Ntata na Yehova Tahi Nookhuveyaxa

1. Ti mwawiihai Mose oonihenryeiye wi aanamuroromela Yehova vaavaa aahooleleiye Aisarayeli aakumihaka o Yiikuputu?

WA YAALE atharihiwe mu liivuru a Ahepri ntoko yootakiherya ya nroromelo, enoota ennamuthariha tho Mose. (Ahe. 3:2-5; 11:23-25) Owo aahooniherya nroromelo vaavaa aahooleleiye a Isarayeli okhuma o Yikuputu. Owo heemererye woopopihiwa ni Farawo vamoha ni anakhoco awe. Amuroromelaka Yehova owo aahaahoolela a Isarayeli mu eniya yooxeerya nave voocharela mutakhwani. (Ahe. 11:27-29) Aisarayeli anncipale yaahiyeleela ororomela owerya wa Yehova wa waakhapelela yaawo, nyenya Mose aahititelela omuroromela Muluku awe. Mose haahense omuroromela Yehova woona wi Muluku aahaavahererya achu awe yoolya ni maahi mutakhwani mummo waahirimo mmiso.a—Muk. 15:22-25; Sal. 78:23-25.

2. Ntakhara heeni Muluku aamukoha Mose: “Onaanyiherya wi ikuru sa Apwiya sinnakota”? (Namarepela 11:21-23)

² Moohipwaca Nroromelo noolipa na Mose, variyari va eyaakha emoha a Isarayeli emanle otaphuliwa, owo aahikhwa minikhwa mukhalelo Yehova aahaaleiye waavaha achu awe emece naari (enama). Mose haawerya waanyiherya mukhalelo Yehova aahaaleiye waavaha achu awe emece naari (enama) yawaakhwanela wi aahakalalihe amilyawu a achu yaari mmixakalani mutakhwani. Mu naakhulo nawe Yehova aahimukoha Mose: “Onaanyiherya wi ikuru sa Apwiya sinnakota?” (Mwaalakhanye Namarepela 11:21-23, PMM.) Iva masu awi ‘ntata na Yehova’ enaloca sa munepa waweela wa Muluku, naari owerya wawe mu saweera. Mweeparipari Yehova aamukoha Mose: ‘weyaano onoona wi nkiwerya weerano yeeyo kinalocaaka wi kinahaala weerano’?

3. Ntakhara heeni yaweereya ya Mose ni Aisarayeli eryaaya yoochuneyaxa?

³ Nyuwaano mohintoko wiikoha waakhanle wi Yehova onahaala okhapelela soothowa sanyu soomwiilini ni sa amusi anyu? Yaari hiiha nnahaala othokororya yaweereya ya Mose ni ya Aisarayeli yaawo yaahirino nroromelo mu owerya wa Muluku wa waakhapelela yaawo. Soorepa sa Mpiipiliyani siphitaanyeriwevo sinahaala onikhaviherya winnuwiha ororomela wahu wi ntata na Yehova hanri nookhuveyaxa.

MUHUSERYEVO ECHU ORWEELA WA MOSE NI WA AISARAYELI

4. Tiheeni yaaweeriha Aisarayeli okhwa minikwa waakhanle wi Yehova aanwerya waavakulelaka omwiilini?

⁴ Muthokororye mwaheene. Nloko na Aisarayeli “yaapwesheherana tho ni achu” yaawo yahaari Aisarayeli yaari mutakhwani mu elukuluku yincipale vaavaa yeecaaya ekhumaka o Yikuputu eyaaka mu Elapo ya Nlakano. (Muk. 12:38, PMM; Malam. 8:15) Nloko nenle naapweseeherane ni Aisarayeli naahikomano olya mana emohamohatho yaaheereya ni Aisarayeli. (Nam. 11:4-6) Achu yaahipacerya okhalela munkhela emece ni soolya sikina sa o Yikuputu. Mose iisoonaka okhala ookhinyerereya ni achu, uupuwela wi owo taahaala waavahaka yoolya.—Nam. 11:13, 14.

5-6. Ti mwawiihai Aisarayeli yaavoloweliwaaya ni akina, nave tiheeni nnahuseryaahu?

⁵ Ti yawooneya wi Aisarayeli yaahivoloweliwa ni ohithamalela wa achu yaawo yaapwexeherannaayano. Hiyaano tho nnanwerya ovoloweliwa ni munepa woohithamalela wa achu nave nihaakhwaneliweke ni yeeyo Yehova onanivaheiye. Eyo enanwerya weereya wakhala wi ninnaweha muchuli nuupuwelelaka sa yeeyo naaryaahuno naari wakhala wi ninnaakhalela nrima achu akina. Mwawiihiiha, nnanwerya okhala oohakalala wakhala wi ninnaakhwaneliwa ni yeeyo nraahuno moohipwacha mukhalelo ahu.

