Mutakiherye ‘Mahala Òhilotxeya’ a Muluku

“Muluku atxitximihiwe wa nthowa na mahala awe òhilotxeya.” —2 KORINTO 9:15.

MACIPO: 121, 63

MWAAHAALA WAAKHULA HAI?

Osivela wa Kiristu onanceenyerya weera eheeni?

Osivela wa Muluku onanceenyerya hai waasivela annihu?

Ntakhara heeni okhurumuwela wa Muluku onaphwanela oneeriha waakhurumuwela annihu?

1, 2. (a) ‘Mahala òhilotxeya’ a Muluku anaphitaanyerya eheeni? (b) Makoho taani nnahaalaahu othokororya mmwaha yoola?

YEHOVA oonivaha yamahala etokweene enooniherya osivela moorweela wa omurumiha Mwanawe Yesu wi arwe veelaponi ya vathi! (Yohani 3:16; 1 Yohani 4:9, 10) Murummwa Paulo aahiichana yoovaha eyo ntoko ‘mahala òhilotxeya.’ (2 Korinto 9:15) Ntakhara heeni Paulo aapharihela masu yaala?

² Paulo aanasuwela wi mukucho wa Yesu waahaala weeriha wi soororomeliha soothene sa Muluku sikhwaanele. (Mwaalakhanye 2 Korinto 1:20.) Ela enataphulela wi ‘mahala òhilotxeya’ a Muluku annavolowela ichu sincipale ohiya pahiru mukucho wa Yesu. Enaphitaanyerya ichu soothene saphaama seiyo Yehova onahaaleiye weera omwaahiyu. Yamahala eyo ti yoohithariheya. Tuuvi onaphwanela okhala moonelo ahu vooloca sa yamahala yeela? Nave enaphwanela oneeriha weera eheeni vaavaa nniireheryaahu ntakhara Mukonelo wa Apwiya nihiku Naneeraru 23 a Marso a 2016?

YAMAHALA ETOKWEENE YA MULUKU

3, 4. (a) Munoona hai vaavaa munavahiwaanyu yamahala? (b) Ti mwawiihai yamahala enaweryaaya otoroka okumi anyu?

³ Ninnahakalala vaavaa muchu onanivaheiye yamahala. Nyenya sookhalavo samahala soochuneyaxa seiyo sinatoroka okumi ahu. Ntoko yootakiherya, mwaanyiherye wi moochekela malamulo nave moothoriheliwa okhwa. Mwawaakuveya, onnarwa muchu muhimusuwenlaanyu yoowo oniivaha ohooxiwa wi awoopoleeni. Owo onniivaha okhwa nthowa na nyuwaano! Mwaahaala woona hai vooloca sa yamahala yeeyo?

⁴ Yamahala yeela yaahaala oweerihaani wuupuwelela echu munaphwanelaanyu weera wi mutoroke okumi anyu. Nave tho mwaahaala ochuna okhala a mahala ni waasivela akina ni waakhurumuwela oothene yaale yoochekenleeni. Mu okumi anyu woothene, nyuwaano mwaahaala wooniherya othamalela yamahala eyo.

5. Ntakhara heeni yamahala ya Muluku ti yoochuneyaxa opwaha yamahala ekina?

⁵ Yamahala ya Muluku etokweenexa opwaha yamahala eromoliwe. (1 Pedro 3:18) Muupuwele ela: Oothene hiyo noorava yoocheka yoorweela wa Aatamu nave noothoriheliwa okhwa. (Aroma 5:12) Osivela waamweeriha Yehova omurumiha Yesu orwa veelaponi ya vathi wi akhwe ntakhara achu oothene wi ‘alawihe okhwa wi antxipale evuluwe.’ (Ahebri 2:9) Nyenya mukucho wa Yesu onahaala weera sincipale! Onahaala omaliha okhwa moomalela. (Isaiya 25:7, 8; 1 Korinto 15:22, 26) Oothene yaale anooniherya nroromelo wa Yesu anahala okhala mmurecele ni moohakalala ntoko mamwene wirimu naari ntoko anamurala a Omwene wa Muluku veelaponi yavathi. (Aroma 6:23; Wupulula 5:9, 10) Mareeliho taani makina anarweela mu mahala a Yehova?

6. (a) Mareeliho taani a yoovaha ya Yehova munaweheryaanyu omwaahiyu? (b) Muromole ichu raru seiyo yamahala ya Muluku enahaalaaya onceenyerya weera.

