Mpuhe Ohakalala Wawaaca Yoowo Onarwa mu Ovaha

1-2. Nnaphuravo hai moorweela wa opatuxiwa ni mavyakelo a okhalano ohakalala wawaaca mu ovaha opwaha mu waakhela?

VAAVAA Yehova aapatunxeiye achu, owo aahaapaka ni mavyakelo a ophwanya ohakalala wawaaca mu ovaha opwaha mu waakhela. (Saw. 20:35) Apwanne eyo enataphulela wi hannaphwanya ohakalala vaavaa nnaakhelaahu? Hooye. Ninnasuwela moorweela wa saweereya, wi oothene ahu ninnakhalano ohakalala vaavaa nnaakhelaahu yamahala. Naamwiihiiha, ninnakhalano ohakalala wawaaca vaavaa nnaavahaahu akina. Mweeparipari, ori ntakhara mphurelo ahu nave Yehova onipanke hiihaa. Ntakhara heeni?

² Woona wi Yehova onipanke hiihaa, nnanwerya okhala oohakalalaxa. Nnanwerya waaceererya ohakalala wahu naavyaka ikari sawaaceererya wi nivahe. Apwanne owo tahi mukhalelo wootikhiniha yoowo naapakeliwaahu?—Sal. 139:14.

3. Ntakhara heeni Yehova onanwerya olociwa ntoko “Muluku oohakalala”?

³ Soorepa sinnanceenyerya wi ovaha onnaruuha ohakalala, wa nthowa na yeeyo tahi yootikhiniha wi Piipiliya onnamuloca Yehova ntoko “Muluku oohakalala.” (1 Tim. 1:11) Owo tari oopacerya Waavaha akina nave haavo onavaha ompwaha yoowo. Nthowa na yoowo, “nookhalano okumi, ninniitannya nave nookhala,” hiiha ntoko murummwa Paulo olonceiye. (Saw. 17:28) Mweeparipari, “yamahala yoothene yaphaama ni yoovaha yoothene yoophaameya” enarwa wa Yehova.—Tiy. 1:17.

4. Tiheeni enahaala onikhaviherya okhalano ohakalala wawaaca?

⁴ Oothene ahu akhweya naamusiveliwa olawiha nlelo ohakalala wawaaca yoowo onarwa mu ovaha. Nnanwerya weerano yeeyo ntakiheryaka mahala a Yehova. (Aef. 5:1) Mmwaha yoola, nnahaala othokororya yootakiherya awe yaphaama nave tho nnahaala ohuserya yeeyo nnaphwanelaahu weera wakhala wi nohoona wi akina hanathamalela yeeyo niweerenlaahu. Eyo enamunikhaviherya otitelela waavaha akina nave mwaweerano yeeyo nnamukhala oohakalalaxa.

MUKHALE A MAHALA HIIHA NTOKO YEHOVA

5. Ichu taani soomwiilini Yehova onanivaheiye?

⁵ Mikhalelo taani mikina seiyo Yehova onooniheryeiye mahala? Muthokororye sootakiherya savakhaani. Yehova onnanivaha ichu soomwiilini seiyo nnachunaahu. Tahi wi ilukuluku soothene ninnakhalano ichu saphaamaxa, nyenya nnikhaviheryo na Yehova, ancipale a hiyo nookhalano ichu seiyo nnachunaahu. Ntoko yootakiherya, owo onnavahererya yeeyo nnaphwanelaahu okhalano ntoko yoolya, soowara, nnipuro nookhala. (Sal. 4:8; Mat. 6:​31-33; 1 Tim. 6:​6-8) Apwanne Yehova onavahererya soothowa sahu soomwiilini nthowa nawi pahiru murici awe? Mweeparipari hooye! Ntakhara heeni Yehova onneerano yeeyo wa hiyaano?