⁶ Aisarayeli yaaphwanela wuupuwela wi Muluku aahaaroromeliha wi yaphiya elapo ya nlakano yaahaala okhalano ichu sincipale soomwiilini. Yooloherya yeela yaahaala waakhwanela ephin’yeene mu elapo ya nlakano ohiya mutakhwani. Mmukhalelo woolikana, ohiya otikithereya mu ichu nihiraahuno mmahiku yaala, nnamweerano phaama otikithereya mu seiyo Yehova ororomelinheiye mu elapo evyaani. Navetho nnaphwanela wuupuwelelaka soorepa seiyo sinahaala onikhaviherya waaceererya omuroromela wahu Yehova.

7. Ntakhara heeni nnanwerya ororomela wi ntata na Yehova tahi nookhuveyaxa?

⁷ Naamwiihiiha, munanwerya wiikoha wi ntakhara heeni Muluku amukonheiye Mose: “Onaanyiherya wi ikuru sa Apwiya sinnakota?” Akhweya Yehova aamukhaviherya Mose wuupuwela ohiya pahiru mu ikuru ni owerya wa ntata Nawe nave tho mu waakhwaniherya wawe. Yehova aawerya waavaha emece yincipale Aisarayeli naamwi yaari variyari va ntakhwa ntokweene. Ni “ntata noowerya ni nwono wawookowa,” Muluku aahooniherya owerya wawe. (Sal. 136:11, 12) Mwawiihiiha, vaavaa nneehiwaahu hannaphwanela okhwa minikwa wi ntata na Yehova nnahaala onikhaviherya hiyaano.—Sal. 138:6, 7.

8. Nni nsepe hai opaka yoohesa emohamoha yeeyo ancipale yaawo yaari mutakhwani yaapankaaya? (Moone tho eruku.)

⁸ Yehova mwawaakuveya ahaavaha emece; achu yaahikhalano ayuurwe ancipale. Nyenya, Aisarayeli yaaphwanela ororomela wi ntata na Muluku tahi nookhuveya. Mwawiihiiha, ancipale yaavoloweliwa ni nrima. Elapaka mowetha ohiyu woothene yaahaathukumanya ayuurwe ancipale. Nyenya Yehova aahitepa onyeenyeya ni achu yaawo ‘yoonihenrye munepa wa nrima’ nave aahaalaka. (Nam. 11:31-34) Nnanwerya oohuseryavo echu ni yootakiherya yeela. Nnaphwanela okhalano ekaasoope wi nihikhale a nrima. Moohipwacha naari ooreela naari ohaawa nnaphwanela ovaha esisapo othukhumanya “muhaku wirimu” moorweela wa winnuwiha onthamwene ahu ni Yehova ni Yesu. (Mat. 6:19, 20; Luka 16:9) Vaavaa nneeraahuno yeeyo, nnanwerya ororomela wi Yehova onahaala onikhapelela.

9. Vooloca sa nikhaviheryo na Yehova, nnaphwanela ororomela eheeni?

⁹ Yehova onnookola ntata nawe wi aakhaviherye achu awe olelo. Mwawiihiiha, eyo tahi enathaphulela wi hinirwa niyeleela sookhalano sahu naari ohoolela etala.b Nyenya Yehova harwa anihiya moomalela, owo onahaala onikhaviherya mu saweeha sincipale. Nnanwerya olikanyiha eparipari yeela nthokororyaka mikhalelo miili seiyo naahaalaahu wooniherya ororomela wahu wi Yehova onahaala wookola ntata nawe wi anivahererye soothowa sahu soomwiilini; (1) vaavaa nnahoolelaahu makacamiho a ikhorowa (2) naalakelelaka soothowa sahu soomwiilini sa omwaahiyu.

OHOOLELA MAKACAMIHO A IKHOROWA

10. Makacamiho taani a ikhorowa akhweya nnahaalaahu ohoolela?

¹⁰ Vaavaa mukhalelo yoola wa ichu onahaalaaya vakhaani omala, nnaphwanela osuwela wi orama wa ikhorowa onamwaaceereryeya. Owanawana wa alamuleli, ikhoco, ipahu sa maphacuwelo naari ireca soohiyanahiyana enanwerya onneeriha oyeleela muteko, sookhalano sahu naari empa ahu. Akhweya nnanwerya opwanya muteko muvyaani mukuma nnakhalaahu naari olakelela othaamela mmukuma mukina wi niweryeke ovakulela emusi. Tiheeni enahaala onikhaviherya opaka soolakelela seiyo inooniherya wi ninnaroromela ntata na Yehova?

