tiheeni yaahaala weereya waakhanle wi nohiivalaanya wa “mooneiho wa masu aphaama”? Moone yootakiherya. Mu nsana noopacerya Akristu akina yaanamwaramwaxa sawootha elocaka wi nihiku na Yehova naahiphiya. Akhweya awo yaakhenle ekaarata mwawooneya yeeyo—yaarempwale ni murummwa Paulo—yeeyo yaaloca sa nihiku nenlo. Nave ehivarenrye yeeyo yaavolowelavo, Akristu akina o Tesalonika yaaheemererya miyaha seiyo nave epacerya omwaramwaxa wa akina. Waakhanle wi awo yaahuupuwela yeeyo Paulo aahusinheiye, awo hiyaahaala owokiwa. (2 Ate. 2:1-5) Paulo aahiloca wa anna yaale wi eheemereryeke soothene seiyo yiiwaaya. Nave wi aakhaviherye mmikhalelo sa omwaahiyu, Paulo aahikuchula ekarata awe yanaawiili wa Atesalonika ariki: “Miyo Paulo, kinnoorepelaani mooni aka, ela eneneeryo mu ikaarata saka soothene; ti hiiha kinarepaaka.”—2 Ate. 3:17.

15. Nni niikhapelele hai wa sawootha seiyo inooneya ntoko wi ti seeparipari? Mvahe yootakiherya. (Moone tho iruku.)

¹⁵ Tiheeni nnaphwanelaahu ohuserya ni yeeyo Paulo aalonceiye wa Atesalonika? Wakhala wi nohiiwa echu vyakala yeeyo ehiniiwanana ni yeeyo nihusenryaahu Mpiipiliyani naari wakhala wi noosuwela mwaha mukina woonanara, nnaphwanela okhala a miruku. Mu ekwaha emoha o Uniyawu Soviyetika akhalai, amwiicani ahu yaahaavahererya annihu ekarata yeeyo mwawooneya yaakhala ntoko wi yaarweela o nipuro ntokweene. Ekaarata eyo yaaceenyerya anna akina opaka makhuuru a marehereryo awaya mukhataaya. Nave tho ekarata eyo, chiryene yaakhala ntoko wi yaari yeeparipari. Nyenya anna yaawo yaari oororomeleya hiyaawoken’ye. Awo yaahiiwexexa wi muchaka waarweela mu ekarata yeele hawiiwanana ni yeeyo yaahusenryaaya. Olelo, mmukhalelo mmohamoha yaale aniica eparipari ikwaha sincipale annampharihela internet ni michaka sawootha wi yeererye onaakanyerya ni onikawanya. Ohiya ‘waakuvela okhala oocikinyeya mmuupuwelo [ahu] waphaama’, nnaphwanela wuupuwelela mweephoole waakhanle wi yeeyo niiwalaahu naari naalakhannyaahu yaarimwi yiiwananaka ni iparipari seiyo nihusenryaahu.—2 Ate. 2:2; 1 Yoh. 4:1.

16. Mwawiiwanana ni Aroma 16:17, 18, tiheeni nnaphwanelaahu weera wakhala wi akina annapheruwa mu eparipari?

¹⁶ Mutitelele wiiwanana ni yaale ari oororomeleya wa Yehova. Yehova onachuna wi nimurumeeleke yoowo ni annihu mwawiiwanana. Nave pahiru nnahaala owerya weerano yeeyo wakhala wi noopharaxa eparipari. Muchu yoowo onamwaramwaxa miselo seiho sinavuhana ni eparipari onnatannya okawanyeya mmulokoni, mwa yeeyo Yehova onnanleela wi ‘naarapele yaawo.’ Wakhala wi haneenreno yeeyo, akaneene ahu nnahaala opacerya weemererya ichu seiyo sihiri seeparipari nave nikhale oohiroromeleya wa Yehova.—Mwaalakhanye Aroma 16:17, 18.

17. Miphurelo taani nryaahuno moorweela wa osuwela eparipari ni opharaxa yeeyo moolipa?

¹⁷ Vaavaa nniiwexexaahu eparipari nave nipharaxa moolipa yeeyo, ninnawerya omwaacamela Yehova ni otitelela olipiha nroromelo nahu. (Aef. 4:15, 16) Ohiya yeeyoru, haniwokiwa ni mahusiheryo atheru a Satana nave nnanwerya otitelela okhala ookhapeleleya ni okhapelela wa Yehova variyari va yoohooxa etokotoko. Mwawiihiiha, mpharexa moolipa eparipari “nave Muluku a murecele onarwa akhala ni nyuwaano.”—Afi. 4:8, 9.