Liivuru Anaawiili a Matharihelo

28 Akasi aarino iyaakha makhumi meeli vaavaa aakhanleiye mwene, nave aalamulela o Yerusalemu mu iyaakha khumi nathanu nammoha. Owo henreno yeeyo yaari yawookololowa vamiithoni va Yehova, hiiha ntoko Tavite nikholo nawe, eenreiyeno. 2 Ohiya yeeyo, owo aacharinhe mamwene o Isarayeli nave aaphiyerya opaka iruku sa emetaale* sa Pala. 3 Aavaha tho mikucho ompopa wa mwaana a Hinomi* nave aahaasuka anamwane awe ni mooro, acharihaka meerelo oothanyeya a maloko yaawo Yehova iikanreiye vamiithoni va Aisarayeli. 4 Ohiya yeeyoru, aanavaha mikucho ni ochuwiha mwiixi wa mikucho mmapuro oocukhuwa, mmiyaako mikhaani ni vathi va miri soothene soovatha.

5 Mwa yeeyo Yehova, Muluku awe, aamveleela mmatani mwa mwene o Siriya, ophiyerya wi avoothiwa nave ekusiwa achu ancipale ekerihiwaka wookapuroni o Tamasku. Nave tho owo aaveleeliwa mmatani mwa mwene o Isarayeli, yoowo eerinhe wi yiiphiwe achu ancipale. 6 Nihiku nimoha pahi, Peka, mwaana a Remaliya, aawiipha alopwana oothene oowerya ncikhwi nsana nimoha ni makhumi meeli* o Yuta, woona wi awo yaamunyanyala Yehova, Muluku a makholo aya. 7 Nave Sikiri, mukhoco o Efraimu, aamwiipha Maseya, mwaana a mwene Asirikami, yoowo aari muhooleli a empa yoomwene* ni Elikana, yoowo aari mu nipuro nanaawiili na mwene. 8 Ohiya yeeyoru, Aisarayeli yaahaakusawo asinnaya alipa oophariwa macikhwi masana meeli,* athiyana, anamwane aasilopwana ni anamwane aasithiyana; awo tho yaakusa ichu sincipale, ekeriha o Yerusalemu.

9 Nto mulipa a miririmu awiichaniwa Oteti aari weiwo. Owo aakhuma aya akumana ni anakhoco yaawo yaarwa o Samariya nave alocano ariki: “Yehova, Muluku a makholo anyu, aahinyeenyeya ni Yuta; ti nthowa nene ooveleenleiyeni mmatani mwaya. Nto nyuwo moowiipha ni onyeenyeya woothene yoowo ophin’ye wirimu. 10 Vano nyuwo munachuna oweera achu o Yuta ni o Yerusalemu okhala akapuro anyu aasilopwana ni aasithiyana. Nyenya apwanne nyuwaano tho himwaano nthowa vamiithoni va Yehova, Muluku anyu? 11 Vano mukiwiriyane nave mwaakookihe alipa oophariwa yaawo mwaakunsaanyu mwa asinninyu, ntakhara esara yoovarela ya Yehova eri mwa nyuwo.

12 Voocharela, ahooleli akina o Efraimu, Asariya, mwaana a Yehowana, Perekiya, mwaana a Misilimoti, Seskiya, mwaana a Salumi, ni Amasa mwaana a Hatelai, yaahikumana ni yaale yaarwa weekhoconi, 13 yaaleela eriki: “Muhaaruuhe wenno alipa ophariwa, woona wi eyo enamuniruuhela mathowa vamiithoni va Yehova. Nthowa nahu nri ntokweene, nave yookhalavo esara ntakhara Isarayeli, nyenya yeeyo munachunaanyu weera, enahaala waaceererya soocheka sahu ni nthowa nahu.” 14 Mwawiihiiha, anakhoco ooreheryeya yaahaaveleela alipa oophariwa ni ichu wa asitokweene ni wa muloko woothene. 15 Voocharela, alopwana yaawo yaathanliwe moorweela wa masina yaahaakuxa alipa oophariwa nave yaavaha soowara ni ichu, oothene yaawo yaari epwitikiri ene. Awo yaahaawariha nave yaavaha asantaalya, soolya, soowurya ni makhurwa ntakhara mwiili aya. Ohiya yeeyoru, yaawo yaari ooceecheya yaahaateexa mu apuuru nave yaahaakeriha wa asinnaya o Yeriko, mu epooma ya mayale. Ohoolo waya yaakookela o Samariya.

16 Mu elukuluku yeele, mwene Akasi aaveka nikhaviheryo wa mamwene o Siriya. 17 Nave a Etomi yaavolowa wanaawiili ni omuhiphela Yuta, yaakuxa achu yaakerihaka wookapuroni. 18 Afilisti tho yaahiphela ipooma so Sefela ni so Nekepi o Yuta nave yaamukuxa Pete-semi, Aiyaloni, Keteroti, Soko vamoha ni miceche saya soorukurerya, Timina vamoha ni miceche saya soorukurerya, ni Kinso vamoha ni miceche saya soorukurerya; nave awo yaamaka weiwo. 19 Yehova aamuuliha muru Yuta wa nthowa na Akasi, mwene o Isarayeli, woona wi haamvareryela Yuta, yeeyo yaaweerinhe achu ohikhala oororomeleya wa Yehova.

20 Tilkati-pilneseri, mwene o Asiriya, ohiya wiimmukhaviherya, aarimmurukunuwela yoowo nave amuruuhela makacamiho. 21 Akasi aakuxa ichu sa mu empa ya Yehova, sa mu empa* ya mwene ni sa mu ipa sa ahooleli nave aveleela wa mwene o Asiriya ntoko yamahala, nto eyo hiyaamukhavihenrye. 22 Nave variyari va makacamiho awe, mwene Akasi aapwahererya weera ichu moohiroromeleya wa Yehova. 23 Aapacerya ovaha mikucho wa amiluku o Tamasku yaawo yaamvonthe; nave aaloca ariki: “Woona wi amiluku a mamwene o Asiriya annaakhaviherya yaawo, kinahaala waavaha mikucho wi ekikhaviherye.” Nto awo yaamweeriha owo ni Isarayeli oothene okwaculeya. 24 Ohiya yeeyoru, Akasi aathukumanya ikaruma sa mu empa ya Muluku eeparipari nave akakachela. Ohoolo waya, aawala milako sa empa ya Yehova nave iipakela a altare mu ikwantu so Yerusalemu. 25 Mu ipooma soothene so Yuta, aapakamo mapuro oocukhuwa wi avahekemo mikucho ntakhara amiluku akina, nave aamunyeenyeiha Yehova, Muluku a makholo awe.

26 Saweereya sawe ikina, saweera sawe soothene, ovinyerya woopaceryani ophiyerya wookuchulani, irempwe mu liivuru a mamwene o Yuta ni o Isarayeli. 27 Vookuchula, Akasi aahiichuuwa ni makholo awe, nave emvitha mu epooma ya o Yerusalemu. Nto hiyaamukerinhe o mahiye a mamwene o Isarayeli. Nave Esekiya, mwanawe, aakhala mwene mu nipuro nawe.