Mutakiherye Mukhalelo wa Wuupuwela wa Yehova ni wa Yesu

1-2. Tiheeni enavolowelavo mu omusivela Yehova, nave ti mwawiihai Yesu oonihenryeiye osivela yoola?

YESU aahithariha nlamulo nenlo naari noochuneyaxa wa Malamulo a Mose vaava aalonceiye: “Omusiveleke Yehova Muluku aa ni murima aa woothene, ni okumi aa woothene ni muupuwelo aa woothene vamoha ni ikuru saa soothene.” (Luka 10:27) Omusivela Yehova onnavolowelavo murima ahu, yeeyo enaphitaanyerya soochuna sahu ni miyoonelo sahu. Nave tho, onnavolowela omulapa wahu yoowo ni okumi ahu woothene ni ikuru sahu soothene. Ohiya yeeyoru, omusivela Yehova onnavolowela muupuwelo ahu, ophitaanyerya mukhalelo nnuupuwelaahu. Eparipari wi, hanirwa niiwexexa moomalela muupuwelo woothene wa Yehova. Nyenya hiyaano nnanwerya wiiwexaxa phaama mukhalelo awe wa wuupuwela moorweela wa ohuserya “muupuwelo wa Kristu.” Tiwi Yesu, aahitakiherya moophaameya mukhalelo wa wuupuwela wa Atiithi awe.—1 Ako. 2:16.

² Yesu aanamusivela Yehova ni muupuwelo awe woothene. Owo aanasuwela yeeyo Yehova aachuneiye wi apake nave aari oolakelela weerano yeeyo, naamwi ahaalaka ohooxeya. Atikitheryeyaka mu weerano yookhwela ya Atiithi awe, Yesu haaweemerenrye wi echu vyakala emwaakanyerye wa yoolakelela yeeyo.

3. Ekari taani Petru aaryeiyeno nave echu taani aaceenyenryeiye Akristu opaka? (1 Petru 4:1)

³ Petru ni arummwa akina, yaahikhalano ekari ya okhala vamoha ni Yesu ni woona vakhivirukhiviru mukhalelo owo uupuweleiye. Vaavaa Petru aarempeiye ekaarata awe yoopacerya, owo aahaaceenyerya Akristu wiilipixerya ni mukhalelo mmohamoha wa muupuwelo wa Kristu, naari wi, mukhalelo awe wa wuupuwela.a (Mwaalakhanye 1 Petru 4:1.) Masu yaawo Petru aapharihenleiye awi: “Mwiilipiserye,” owo aapharihenle masu yaawo anaathariha anakhoco yaawo aniirehererya ni ikaruma sa ekhoco wi yawane. Mwa yeeyo, nnanwerya oloca wi wuupuwela ntoko Yesu, eri ekaruma yoowerya ya owanano ekhoco ntakhara mathitimanelo ahu a yoocheka ni a elapo yeela ya Satana.—2 Ako. 10:3-5; Aef. 6:12.

4. Tiheeni nnahaalaahu othokororya mmwaha yoola?

⁴ Mu yoohuserya yeela, nnahaala woona mukhalelo nnahaalaahu (1) wuupuwelaka ntoko Yehova, yeeyo enahaala onikhaviherya okhala awiiwanana mmuupuweloni, (2) okhala awiiyeviha, ni (3) okhala amiruku moorweela wa omuroromela Yehova ni ovekela. Wi nihuserye yeeyo, nnahaala othokororya mukhalelo Yesu uupuweleiye ni mukhalelo nnahaalaahu omutakiherya.

MUUPUWELEKE NTOKO YEHOVA

5. Elukuluku taani Petru aahuupuwenleiye ntoko Yehova?

⁵ Mu ekwaha emoha, Petru haarino moonelo woolikana ni wa Yehova vooloca sa ichu. Yesu aahiloca wa arummwa awe wi aahaala oya o Yerusalemu nave weiwo aahaala owaleliwa ni ahooleli a malapelo, ohooxiwa ni okhwa. (Mat. 16:21) Petru aanasuwela wi Yesu aari yoowo aalaiheryiwe, Mesiya yoowo aahaala waavuluxa achu a Muluku. Ti nthowa nene waaryaaya woovila wa yoowo waakhulela wi Yehova aahaala weemererya wi Mwanawe ahooxeye mmukhalelo yoowo. (Mat. 16:16) Mwawiihiiha, Petru aamukeriha okhwipi apacerya omusamela ariki: “Mwiimorele ikharari, Pwiya! Ela herwa yoophacuwelaani.” (Mat. 16:22) Nyenya Yesu haaweemerenrye yeeyo woona wi Petru huupuwela ntoko Yehova.

