Amiravo—Munii Mwiirehererye Hai Ntakhara Opatiso?
“Kinnarwa wi kere ochuna wanyu, ntoko irempwaya sa miyo munlivuruni.”—SALUMU 40:8.
MACIPO: 51, 58
MWAAHAALA WAAKHULA HAI?
Enataphulela eheeni okhala a “wemererya”?
“Okhala awela ni òmusivela Muluku,” tiheeni?
Wuupuwelela woopola onookhaviherya hai omuthamalela Yehova?
1, 2. (a) Mutharihe ntakhara heeni opatiso yoolakelela etokotoko. (b) Muchu onachuna opatisiwa tiheeni onaphwaneleiye osuwela, nave ntakhara heeni?
WEYAANO wa mmiravo onachuna opatisiwa? Wakhala wi ti hiiha, ekari etokweene waahaalaawe okhalano. Ntoko elociwaaya mmwaha ovirale, opatiso yoolakelela etokweene. Onnawooniherya akina wi wooveleela okumi aa wa Yehova, ti wi, omuroromeliha wi onahaala omurumeelaka okhala wookhala nave wi opaka yookhwela awe echu yoochuneyaxa mookumini mwaa. Nthowa na okhala yoolaiherya etokotoko wa Muluku, onaphwanela opatisiwa pahiru wakhala wi wohiichwelavo, wookhalano nchuno na weerano hiiha, nave onniiwexexa yeeyo enataphulela wiiveleela wa Muluku.
2 Naamwi hiiha, akhweya onanwerya woona wi hori ahaakhwanela wi opatisiwe. Naari onanwerya wiisoona wi wohaakhwanela nyenya asitiithi aa anuupuwela wi onaphwanela oweherya winnuwa ni okhalano mavyakelo. Tiheeni onaphwanelaawe weera? Ohiceecheye. Ohiya yeeyo, opharihele elukuluku yeeyo wi oye vahoolo nave moohilekela onahaala ophwanelela opatisiwa. Ni yeeyo mmuupuweloni, onaphwanela otikitherya soolakelela raru mmikhalelo soohiyana hiyana: (1) Nchuno naa, naari soororomela, (2) saweera saa, ni (3) othamalela waa.
NCHUNO NAA
3, 4. Tiheeni amiravo eneeraaya ehuserye orweela wa yootakiherya ya Timoteo?
3 Wuupuwele mukhalelo waahaalaawe waakhula makoho ala: Ntakhara heeni kinneemererya wi Muluku ookhala? Ntakhara heeni kinnaroromela wi Piipiliya onarweela wa Muluku? Ntakhara heeni wiiwelela malamulo a Muluku ohiya otakiherya meecelo eelapo? Makoho ala ananwerya wookhaviherya ochariha ekano ya murummwa Paulo: “Mutatuse murima anyu, wi n’werye othalela khwino okhwela wa Muluku, khwino saphama, khwino sosivela ni sawakhwanela.” (Aroma 12:2) Ntakhara heeni onnaphwanela weerano yeela?
4 Yootakiherya ya Timoteo enahaala wookhaviherya. Owo aakhalano masuwelelo a mu Soorempwa nthowa nawi amannya ni amunnawe yaamuhusiha orweela mu Soorempwa. Mwawiihiiha Paulo aaloca wa Timoteo: “Nto weyano olipe mwa seiyo ohusenryawe ni wakhenlawe ni wemererya.” (2 Timóteo 3:14, 15) Nsu nawi “wemererya” nnataphulela “okhala oolekecheya wa eparipari naari echu ekina.” Mwawiihiiha Timoteo aaphwanela olekecheya wi eparipari yaaphwanyeya mu Soorempwa. Owo aaheemererya ela, ohiya nthowa nawi amamawe ni amunnawe yaamuleela weerano hiiha, nyenya nthowa nawi aahuupuwelela yeeyo aahusihiweiye ni aakhenleiye.—Mwaalakhanye Aroma 12:1.
5, 6. Ntakhara heeni ti wookhweleya ohuserya opharihela yeeyo ‘onaphwanelawe wera’ ovinyerya woomiravoni?
5 Hanka weyaano? Akhweya ohusenrye eparipari khalai.Wakhala wi ti hiiha, yoolakelela aa ekhale wuupuwelela mathowa a soororomela saa. Ela enahaala wookhaviherya olipiha nroromelo naa ni osepa opaka soolakelela soonanara nthowa na okhinyererya wa asinthamwene, muupuwelo wa elapo, naari ni moonelo aa.
