Okhala Oororomeleya Onnahoolela Weemereryiwa ti Muluku
Mukhale “òwatakiherya yale anakhala òhiyeriwa sororomelihiwa wa nthowa na wemererya ni nthìti naya.”—AHEBRI 6:12.
MACIPO: 86, 54
MUNANWERYA WAAKHULA?
Yootakiherya ya Yefita ni mwanawe enanikhaviherya hai osepa ovolowela weelapo?
Malakiheryo taani a Mpiipiliyani enii yookhaviheryeene hai omaliha makacamiho?
Mwaha ola woolipinheeni hai opaka mikucho ntakhara Omwene?
1, 2. Makacamiho taani Yefita ni mwanawe yaakumannaayano?
MWALI onnachimaka wi akumane ni tiithi awe. Owo aatepa oohakalala owoona ekookaka okhoconi. Ovootha waya waamweeriha wiipa ni wiina moohakalala. Nyenya yeeyo tiithi awe enreiye ni aalonceiye yaamutikhiniha vancipale. Tiithi aahaahula yoowara awe nave aakhuwela: “Hì, mwanaka, kòtakhaliwa! Wonanariha murima aka.” Voocharela aamuleela wi aapaka nlakano wa Yehova nenlo naahaala otoroka okumi awe. Nlakano nlo naataphulela wi mwanawe haahaala otheliwa naari okhalano mwaana. Moohilekela mwali aavaha naakhulo naphaama, amulipixaka tiithi awe wi aakhwaniherye nlakano nawe wa Yehova. Naakhulo nawe naahooniherya wi owo aari oolekecheya wi echu yoothene Yehova aahaaleiye omveka yaahaala okhala yaphaama. (Amuthoriha 11:34-37) Vaavaa tiithi awe oonneiye nroromelo nawe, owo aahakalala nthowa na osuwela wi wiiveleela wawe waahaala omuhakalaliha Yehova.
2 Yefita ni mwanawe yaamuroromela Yehova. Awo yaari oororomeleya naamwi waari woovila. Yaachuna weemereryiwa ni Yehova, nave mukucho ori woothene waari woochuneya.
3. Ntakhara heeni yootakiherya ya Yefita ni mwanawe enahaala onikhaviherya olelo?
3 Tahi wi ikwaha soothene ti wookhweya okhala oororomeleya wa Yehova. Hiyaano nnaphwanela ‘owana tchiri ntakhara nroromelo.’ (Yuda 3, NN) Wi enikhaviherye weerano hiiha, hankooni nihuserye mukhalelo Yefita ni mwanawe yaavilenlaaya makacamiho mu okumi aya. Ti mwawiihai yaakhanlaaya oororomeleya wa Yehova?
MUTITELELE OKHALA OOROROMELEYA MOOHIPWACHA OVOLOWELA WEELAPO
4, 5. (a) Nlamulo taani Yehova aavanheiye Aisarayeli vaavaa yaavolonwaaya mu Elapo ya Nlakano? (b) Mwawiiwanana ni Salumu 106, tiheeni yeeren’ye ni Aisarayeli nthowa na ohiiwelela waya?
4 Mahiku oothene, Yefita ni mwanawe yaanuupuwelela sookhumelela sa Aisarayeli ohimwiiwelela waya Yehova. Iyaakha 300 muculi, Yehova aahaalamulela Aisarayeli wi ewiiphe alapeli oothene atheru mu Elapo ya Nlakano, nave awo hiyaamwiiwelenle. (Malamulo 7:1-4) Aisarayeli ancipale yaapacerya waatakiherya Akaanani, yaalapela amuluku atheru nave yaarino okumi woocapaheya.—Mwaalakhanye Salumu 106:34-39.
5 Nthowa na ohiiwelela wa Aisarayeli, Yehova haawaakinhe wa amwiicani aya. (Amuthoriha 2:1-3, 11-15; Salumu 106:40-43) Moohikhwa minikwa yaari echu yoovila wa imusi saamusivela Yehova, okhala oororomeleya variyari va iyaakha seiye sookacamiha. Nyenya, Piipiliya onnaaloca wi yaakhalawo achu oororomeleya, ntoko Yefita ni mwanawe, Elkaana, Aana ni Samuwele. Awo yaari oolakelela omuhakalaliha Yehova.—1 Samuwele 1:20-28; 2:26.