6. Tiheeni nnahuseryaahu ni Mateyu 6:​25, 26?

⁶ Mwa mukwasu, Yehova onnavahererya soothowa sahu soomwiilini nthowa nawi owo onnanisivela. Muthokororye masu a Yesu anaphwanyeya mu Mateyu 6:​25, 26. (Mwaalakhanye.) Yesu onnapharihela sootakiherya sa soopatuxiwa. Alocaka sa ipalame, Yesu aahi: “iho hasinamisa naari ohaca naari othukumanya mmakhupini.” Nyenya, moone yeeyo tho owo olonceiye voocharela: “Atiithi anyu a wirimu annavaha yoolya.” Mwawiihiiha Yesu onnakoha: “Apwanne nyuwo hamuri oochuneyaxa opwaha ipalame seiho?” Tinivi nri nihusiheryo? Yehova onawoona alapeli awe ntoko oochuneyaxa opwaha soopatuxiwa sa axinama. Waakhanle wi Yehova onnakhapelela soothowa sa axinama, nnanwerya ororomela wi owo onahaala onikhapelela! Ntoko tiithi oomwiilini oopwacha, Yehova onnavakulela emusi awe moosivela.—Sal. 145:16; Mat. 6:32.

7. Tuuvi ori mukhalelo mmoha wa otakiherya mahala a Yehova? (Moone tho eruku.)

⁷ Hiiha ntoko Yehova, hiyaano tho nnanwerya ovaha sookhalano sahu moosivela. Ntoko yootakiherya, apwanne moomusuwela nthamwene a munroromeloni yoowo othoiwe yoolya naari yoowara? Yehova onanwerya woopharihelaani nyuwaano omvaha echu wi mmukhaviherye waakhwaniherya yoothowa awe. Achu a Yehova aasuweliwa xaxaxa moorweela wa wooniherya mahala vaavaa eneereyaaya epahu. Ntoko yootakiherya, variyari va epahu ya Koronaviru, anna ni arokora yaanakawana soolya, soowara ni ichu ikina ni yaale yaathoiwa. Ancipale tho yaapaka sooveleela saya mwa mahala ntakhara muteko wa elapo yoothene. Eyo yoheeriha okhala wooweryeya waakhaviherya anna orukurerya elapo yaawo yaathoiwa nthowa na epahu. Awo yaahipharihela muteko masu anaphwanyeya mu Ahepri 13:16: “Muhicuwaleke oweerela saphaama ni okawana ni akina yeeyo muryaanyuno, woona wi Muluku onasiveliwa ni mikucho ntoko seiho.”

8. Mmukhalelo taani nnaphuraahu mu owerya wa Yehova? (Afilipi 2:13)

⁸ Yehova onnanivaha owerya. Yehova ookhalano owerya woohikota nave onnahakalala waavaha ikuru alapeli awe oororomeleya. (Mwaalakhanye Afilipi 2:13.) Apwanne mohintoko ovekela wi mukhale oolipa wi mvoothe yaweeha, naari mohintoko ovekela mvekaka ikuru wi mvilele yaweeha yoovila? Nyuwaano tho akhweya munnavekela pahiru mvekaka ikuru sawaakhwanela wi mutitelele okhala nihiku nikina. Vaavaa nivekelo nanyu na oveka ikuru nnaakhuliwaaya, nyuwaano munanwerya weemererya yeeyo murummwa Paulo, orempeiye: “Kinnawerya soothene moorweela wa yoowo onakivaha ikuru.”—Afi. 4:13.

9. Mikhalelo taani mikina nnahaalahu omutakiherya Yehova nipharihelaka ikuru sahu wi naakhaviherye akina? (Moone tho eruku.)

⁹ Naamwi nri achu oohiphaameya, nnanwerya otakiherya opharihela mahala a ikuru sa Yehova. Hannawerya waakawela ikuru akina. Nyenya nnanwerya opharihela ikuru sahu mu nipuro naya. Ntoko yootakiherya, nnanwerya wakhaviherya anna ni arokora awuuluvala naari awiiceliwa okhapelela empa aya naari othuma echu olooxa ntakhara yaawo. Wakhala wi mikhalelo sahu sinnaneemererya, nnanwerya wiiveleela wi nikhaviherye orehererya Empa ya Omwne. Wakhala wi ninnapharihela ikuru sahu wi nipake ichu seiya, nnanwerya weerano phaamaxa wa anna ni arokora ahu.