6 Wakhala wi woohuserya yeeyo ‘onaphwanelawe wera’ oniiha nlelo ori mmiravo, onahaala owerya waakhula makoho a asinthamwene aa ntoko ala: ‘Onasuwela hai wi Muluku ookhala? Wakhala wi Muluku onnanisivela, ntakhara heeni onneemererya weereya ichu soonanara? Onaweryeya hai wi Muluku onnakhala mahiku oothene?’ Wakhala oorehererya, makoho ntoko yaala henii yooruuhele minikwa mmuupuweloni, nyenya anahaala wooceenyerya omuhuserya Piipiliya.
7-9. Mutharihe ti mwawiihai miyaha sa interneti ya yoochariha ya ohuserya, “O Que a Bíblia Relamente Ensina?,” ineeraaya ilipihe nchuno nanyu.
7 Yoohuserya ya muchu mukhateiye enanwerya wookhaviherya waakhula makoho anathannya minikwa, ni olipiha nchuno naa. (Saweriwa T’arummwa 17:11) Nookhalano soolaleeryiwa sincipale sinahaala wookhaviherya weerano yeeyo. Ancipale annaphwanya nikhaviheryo mu ohuserya eproxura A Origem da Vida — Cinco Perguntas Que Merecem Resposta ni liivuru Existe um Criador Que Se Importa com Você? Nave tho, amiravo ancipale annasiveliwa ni ophura orweela wa miyaha “O Que a Bíblia Realmente Ensina?” siri mu jw.org. Weyaano onahaala ophwanya vathi va ENSINOS BÍBLICOS. Yoochariha eri yoothene ya ohuserya mmiyaha seiya sireheryiwe wi sookhaviherye olipiha nchuno naa vooloca sa mwaha wa Piipiliya.
8 Weyaano onamuhuserya Piipiliya, onahaala osuwela maakhulo a makoho makina anaphwanyeya mu yoochariha ya ohuserya. Nyenya onnaroromela maakhulo aa? Yoochariha ya ohuserya enahaala wookhaviherya wuupuwela soorepa nave voocharela enamooceenyerya orepela mathowa a soororomela saa. Ela enahaala wookhaviherya osuwela mukhalelo wa othariha soororomela saa wa akina. Wakhala wi onnavolowa mu interneti mmiyaha “O Que a Bíblia Realmente Ensina?” ti yaphaama opharihela mu yoohuserya aa ya muchu mukhateiye wi yookhaviherye olipiha nchuno naa.
9 Onahaala osuwela mukhataa wi ela eparipari. Enahaala wookhaviherya wiireherya wi opatisiwe. Murokora mmoha ori mwali onnaloca: “Kihaakumve olakelela wi kapatisiwe, kaamuhuserya Piipiliya nave koona wi ala malapelo eeparipari. Nave nihiku nnihiku, nchuno nla naanunnuwa.”
SAWEERA SAA
10. Ntakhara heeni ennaweheryiwa wi muchu oopatisiwa onaphwanela weera ichu mwawiiwanana ni nroromelo nawe?
10 Piipiliya onnaloca: “Nroromelo nahivahà miteko saphama, nri nokhwa mukhataya.” (Tiyako 2:17) Wakhala wi wookhalano nchuno noolipa, onahaala wooniherya mu saweera saa. Onahaala okhalano yeeyo Piipiliya oniichaneiye “okhala awela ni òmusivela Muluku.”—Mwaalakhanye 2 Pedro 3:11.
11. Mutharihe masu awi “okhala awela.”
11 “Okhala awela” tiheeni? Wakhala wi saweera saa ti saweela, ori aweela mmuupuweloni. Ntoko yootakiherya, wuupuwele miyeeri thanu nammoha sivinre. Elukuluku weehiwaawe opaka yoonanara, apwanne waawerya wuupuwela mweephoole yeeyo yaari yaphaama ni yoonanara? (Ahebri 5:14) Onnuupuwela elukuluku waheemerenryaawe yaweeha naari okhinyererya wa asinthamwene? Oxikola, onnavaha yootakiherya yaphaama wa akina? Onnatitelela okhala oororomeleya wa Yehova, naari onneererya okhala ntoko asinthamwene aa ooxikola? (1 Pedro 4:3, 4) Mweeparipari, haavo ori oophaameya? Ikwaha ikina, ophiyerya tho yaale anamurumeela Yehova mu iyaakha sincipale annoovelela nave annakacamiheya waalaleerya akina. Nyenya muchu iiveleenle wa Muluku onahaala wiirumiha okhala mmoha a Anamoona a Yehova, ni wooniherya eyo mmeecelo awe aweela.
