Muni Mweerihe Hai Yoohuserya Anyu ya Piipiliya Okhala Yamphurelo ni Yoopuheya?

Yosuwa onaalakhanya Nlamulo; Isiri sa o Yeriko sinnakurumuwa nave empa ya Rahapi henakurumuwa; Yosuwa onnacukhulela mata awe osulu avekelaka

YOSUWA aahikhalano murici wa ohoolela nloko na Isarayeli ovolowa mu Elapo ya Nlakano. Eyo yaaya okhala echu yoovilaxa. Nyenya, Yehova aahimuceenyerya nave aahimulipiha moorweela wa oloca: “Olipe ni wumihe murima.” Yehova aahimuleela Yosuwa wi wakhala wi onnaalakhanya ni wiiwelela Nlamulo, voocharela aahaala opaka soolakelela mwa miruku nave aahaala okhumelela phaama.—Yosuwa 1:7, 8.

Woona wi nnakhala mu “ilukuluku sokatxamiha,” okumi ahu tho onamukhala woovila. (2 Timóteo 3:1) Wakhala wi ninnachuna okhala ntoko Yosuwa, nnaphwanela ochariha ekano Yehova aamvanheiye. Nnaphwanela omwaalakhanya Piipiliya moohihiyererya ni opharihela muteko yeeyo nnahuseryaahu wi nipake soolakelela mwa miruku.

Nyenya akina a hiyo akhweya hannasuwela mukhalelo wa ohuserya, naari hannapuha ohuserya. Nyenya, yoohuserya ya Piipiliya ya muchu mukhateiye ti yookhweleyaxa. Elukuluku munuuluulelaanyu ekaaxa “Mweererye Sooleeliherya Iha”, munahaala ophwanya mikhalelo sinahaala wookhaviheryaani okumiha mphurelo yoohuserya anyu ni opuha moopwahaxa.

Mulipa a masalumu aahiipa: “Muketxiheke mphironi mwa ikano sanyu, ntakhara sinnakisivela.” (Salumu 119:35) Nyuwotho munanwerya opuha ohuserya Masu a Muluku. Munahaala osuwela mahusiheryo mancipale aphaama vaavaa munatitelelaanyu omuhuserya Piipiliya.

Naamwi nyuwaano muhirino murici wa ohoolela nloko hiiha ntoko Yosuwa enreiye, nyuwo mookhalano makacamiho anyu. Mwawiihiiha, ntoko Yosuwa, muhuserye nave mwiiwelele Masu a Muluku. Wakhala wi moheerano hiiha, munahaala opaka soolakelela mwa miruku nave munahaala okhumelela phaama.

MWEERERYE SOOLEELIHERYA IHA

Mvekele muhaakumve ohuserya. Piipiliya orino muupuwelo wa Yehova, nave owo woorempwa ntakhara mphurelo anyu. Mwawiihiiha vaavaa munamuhuseryaanyu Piipiliya, mumveke Yehova wi ookhaviheryeeni wiiwexexa, wuupuwelela ni opharihela muteko yeeyo munaalakhanyaanyu, wi mpake soolakelela mwa miruku mu okumi anyu.—Esdra 7:10.
Mwiipakele makoho vaavaa munamwaalakhanyaanyu Piipiliya naari soolaleeryiwa sinathipeleya mu Piipiliya. Ntoko yootakiherya: ‘Ela enakileela eheeni vooloca sa Yehova? Eniiwanana hai ni muchaka wa Piipiliya? Kinahaala opharihela hai makupa yaala wi kaakhaviherye akina?’
Muupuwelele yeeyo munahuseryaanyu. Mmaale vakhaani, nave muupuwelele vooloca sa yeeyo mmanlaanyu waalakhanya. Mwiikohe: ‘Ela enakivolowela hai? Ntakhara heeni ennakivolowela mmukhalelo yoola? Eniiwanana hai ni yeele yeeren’ye ni miyaano khalai, tiheeni eneereya ni miyaano hiihaano, naari eni yeereye ni miyo omwaahiyu? Kini kipharihele hai nlakiheryo nenla na Piipiliya naari ekano yeela mu okumi aka?’ (Yobi 23:5; Salumu 49:4) Elukuluku munuupuwelelaanyu, moone waakhanle wi munanwerya othariha ntakhara heeni Yehova onnaaleela achu awe osepa meerelo makina. Naari muupuwele vooloca sa sookhumelela taani saahaala weereya vooloca sa muchu yoowo mmanlaanyu waalakhanya yaweereya awe waakhanle wi oopaka ichu mmukhalelo woohiyana.—Malamulo 32:28, 29.
Mpharihele waanyiherya wanyu elukuluku munaalakhanyaanyu. Ntoko yootakiherya, apwanne munnawerya waanyiherya echu vaavaa asinnawe Yosefe yaamukulinhaaya wa a Isimayeli? (Maphatxuwelo 37:18-28) Tiheeni munoonaanyu, muniiwaanyu, nave eninkhela? Mwiihele mu nipuro na achu yaawo. Tuuvi ori muupuwelo ni moonelo aya? Vaavaa munapharihelaanyu waanyiherya, yoohuseraanyu enahaala okumiherya mphurelo.
Mpharihele ikaruma sa ohuseryano seiyo marehereryo anavahereryaaya. Iho inamookhaviheryaani wi mpake otholathola woohakalaliha. Muhuserye mukhalelo wa opharihela ikaruma inaphwanyeya mu elocelo anyu, mu interneti ni sawimprimiriwa. Muhoovelele waakoha akina wi yookhaviheryeeni mukhalelo wa opharihela mmukhalelo woophwanelela. Ntoko yootakiherya, Índice das Publicações da Torre de Vigia naari Guia de Pesquisa para Testemunhas de Jeová onahaala wookhaviheryaani ophwanya yeeyo erempwe mmiyaha vyakala nave onnathariha iciciri sincipale sa Piipiliya. Mmupharihele apêndice a Tradução do Novo Mundo wakhala wi onnaphwanyeya mu elocelo munaalakhanyaanyu. Iho sookhalano miselo soophara muteko vooloca sa mapuro, miyaha sa khalai, olimela ni miphimo, ni ichu ikina.
Mukwasu wa miyaha sookhweleya. Ela enahaala wookhaviheryaani wuupuwelela yeeyo mmanlaanyu ohuserya. Echu yookhweleyaxa, mwaaleele akina vooloca sa yeeyo muhusenryaanyu. Apwanne yookhalavo echu munahaalaanyu opharihela mmuteko woolaleerya? Mu weerano ichu seiya, munahaala wuupuwelela miyaha sookhweleya, nave akina anahaala okumihavo mphurelo yoohuserya anyu.