10. Nni nipharihele hai owerya wa masu wi naalipihe akina?

¹⁰ Muhicuwale tho wi masu aakhalano owerya. Apwanne mwaanwerya owuupuwela yaawo yaahaala olipiheya waakhanle wi mohaaleela awo wi munnathamalela yeeyo anapakaaya? Apwanne moomusuwela muchu yoowo onachuna nihakararyo? Waakhanle wi tihiiha, munoona hai opaceryiha omwaacamela muchu owo? Nyuwaano munanwerya omuxekurya ethoi ni ethoi, omulikaarela naari omvonyerya michaka. Hamunaphwanela okhala awuukhuwa ni yeeyo munayaanyu oloca. Masu avakhaani ookhweya oovinyerya vathi vamurimani, ananwerya okhala yaaweenexa nthamwene anyu amunroromeloni onachuneiye wi atitelele okhala oororomeleya wa nihiku nikina naari wiisoona okhala phaama ni mukhalelo awe.—Mas. 12:25; Aef. 4:29.

11. Yehova onapharihela hai miruku sawe?

¹¹ Yehova onnavaha miruku. Oohuserya Tiyaku oorepa: “Mukina a nyuwo athoiwa miruku, atitelele omveka Muluku, owo onarwa avahiwa. Woona wi Muluku onnavaha ni murima woothene, ahikhalenle nrima.” (Tiy. 1:5; enoota.) Ntoko masu yaala anooniheryaaya, Yehova hanakhalela nrima miruku sawe. Owo mwa mahala onnakawana ni akina. Moone tho wi Yehova, vaavaa onavaheiye miruku, owo onnavaha “ni murima woothene,” naari “ahikhalenle nrima.” Owo hanachuna wi nihooneke phaama vaavaa nnamvekaahu ohoolela wawe. Mweeparipari, owo onnanceenyerya omwaavya yoowo.—Mas. 2:​1-6.

12. Ikari taani nryaahuno wi nikawane masuwelelo ahu?

¹² Hanka vooloca sa hiyaano? Apwanne nnanwerya omutakiherya Yehova nikawanaka masuwelelo ahu? (Sal. 32:8) Achu a Yehova aakhalano ikari sincipale sa okawana yeeyo ahusenryaaya. Ntoko yootakiherya, wiiliwiili ninnaavyakiha avyaani mmuteko woolaleerya. Atokweene a mmulokoni annaakhaviherya mopixa murima arummwa oorumeela ni anna oopatisiwa mukhalelo wa okhapelela mirici saya mmulokoni. Nave yaale arino mavyakelo a oteka ni orehererya annaavyakiha yaale ahirino mavyakelo wi epakeke miteko mmuteko wa Omwene.

13. Nni ntakiherye hai mukhalelo wa Yehova wa ovaha miruku?

¹³ Yaale anavahererya ovyakiha anneerano phaama mu otakiherya mukhalelo Yehova onavaheiye miruku sawe. Muupuwele wi Yehova onnavaha miruku mwa mahala. Mmukhalelo mmohamoha nnachuna okawana mootaphuwa masuwelelo ni mavyakelo ahu ni yaale anaamuhuserya. Hannoovelela waahusiha akina akhweya noovaka wi muchu yoowo nnamuvyakihaahu tonahaala okuxa murici ahu. Nave tho hannakhalano muupuwelo wawi: ‘Miyaano haavo okivyakinhe! Mmuhiye ahuseryeke mukhateiye.’ Achu a Yehova hanuupuwela mmukhalelo yoola. Ohiya yeeyo, ninnakawana moohakalala ohiya pahiru masuwelelo ahu, “nyenya tho wiivaha hiyo aneene” wa yaale nnaavyakihaahu. (1 Ate. 2:8) Ninnaweherya wi awo, “anahaala okhala oophwanelela waahusiha akina.” (2 Tim. 2:​1, 2) Wakhala wi hiyaano ninnakawana mwa mahala masuwelelo ahu, hiyaano hiiha tho ntoko akina nnamukhala amirukuxa ni oohakalala.

