Mulipihaneke “Nihiku ti Nnihiku”

“Mwarino masu olipihano nloko na atxhu, lotxani!”—SAWERIWA T’ARUMMWA 13:15.

MACIPO: 121, 45

MWAAHAALA WAAKHULA HAI?

Ntakhara heeni ti wookhweleya waalipiha akina?

Sootakiherya sa Yehova, Yesu ni murummwa Paulo sinanihusiha hai waalipiha akina?

Mmikhalelo taani nneeraahu naalipihe akina?

1, 2. Ntakhara heeni ti wookhweleya waalipiha akina?

KRISTINA yoowo orino iyaakha 18, ooloca: “Ti woovila asitiithi aka okilipiha, nyenya anamukisamela mahiku oothene. Nave masu aya annakiphoreiha vancipale. Awo analoca wi nkaakumve wiichwelavo, nkinaleeleya, nave kooneneva. Mwawiihiiha kinninla mahiku oothene nave kinnathanla ohaalociha. Kiniisoona ohikhala echweenevo.”^[1] (Moone masu avathi omakuchuwelo.) Chiryene okumi onnakhala woovila wakhala wi akina hananlipiha!

² Muupuwele mukhalelo nnaakhaviheryaahu akina vaavaa nnaalipihahu. Rupeni ooloca: “Kaaniisoona okhala oohiphwanelela mu iyaakha sincipale. Nyenya nihiku nimoha kaakhuma mmuteko woolaleerya ni mutokweene yoowo aasuwenle wi nihiku nle hinaakecenle phaama. Vaavaa kaamuleelaaka moonelo aka owo aakiwiriyana phaama. Voocharela aakuupuxerya ichu saphaama kaapakaaka. Aakuupuxerya tho masu a Yesu—wi muchu ti muchu a hiyo tookhweleya opwaha ipalame sawaaca. Mahiku oothene kaanuupuwelela yoorepa yeele, nave nlelo ennatannya murima aka. Masu a mutokweene yaatepa okilipiha.”—Mateu 10:31.

3. (a) Tiheeni murummwa Paulo olonceiye? (b) Tiheeni nnahaalaahu othokororya mmwaha yoola?

³ Piipiliya onnaloca wi ti wookhweleya olipihana moohihiyererya. Murummwa Paulo aahaarepela Akristu Ahebri ariki: “Asinna mwikosope ahikhale mutxhu ònanarasa murima ni òhemererya oni amurakamele Muluku mukumi. Nto mulakaneke [naari mulipihaneke] nihiku ti nihiku.” Paulo aathariha mathowa ene: “Wi ahikhale mwa nyuwo oni aturuwihe murima vokusiwa ti yotxheka.” (Ahebri 3:12, 13) Muupuwele mukhalelo munoonaanyu vaavaa munalipihiwaanyu. Vanonto, mathowa taani nryaahuno a waalipiha anna ni arokora ahu? Tiheeni nnahuseryaahu orweela wa mukhalelo Yehova, Yesu ni Paulo yaalipinhaaya akina? Nave mmikhalelo taani nnaphwanelaahu olipihana? Hankooni nthokororye makoho yaala.

OOTHENE AHU NINNACHUNA OLIPIHIWA

4. Taani onaphwanela olipihiwa? Ntakhara heeni achu ancipale olelo, hanaalipiha akina?

⁴ Oothene ahu ninnachuna olipihiwa. Nyenya xaxaxa asitiithi ti wookhweleya waalipiha anamwane aya. Muhusiha oniichaniwa Timoteo Evans otharinhe wi anamwane “annachuna olipihiwa ntoko mwiri onakhwela maahi.” Owo aahaaceererya: “Mwaana onniisoona okhala oophwanelela ni othamaleleya wakhala wi onnalipihiwa.” Nyenya woona wi nnakhala mu “mahiku òmaliherya,” achu ancipale ta nrima nave “òhikhwela.” (2 Timóteo 3:1-5) Asitiithi akina hanaalipiha anamwane aya nthowa nawi asitiithi aya tho hiyaalipiha. Achu awunnuwelavo tho annachuna olipihiwa, nyenya ela heneereya wiiliwiili. Ntoko yootakiherya, ancipale anniikhupanyerya elocaka wi hantonko othamaleliwa mwa yeeyo anapakaaya omutekoni.