6. Ovolowela taani weelapo orivovo olelo, nave tiheeni nnaphwanelaahu weera?
6 Mmahiku ahu, achu anuupuwela nave aneera ichu ntoko Akaanani. Okhala waya onateteiwa ni oraruwa, nlala ni ikhorowa. Nyenya Yehova onnanivaha soolopola. Owo onachuna onikhapelela ntoko aachuneleiye waakhapelela Aisarayeli orweela wa ovolowela woonanara. Apwanne nnahaala ohuserya orweela wa soohesa aya? (1 Korinto 10:6-11) Nnaphwanela weera soothene nnaweryaahu wi nsepe muupuwelo weelapo. (Aroma 12:2) Apwanne nnahaala wooniherya owetha wahu wi neereno hiiha?
YEFITA AATITELELA OROROMELEYA MOOHIPWACHA MAKACAMIHO
7. (a) Okhalihiwa taani Yefita eereliweiye ni achu awe? (b) Yefita onne hai?
7 Mmahiku a Yefita, Aisarayeli yaahooxiwa ni maloko meeli Afilisti ni Amonita nthowa nawi Aisarayeli hiyaamwiiwelenle Yehova. (Amuthoriha 10: 7, 8) Mwawaaceererya ni maloko a amwiicani, Yefita aakhalano tho makacamiho ni ahima awe vamoha ni ahooleli a Isarayeli. Woona wi annawe yaari awiirumiha nave yaanamwiica, awo yaamwiikara mu elapo yeeyo yaari yawawe. (Amuthoriha 11:1-3) Yefita heemerenrye wi moonelo aya woonanara omvolowele. Nnasuwela hai yeela? Nthowa nawi vaavaa ahooleli a nloko yaamvenkaaya nikhaviheryo, owo aaheerano mwaphaama. (Amuthoriha 11:4-11) Tiheeni yaamuceenyenrye Yefita opaka ichu mmukhalelo yoola?
8, 9. (a) Malakiheryo taani a Nlamulo na Moose yaamukhavihenrye Yefita? (b) Tiheeni yaari yookhweleya wa Yefita?
8 Yefita aari mukhoco oowerya, nave aasuwela phaama mwaha wa Aisarayeli ni Nlamulo na Moose. Mukhalelo Yehova aakhalinheiye achu awe yaamuhusiha malakiheryo a Muluku vooloca sa yaphaama ni yoonanara. (Amuthoriha 11:12-27) Yefita aapharihela masuwelelo yaala mu okumi awe vaavaa aapakeiye soolakelela. Aasuwela phaama mukhalelo Yehova ooneiye vooloca sa onyeenyeya ni wunla ikuhu ni mukhalelo Muluku aachuneiye wi achu Awe esivelaneke mukina ni mukhwaawe. Mwawaacererya, Nlamulo naamuhusiha mukhalelo wa waakhaliha akina, ophiyerya tho yaale yaamwiica.—Mwaalakhanye Mukwaha 23:5; Onamukutxho 19:17, 18.
9 Yootakiherya ya Yoosefe yaamukhaviherya Yefita. Owo aahuserya mukhalelo Yoosefe oonihenryeiye ikharari wa annawe naamwi yaamwiince. (Maphatxuwelo 37:4; 45:4, 5) Wuupuwela yootakiherya yeela yaamukhaviherya Yefita opaka yeeyo yaahaala omuhakalaliha Yehova. Yeeyo asinnawe yaapankaaya yaamwiicela Yefita. Nyenya owana mwa nsina na Yehova ni achu awe yaari echu yookhweleya opwaha moonelo wa Yefita. (Amuthoriha 11:9) Owo aari oolakelela okhala oororomeleya wa Yehova. Moonelo yoola waakumiherya mareeliho a Yehova, wa yene ni wa Aisarayeli.—Ahebri 11:32, 33.
10. Nnii neerihe hai wi malakiheryo a Muluku enikhaviherye opaka ichu ntoko Akiristu?
10 Tiheeni nnahuserya orweela wa yootakiherya ya Yefita? Tiheeni nnaphwanelaahu weera wakhala wi Annihu aaniphuca naari wakhala wi nnoona wi awo hananikhaliha phaama? Niheemererye wi moonelo ahu ovolowele omurumeela wahu Yehova. Muhimaale ophiya mmithukumano Seekiristu naari omaliha elukuluku ni anna. Hankooni nimutakiherye Yefita ni omwiiwelela Yehova. Weerano hiiha enahaala onikhaviherya ovootha makacamiho nave tho okhala yootakiherya yaphaama.—Aroma 12:20, 21; Kolosi 3:13.
OVAHA MUKUCHO MWAWIIVELEELA ONNOONIHERYA NROROMELO NAHU
11, 12. Nlakano taani Yefita eenreiye, nave yaavolowela eheeni?