WAKHALA WI ACHU HANATHAMALELA YOOVAHA AHU

14. Ti mwawiihai achu ancipale anaakhulelaaya mahala ahu?

¹⁴ Vaavaa nnakhalaahu a mahala, xaxaxa wa anna ni arokora ahu, ikwaha sincipale awo annooniherya othamalela wa yeeyo. Awo ananwerya onirepela ekaarata ya othamalela naari wooniherya othamalela waya mmukhalelo mukina. (Ako. 3:15) Vaavaa awo ananthamalelaaya, ninnakhala oohakalalaxa nthowa na opaka echu ntakhara yaawo.

15. Tiheeni nnaphwanelaahu wuupuwela vaavaa achu ahinooniheryaaya othamalela?

¹⁵ Mweeparipari, tahi wi akina ilukuluku soothene annooniherya othamalela. Ikwaha ikina, nnanwerya ovaha elukuluku ahu, ikuru naari sookhalano sahu, nyenya voocharela nniikoha waakhanle wi mulipa awaakhela onnapwacha yeeyo nimweerenlaahu. Wakhala wi eyo yoheereya, nni nsepe hai oyeleela ohakalala wahu naari okhala oonyeenyeya? Muupuwele masu a yoorepa ya mwaha ahu, Saweeriwa ti Arummwa 20:35. Ohakalala nnakhalaahuno vaavaa nnaavahaahu akina, honarweela mu othamalela wa achu yeeyo nnaweerelaahu. Nnaphwanela osiveliwaka ovaha, naamwi akina ehithamalelaka. Mwawiihai? Muthokororye mikhalelo mikina.

16. Tiheeni enahaala onikhaviherya otitelela ovahaka moohakalala?

¹⁶ Mutikitheryeye mu omutakiherya Yehova. Owo onnaavaha ichu saphaama achu, moohipwacha achu othamalela naari hooye. (Mat. 5:​43-48) Yehova oororomeliha wi vaavaa hiyaano tho nnavahaahu ‘nihiweheryaka okookiheryiwa echu; nchuwelo nahu nnarwa nikhala ntokweene.’ (Luka 6:35) “Echu” enanwerya ophitaanyera wooniherya othamalela. Othamaleliwa ni ohithamaleliwa, Yehova ilukuluku soothene onamunireeliha ntakhara ophaama yoowo nnapakaahu wi naakhaviherye akina, moorweela wa ‘ovaha moohakalala.’—Mas. 19:17; 2 Ako. 9:7.

17. Taavi ari mathowa oochuneyaxa yaawo ananeeriha waavahaka akina? (Luka 14:​12-14)

¹⁷ Echu ekina nnaphwanelaahu weera wi nimutakiherye Yehova vaavaa nnavahaahu ori opharihela muteko yeeyo Yesu olonceiye mu Luka 14:​12-14. (Mwaalakhanye.) Tahi yooheseya wooniherya owaakhela aleco, naari okhala amahala mmukhalelo mukina ni yaale anahaala weerano echu yoolikana wa hiyaano. Hanka wakhala wi ninnoona wi ikwaha ikina ninnaavaha akina niweheryaka wi nikhaleno echu ya onikookiherya? Wakhala wi tihiiha, mweererye yeeyo Yesu olonceiye. Nnaphwanela omwaakhela muchu yoowo nnoonaahu wi haano echu wi anooniherye onaakhela. Mwawiihiiha, nnahaala okhala oohakalala nthowa nawi nnamutakiherya Yehova. Nave wakhala wi hannaweherya echu ya okookiheryiwa, nnamukhala oohakalala vaavaa nnaavahaahu akina, naamwi awo ehooniheryaka othamalela.