5. Nni naalipihe hai akina?

⁵ Nnanwerya waalipiha akina moorweela wa waathamalela mwa yeeyo apankaaya phaama. Nnanwerya tho waaceenyerya moorweela wa waaleela wi vaya aakhalano mikhalelo saphaama ni waalipiha vaavaa anakhalaaya awoova ni ooceecheya. (1 Tesalónika 5:14) Nnaphwanela oloca echu enahaala waalipiha anna ni arokora ahu vaavaa nnakhalaahu ni yaawo. (Mwaalakhanye Eklesiyaste 4:9, 10.) Mwawiihiiha mwiikohe: ‘Apwanne kinnaaleela akina mathowa anakeeriha waacicimiha ni waasivela? Nave kinneerano wakhala wooweryeya?’ Muupuwele yeeyo Piipiliya onaloceiye: “Osuwelano wakhula, nihakalaliho; nsu n’eparipari t’exhu yoréra elukuluku yophwanelela.”—Masiposipo 15:23.

6. Ntakhara heeni Satana onnachuna waavololiha achu a Muluku? Mvahe yootakiherya mmukhalelo Satana eerenryeiye weerano hiiha.

⁶ Masiposipo 24:10 ani: “Onavolola mmakatxamihoni, onakhala awotxeya.” Satana oosuwela wi wakhala wi oonivololiha, onahaala wooceiha onthamwene ahu ni Yehova. Owo aaheererya omvololiha Yupu moorweela wa omuruuhela makacamiho. Nyenya yoolakelela ya Satana yaakuvya. Yupu aatitelela ororomeleya wa Yehova. (Yobi 2:3; 22:3; 27:5) Hiyaano tho nnanwerya owana ni Satana nroromelaka wi onahaala okuvya. Wakhala wi nootitelela waalipiha achu a veemusini vahu, anna ni arokora ahu mmulokoni, nnamukhaviheryana okhala oohakalala ni otitelela omwaacamela Yehova.

SOOTAKIHERYA NNAPHWANELAAHU OCHARIHA

7, 8. (a) Yehova onaalipiha hai achu? (b) Asitiithi eni echarihe hai yootakiherya ya Yehova? (Moone eruku yoopacerya.)

⁷ Yehova onnaalipiha achu. Namarepa a Salumu ooloca: “Apwiya [Yehova] ari vakhiviru va yale awiniwa murima, annavulusa atxhu awotxeya.” (Salumu 34:18) Vaavaa mulipa miririmu Yeremiya aareiye awoova ni awooceya, Yehova aamulaiherya omukhaviherya. (Yeremiya 1:6-10) Yehova aamurumiha munkeelo wi amulipihe mulipa miririmu Taniyeli. Munkeelo aamwiichana Taniyeli ntoko muchu ‘okhweleya.’ (Daniyeli 10:8, 11, 18, 19) Mano, mwanwerya waalipiha anna ni arokora anyu mmukhalelo woolikana, ophitaanyerya mapiyoneero ni awunnuwelavo yaawo ahinawerya opaka ichu ntoko yaapakelaaya khalai?

⁸ Naamwi Yehova ni Yesu yaakhanle vamoha mu iyaakha sincipale, Yehova aanasuwela wi nlelo waari woochuneya omulipiha Mwanawe vaavaa Yesu aareiye veelaponi yavathi. Yesu aahaawiriyana Atiithi awe elocaka orweela wirimu, vaavaa aapacenryeiye muteko awe wa olaleerya ni variyari va eyaakha awe yookuchula veelaponi yavathi. Mu ikwaha piili, Yehova aaloca: “Ola ti Mwanaka òkhweleyasa, kinaphwanyakamo ohakalala.” (Mateu 3:17; 17:5) Chiri Yesu aalipiheya vancipale vaavaa aawiriyanneiye Atiithi awe elocaka wi yaanamusivela nave yaanahakalala. Ohoolo waya, mu ohiyu Yesu ahaakumve okhwa, owo aatepa wiiniwa murima. Yehova aamulipiha moorweela wa omurumiha munkeelo wi amvahe ikuru ni ommaaliha. (Luka 22:43) Asitiithi, nyuwaano munanwerya ochariha yootakiherya ya Yehova, moorweela wa waalipiha anamwane anyu moohihiyererya. Mwaathamalele vaavaa anapakaaya echu yaphaama. Nave vaavaa anakumanaayano makacamiho osikola, mpake soothene munaweryaanyu wi mwaalipihe ni waakhaviherya ovilela.

