Mooniherye Nroromelo Nanyu mu Soolaiherya sa Yehova
Nroromelo “ti . . . nsuweliho na itxhu nihinonahu.”—AHEBRI 11:1.
MACIPO: 54, 125
MWAAHAALA WAAKHULA HAI?
Yootakiherya ya Nowa enanikhaviherya hai wiiwexexa yootaphulela ya okhalano nroromelo?
Mmikhalelo taani nnaphwanelaahu wooniherya nroromelo?
Ntakhara heeni nroromelo ni okhwela ti sookhweleya?
1. Nnaphwanela woona hai vooloca sa nroromelo nahu?
TAHI wi achu oothene aakhalano nroromelo. (2 Tesalónika 3:2) Nyenya Yehova onnaavaha nroromelo achu oothene yaale anamulapela. (Aroma 12:3; Galasya 5:22) Ekari etokweene osuwela wi Yehova onnanivaha nroromelo!
2, 3. (a) Nnaphura hai vaavaa nnakhalaahuno nroromelo? (b) Makoho taani nnahaalaahu othokororya?
2 Yehova oomvaha Mwanawe Yesu wi muchu ti muchu onamuroromela yoowo awerye oleveleliwa soocheka sawe. Ela enneeriha okhala wooweryeya achu okhala asinthamwene a Yehova ni okhalano ekumi yoohimala. (Yohani 6:44, 65; Aroma 6:23) Chiryene ala mahala a Yehova wa hiyo! Naamwi nri achu oocheka nave niphwanelaka okhwa, Yehova aahoona wi waari wooweryeya wa hiyaano opaka ichu saphaama. (Salumu 103:10) Owo oonikhaviherya ohuserya michaka yaphaama vooloca sa Yesu ni mukucho awe. Vaavaa naapacenryaahu okhalano nroromelo mwa Yesu ni omuchara, naanaweherya ekumi yoohimala!—Mwaalakhanye 1 Yohani 4:9, 10.
3 Nyenya echu taani ekina nnahuseryaahu vooloca sa nroromelo? Wakhala wi noosuwela yeeyo Muluku oneerenleiye ni onahaaleiye opaka omwaahiyu, enataphulela wi nookhalano nroromelo? Hankooni noone echu taani ekina nnaphwanelaahu weera.
“WEMERERYÀ MMURIMANI MWÀ”
4. Nroromelo nnanivolowela hai?
4 Vaavaa nnakhalaahuno nroromelo mwa Yehova ni Yesu, ninnawerya woona yeeyo anapakaaya naari aneeraaya enipakele. Ninnakhalano tho nchuno na okhala mwawiiwanana ni mahusiheryo aya. Nave ninnakhalano nchuno na waakhaviherya akina wi yaasuwele. Murummwa Paulo aaloca: “Ntakhara weyano walotxà ni eyano-à wi Yesu ti Pwiya, nave wemereryà mmurimani mwà wi Muluku onvinyiha yowo mokhwani, onanvuluwa. Nave ororomela ni murima wothene onnaphwanyiha wokololiwa, ni olokoha ni masu onnakeriha wovuluwani.”—Aroma 10:9, 10; 2 Korinto 4:13.
5. Ntakhara heeni nroromelo ti nookhweleya, nave tiheeni nnaphwanelaahu opaka wi nlipihe nroromelo nahu? Mvahe yootakiherya.
5 Wi nipuhe ekumi yoohimala mu elapo evyaani ya Muluku, nnaphwanela okhalano nroromelo nave nnaphwanela otitelela olipiha nroromelo nahu. Nroromelo nnalikana ni mwiri. Nnaphwanela otitelela ohela maahi mwiri wi okhale woolipa nave otitelele winnuwa. Nyenya wakhala wi nnahela maahi vakhaani, mwiri owo onahaala onyaala ni okhwa. Moolikana, nnaphwanela weeravo echu wi nroromelo nahu nikhale ‘nolipa’ nave ntitelele ‘winnuwa.’—Tito 2:2; 2 Tesalónika 1:3; Luka 22:32; Ahebri 3:12.
NROROMELO TIHEENI?
