Okhurumuwela wa Yehova—Muni Mutakiherye Hai?

1-2. (1) Mmukhalelo taani xaxaxa nnahaalaahu woona okhala woovila omukhurumuwela muchu? (2) Ti mwawiihai Denise oonihenryeiye okhurumuwela?

APWANNE munnoona okhala woovila waakhurumuwela akina? Ancipale a hiyaano ennaneera, xaxaxa vaavaa muchu onaloceiye naari onapakeiye echu yeeyo enaniphoreiha vancipale. Mwawiihiiha, sookhalavo ichu seiyo nnaphwanelaahu weera wi nsepe okhala oonyeenyeya ni oosarasareya murima wi naakhurumuwele akina. Ntoko yootakiherya, muthokororye yaweereya emoha ya murokora oniichaniwa Denise,a yoowo oonihenrye okhurumuwela otokweene. Mu 2017, Denise ni emusi awe emanle oxekurya ohuleliwa wa Nipuro Ntokweene na Anamoona a Yehova. Vaavaa yaakookelaaya owaani, motorista mmoha aahiyeleela wiivareryela ophiyerya akhumula ekaaro ya Denise. Mu asitenti yoole, Denise aahitiximayaara. Vaavaa aahuhumunweiye, owo aahoona wi anamwane awe yaatepa ophoreya, nyenya aiyawe Brian yaahikhwa. Uupuwelaka sa elukuluku yeele, Denise ooloca: “Miyaano kaahiisoona okhala oonyaanyeryeya ni oohaleeliheya.” Voocharela, owo aahisuwela wi motorista haaphoren’ye naari waakanyeryeya nave aahimveka Yehova avekaka murecele.

² Motorista yoowo aawaakhumunle aahiwaleliwa mukariposo nave aahithorihiwa nthowa na wiipha. Etripunaale yaahoona wi owo ookhalano mulacu. Nyenya voocharela, etripunaale yaahimuleela Denise wi soocharela sa othorihiwa wa mulopwana yoole saahaala orweela mu onamoona awe. Denise ooloca: “Koonne ntoko wi muchu otaphunle nikhwaca naka nave iichelavo esaakhu yanteeru ya maakha, kaahiisoona wi kaakhala mmahiku ookacamihaxa mu okumi aka.” Mu isumana vakhaani ohoolo waya, Denise aahiya mu empa ya othoriha nave iirehererya wi aloce ni mulopwana yoowo aatannyile wiicela otokweenexa wa emusi awe. Tiheeni owo aalonceiye? Denise aahimuleela muthoriha wi ammorele ikharari mulopwana yoole.b Vaavaa aamalinheiye oloca, muthoriha amwaamuthiyana aapacerya winla. Owo aloca: “Mu iyaakha saka 25 ntoko muthoriha, nkintonko wiiwa mwaha woolikana ntoko yoola mu empa yeela ya othoriha. Nkintonko woona emusi echekeliwe evekaka nikhurumuwelo mu nsina na yoole aachekenle. Nkintonko wiiwa masu siyaala oosivela ni ookhurumuwela.”

3. Tiheeni yaamweerinhe Denise okhurumuwela?

³ Tiheeni yaamukhavihenrye Denise okhurumuwela? Owo aahuupuwelela vooloca sa okhurumuwela wa Yehova. (Mik. 7:18) Vaavaa nnooniheryaahu othamalela okhurumuwela yoowo Yehova onoonihenryeiye, nnahaala oceenyeryeya waakhurumuwela akina.

4. Tiheeni Yehova onachuneiye wi neere? (Aefesu 4:32)

⁴ Yehova onachuna wi naakhurumuweleke akina moomalela hiiha ntoko owo onikhurumuwenleiye. (Mwaalakhanye Aefesu 4:32.) Owo onaweherya wi nikhale ooreheryeya waakhurumuwela yaale ananchekela. (Sal. 86:5; Luka 17:4) Mwaha yoola, nnahaala othokororya ichu raru seiho inahaala onikhaviherya okhala ookhurumuwelaxa.

MUHIHIYE OPWACHA MIYOONELO SANYU

5. Mwawiiwanana ni Masiposipo 12:​18, nnaphwanela wiisoonaka hai vaavaa muchu onannyeenyeiheiye?

⁵ Nnanwerya okhala oonyeenyeya vancipale wa nthowa na yeeyo muchu olonceiye naari onipakenleiye, xaxaxa wakhala wi muchu owo nthamwene ahu awaacameleya naari mmusi. (Sal. 55:​12-14) Vakina vaya, wiicela wa mmuupuweloni yoowo nnoonaahu onanwerya olikanyihiwa ni ohommwa ni mwaalo. (Mwaalakhanye Masiposipo 12:18.) Nnanwerya weererya onyikalela naari ohipwacha wiicela wa murima ahu. Nyenya weerano yeeyo onanwerya okhala ntoko ohommwa ni mwaalo nave voocharela ohiya mwaalo ene vanikhwacani vaavo. Mmukhalelo mmohamoha, nihiweherye wi wiicela wa murima ahu onahaala omaala wakhala wi hannapwacha.