9. Tiheeni nnahuseryaahu orweela wa mukhalelo Yesu aakhalinheiye arummwa awe?

⁹ Yesu tho oonihiyerya yootakiherya yaphaama wi ncharihe. Mu ohiyu ahaakumve okhwa, Yesu aarapiha inaani sa arummwa awe nave aahaahusiha ochuneya waya okhala awiiyeviha. Nyenya, yaanavaanyihana nave yaanaakhulana vooloca sa taani ari mutokweene, nave Petro aalipela wi hi amuhiye Yesu. (Luka 22:24, 33, 34) Yesu haaweiwe ni soohesa saya. Moohiyana, aahaathamalela okhala oororomeleya wa yene. Aahaalaiherya wi yaahaala opaka ichu itokotoko opwaha seiye aapankeiye, nave aahaaroromeliha wi Yehova aanaasivela. (Luka 22:28; Yohani 14:12; 16:27) Nnaphwanela wiikoha: ‘Kinnachariha yootakiherya ya Yesu, nave kinnaathamalela akina ntakhara mikhalelo saya saphaama ohiya okhala ooweiwa ni soohesa saya?’

10, 11. Paulo aalipinhe hai asinnawe, nave tiheeni ilipixenryeiye opaka?

¹⁰ Murummwa Paulo wiiliwiili aanaloca ichu saphaama sa annawe. Owo aanamaliha elukuluku yincipale apakaka mikwaha ni akina a yaawo nave aahaasuwela phaama, nyenya harempe soohesa saya. Opwaha yeeyo, aanahakalala ni yaawo. Ntoko yootakiherya, Paulo aaloca wi Timoteo aari ‘mwanawe òkhweleya ni òroromeleya’ mwa Apwiya, nave aari oolekecheya wi Timoteo aahaala othokororya soothowa sa akina. (1 Korinto 4:17; Filipi 2:19, 20) Paulo aaloca ni Akristu o Korinto wi Tito aari “mukhwakhwa ni mukhaviherya aka veri vanyu.” (2 Korinto 8:23) Mweeparipari, Timoteo ni Tito yaari oolipiheya vaavaa yoonnaaya mukhalelo Paulo aathamaleleiye!

¹¹ Paulo ni nthamwene awe Parnapa yaahela vawoopiha ikumi saya wi yaalipihe anna aya. Ntoko yootakiherya, oopiili yaasuwela wi achu ancipale mu epooma ya o Listra yaachuna owiipha. Nlelo, yaakookelawo wi yaalipihe oohuserya avyaani ni waakhaviherya okhala oororomeleya wa Yehova. (Saweriwa T’arummwa 14:19-22) Ohoolo waya, o Efeso, Paulo aari va yawoopiha nthowa na muloko waanyenyen’ye, nyenya aakhala weiwo elukuluku yoophwanelela wi aalipihe asinnawe. Saweriwa T’arummwa 20:1, 2 onnaloca: “Paulo àruma witxhaniwa amuhuserya, wi avahe miruku. Oholo waya àhalanya ni apwaha ayaka o Masedòniya. Àhetxelela mapuro yawo, àlipihaka asinna ni masu awe. Vomaliherya àphiya o Gresiya.”