⁶ Ntoko yookhumelela ya yamahala ya Muluku, elapo ya vathi enahaala okhala parataiso, areca anahaala openuxiwa, nave alipa ookhwa anahaala oviihiwa. (Isaiya 33:24; 35:5, 6; Yohani 5:28, 29) Ninnamusivela Yehova ni Mwanawe nthowa na onivaha ‘mahala òhilotxeya.’ Yamahala yeela enahaala oneeriha weera eheeni? Enahaala onceenyerya (1) omutakiherya Kiristu Yesu, (2) waasivela annihu ni (3) waakhurumuwela akina ni murima woothene.

‘OKHWELA WA APWIYA ONANITXUTXHA’

7, 8. Nnoona hai vooloca sa osivela wa Kiristu, nave eyo enaphwanela oniceenyerya weera eheeni?

⁷ Yoopacerya, nnaphwanela opharihela okumi ahu wi nimucicimihe Yesu. Murummwa Paulo aaloca: “T’okhwela wa Apwiya onanitxutxha.” (Mwaalakhanye 2 Korinto 5:14, 15.) Paulo aanasuwela wi wakhala wi noheemererya osivela wa Yesu, nnahaala ocucheya naari oceenyeryeya omusivela ni omucicimiha Yesu. Aai, vaavaa nniiwexexaahu yeeyo Yehova oneerenleiye nnahaala ochuna omwiiwelela Yesu. Nnii neereno hai?

⁸ Omusivela Yehova onahaala onceenyerya ochara yootakiherya ya Yesu ncharihaka inaani sawe. (1 Pedro 2:21; 1 Yohani 2:6) Vaavaa nnamwiiwelelaahu Muluku ni Kiristu, ninnooniherya wi ninnaasivela. Yesu aaloca: “Mutxhu onakhela malamulo aka ni antxhariha, yowo t’onakikhwela. Vano yowo onakikhwela, onamukhweliwa t’Atithi, nave miyo kinamukhwela ni kinamwisoneiha wa yowo.”—Yohani 14:21; 1 Yohani 5:3.

9. Saweeha taani nnakumanaahuno?

⁹ Variyari va elukuluku ya Mukonelo, ti yaphaama wuupuwelela mukhalelo nnapharihelaahu okumi ahu. Mwawiihiiha mwiikohe: ‘Mmikhalelo taani kinamutakiheryaaka Yesu? Makupa taani kinaphwanelaaka orehererya?’ Ti woochuneya wiipakela makoho yaala nthowa nawi elapo enachuna wi nikhaleke mwawiiwanana ni soochuna saya. (Aroma 12:2) Wakhala wi hanniikasopa, nnahaala opacerya ochariha mahusiheryo a elapo ni sookhovelela saya. (Kolosi 2:8; 1 Yohani 2:15-17) Nnii nivoothe hai yaweeha yeeyo?

10. Makoho taani nnaphwanelaahu wiipakela, nave maakhulo aya anahaala oneeriha weera eheeni? (Moone eruku yoopacerya.)

¹⁰ Ti yaphaama tho opharihela elukuluku ya Mukonelo wi naalikhele soowara sahu, ixilema, macipo ahu ni yeeyo eri mu komputatore ahu, mu telefone naari ekhankoonya ekina. Mwiikohe: ‘Waakhanle wi Yesu ori vaava nave oona yoowara aka, apwanne kaahaala wuukhuleya?’ (Mwaalakhanye 1 Timóteo 2:9, 10.) ‘Soowara saka saahaala wooniherya wi ka oomuchara a Yesu? Apwanne Yesu aahaala osiveliwa woona ixilema saka? Khwino aahaala osiveliwa owiriyana macipo aka? Waakhanle wi Yesu ompoleya telefone aka naari ekhankoonya ekina apwanne kaahaala okhala awuukhuwa nthowa na yeeyo aahaaleiye woona? Mano waahaala okhala woovila omutharihela mathowa anakeeriha osiveliwa ni mathatelo ammoori?’ Omusivela wahu Yehova onaphwanela oneeriha oriha echu yoothene yoohiphwanelela wa Mukiristu, moohipwacha esisapo aya. (Saweriwa T’arummwa 19:19, 20) Vaavaa naavelenlaahu okumi ahu wa Yehova, naaroromeliha opharihela okumi ahu wi nimucicimihe Kiristu. Mwawiihiiha, hannaphwanela okhapelela echu yeeyo yaahaala onihiiha omutakiherya Yesu.—Mateu 5:29, 30; Filipi 4:8.

11. (a) Omusivela wahu Yehova ni Yesu onahaala onceenyerya hai mmuteko wa olaleerya? (b) Osivela onahaala oneeriha weera eheeni wa achu a muloko ahu?