6. Nnaphwanela waakhulelaka hai vaavaa muchu onannyeenyeiheiye?

⁶ Vaavaa muchu onannyeenyeiheiye, waakhulela wahu woopacerya onanwerya okhala wa esara. Piipiliya onnaloca wi nnanwerya okhala oonyeenyeya. Nyenya onnanlopola wi hannaphwanela okhala a esara. (Sal. 4:4; Aef. 4:26) Ntakhara heeni? Nthowa nawi ikwaha sincipale miyoonelo sahu sinnaneeriha opaka echu. Nave ti woovila isara oruuha sookhumelela saphaama. (Tiy. 1:20) Muupuwele, okhalano isara mukhalelo mmoha wawaakhulela yoonyeenyeiha, nyenya otitelela okhalano isara enakhala yoothanla ya muchu.

7. Moonelo taani nnaphwanelaahu okhalano vaavaa muchu onaniphoreiheiye?

⁷ Vaavaa nnakhalihiwaahu moonanara, nnanwerya woona mikhalelo mikina sa mmuupuweloni sawiicelaxa. Ntoko yootakiherya, murokora mmoha awiichaniwa Ann ooloca: “Vaavaa kaaryaaka mwaana apapa yaahaahiya amama aka nave emuthela namuteko yoowo aakikhapelela. Kaahiisoona okhala oonyanyaliwa. Vaavaa yaaryaayano anamwane, kaahiisoona okhala ooraceeliwa. Kinnunwe kiisoonaka okhala oohichuneya.” Murokora awiichaniwa Georgette, oothariha mukhalelo iisooneiye vaavaa aiyawe yaakhalaaya oohiroromeleya wa yoowo, owo ooloca: “Naahikhala asinthamwene opacerya woonamwaneni. Nave tho naahikhala mapiyoneeru vamoha! Murima aka waahiphweeya.” Nave murokora mmoha awiichaniwa Naomi ooloca: “Nkintonko waanyiherya wi aiyaka yaahaala okiphoreiha. Mwawiihiiha, vaavaa awo yaalokonhaaya wi yaanoona epwitikiri nave wi yaaniipithiha wa miyaano, kaaniisoona okhala oowokiwa ni oomwareeliwa.”

8. (1) Mathowa taani makina ananeeriha waakhurumuwela akina? (2) Miphurelo taani nnakhalaahuno vaavaa nnaakhurumuwelaahu akina? (Moone ekaaxa “Hanka Wakhala wi Muchu Ooniceecheiha?”)

⁸ Hannaphwanela ovareryelaka yeeyo akina ananleelaaya naari anapakaaya, nyenya nnaphwanela weererya ovareryela naakhulo nahu. Nave ikwaha sincipale naakhulo naphaama ori okhurumuwela. Ntakhara heeni? Nthowa nawi ninnamusivela Yehova, nave owo onachuna wi nikhale achu ookhurumuwela. Natitelela okhala oonyeenyeya nave nihinakhurumuwela, ti yawooneya wi nnanwerya opaka ichu moololo naari ohooxa okumi ahu. (Mas. 14:​17, 29, 30) Noone yootakiherya emoha ya murokora awiichaniwa Christine. Owo ooloca: “Vaavaa kinakhalaaka oonyeenyeya naari kinaphuciwaaka, kinatheya vakhaani. Kinnasiveliwano olya yoolya ehirino vitamina. Nkinakona mwawaakhwanela nave onakhala woovila ovareryela miyoonelo saka, yeeyo ikwaha ikina enavolowela othela waka ni onthamwene aka ni akina.”

9. Ntakhara heeni nnaphwanelaahu ohiya okhwipi okuha mathowa?

⁹ Naamwi muchu yoowo oninyeenyeihale ahipwachaka moorweela wa saweera sawe, nnaphwanela ohipwacha nikacamiho nenlo onitannyenryeiye. Mwawiihai? Georgette olociwe woopaceryai ooloca: “Yaahiviravo elukuluku, nyenya kaahihiya okhwipi isara ni onyeenyeya moohiyana ni aiyaka oopacerya. Ntoko yookhumelela, kaahikhalano murecele wawaaca.” Vaavaa nihinakuhaahu mathowa, ninnasepa wi murima ahu ohipahuwe ni soonyeenyeiha. Ninniivaha ekari—nnanwerya opacerye oya vahoolo ni okhala oohakalala mu ekumi ahu wanaawiili. (Mas. 11:17) Nyenya hanka wakhala wi mmanle wiiwexexa miyoonelo sanyu, muhikhala ooreheryeya wi mukhurumuwele?