6. Mwawiiwanana ni Ahebri 11:1 nroromelo tiheeni?
6 Mu Ahebri 11:1, Piipiliya onnathariha nroromelo. (Mwaalakhanye.) (1) Weemererya naari nroromelo ti “nlipiseryo na itxhu nnaweheryahu.” Ichu “nnaweheryahu” inaphitaanyerya soolaiherya sa Muluku vooloca sa omwaahiyu. Ntoko yootakiherya, ninnaroromela wi ichu soonanara inahaala omala nave wi enahaala okhalavo elapo evyaani. (2) Nroromelo ti “nsuweliho,” naari olekecheya vooloca sa “itxhu nihinonahu.” Noosuwela wi Yehova, Yesu Kristu, ankeelo, ni Omwene wa wirimu wookhala, naamwi nihiweryaka woona. (Ahebri 11:3) Nni nooniherye hai wi nookhalano chiryene nroromelo mu soolaiherya sa Muluku ni ichu nihinaweryaahu woona? Nnahaala wooniherya yeeyo moorweela wa mukhalelo nnakhalaahu ni yeeyo nnalocaahu ni nnapakaahu.
7. Yootakiherya ya Nowa enanikhaviherya hai wiiwexexa yeeyo enataphulela okhalano nroromelo? (Moone eruku yoopacerya.)
7 Tiheeni nnahuseryaahu orweela wa Nowa vooloca sa nroromelo? Murummwa Paulo ooloca wi Nowa, ‘ahemererya masu a Muluku wa itxhu nivano sari sohoneya, nave t’amutenkeiye mwatxeya, yowo ni ahima awe yavulun’wayamo.’ (Ahebri 11:7) Woona wi Nowa aakhalano nroromelo mwa yeeyo Yehova aamulenleiye, owo aampaka mwaaceya mutokweene. Akhweya amwaacamani awe yaanamukoha ntakhara heeni ampakeiye mwaaceya. Ninnasuwela wi Nowa haamaanle. Piipiliya onaloca wi Nowa aari “namalaleya a wokolola.” (2 Pedro 2:5) Owo aanaalopola achu wi Muluku aahaala oruuha maahi mancipale wi aatolose aweera soonanara. Akhweya aahaaleela yeeyo Yehova aamulenleiye: “Kohupuwela watolosa atxhu othene wa nthowa na sotxheka saya txhiri elapo yosareya owali,” nave “miyano kinamurupiha epwila yintxipale wi yeyo etolose itxhu sothene s’ekumi. Itxhu sothene inetxa vathi inamutholowa.” Voocharela Nowa aahaaleela achu yeeyo yaaphwanelaaya opaka wi evuluwe. Yehova aamulamulela ariki: “Ovolowe mmwatxeyani.”—Maphatxuwelo 6:13, 17, 18.
8. Tiheeni Yakopo olonceiye sa nroromelo?
8 Yakopo tho aarepa vooloca sa nroromelo. Akhweya owo aarempe murummwa Paulo amanle waarepela Ahepri. Yakopo aarepa: “Koniherye nroromelo nà nihirino miteko, nave miyano kini kiwonihe ni miteko nroromelo naka.” (Tiyako 2:18) Yakopo aathariha wi naariki nikhaleno nroromelo, nnaphwanela opaka sincipale opwaha weemererya. Masololo anneemererya wi Muluku ookhala, nyenya awo haanono nroromelo mwa Yehova. Opwaha yeeyo, awo annamwiica. (Tiyako 2:19, 20) Mmukhalelo mukina, wakhala wi muchu ookhalano nroromelo, owo onahaala omuhakalaliha Muluku moorweela wa opaka miteko naari saweera saphaama. Ti yeeyo Aparahamu enreiye. Yakopo oorepa: “Tahi wa miteko, Abrahamu, nikholo nahu, eriweiye, awokolola anvelèlaka mwanawe Isàki ntoko mukutxho? Weyano onnona wi nroromelo ni miteko sinnalapelana nave ti mwa miteko nroromelo nnakhwanelaya.” Voocharela Yakopo aaceenyerya wi nroromelo nihirino miteko hinnaphara muteko, moorweela wa oloca: “Ntoko enereya wi mwili wahikhala ni munepa ti wokhwa, hihatho, nroromelo nahitxarihiwa ni miteko sa ikharari, nnakhala nokhwanene.”—Tiyako 2:21-23, 26.
9, 10. Enataphulela eheeni omuroromela Mwaana?