¹¹ Omusivela wahu Yesu onnanceenyerya olaleerya ni ohusiha mwa mvai. (Mateu 28:19, 20; Luka 4:43) Variyari va elukuluku ya Mukonelo, apwanne munanwerya orehererya miteko sanyu wi muwerye orumeela ntoko piyoneero ookhaviherya ni omaliha iwora 30 naari 50 mmuteko wa olaleerya? Naamukhwele mmoha a mwaamulopwana a iyaakha 84 uupuwela wi hi awerye okhala piyoneero nthowa na wuuluvala ni nanceeche. Nyenya mapiyoneero a muloko awe yaanachuna omukhaviherya. Awo yaalivela ekaaro wi emuteexeke nave yaathanla ekulucu yoophwanelela wa yoowo. Ntoko yookhumelela, munna ola aahaakhwaniha yoolakelela awe ya iwora 30. Nyuwaano tho munanwerya omukhaviherya muchu a muloko anyu okhala piyoneero ookhaviherya variyari va Marsu ni Apirili. Eparipari wi oothene hannawerya okhala mapiyoneero, nyenya nnanwerya opharihela elukuluku ni ikuru sahu wi naaceererye muteko ahu wa Yehova. Wakhala wi noheerano yeeyo, moolikana ni Paulo, nnahaala wooniherya wi ninnatakiherya osivela wa Yesu. Echu taani ekina osivela wa Muluku onahaalaaya onceenyerya weera?

NINNALAMULELIWA OSIVELANA MUKINA NI MUKHWAAWE

12. Osivela wa Muluku onanceenyerya weera eheeni?

¹² Yanawiili, osivela wa Muluku onaphwanela oneeriha waasivela akina. Murummwa Yohani aarepa: “Òkhweleyasa, Muluku anikhwenle hiha, hiyotho ninnaphwanela okhwelana.” (1 Yohani 4:7-11) Mwawiihiiha, wakhala wi ninneemererya osivela wa Muluku, nnaphwanela waasivelaka annihu. (1 Yohani 3:16) Nnii nooniherye hai wi ninnaasivela?

13. Yootakiherya taani Yesu ovanheiye?

¹³ Yootakiherya ya Yesu ennanooniherya mukhalelo wa waasivela akina. Vaavaa aareiye veelaponi yavathi, owo aahaakhaviherya achu, xaxaxa ale oohooxeya. Aahaapenuxa areca, oorakala, eevaasi, oohiiwa ni oohiloca. (Mateu 11:4, 5) Moohiyana ni ahooleli a malapelo, Yesu aanasiveliwa waahusiha achu yaawo yaachuna osuwela vooloca sa Muluku. (Yohani 7:49) Aanaasivela achu awiiyeviha nave aanawetha wi aakhaviherye.—Mateu 20:28.

14. Tiheeni munaphwanelaanyu weera ntoko eneneeryo ya waasivela anna?

¹⁴ Mpharihele elukuluku ya Mukonelo wi muupuwelele mukhalelo munahaalaanyu waakhaviherya anna ni arokora a mmulokoni, xaxaxa yaale awunnuwelavo. Munanwerya waakhaviherya moorweela wa waaxekurya, opaka yoolya, ophara miteko sa vaate, waalivela yoowela wi ephiye mmuthukumano naari olapano mmuteko wa olaleerya. (Mwaalakhanye Luka 14:12-14.) Mweemererye wi osivela wa Muluku oweeriheeni waasivela anna!

MWAAKHURUMUWELEKE ANNA OOTHENE

15. Tiheeni nnaphwanelaahu osuwela?

¹⁵ Yaneeraru, osivela wa Yehova onnaneeriha waakhurumuwela annihu. Oothene hiyo noorava okhwa ni yoocheka ya Aatamu, mwawiihiiha haavo onawerya oloca: “Nkinachuna yawoopola ya mukucho.” Naamwi ari mulapeli oororomeleya a Muluku onnachuna yawoopola eyo. Mmoha ti mmoha a hiyo ookhurumuweliwa mankaawu matokweene! Ntakhara heeni ti woochuneya osuwela yeela? Ninnaphwanya naakhulo mu niphwanaphwaniho nimoha na Yesu.

16, 17. (a) Tiheeni nnahuseryaahu orweela wa niphwanaphwaniho na Yesu vooloca sa mwene ni kapuro? (b) Mmanle wuupuwelela niphwanaphwaniho na Yesu, teevi eri yoolakelela anyu?