MULIPIHANEKE

12. Ntakhara heeni ti wookhweleya wa hiyo oya mmithukumano?

¹² Yehova onachuna wi nikhale phaama. Ti nthowa nene onanleeleiye ohicompela mithukumano. Mmithukumano sahu, ninnahuserya sa yoowo ni olipihana. (1 Korinto 14:31; mwaalakhanye Ahebri 10:24, 25.) Kristina, oromoliwe woopaceryani wa mwaha yoola, ooloca: “Echu enakisivela mmithukumano, osivela ni nlipiho kinaakhelaaka mwemmo. Ikwaha ikina kinnaphiya mu Empa ya Omwene kiri ooceecheya. Nyenya moohilekela murokora onnakaacamela ni okikhupaarela, ni oloca wi koophwaneliwa. Awo annakileela wi annasiveliwa ni miyaano nave annahakalala woona oyawaka vahoolo omunepani. Nlipiho naya ninnakikhaliha phaama!” Chiryene, ti wookhweleya muchu ti muchu a hiyo waalipiha akina!—Aroma 1:11, 12.

13. Naamwi yaale anamurumeela Yehova mu iyaakha sincipale ntakhara heeni annachuna olipihiwa?

¹³ Ophiyerya tho yaale anamurumeela Yehova mu iyaakha sincipale annachuna olipihiwa. Nkamuupuweleni Yosuwa. Vaavaa Aisarayeli yaayaaya ovolowa mu Elapo ya Nlakano, Yehova aamuthanla Yosuwa wi aahooleleke. Mwa yeeyo, Yehova aamuleela Mose wi amulipihe naamwi Yosuwa aamurumeela Yehova mu iyaakha sincipale. Yehova aaloca: “Omuhusihe Yosuwa, omulèle wi akhale òlipa ni awumiha murima: owo onamukhala mutokwene a nloko nla, nave onamuholela nloko nenlo n’yaka okusa elapo onerawe wone.” (Malamulo 3:27, 28) Yosuwa aanachuna olipihiwa, nthowa nawi ohoolo waya aahaala owana ikhoco, ophiyerya tho ovoothiwa. (Yosuwa 7:1-9) Olelo, nnaphwanela waalipiha atokweene ni ooweherya a ekulucu, yaawo analapa mwakuru wi yaakhapelele achu a Muluku. (Mwaalakhanye 1 Tesalónika 5:12, 13.) Ooweherya mmoha a ekulucu ooloca: “Ikwaha ikina anna annarepa ikaarata ethamalelaka mukhalelo yaaphunraaya oxekurya wahu. Ninnakhapelela ikaarata iha ni waalakhanya vaavaa nnakhalaahu ooceecheya. Awo chiryene anakhala ehime ya nlipiho.”

14. Sootakiherya taani sinooniherya okhweleya waya waathamalela akina vaavaa nnaavahaahu ekano?

¹⁴ Mu ekwaha emoha, murummwa Paulo aahaavaha ekano Akristu o Korinto. Vaavaa yaapharihenlaaya muteko ekano eyo, Paulo aahaathamalela. (2 Korinto 7:8-11) Mweevelevelo, masu awe yaahaalipiha otitelela opaka ichu soophwanelela. Olelo, atokweene ni asitiithi ananwerya ochara yootakiherya ya Paulo. Antreya, yoowo orino anamwane apiili, ooloca: “Nlipiho ninnaakhaviherya anamwane wunnuwa omunepani ni mmuupuweloni. Weerano hiiha munnaakhaviherya anamwane mwawaakhwanela. Naamwi anamwane ahu esuwenle yeeyo eri yoophwanelela, wi epake echu yoophwanelela okhala mukhalelo aya wa okumi, onahaala oweryeya moorweela wa waalipiha moohihiyererya.”

TIHEENI ENAHAALA WOOKHAVIHERYAANI WAALIPIHA AKINA?

15. Tuuvi ori mukhalelo mmoha wa waalipiha akina?

¹⁵ Mwaaleele anninyu wi munnavaha esisapo wiilipiserya waya ni mikhalelo saya saphaama. (2 Matharihelo 16:9; Yobi 1:8) Wakhala wi noheerano yeela, nnamutakiherya Yehova ni Yesu. Awo annacicimiha soothene nnaweerelaahu, naamwi nihiweryaka opaka sincipale ntoko nachunelaahu. (Mwaalakhanye Luka 21:1-4; 2 Korinto 8:12.) Ntoko yootakiherya, noosuwela wi onakhala wiilipiserya anna awuuluvala ophiya wiiliwiili mmithukumano ni mmuteko woolaleerya. Apwanne ninnaalipiha ni waathamalela mwa soothene anapakaaya?