12. Taavi ari makhalelo makina “òmusivela Muluku,” nave onaphwanela woona hai?
12 Masu awi “Òmusivela Muluku” tiheeni? Anaphitaanyerya miteko onapharaawe mmulokoni, ntoko oya mmithukumanoni ni olaleerya. Nyenya sinnaphitaanyerya tho miteko akina ahinaweryaaya woona, ntoko mavekelo aa awiipitheya wa Yehova ni yoohuserya aa ya muchu mukhateiye. Muchu oveleenle okumi awe wa Yehova hanuupuwela wi miteko iha ti soolimela. Owo onahaala woona ntoko Mwene Tavite yoowo olonce: “Kinnarwa wi kere ochuna wanyu, ntoko irempwaya sa miyo munlivuruni”—Salumu 40:8.
13, 14. Yoovaha taani enahaala wookhaviherya okhala “òmusivela Muluku,” nave amiravo akina anaphura hai orweela wa yoovaha yeela?
13 Wi okhaviheryeye otikitherya soolakelela, nookhalano ekaaxa eri mu liivuru Os Jovens Perguntam—Respostas Práticas, Volume 2 ipaaxina 308 ni 309. Mu ekaaxa, onaphwanela orepa vathi vaya maakhulo a makoho ntoko ala: “Ophiyerya mweeryo taani mavekelo aa aryaaya ooluluwanya, nave awo anooniherya eheeni vooloca sa omusivela waa Yehova?” “Onaphitaanyerya eheeni mu yoohuserya aa ya muchu mukhateiye?” “Onnaphwanyeya mu orummwa naamwi asitiithi aa ehiyaakawo?” Ekaaxa tho yookhalano mpuro onaphwanelaawe orepela soolakelela siri soothene onachunaawe otikitherya muukumini mwaa vooloca sa mavekelo aa, yoohuserya ya muchu mukhateiye, ni olaleerya.
14 Amiravo ancipale anuupuwela sa opatiso annoona wi ekaaxa ela ekaruma yoophwanelela. Murokora mwali oniichaniwa Tilta onnaloca: “Kaapharihela ekaaxa wi kitikitherye soolakelela. Kaawerya ophwanya emoha ti emoha ya soolakelela seiye, nave kaareheryeya wi kipatisiwe eyaakha emoha ohoolo waya.” Munna mmiravo oniichaniwa Patrick ookhalano sookhumelela imohamoha. Owo onnaloca: “Kaasuwela ti sivi saari soolakelela saka, nyenya orepela saakeeriha olapa mwakuru wi kiphwanye.”
15. Mutharihe ntakhara heeni wiiveleela enaphwanela okhala yoolakelela ya muchu mukhateiye.
15 Nikoho nimoha nnaphwanyeya va ekaaxa ti nla: “Weyaano onahaala omurumeela Yehova naamwi asitiithi aa ni asinthamwene ehin’ye weerano hiiha?” Vaavaa onaveleelaawe okumi aa wa Yehova nave apatisiwa, onahaala okhalano onthamwene waphaama ni yoowo. Mwawiihiiha, yeeyo oneeraawe ntakhara Yehova ehikhale nthowa na asitiithi aa naari muchu mukina. Saweera saa saweela mmeeceloni ni omusivela Muluku yawooniherya yawi woolekecheya wi wookhalano eparipari nave onnachuna ochariha malakiheryo a Muluku. Moohilekela onahaala ophwanelela opatiso.
OTHAMALELA WAA
16, 17. (a) Tiheeni enaphwanela omuceenyerya muchu okhala Mukiristu? (b) Othamalela woopola enahaala olikanyihiwa ni eheeni?
16 Nihiku nimoha, mulopwana yoowo aasuwenle phaama Nlamulo na Moose aamukoha Yesu ariki: “Nlamulo ntokotoko ti nivi na m’malamulo?” Yesu aahi wa yoowo: “Onarwa-osivelana ni Apwiya [Yehova] Mulukuá ni murimá wothene, nave ni okumiá wothene, nave ni mirukuá yothene.” (Mateu 22:35-37) Yesu aahooniherya wi omusivela Yehova nthowa nnaphwanela omweeriha muchu opatisiwa wi akhale Mukiristu. Mukhalelo mmoha waphaama wa olipiha osivela waa wa Yehova ori wuupuwelela mweephoole woopola, yoovaha etokweene ya Muluku ntakhara achu. (Mwaalakhanye 2 Korinto 5:14, 15; 1 Yohani 4:9, 19.) Vaavaa oneeraawe yeela, onahaala ochuna wooniherya othamalela waa yoovaha yeela yootikhiniha.
