Liivuru Anaawiili a Matharihelo
1 Solomoni mwaana a Tavite aamvira akhalaka oowerya mu olamulelo awe, nave Yehova Muluku awe ari ni yoowo nave aanamwinnuwiha mmukhalelo wootikhiniha.
2 Solomoni aahinwopa Isarayeli oothene, ahooleli a makhuuru ncikhwi ni ahooleli a makhuuru nsana, athoriha, asitokweene oothene a Isarayeli oothene, ni ahooleli a imusi sa makholo. 3 Voocharela, Solomoni ni muloko woothene waaya nipuro noocukhuwa o Kipiyoni, woona wi ti weiwo waariwo muxakala wa muthukumano wa Muluku eeparipari, muxakala yoowo Mose mulapeli a Yehova aapankeiye mutakhwani. 4 Mwawiihiiha, Tavite aahimukuxawo Arka a Muluku eeparipari o Kiriyati-xeyarimi amukerihaka nipuro nenlo aareherenryeiye ntakhara yoowo; owo aaheemesa muxakala ntakhara Arka o Yerusalemu. 5 Nave altare a muchove yoowo Pesaleli aampankeiye, mwaana a Uri, mwaana a Huri, aahikuhiwa vakhiviru va tapernaakulu a Yehova; nave Solomoni ni muloko waanavekela vakhiviru vawe.* 6 Vanonto, Solomoni aapaka sooveleela vamiithoni va Yehova, nave owo aavaha sooveleela soopahiwa ncikhwi nimoha va altare a muchove mmuxakala wa muthukumano.
7 Mu ohiyu ene yoowo, Muluku aamphiyerya Solomoni nave aloca ariki: “Okiveke yeeyo waahaalaawe osiveliwa wi koovahe.” 8 Mwawiihiiha, Solomoni aaloca wa Muluku ariki: “Nyuwaano mohooniherya osivela otokweene woororomeleya wa apapa aka Tavite, nave mookipaka okhala mwene mu nipuro naya. 9 Vano, Yehova Muluku, mooniherye okhala yoororomeleya yoororomeliha anyu wa Tavite apapa aka, woona wi mookipaka okhala mwene a achu awaaca ntoko nchupi na vachayani. 10 Vano, mukivahe miruku ni masuwelelo wi kaahooleleke achu* yaala. Taani onahaala owerya waathoriha achu anyu yaala ahiya waaca?”
11 Muluku aamwaakhula Solomoni: “Woona wi ela yookhwela ya murimaa nave weyaano hovenke muhakhu, sookhalano, ni ovuwa naari okhwa* wa yaale anawiica, naari hovenke okumi wawaaca,* nyenya ovenke miruku ni masuwelelo wi waathoriheke achu aka wa yaawo koopankaaka wi okhale mwene, 12 kinahaala woovaha miruku ni masuwelelo; nave tho kinahaala woovaha muhakhu, sookhalano ni ovuwa seiho ahintonko okhalano mwene ohaakumve weyo nave ohinahaala okhalano mwene ohoolo waa.”
13 Mwawiihiiha, Solomoni aakookawo o nipuro noocukhuwa na o Kipiyoni, o muxakala wa muthukumano, ayaaka o Yerusalemu; nave owo aanamulamulela Isarayeli. 14 Solomoni aahithukumanya ikaaro sakhoco ni akavalo;* owo aahikhalano ikaaro sakhoco ncikhwi nimoha ni masana maxexe* ni akavalo* macikhwi khumi napiili,* nave owo aanakuha mu ipooma sa ikaaro sakhoco ni waacamela wa mwene o Yerusalemu. 15 Mwene aakhalano eparata ni ooru awaaca o Yerusalemu anakhala ntoko maluku, ni ithaapwa sawaaca ntoko miri sa sikoomoro so Sefela. 16 Akavalo a Solomoni yaaruuhiwa o Yikuputu. Alipa a maroca a mwene yaanaathuma akavalo awaaca* ni epereesu yaatikitheryiwe. 17 Ekaaro ti ekaaro yakhoco yaaruuhiwa o Yikuputu yaathummwa ipeesa masana mathanu nammoha sa eparata, nave kavalo mmoha aathummwa nsana nimoha ni makhumi mathanu a eparata. Nave awo yaanaaruuha ntakhara mamwene oothene a Aheeti ni a Asiriya.