OWANIHA NI MIYOONELO SANYU

10. Ntakhara heeni nnaphwanelaahu omaliha elukuluku wi nivole mmuupuweloni? (Moone tho iruku.)

¹⁰ Nni niwerye hai ovilela ni miyoonelo sooceecheiha? Mukhalelo mmoha ori ohiya oviravo elukuluku. Amanle waakhela nikhaviheryo na mameetiku, muchu yoowo aatempe ophoreya onnachuneya elukuluku wi avole. Mmukhalelo mmohamoha, nnanwerya ochuna elukuluku wi muupuwelo ahu ovole nihaakumve okhala ooreheryeya wi nimukhurumuwele muchu ni murima woothene.—Ekl. 3:3; 1 Pet. 1:22.

11. Ti mwawiihai nivekelo nnahaalaaya wookhaviheryaani okhurumuwela?

¹¹ Mvekele mumvekaka Yehova wi ookhaviheryeeni okhala ookhurumuwela.c Ann, yoowo olociwe woopaceryani, onnathariha mukhalelo nivekelo nimukhavihenryaaya. Owo ooloca: “Kaahimveka Yehova wi amukhurumuwele mmoha ti mmoha a veemusini vahu wa ichu seiho nihinakhalihanaahu phaama. Mwawiihiiha, kaahaarepela ekaarata apapa ni amwaaraya avyaani kaaleelaka wi kohaakhurumuwela.” Ann onneemererya wi weerano yeela hiwaari wookhweya. Nyenya owo ooloca: “Kinnawehererya wi moorweela wa weererya otakiherya okhurumuwela wa Yehova, apapa aka ni amwaaraya ananwerya oceenyeryeya ohuserya sincipale vooloca sa Yehova.”

12. Ntakhara heeni nnaphwanelaahu omuroromela Yehova ohiya ororomela muupuwelo ahu? (Masiposipo 3:​5, 6)

¹² Mmuroromele Yehova, ohiya muupuwelo anyu. (Mwaalakhanye Masiposipo 3:​5, 6.) Yehova ilukuluku soothene onnasuwela yeeyo eri yaphaama wa hiyaano. (Yes. 55:​8, 9) Nave owo harwa aniveka weera echu yeeyo enahaala onipahula. Mwawiihiiha, vaavaa owo onanceenyeryeiye okhala ookhurumuwela, nnaphwanela ororomela wi eyo enahaala oniruuhela mphurelo. (Sal. 40:4; Yes. 48:​17, 18) Mmukhalelo mukina, wakhala wi nnaroromela miyoonelo sahu hanirwa nikhala ooreheryeya okhurumuwela. (Mas. 14:12; Yer. 17:9) Naomi, yoowo olociwe woopaceryani ooloca: “Woopaceryani, kaahiisoona okhalano mathowa oophwanelela oohaakhurumuwela aiyaka nthowa na woona epwitikiri. Kaanoova wi awo yaahaala okiphoreiha wanaawiili naari wi yaahaala ocuwala yoonanara yeeyo yaapankaaya. Nave kaahuupuwela wi Yehova onniiwexexa miyoonelo saka. Nyenya kaahipacerya wiiwexexa wi pahiru nthowa nawi Yehova onniiwexexa miyoonelo saka, eyo henataphulela wi owo onneemererya seiyo. Owo onnasuwela mukhalelo kiniisoonaaka nave wi ennaviravo elukuluku wi kivole nyenya tho onachuna wi kilevelele.”d

MUNNUWIHE MIYOONELO SOOPHWANELELA

13. Mwawiiwanana ni Aroma 12:​18-21, tiheeni nnaphwanelaahu weera?

¹³ Vaavaa nnamukhurumuwelaahu muchu yoowo onichekenle vancipale, ninnachuna opaka sincipale ohiya pahiru olakelela ohiloca sa yeeyo yeeren’ye. Wakhala wi muchu onichekenle munna naari murokora ahu Eekristu, yoolakelela ahu ori opaka murecele. (Mat. 5:​23, 24) Ninnathanla oraceeliha isara ni ikharari, okuha mathowa ni okhurumuwela. (Mwaalakhanye Aroma 12:​18-21; 1 Pet. 3:9) Tiheeni enahaala onikhaviherya weerano yeeyo?