17 Othamalela waa yawoopola enahaala otharihiwa mmukhalelo ola: Waanyiherye wi onamuneela mmaahini nave muchu mukina oowoopola. Apwanne yaahaala okhala yaphaama orowa owaani, wiisuumiha nave ocuwale yeeyo muchu ole oweerenleiye? Hooye! Wiiliwiili waaphwanela wooniherya omuthamalela waa muchu yoowo ooponle okumi aa! Moolikana, weyaano onaphwanela omuthamalela Yehova ni Yesu moorweela wa woopola. Hiyaano nookhalano mankaawu wa yaawo! Awo aanoopola wa yoocheka ni okhwa. Nthowa na onisivela waya, nookhalano ewehereryo ya ekumi yoohimala Mparataiso veelaponi yavathi!
18, 19. (a) Ntakhara heeni honaphwanela woova wiiveleela wa Yehova? (b) Omurumeela Yehova enii yookhaviherye hai okhalano okumi waphaama?
18 Weyaano onnathamalela yeeyo Yehova oweerenleiye? Wakhala wi ti hiiha, wiiveleela ni opatiso echu yaphaama weera. Wiiveleela waa yoolaiherya wa Muluku wi onahaala opaka yookhwela awe okhala wookhala. Onaphwanela woova opaka nlakano nenla? Hooye! Yehova onachuna yaphaama wa weyaano, nave onahaala waavaha phatamari yaale anapaka yookhwela awe. (Ahebri 11:6) Vaavaa onaveleelaawe okumi aa wa Muluku ni opatisiwa, okumi aa honii onanare, nyenya onahaala okhala waphaama! Munna a iyaakha 24 sa oyariwa yoowo aapatisiwe ahaakumve okhala mmiravo onnaloca, “Kaahaala okhalano wiiwexexa wawaakhwanela waakhanle wi koowehererya wunnuwa, nyenya opaka yoolakelela ya wiiveleela wa Yehova kiri ponkwe yaakikhapelela ntakhara ovolowela weelapo.”
19 Yehova onachuna yeeyo eri yaphaama wa weyaano. Nyenya Satana ta nrima nave owo hanachuna wookhapelela. Owo hanii oovahe echu yaphaama wakhala wi woomuchara. Mano, onii awerye hai ovaha echu yeeyo ohiryeiyeno? Owo hanavaha michaka yaphaama, nave hanono ewehereryo. Pahiru onavaha omwaahiyu woonanara, nthowa nawi ti yeeyo onaweheryeiye waakhela!—Wupulula 20:10.
20. Tiheeni mmiravo onaya vahoolo onaphwaneleiye weera wi aphwanelele wiiveleela ni opatiso? (Moone tho ekaaxa “Wi Okhaviheryeye Oya Vahoolo.”)
20 Oveleela okumi aa wa Yehova yoolakelela yaphaama onaphwanelaawe opaka. Ori ooreheryeya weereno yeela? Wakhala wi aai, ohoove opaka yoolaiherya yeela. Nyenya wakhala wi hori ooreheryeya, opharihele malakano yaala alociwe mmwaha yoola wi otitelele oya vahoolo. Paulo aaloca wa anna o Filipi wi etitelele oya vahoolo. (Filipi 3:16) Wakhala wi woochara ekano yeela, moohilekela onahaala ochuna oveleela okumi aa wa Yehova ni opatisiwa.
[Ekaaxa va epaaxina 14]
WI OKHAVIHERYEYE OYA VAHOOLO
Orweela wa miyaha sa Despertai! “Os Jovens Perguntam?”
▪ “Como posso melhorar minhas orações?”—Novempuru a 2008
▪ “Como tornar a leitura da Bíblia agradável?”—Apirili a 2009
▪ “Quem sou eu?”—Outupuru a 2011
▪ O que tenho de fazer para gostar de estudar a Bíblia?—Fevereru a 2012
▪ “Por que devo assistir as reuniões cristãs?”—Apirili a 2012
Orweela mu Os Jovens Perguntam—Respostas Práticas
VOLUME 1
▪ “Como posso sentir prazer em adorar a Deus?”—mwaha 38
▪ “Por que tenho medo de falar sobre minha religião na escola?”—mwaha 17
VOLUME 2
▪ “Por que seguir as regras da Bíblia?”—mwaha 34
▪ “Como posso me tornar amigo de Deus?”—mwaha 35
▪ “Devo me batizar?”—mwaha 37