11 Yefita aasuwela wi owo aanachuna nikhaviheryo na Muluku wi awoopole Aisarayeli mmatani mwa Amonita. Owo aamulaiherya Yehova wi wakhala wi oomukhaviherya, owo aahaala omvaha “mukutxho wopahiwa” muchu oopacerya aahaala okhuma mpa mwawe akookaka okhoconi. (Amuthoriha 11:30, 31) Ela enataphulela eheeni?
12 Yehova onniica waavaha achu ntoko mukucho, mwawiihiiha ninnasuwela wi Yefita haaya opaka mukucho wawooneya. (Malamulo 18:9, 10) Mwawiiwanana ni Nlamulo na Moose, mukucho woopahiwa yaakhala yamahala yavameekhaaya muchu aamvaheiye Yehova moomalela. Mwawiihiiha Yefita uupuwela wi muchu aahaaleiye omvaha Yehova aahaala omurumeelaka mu tapernaakulu okumi awe woothene. Yehova anwiriyana Yefita nave aamukhaviherya ovootha. (Amuthoriha 11:32, 33) Nyenya taani Yefita aahaaleiye omvaha Yehova?
13, 14. Masu a Yefita anaphwanyeya mu Amuthoriha 11:35 anooniherya eheeni vooloca sa nroromelo nawe?
13 Muupuwele yaweereya elociwe wuupaceryani wa mwaha yoola. Yefita akookaka okhoconi, muchu oopacerya yoowo aamuthikiryenrye aari mwanawe mwaamuthiyana, mwanawe mmoharu! Apwanne Yefita aahaala waakhwaniherya nlakano nawe? Aahaala omvaha Yehova mwanawe mwaamuthiyana wi arumeeleke mu tapernaakulu okumi awe woothene?
14 Wanaawiili, malakiheryo a Nlamulo na Muluku naamukhaviherya Yefita opaka yoothanla yaphaama. Akhweya aahuupuwelela masu ari mu Mukwaha 23:19, yaawo analoca wi achu a Muluku yaahaala wiiveleela wi emvahe Yehova owetha waya. Nlamulo tho naaloca wi muchu opanke nlakano wa Yehova aaphwanela ‘werano olontxeiye niororomelin’heiye.’ (Namarepela 30:3) Ntoko Aana oororomeleya, akhweya aakhanle ophiyerya elukuluku awe, Yefita aaphwanela waakhwaniherya nlakano nawe, naamwi aasuwenle yeeyo yaataphulela wa mwanawe ni yene. Woona wi mwanawe aahaala orumeelaka mu tapernaakulu, owo hii akhaleno mwaana. Mwawiihiiha Yefita hii akhaleno mukelampa wa nsina nawe ni elapo. (Amuthoriha 11:34) Naamwi hiiha, Yefita moororomeleya aaloca: “Kòlipela wa Apwiya nkinaweryatho okòkela otxuli.” (Amuthoriha 11:35) Yehova aheemererya vatokovene mukucho wa Yefita nave aamureeliha. Apwanne munamukhala ooromeleya hiiha ntoko Yefita?
15. Nlakano taani ancipale a hiyo nipankaahu, nave nnii niwerye hai wooniherya nroromelo?
15 Vaavaa niivelenlaahu wa Yehova, naapaka nlakano wi naahaala opakaka yookhwela awe moohipwacha yaweereya. Noosuwela wi tahi wookhweya waakhwaniherya yoolaiherya. Nyenya nnoona hai vaavaa nnavekiwaahu opaka echu ehinanisivela? Wakhala wi noovootha moonelo ahu nave nimwiiwelela Muluku ahu, nnooniherya wi nri oororomeleya wa yoolaiherya ahu. Mukucho ahu akhweya onahaala okhala wawiicela, nyenya wiiliwiili mareeliho a Yehova anakhala mancipale. (Malakiya 3:10) Nyenya hanka vooloca sa mwaana mwaamuthiyana a Yefita? Owo onne hai yoolaiherya ya tiithi awe?