6. Mmukhalelo taani Yesu oonihenryeiye wi aanatakiherya mukhalelo wa wuupuwela wa Yehova?

⁶ Yesu aanatakiherya moophaameya mukhalelo wa wuupuwela wa Atiithi awe. Mwa yeeyo, owo aahi wa Petru: “Satana, vinyavo vamiithoni vaka! Weyo wa nluku nookikwaculiha, nthowa nawi orino muupuwelo wa achu, ohiya wa Muluku.” (Mat. 16:23) Akhweya soolakelela sa Petru saari saphaama, nyenya Yesu aahikhooca miruku sawe. Yesu aanasuwela wi Yehova haachuna wi owo iisuupuweleke wa yene mukhateiye. Mu ekwaha yeela, Petru aahihuserya ochuneya waya wuupuwelaka ntoko Yehova. Nave nla tho, nihusiheryo ntokweene wa hiyo.

7. Ti mwawiihai Petru aareherenryeiye mukhalelo awe wa wuupuwela wi olikaneke ni wa Yehova? (Moone tho eruku.)

⁷ Ohoolo waya, Petru aahooniherya wi aanachuna okhala mwawiiwanana ni muupuwelo wa Yehova. Eyo yaahikhala yookwakwaleya vaavaa yaaphiyenryaaya elukuluku ya achu a maloko, eyo tiwi, yaawo yaahiri Ayuta yaapankaaya makupa a achu a Muluku. Yehova aahimuthanla Petru wi amulaleerye Korneliyu, yoowo mwa maloko aari oopacerya okhala Mukristu. Ayuta yaanasepa olocihana ni achu a maloko. Mwawiihiiha, tiyawooneya wi Petru aanaphwanela otoroka mukhalelo awe wa wuupuwela. Yehova amanle omukhaviherya Petru wiiwexexa yookhwela awe, owo aatoroka moonelo awe vooloca sa achu a maloko nave aaya omuxekurya Korneliyu ‘ahikhoonceru.’ (Saw. 10:28, 29) Yookhumelela ya yeeyo yaari wi amanle omulaleerya Korneliyu ni achu oothene a vaate vawe, awo yaapatisiwa.—Saw. 10:21-23, 34, 35, 44-48.

8. Nni nooniherye hai wi ninnuupuwela ntoko Yehova? (1 Petru 3:8 ni enoota)

⁸ Iyaakha ohoolo waya, Petru aahaaceenyerya Akristu okhala “awiiwanana mmuupuweloni” naari wi, wuupuwelaka mmukhalelo mmohamoha. (Mwaalakhanye 1 Petru 3:8 ni enoota.) Nnanwerya weerano yeeyo wakhala wi noohuserya Mpiipiliyani mukhalelo wa wuupuwela wa Yehova ni omutakiherya yoowo. Ntoko yootakiherya, Yesu aahaaceenyerya oomuchara awe okuha mu nipuro noopacerya Omwene wa Muluku mu okumi aya. (Mat. 6:33) Nuupuwelaka sa yeeyo, munna a mmulokoni mwahu akhweya onanwerya olakelela orumeela ntoko piyoneero naari muteko vyakala wa elukuluku yoothene. Hinnachuna oloca ichu seiyo saahaala omuceecheiha munna naari saahaala omweeriha wiisuupuwelaka mukhateiye. Moohiyana, nnaphwanela oloca mmukhalelo woophwanelela vooloca sa soolakelela sawe soomunepani ni omvahererya nikhaviheryo.

MUKHALE AWIIYEVIHA

9-10. Yootakiherya taani etokweene ya wiiyeviha Yesu oonihenryeiye?

⁹ Mu ohiyu aahaakumve okhwa, Yesu aahimuhusiha Petru ni arummwa akina nihusiheryo noochuneya na wiiyeviha. Yesu, aahimuruma Petru ni Yohani wi epake marehereryo ntakhara yoolya awe yookuchula. Echu emoha awo yaapankaaya, waari orehererya epasiya erimo maahi ni ekuwo yawiipupuchano nave wi akhalevo muchu yoowo aahaala orapihaka inaani sa alipa oowompwa. Nyenya taani aahaala okhala awiiyeviha mwawaakhwanela wi eereno muteko yola?