11. Tiheeni enahaala wookhaviheryaani ovootha makacamiho a ikhorowa? (Luka 12:29-31)

¹¹ Echu yoopacerya ori omvonyerya sawuukhula sanyu Yehova. (Mas. 16:3) Mumveke miruku sawaakhwanela wi mpake soolakelela saphaama ni murima woomaaleleya wi musepe ‘okhala awuukhuwa’ vooloca sa mukhalelo anyu. (Mwaalakhanye Luka 12:29-31.) Mumveke wi ookhaviheryeeni okhala oohakalala ni seiyo muryaanyuno. (1 Tim. 6:7, 8) Mpake otholathola mu soolaleeryiwa sahu vooloca sa mukhalelo wa ohoolela makacamiho a ikhorowa mmukhalelo waphaama. Ancipale aaphuravo ni ikaruma sinapwanyeya mu jw.org seiyo sinaloca mukhalelo wa ovootha makacamiho a ikhorowa.

12. Makoho taani enahaala omukhaviherya Mukristu opaka yoolakelela yaphaama ntakhara emusi awe?

¹² Akina aniisoona okhala ookhinyereryeya weemererya muteko yoowo onahaala oweeriha orakamelana ni emusi, mwa yeeyo ancipale annapaka yoolakelela yoololo. Muhaakumve weemererya muteko muvyaani, mwalikhele ohiya pahiru mphurelo wa ikhorowa, nyenya tho ovolowela waya makupa omunepani. (Luka 14:28) Mwikohe: Ti mwawiihai othela waka waahaalaaya ovoloweliwa wakhala wi koorakamela ni oothelana aka? Apwanne othaama wuuwu onahaala ovolowela hai makupa aka oomunepani? Mwaarino anamwane munaphwanela wiipakela tho nikoho nenla noochuneya: Kini kaaphuwe hai anamwane aka, “olaka ni mmahusiheryo a Yehova” kiniiso kihiri vakhiviru ni yaawo? (Aef. 6:4) Muhooleliwe ni muupuwelo wa Yehova ohiya wa amusi naari asinthamwene yaawo ahinacicimiha malakhiheryo a Mpiipiliyani.c Tony, yoowo onakhala o Asiya, aahaakhela soovaha saweeha wi alapeke mu ilapo ikina. Mwawiihiiha, amanle ovekela vooloca sa mwaha yoowo ni ovaanela ni amwaariye, owo aalakelela okhooca soovaha seiya nave ohiya yeeyo, onnalapa vakhaani wi awerye ophwanyaka yaawikhaviheryano. Uupuwelaka muculi, Tony ooloca: “kaahikhalano ekari yawaakhaviherya achu ancipale omusuwela Yehova nave anamwane ahu tho ennasiveliwa ni eparipari. Emusi ahu yoohuserya wi vaavaa nnakhalaahu mwawiiwanana ni masu enaphwanyeya mu Mateyu 6:33, Yehova onahaala otitelela onikhapelelaka.”

OLAKELELA SOOTHOWA SAHU SOOMWIILINI SA OMWAAHIYU

13. Ichu taani ikina nnaphwanelaahu opaka hiihaano wi nikhaleno echu yoochuneya vaavaa nneeraahu nuuluvale?

¹³ Ororomela wahu tho ntata na Yehova, onanwerya weehiwa vaavaa nnuupuwelelaahu mukhalelo ahu wa omwaahiyu onahaalaaya okhala wakhala wi nohuuluvala. Piipiliya onnancenyerya olapaka moowetha wi niweryeke okhapelela soothowa sahu soomwiilini sa omwaahiyu. (Mas. 6:6-11) Wakhala wooweryeya, ti waphaama okhapelela ikhorowa mwawiiwanana ni mikhalelo sahu ntakhara omwaahiyu. Ikhorowa sinnavahererya mukhalelo wa okhapeleleya. (Ekl. 7:12) Mwawiihiiha, nnaphwanela osepa waavyaka ichu soomwiilini ntoko echu yoochuneyaxa ya mookumini mwahu.