9 Iyaakha 30 ohoolo waya, Yohani aarepa muchaka awe ni ikaarata chaaru. Moolikana ni anamarepa akina a Piipiliya, Yohani aahiiwexexa yootaphulela ya nroromelo. Ikwaha sincipale mu soorepa sawe, Yohani aapharihela masu a Ekiriki yaawo wiiliwiili anataphuleliwa “nroromelo” mu Elomwe.
10 Ntoko yootakiherya, Yohani aathariha: “Ole onamwemererya [naari onamuroromela] mwana, òkhalano ekumi. Nto yowo onakhotxa omwiwelela mwana harwa ona ekumi, nave esara ya Muluku enamukhala mwa yowo.” (Yohani 3:36) Wi nooniherye nroromelo mwa Mwaana, nnaphwanela omwiiwelela Yesu. Mweeparipari, moorweela wa soorepa sa Yohani, ninnoona wi Yesu wiiliwiili aaloca wi naariki nikhaleno ekumi yoohimala, nnaphwanela omweemererya owo vamoha ni Tiithi awe.—Yohani 3:16; 6:29, 40; 11:25, 26; 14:1, 12.
11. Nni nooniherye hai wi ninnamuthamalela Yehova moorweela wa onisuweliha eparipari?
11 Yehova oopharihela munepa awe waweela wi anikhaviherye wiiwexexa eparipari vooloca sa yoowo ni Mwanawe ni onikhaviherya okhalano nroromelo mwa yaawo. (Mwaalakhanye Luka 10:21.) Nni nooniherye hai wi ninnamuthamalela Yehova wa ichu soothene opankeiye wa hiyo? Nihimaale omuthamalela nthowa na oneemererya okhalano onthamwene ni yoowo moorweela wa Yesu, yoowo ori “mpatxerya ni mwakhwaniha a nroromelo.” (Ahebri 12:2) Nave tho nnaphwanela otitelela olipiha nroromelo nahu moorweela wa ovekela wa Yehova mahiku oothene ni ohuserya Nsu nawe.—Éfeso 6:18; 1 Pedro 2:2.
12. Nroromelo nnahaala onikhaviherya opaka eheeni?
12 Nnaphwanela otitelela wooniherya wi nookhalano nroromelo noolipa mu soolaiherya sa Yehova moorweela wa saweera sahu. Ntoko yootakiherya, ninnatitelela olaleerya Omwene wa Muluku wa achu ni waakhaviherya awo okhala oomuchara a Yesu. Ninnatitelelatho ‘owerela saphama atxhu othene, ntosa yale ari asinnihu munroromeloni.’ (Galasya 6:10) Nave tho ninniilipiserya wi ‘nimurule mutxhu akhalai ni miteko sawe’ moorweela wa okhooca echu vyakala yaahaala onanariha onthamwene ahu ni Yehova.
NROROMELO MWA MULUKU NIKUPA NA MATHIPELO AHU
13. Apwanne “nroromelo na va Muluku” ti nookhweleya? Nave ntakhara heeni?
13 Piipiliya oriye: “Mutxhu ohirino weemererya hanawerya omusiveliha Muluku. Yole onamwatxamela Mululu onnaphwanela wemererya wi Muluku okhala, nave wi ti owo onavaha ntxhuwelo yale anamwasya.” (Ahebri 11:6) Piipiliya tho onnooniherya wi “nroromelo na va Muluku” eri echu yoopacerya yeeyo Akristu eeparipari anaphwanelaaya okhalano. Nno makupa a “mathipelo” ahu. (Ahebri 6:1, Nlakano Nahihano) Mwawaacererya ni weemererya, ninnachuna mikhalelo mikina sookhweleya wi nikhaleno onthamwene ni Yehova ni okhapelela wawe.—Mwaalakhanye 2 Pedro 1:5-7; Yuda 20, 21.
14, 15. Ntakhara heeni okhalano okhwela oryaaya woochuneya opwaha pahiru okhalano nroromelo?
14 Anamarepa a Piipiliya aaloca nroromelo ikwaha sincipale opwaha mukhalelo mukina. Apwanne enooniherya wi nroromelo mukhalelo wookhweleyasa nnaphwanelaahu okhalano?