¹⁰ Ahuupuwenle ikwaha piili, Yesu aahivaha yootakiherya etokweene ya wiiyeviha. Owo aahipaka echu yeeyo enapakiwa ni kapuro, nave eyo yaahaatikhiniha vancipale arummwa awe. Piipiliya onaloca wi Yesu aarula malaya awe, amakela muyuununi ekuwo yawiipupuchano, ahela maahi mpasiyani nave apacerya orapiha inaani sa oohuserya awe. (Yoh. 13:4, 5) Yesu aahirapiha inaani sa arummwa awe 12, ophitaanyerya sa Yutasi yoowo ohoolo waya aahaala omutumiha. Akhweya owo aahimaliha elukuluku yincipale arapihaka inaani saya, nyenya Yesu aari awiiyeviha nave aakwaaxa muteko. Voocharela owo aahithariha moopixa murima: “Apwanne mohiiwexexa yeeyo kiweerenlaakaani? Nyuwo munakeera ‘Muhusiha’ ni ‘Apwiya,’ nave chiryene ti yeeyo, woona wi ka yoowo. Mwawiihiiha, waakhanle wi miyaano, Apwiya ni Muhusiha koorapiha inaani sanyu, nyuwo tho munaphwanela orapiha inaani sa mukina ni mukhwaawe.”—Yoh. 13:12-14.

11. Ti mwawiihai Petru oonihenryeiye wi aahihuserya okhala awiiyeviha? (1 Petru 5:5) (Moone tho eruku.)

¹¹ Petru aahihuseryavo echu ni wiiyeviha wa Yesu. Yesu amanle okookela wirimu, Petru aahipaka yootikhiniha emoha. Owo aahimpenusa mulopwana oorakala oyariwa wooyariwa. (Saw. 1:8, 9; 3:2, 6-8) Muloko wa achu woonne yootikhiniha yeele, waakhala moorukurerya mwawe. (Saw. 3:11) Woona wi mu sookhovelela saya okhala oovuwa yaari echu yoochuneyaxa, apwanne Petru aahaala ophwanyavo ekari wi iirumihe? Hooye, Petru aari awiiyeviha, owo haawiivanhe ncicimiho nyenya aamvanhe Yehova ni Yesu ariki: “Moorweela wa nsina [na Yesu], ni mwa nroromelo nryaahuno mwa nsina nawe, tinimulipinhe mulopwana ola.” (Saw. 3:12-16) Mu ikaarata sawe ikina, Petru aahaaceenyerya Akristu okhala awiiyeviha. Masu yaala ennanuupuxerya vaavaa Yesu aamakenleiye ekuwo yoopupuchano muyuununi mwawe wi arapihe inaani sa arummwa awe.—Mwaalakhanye 1 Petru 5:5.

12. Nni ntitelele hai winnuwiha wiiyeviha hiiha ntoko Petru?

¹² Nnanwerya ochariha yootakiherya ya Petru ni otitelela wunnuwiha wiiyeviha. Nyenya muupuwele: Honaakhwana pahiru mukhalelo wa oloca okhaleke ntoko wi na achu awiiyeviha. Petru aahipharihela masu wi “wiiyeviha wa mmuupuweloni,” yeeyo enooniherya wi, wiiyeviha weeparipari onavolowela miyuupuwelo sahu sawiixeela. Ninnapaka ichu saphaama wa akina nthowa nawi ninnamusivela Yehova ni achu, ohiya opaka ichu saphaama wi akina enoone. Hiyaano ninnooniherya wi na achu awiiyeviha mweeparipari, vaavaa nnamurumeelaahu Yehova ni anna moohakalala, naamwi akina ehiweryaka woona.—Mat. 6:1-4.