14. Ti mwawiihai Ahepri 13:5 onanikhaviheryeiye ohikhala awuukhuwaxa ni omwaahiyu ahu?

¹⁴ Yesu oophwanaphwaniha ololo wa othukumanya ikhorowa nihiri “ooreela vamiithoni va Muluku.” (Luka 12:16-21) Haavo onasuwela yeeyo enahaala weereya omeelo. (Mas. 23:4, 5; Tiy. 4:13-15) Oothene ahu ninnahoolela makacamiho hiiha ntoko oomuchara a Kristu. Yesu olonce wi nnaphwanela okhala ooreheryeya ‘ohiya’ ichu soothene soomwiilini wi nikhale oohuserya awe. (Luka 14:33) Akristu a mu nsana noopacerya o Yuteya yaaheemererya oyeleela wuuwu ni ohakalala. (Ahe. 10:34) Mmahiku ahu, anna ancipale aayeleela muteko ni sookhalano saya wanthowa na ohipaka makupa a elapo ni ohikhaviherya epartiitu eri yoothene. (Wup. 13:16, 17) Tiheeni yaakhavihenrye weerano yeeyo? Awo aakhalano ororomela woolipa wa soororomeliha sa Yehova: “Nkirwa koohiya nave nkirwa koonyanyala.” (Mwaalakhanye Ahepri 13:5.) Nipake yeeyo nnaweryaahu wi niirehererye wa soothowa soomwiilini sa muhoolo, nave vaavaa inahaalaaya okhumelela ichu soohiwehereryeya, ninnaroromela nikhaviheryo na Yehova.

15. Muupuwelo taani woophwanelela asitiithi Eekristu anaphwanelaaya okhalano vooloca sa anamwane aya? (Moone tho eruku.)

¹⁵ Mmakupa makina, atheli anakhalano anaaya ni yoolakelela wi awo ephwanyeke ikhorowa sincipale wi yaakhapeleleke asitiithi aya mmakupa oomwiilini vaava awo anuuluvalaaya. Mmukhalelo vyakala, atheli yaala anawoona anaya ntoko “achu anahaala waavahaka ikhorowa mu wuuluvala waya.” Piipiliya onaloca wi asitiithi enaphwanela othokororyaka soothowa sa anamwane aya. (2 Ako. 12:14) Eparipari wi asitiithi ikwaha ikina anamuchuna waakhela nikhaviheryo vyakala noophara muteko vaavaa anuuluvalaaya, nave anamwane aya annahakalala vancipale ovahererya nikhaviheryo nenlo. (1 Tim. 5:4) Nyenya asitiithi yaawo ari Akristu anniiwexexa wi ohakalala waya otokweene honarweela mu waaphuwa anamwane aya ni yoolakelela ya okhalakano nikhaviheryo na waavaha ikhorowa saya, nyenya mu waakhaviherya anamwane aya okhala alapeli a Yehova.—3 Yoh. 4.

16. Asitiithi eni yaarehererye hai anamwane aya ntakhara omwaahiyu? (Aefesu 4:28)

¹⁶ Ni yootakiheryaanyu, mwaahusihe anamwane anyu omuroromela Yehova vaavaa munaakhaviheryaanyu wiirehererya wi yiivakuleleke. Opacerya eri amiravo, nwooniherye ochuneya waya olapa moowetha. (Mas. 29:21; mwaalakhanye Aefesu 4:28.) Vaavaa anannuwaaya, mwaakhaviherye opaka soothene anaweryaaya oxikola. Asitiithi Eekristu anamweerano phaama otholathola ni opharihela malakiheryo a Mpiipiliya wi yaakhaviherye anamwane olakelela mukhalelo wa opharihela mahusiheryo ooxikola mwa miruku. Eyo enamwaavyakiha anamwane anyu wiivakulelaka ni ophwanyeyaka mu orummwa Weekristu mwawaakhwanela.

17. Nnaphwanela ororomela eheeni?

¹⁷ Alapeli oororomeleya a Yehova ananwerya olekecheya wi owo ookhalano nchuno ni owerya wa okhapelela soothowa saya soomwiilini. Vaavaa nnaacamelaahu makuchuwelo a mukhalelo yoola wa ichu, nnaphwanela oweherya wi ororomela wahu wa Yehova onahaala weehiwa. Moohipwacha yeeyo enahaala weereya, nnaphwanela ororomela moomalela wi Yehova onahaala opharihela owerya wawe wi anikhapelele. Hinaano minikwa wi ntata noowerya na Yehova ni moono awe wawookowa, hasirwa sikhala sookhuveya wi sihinikhaviherye.