18. Tiheeni nnaphwanelaahu ovareryela wi niheereno nave ntakhara heeni?

¹⁸ Musepe wuupuwelela moonanara miyoonelo sa akina. (1 Ako. 13:7) Wakhala wi akina hanooniherya othamalela, nnanwerya wiikoha: ‘Apwanne awo chiryene toohithamalela, naari pahiru arimucuwala wooniherya othamalela?’ Akhweya aakhalavo mathowa makina yaawo aweerinhe awo ohaakhulela ntoko hiiha naaweheryahu. Akina ananwerya othamalela ovinyerya vathi va murima, nyenya ekhaleno nikacamiho na wooniherya. Awo ananwerya okhala awuuliwa muru waakhela nikhaviheryo, xaxaxa wakhala wi khalai yaari yaawo yaakhaviherya akina. Nyenya wakhala wi ninnaasivela mweeparipari anna ni arokora ahu, hanirwa niwuupuwelela moonanara yaawo nave nnamutitelela ovahaka moohakalala.—Aef. 4:2.

19-20. Ntakhara heeni opixa murima ti wamphurelo vaavaa nnaavahaahu akina? (Moone tho eruku.)

¹⁹ Mukhale oopixa murima. Vooloca sa okhala a mahala, Mwene Solomoni oriye: “Orihele epaau aa mmaahini, woona wi emanle mahiku mancipale onarwa ophwanya wanaawiili.” (Ekl. 11:1) Masu yaala ennanihusiha wi, ikwaha ikina, achu ananwerya wooniherya othamalela waya—“emanle mahiku mancipale.” Muthokororye yaweereya emoha enathariha eparipari ene.

²⁰ Mu iyaakha sincipale khalai, mwaara a ooweherya a ekulucu aahimurepela ekaarata yoolipiha murokora mmoha yoowo aapatisiwe hiihaanoru, amuceenyeryaka ochuneya waya otitelela okhala oororomeleya. Ivinrevo iyaakha thanu nararu, murokora aahaakhula orweela mu ekaarata, ariki: “Akhweya nyuwaano hamunasuwela ela, nyenya kinachuna wooleelaani mukhalelo mukikhavihenryaanyu mu iyaakha sa muculi.” Owo onnatitelela: “[Masu mwaarempaanyu] yaari aphaamaxa, nyenya yaari yoorepa yaatannyile murima aka, nave nkintonko ocuwala.”a Amanle othariha makacamiho makina ahoolenleiye, murokora ooloca: “Ikwaha ikina, miyaano pahiru kaachuna ohiya soothene—omaala omurumeela Yehova. Nyenya kaanuupuwelela yoorepa yeele mwaakirepenlaanyu nave eyo yaanakivaha ikuru . . . wi kititelele okhala oororomeleya.” Owo onnaaceererya: “Variyari va iyaakha thanu nararu, hiyaavo echu ekina yaakilipinhe opwaha ekaarata yeeyo mwaakirepenlaanyu.” Mwaanyiherye mukhalelo amwaara a ooweherya a ekulucu yaaryaaya oohakalala vaavaa yaakhenlaaya ekaarata “emanle mahiku mancipale”! Hiyaano tho nnanwerya wooniheryiwa othamalela otokweene, nimanle opaka echu yaphaama wa muchu.

21. Ntakhara heeni nyuwaano muri oolakelela otakiherya mahala a Yehova?

²¹ Ntoko etharihiwaaya, Yehova onipatunxe ni mavyakelo avameekhaaya. Naamwi nsiveliwaka waakhela echu, ninnakhalano ohakalala wawaaca vaavaa nnaavahaahu echu akina. Ninniisoona okhala phaama vaavaa nnakhalaahu ooreheryeya waakhaviherya annihu a munroromeloni. Nave ninnakhala oohakalala vaavaa awo anooniheryaaya othamalela waya. Mwawiihiiha, moohipwacha mulipa awaakhela ooniherye othamalela naari hooye, nnaphwanela okhala oohakalala moorweela wa opaka echu yaphaama. Muhirwe mucuwale wi soothene seiyo munavahaanyu, “Yehova onamoovahaani sincipale opwaha seiyo.” (2 Math. 25:9) Mwawiihiiha nyuwaano hamurwa mwaavaha akina sincipale opwaha seiyo Yehova onoovaheiyeni! Nave hiwaavo ohakalala wawaaca opwaha ochuweliwa ni mwaneene Yehova. Mwawiihiiha, nikhale oolakelela otitelela omutakiheryaka Tiithi ahu amahala a wirimu.