¹⁶ Yesu aaloca niphwanaphwaniho na mwene yoowo aamukhurumuwenle kapuro awe mankaawu a itenaario 60.000.000. Nyenya ohoolo waya, kapuro owo haamukhurumuwenle namalapa awe yoowo aarino mankaawu vakhaani a itenaario 100. Okhurumuwela wa mwene waanaphwanela omweeriha omukhurumuwela namalapa awe. Mwene aatepa onyeenyeya vaavaa iiwaleiye wi kapuro awe haakhurumuwenle mankaawu vakhaani. Owo aaloca: “Mutxhu ònanara murima, miyo kìholevelela mankau othene, wona wi wari mukiveka. Weyanotho hiwawerya ommorela ikharari mukhwa à, ntoko miyano komorenlaka ikharari?” (Mateu 18:23-35) Moolikana ni mwene, Yehova oonikhurumuwela mankaawu matokweene. Osivela wa Yehova ni ikharari sawe inaphwanela oneeriha weera eheeni?

¹⁷ Vaavaa nniireheryaahu ntakhara Mukonelo, nnaphwanela wiikoha: ‘Ookhala munna okiphunce? Apwanne kinoona okhala woovila omukhurumuwela?’ Wakhala wi ti hiiha, ela elukuluku yaphaama ya omutakiherya Yehova yoowo ori “Muluku òlevelela.” (Nehemiya 9:17; Salumu 86:5) Wakhala wi ninnathamalela ikharari sa Yehova, nnahaala tho wooniherya ikharari wa akina ni waakhurumuwela ni murima woothene. Wakhala wi hinnaasivela akina ni waakhurumuwela, nihiweherye wi Yehova onahaala onisivela naari onikhurumuwela. (Mateu 6:14, 15) Vaavaa nnaakhurumuwelaahu akina, nnahaala okhalano omwaahiyu woohakalala.

18. Osivela wa Muluku waamukhavihenrye hai murokora mmoha ovilela soohesa sa murokora mukina?

¹⁸ Onamukhala woovila ovilela ohiphaameya wa annihu. (Mwaalakhanye Éfeso 4:32; Kolosi 3:13, 14.) Eyo yaaheereya ni murokora Lily.^[1] (Moone masu a vathi omakuchuwelo.) Owo aamukhaviherya naamukhwele awiichaniwa Karol. Ntoko yootakiherya owo aanamuteexa Karol ni ekaaro awe, aanamukhaviherya opaka soothuma ni ichu ikina. Naamwi Lily aapanke soothene seiya, Karol hooniherya othamalela, nave ikwaha ikina wakhala woovila omukhaviherya. Nto Lily aanathokororya mikhalelo saphaama sa Karol nave aatitelela omukhaviherya ophiyerya okhwa wawe. Naamwi waari woovila wa Lily omukhaviherya Karol, owo onnaloca: “Kinnaweherya omoona Karol avinnye mookhwani. Kinachuna omoona vaavaa oneereiye akhale oophaameya.” Chiryene, osivela wa Muluku onahaala onikhaviherya waavilela annihu ni owehererya elukuluku yeeyo achu anahaalaaya okhala oophaameya.

19. ‘Mahala òhilotxeya’ a Muluku anooceenyeryaani weera eheeni?

¹⁹ Chiryene Yehova oonivaha ‘mahala òhilotxeya.’ Hankooni elukuluku yoothene nooniherye othamalela wahu! Nipharihele elukuluku ya Mukonelo wi nuupuwelele soothene seiyo Yehova ni Yesu apankaaya ntakhara hiyo. Neemererye wi osivela waya oneerihe omutakiherya Yesu vakhiviru khiviru, naasivelaka annihu ni waakhurumuwela ni murima woothene.

[Masu a vathi]

[Ekaaxa va epaaxina 16]

MASU ATHARIHIWE

Ocucheya: Wakhala wi ninnacucheya weera echu, ninnachuna weerano nthowa nawi echu yoophwanelela weera. Vaavaa nneemereryaahu yamahala ya woopola ya Yehova, osivela wa Muluku onnanceenyerya othamalela yamahala eyo ni omutakiherya Yesu vakhiviru khiviru

Elukuluku ya Mukonelo: Elukuluku eyo enapacerya Mukonelo ohaakumve ophiyerya omanle Mukonelo. Wiiliwiili variyari va mweeri wa Marsu, Apirili ni Maiyu

[Eruku va epaaxina 15]

Munanwerya omukhaviherya munna naari murokora awunnuwelavo mmuteko wa olaleerya? (Moone eparakrafo 14)