16. Elukuluku taani nnaphwanelaahu waalipiha akina?

¹⁶ Mwakhalano ekari ya waalipiha akina, mweereno. Wakhala wi moomoona muchu opanke echu yaphaama, khwoo, mmuthamalele! Vaavaa Paulo ni Parnapa yaaryaaya o Antiyokeya o Pisitiya, asitokweene musinakooka yaaloca: “Asinna, mwarino masu a olipihano nloko na atxhu, lotxhani!” Paulo aapharihela ekari yeele wi aalipihe achu. (Saweriwa T’arummwa 13:13-16, 42-44) Vaavaa nnaalipihahu akina, awo tho anahaala onilipiha.—Luka 6:38.

17. Tuuvi ori mukhalelo waphaama wa waathamalela akina?

¹⁷ Mukhale ooluluwanya. Vaavaa Yesu aathamalenleiye Akristu o Tiyatira, owo aari ooluluwanya nave aloca wi yaanapaka ichu saphaama. (Mwaalakhanye Wupulula 2:18, 19.) Nni nimutakiherye hai? Akhweya naahaala omuthamalela mai onaaphuwa anamwane mukhateiye. Naari wakhala wi mwa tiithi naari mai, munaphwanela waathamalela anamwane anyu wiilipiherya waya omurumeela Yehova. Mwaatharihele ichu saphaama anapakaaya. Nakhala ooluluwanya vaavaa nnaathamalelaahu akina, awo anahaala osuwela wi nnathamalela ni murima woothene.

18, 19. Nni nikhaviheryane hai wi ntitelele omwaacamela Yehova?

¹⁸ Yehova aamuleela Mose wi amuceenyerye ni omulipiha Yosuwa. Olelo, Yehova hanaloca ni hiyo wi nimulipihe muchu ammoori. Nyenya owo onnahakalala vaavaa onooneiye owetha wahu waalipiha akina. (Masiposipo 19:17; Ahebri 12:12) Ntoko yootakiherya, vaavaa munna onaloceiye mwaha wa vanlakani mmulokoni, nnaphwanela omuleela tiheeni enisivenle va mwaha awe. Akhweya yeeyo olonceiye yoonikhaviherya ovootha nikacamiho naari nohiiwexexa phaama yoorepa yammoori. Murokora mmoha aamurepela munna yoowo aalonce mwaha va muthukumano ariki: “Naamwi naachekunle mu elukuluku vakhaani, nyuwaano mwaahoona murimaaka woolimela, mwaakihakararya nave mwaakilipiha. Kinachuna musuwele wi vaavaa mwaaloncaanyu mmukhalelo yoole, otripuna ni ochekula wahu, konne wi eyo yaari yamahala ya Yehova.”

¹⁹ Nnanwerya waakhaviherya akina otitelela omwaacamela Yehova wakhala wi noochariha ekano ya Paulo: “Tiva, muhakalalihaneke ni mukhaviheryaneke ntoko mwenranyu ophiyerya olelo.” (1 Tesalónika 5:11) Wakhala wi ninnatitelela olipihana “nihiku ti nihiku,” nnahaala omuhakalaliha Yehova!

[Masu a vathi]

[Yooleeliherya va epaaxina 4]

Mwaathamalele akina mwa yeeyo apankaaya phaama

[Yooleeliherya va epaaxina 5]

Asitiithi, mwaakhaviherye anamwane anyu ovilela makacamiho osikola

[Ekaaxa va epaaxina 8]

MASU ATHARIHIWE

Waalipiha akina: Waakhaviherya akina okhala phaama. Moorweela wa yeeyo nnalocaahu ni nnapakaahu, ninnaakhaviherya otitelela opaka yeeyo eri yaphaama ni otitelela omurumeela Yehova. Ninnaweeriha akina osuwela wi ninnaasivela nave wi tasisapo wa hiyo, wa muloko, wa Yehova ni Yesu