15 Paulo oolikanyiha nroromelo ni okhwela. Owo oorepa: “Kinamwi kirino nroromelo nowakhwanela nootxukhulano miyako, miyo, kahikhalano okhwela, nkiri etxhu.” (1 Korinto 13:2) Yesu aaloca wi “nlamulo ntokotoko” ori omukhwela Muluku. (Mateu 22:35-40) Okhwela onnanikhaviherya okhalano mikhalelo mikina mincipale sinamuhakalaliha Muluku. Ntoko yootakiherya, Piipiliya olonce wi “okhwela onnaroromela sothene.” Mwawiihiiha, osivela onahaala onikhaviherya weemererya, naari okhalano nroromelo mu echu yoothene Muluku onanleeleiye orweela Mpiipiliyani.—1 Korinto 13:4, 7.
16, 17. Tiheeni Piipiliya onaloceiye sa nroromelo ni okhwela? Mukhalelo taani mwa seiya miili ori mutokotoko, nave ntakhara heeni?
16 Mikhalelo soomiili weemererya ni okhwela ti soochuneya, nave anamarepa a Piipiliya wiiliwiili yaaromola mikhalelo seiya vamoha. Paulo aahaaceenyerya annawe ‘owara eyakiho ya wemererya ni ya okhwela.’ (1 Tesalónika 5:8) Petro oorepa vooloca sa Yesu: “Yowo munamukhwelanyu, munamwi muhimonne ni munamwemereryanyu, nari muhimonne.” (1 Pedro 1:8) Yakopo aahaakoha annawe awoocihiwa: “Muluku hathanlile yale ari òhawa mwelaponi wi arelihe ni nroromelo ni yakhele omwene ororomelihiwe wa yale anamukhwela yowo?” (Tiyako 2:5) Yohani oorepa wi nlamulo na Muluku ti wi “nemererye mwa nsina na Mwana awe Yesu Kristu wi nikhwelaneke mukina ni mukhwawe.”—1 Yohani 3:23.
17 Paulo tho aarepa: “Vano sokhalavo itxhu txharu: weemererya, owehererya, ni okhwela. Nto mwa seiho etokotokosa ti okhwela.” (1 Korinto 13:13) Omwaahiyu, hinnahaala ochuna okhalano weemererya mu soolaiherya sa Muluku vooloca sa elapo awe evyaani woona wi sinii ineera saakhwanenle. Nnahaala okhalano ekumi yoohakalaliha hiiha ntoko Piipiliya onaloceiye. Nyenya elukuluku yoothene nnahaala ochunaka okhalano okhwela mwa Muluku ni achu. Mweevelevelo, waakhwela wahu onahaala otitelela wunnuwa okhala wookhala.
YEHOVA ONNAREELIHA NROROMELO NAHU
18, 19. Tiivi enakhala yookhumelela wa achu a Muluku okhalano nroromelo, nave taani onaphwanela ovuwihiwa?
18 Achu a Muluku mu ilukuluku sahu aakhalano nroromelo mu Omwene wa Muluku nave annakhaviherya. Nave awo annasivelana mukina ni mukhwaawe. Eyo eneereya nthowa nawi anneemererya munepa wa Muluku wi ohoolele okumi aya. (Galasya 5:22, 23) Ni sookhumelela taani? Anna ni arokora opwaha 8.000.000 orukurerya elapo aakhalano murecele ni wiiwanana mmilokoni mwaya. Chiryene, nroromelo ni okhwela mikhalelo sakuru.
19 Wiiwanana yoola oneereya pahiru nnikhaviheryo na Muluku ahu. Mwa yeeyo onnaphwanela ovuwihiwa. (Isaiya 55:13) Hiyaano ninnathamalela vancipale nthowa na weeriha okhala wooweryeya wi nivulusiwe “wa nthowa na nroromelo.” (Éfeso 2:8) Yehova onahaala otitelela waakhaviherya achu ancipale wi ekhaleno nroromelo mwa yoowo. Voocharela, elapo yoothene enahaala osareya ni achu oophaameya, eekhaikhai, ni oohakalala, yaawo anahaala omucicimihaka Yehova okhala wookhala!
[Yooleeliherya va epaaxina 23]
Ninnooniherya nroromelo mwa Mwaana moorweela wa omwiiwelela Yesu
[Ekaaxa va epaaxina 25]
MASU ATHARIHIWE
Wooniherya nroromelo mwa Muluku ni Mwanawe:
Othamalela ni weemererya soothene Yehova ni Yesu apankaaya wa hiyo ni omutakiherya Yesu mu yeeyo nnalocaahu ni nnapakaahu