16. Mwaana mwaamuthiyana a Yefita aakhulenle hai yoolaiherya ya tiithi awe? (Moone eruku yoopacerya.)
16 Nlakano na Yefita naari noohiyana ni na Aana. Owo aalaiherya omvaha mwanawe Samuwele wi arumeeleke mu tapernaakulu ntoko Nasireu. (1 Samuwele 1:11) Nasireu aaneemereryiwa othela ni okhalano emusi. Nyenya mwaana amwaamuthiyana a Yefita aavahiwe ntoko “mukutxho wopahiwa,” mwawiihiiha owo haahaala opuha okhala muthiyana ootheliwa ni maai. (Amuthoriha 11:37-40) Nkuupuwelani! Owo akhweya aahaala okhalano mulopwana oosivela mu elapo, woona wi tiithi awe aari muhooleli o Isarayeli. Vano owo aahaala okhala kapuro awiiyeviha mu tapernaakulu. Mwaana ola aakhulenle hai? Owo aahooniherya wi muteko wa Yehova waakhalano nipuro noopacerya moorweela wa oloca wa tiithi awe: “Okèrele ntoko olipela wà.” (Amuthoriha 11:36) Owo aahiipha minkhela sawe sa okhalano mulopwana ni anamwane wi amurumeeleke Yehova. Nnii ntakiherye hai moonelo awe?
17. (a) Nnii ntakiherye hai nroromelo na Yefita ni mwanawe mwaamuthiyana? (b) Masu ari mu Ahebri 6:10-12 enii yoolipiheeni hai?
17 Macikhwi macikhweene a amiravo Eekiristu alopwana ni athiyana mwawiiveleela haneemererya othela naari annathanla ohikhalano anamwane, ophiyerya olelo. Ntakhara heeni? Nthowa nawi awo anachuna omurumeela Yehova mwawaakhwanela. Nave tho, makholo ahu mancipale annamaliha elukuluku ni anamwane aya ni asisulwaaya. Moohiyana, awo annavaha elukuluku ni ikuru saya wa Yehova. Akina a yaawo analapa mmuteko wa oteka naari oya o Exikola ya Alaleeryi a Omwene nave annaya mmiloko weiwo oriwo othowa otokweene wa alaleeryi. Akina annapaka marehereryo wi yaaceererye omurumeela waya Yehova variyari va Mukonelo. Chiryene Muluku harwa acuwala mikucho soothene sa achu yaala oororomeleya. (Mwaalakhanye Ahebri 6:10-12.) Hanka nyuwaano? Mwaahaala owerya opaka mikucho sa omurumeela Yehova mwawaakhwanela?
TIHEENI NIHUSENRYAAHU?
18, 19. Tiheeni nnahuseryaahu orweela wa yaweereya ya Mpiipiliyani vooloca sa Yefita ni mwanawe, nave nnii naatakiherye hai?
18 Tiheeni yaamukhavihenrye Yefita ovootha makacamiho awe mancipale? Owo aaheemererya wi Yehova a muhoolele mu okumi awe. Owo aathanla wi ahivoloweliwe ni achu yaamwaacamenle. Nave aatitelela okhala oororomeleya naamwi akina yaamunyeenyeiha. Yehova aamureeliha Yefita ni mwanawe mwaamuthiyana ntakhara mukucho aya wawiiveleela, nave Yehova aahaapharihela oopiili wi evuwihe malapelo eeparipari. Naamwi akina yaamaala opaka echu yaphaama, Yefita ni mwanawe yaatitelela okhala oororomeleya wa Yehova.
19 Piipiliya onnaloca: Mukhale “òwatakiherya yale anakhala òhiyeriwa sororomelihiwa wa nthowa na wemererya ni nthìti naya.” (Ahebri 6:12) Hankooni nimutakiherye Yefita ni mwanawe, nsuwelaka wi nakhala oororomeleya, Yehova onahaala onireeliha.
[Yooleeliherya va epaaxina 5]
Niheemererye wi moonelo ahu ovolowele omurumeela wahu Yehova
[Yooleeliherya va epaaxina 7]
Mwaana mwaamuthiyana a Yefita aahiipha minkhela sawe sa okhalano mulopwana ni anamwane wi amurumeeleke Yehova
[Ekaaxa va epaaxina 8]
MASU ATHARIHIWE
Mukucho woopahiwa: Mikucho soopahiwa naari soovaha soopahiwa, sinnaromoliwa mu Nlamulo na Moose. Vaavaa Muisarayeli aachuneiye wooniherya othamalela wawe wa Yehova, owo aaphwanela omukuxa mwaasinama ni omunnya namukucho wi amusuke va yuupuni ntoko mukucho woopahiwa wawaakhwanela. Waanaweryeyavo tho omvaha muchu wa Yehova ntoko mukucho, etaphulelaka wi muchu owo aahaala omurumeelaka Muluku mu okumi awe woothene
Variyari va Mukonelo:
Elukuluku ehaakumve, variyari, ni elukuluku vakhaani omanle Mukonelo. Ikwaha ikina inaphitaanyerya miyeeri sa Marsu, Apirili ni Maiyu