“MUKHALE A MIRUKU”

13. Tiheeni enavolowelavo ‘okhala amiruku?’

¹³ Tiheeni enavolowelavo ‘okhala amiruku?’ (1 Pet. 4:7) Mukristu a miruku onnapaka owetha wawe wi apake soolakelela seiyo iniiwanana ni muupuwelo wa Yehova. Owo onniiwexexa wi hiyaavo echu eri yoochuneyaxa mookumini, opwaha onthamwene awe ni Yehova. Ohiya yeeyoru, owo onnakhalano moonelo woophimelela vooloca sa yene mwaneene, nave anniiwexexa wi hasuwenle ichu soothene. Muchu a miruku annooniherya wi annamuroromela Yehova, moorweela wa ovekela ilukuluku soothene avekaka ohoolela wawe.b

14. Mu elukuluku taani Petru aahimuroromenleiye Yehova?

¹⁴ Mu ohiyu ahaakumve okhwa, Yesu aahaalopola oohuserya awe ariki: “Wa nthowa na yeeyo eni yeereye ni miyo ohiyu yoola, oothene nyuwo munamukwaculeya.” Iiroromelaka yene mukhateiye, Petru aahaakhula: “Naamwi oothene akina ekwaculen’ye wa nthowa na yeeyo eni yeereye ni nyuwo, miyaano nkirwa kikwaculeya!” Mu ohiyu ene yoole, Yesu aahaavaha ikano oohuserya awe: “Mutitelele olipelela nave mvekeleke moohihiyererya.” (Mat. 26:31, 33, 41) Waakhanle wi Petru oochariha ekano yeeyo, mwawooneya owo aahaala okhala oolipa murima ni oloca wi aari oohuserya a Yesu. Nyenya owo aahimukhooca Pwiya awe, nave voocharela aahiisoona moonanara wa yeeyo aapankeiye.—Mat. 26:69-75.

15. Echu taani yaamukhavihenrye Yesu otitelela okhala amiruku mu ohiyu ahaakumve okhwa?

¹⁵ Yesu aanamuroromela Yehova moomalela. Naamwi aari oophaameya, owo aahivekela ikwaha sincipale mu ohiyu ahaakumve okhwa. Eyo yaahimvaha olipa murima wi eereno yeeyo Yehova aachuneiye wi apake. (Mat. 26:39, 42, 44; Yoh. 18:4, 5) Petru aahoona mukhalelo Yesu aavekenleiye variyari va elukuluku yeele yoovila, nave eyo yaahivolowela mwawiiseela okumi wa Petru.

16. Nnasuwela hai wi Petru aahikhala amiruku? (1 Petru 4:7)

¹⁶ Woovira wa elukuluku, Petru aahipacerya omuroromela Yehova ni ovekela avekaka ohoolela wawe. Yesu amanle oviihiwa mookhwani, owo aahimuroromeliha Petru ni arummwa akina wi awo yaahaala waakhela munepa waweela wi ewerye olaleerya michaka saphaama. Nyenya Yesu, aahaaveka wi yakhale o Yerusalemu ophiyerya yaakhenle munepa waweela. (Luka 24:49; Saw. 1:4, 5) Tiheeni Petru eereiye vaavaa aaweheryeiye? Owo ni annawe akina “yaatitelela ovekela.” (Saw. 1:13, 14) Ohoolo waya, mu ekaarata awe yoopacerya, Petru aahaaceenyerya Akristu okhala a miruku ni ovekela ilukuluku soothene evekaka ohoolela wa Yehova. (Mwaalakhanye 1 Petru 4:7.) Petru aahihuserya omuroromela Yehova nave aahikhala poco mmuloko.—Aka. 2:9.

17. Echu taani nnaphwanelaahu otitelela weera, moohipwacha mavyakelo ahu? (Moone tho eruku.)

¹⁷ Wi nikhale amiruku, nnaphwanela otitelela ovekela wa Yehova, moohipwacha mavyakelo ahu. Vaavaa nnachunaahu opaka soolakelela soochuneya, hiyaano ninnavekela wa Yehova nivekaka ohoolela wawe, nroromelaka wi owo oosuwela yeeyo eri yaphaama wa hiyo.

18. Nni niwerye hai omutakiherya phaama Yehova?

¹⁸ Chiryene ti yoohakalaliha Yehova onipatuxa ni mavyakelo a omutakiherya yoowo! (Map. 1:26) Eparipari wi haniwerya omutakiherya Yehova moophaameya. (Yes. 55:9) Nyenya, hiiha ntoko Petru, nnachuna wiiliwiili nuupuweleke ntoko Yehova, winnuwiha wiiyeviha ni okhala a miruku.