14. Tiheeni nnaphwanelaahu wiilipixerya weerano, nave ntakhara heeni?

¹⁴ Nnaphwanela wiilipixerya omoonaka muchu yoowo oninyeenyeihale hiiha ntoko Yehova onamooneiye. Yehova onathanla waavya ichu saphaama wa achu. (2 Math. 16:9; Sal. 130:3) Wiiliwiili ninnaphwanya yeeyo nnaavyaahu wa muchu—moohipwacha yaari yaphaama naari yoonanara. Vaavaa nnaavyaahu ichu saphaama wa akina, nnahaala okhalano ohakalala wawaaca mu waakhurumuwela. Ntoko yootakiherya, munna mmoha awiichaniwa Jarrod ooloca: “Kinnoona okhala wookhweya omukhurumuwela munna vaavaa kinalikanyihaaka yoohesa awe ni elista etokweene ya ichu seiyo kinasiveliwaakano mwa yoowo.”

15. Ntakhara heeni onamukhala woochuneya omuleela muchu wi moomukhurumuwela?

¹⁵ Echu ekina yoochuneyaxa nnaphwanelaahu weera ori omuleela muchu yoowo wi kohookhurumuwelaani. Ntakhara heeni? Moone yeeyo Naomi olociwe woopaceryani, owo oriye: “Aiyaka yaakikoha, ‘Apwanne wookikhurumuwela?’ Vaavaa kaachunaaka oloca wi: ‘Miyaano kohookhurumuwelaani,’ kaahikhammwa. Kaahoona wi nkaakhurumuwenle mweeparipari mmurimani mwaka. Voocharela, kaahiwerya oloca masu yaale ooweryaxa meeli: ‘Miyaano kohookhurumuwelaani.’ Vaavaa kaawaakhurumuwenlaaka, aiyaka yaamoriha miithori nave kaakhala ootikhiniheya ni mukhalelo awo yiisoonnaaya okhala ootaphuwa ni mukhalelo kiisoonnaaka okhala phaama. Ovinyerya vaavaa koorehererya ororomela waka wa yaawo nave naasinthamwene aphaama wanaawiili.”

16. Tiheeni nyuwaano muhusenryaanyu vooloca sa okhurumuwela?

¹⁶ Yehova onachuna wi nikhale achu ookhurumuwela. (Ako. 3:13) Naamwihiiha, nnanwerya wiilipixerya wi naakhurumuweleke akina. Nnanwerya weerano yeeyo wakhala wi ninnapwacha miyoonelo sahu ni wiilipixerya wi nihoolele seiho. Mwa yeeyo, nnaphwanela wunnuwiha miyoonelo soophwanelela.—Moone ekaaxa “Mikhalelo Miraru sa Okhurumuwela.”

OTIKITHERYEYA MMIPHURELO SA OKHURUMUWELA

17. Okhurumuwela onaniphuriha hai?

¹⁷ Nookhalano mathowa mancipale a okhurumuwela. Muthokororye pahiru makina a yaawo. Noopacerya, ninnamutakiherya ni omuhakalaliha Tiithi ahu a ikharari, Yehova. (Luka 6:36) Nanawiili, ninnooniherya othamalela mu okhurumuwela yoowo Yehova oonihenryeiye mu oreera murima wa hiyo. (Mat. 6:12) Naneeraru, ninnapuha okumi waphaama nave ninnatikitherya onthamwene waphaama ni woolipa.

18-19. Yookhumelela taani enahaala okhalavo wakhala wi naachu ookhurumuwela?

¹⁸ Vaavaa nnaakhurumuwelaahu akina, nnanwerya olawiha mareeliho oohiwehereryeya. Ntoko yootakiherya, moone yeeyo yeeren’ye ni Denise, yoowo olociwe woopaceryani. Naamwi owo ahaasuwela mu elukuluku ene yeele, mulopwana yoowo aamutannyile asitenti aahilakelela wiisiipha omanle olociwa mulacu. Nyenya, owo aahitannyeya murima ni okhurumuwela yoole wa Denise nave aahipacerya omuhuserya Piipiliya ni Anamoona a Yehova.

¹⁹ Nnanwerya woona wi omukhurumuwela muchu eri echu yoovilaxa weerano—nyenya tho enanwerya okhala echu ya mphureloxa. (Mat. 5:7) Mwawiihiiha, oothene ahu nnaphwanela opaka owetha wahu wi ntakiherye okhurumuwela wa Yehova.