Liivuru Anaawiili a Matharihelo
33 Manase aarino iyaakha khumi napiili vaavaa aakhanleiye mwene, nave aahilamulela iyaakha makhumi mathanu nathanu o Yerusalemu.
2 Owo aaheera yeeyo yaari yoonanara vamiithoni va Yehova, acharihaka meerelo oothanyeya a maloko yaawo Yehova iikanreiye vamiithoni va nloko na Isarayeli. 3 Owo aahuuluula oteka mapuro oocukhuwa yaawo Esekiya, apapaawe, yaamwanryaaya, aahaateka a altare a Pala, nave aapaka apoco aweeliheya;* owo aanakokhorela ichu soothene sa wirimu* nave analapela. 4 Aahaateka tho a altare mu empa ya Yehova wa yeeyo Yehova aalonceiye ariki: “Nsina naka nnahaala okhala o Yerusalemu okhala wookhala.” 5 Ohiya yeeyoru, aahaateka a altare ntakhara ichu soothene sa wirimu* mmayate a empa ya Yehova. 6 Owo aahaasuka anamwane a wene vaikho* o mpopa wa mwaana a Hinomi, aahiisaaciherya, aaneeherya ehako ni okhwiri, nave aahaathanla alipa a weeherya ihako ni achu anakoherya minepa. Owo aaheerano ichu sincipale saari soonanara vamiithoni va Yehova, wi amunyeenyeihe.
7 Owo aahipaka eruku yoopachiwa nave avoliiha mu empa ya Muluku eeparipari, wa yeeyo Muluku aamuleenleiye Tavite ni Solomoni, mwanawe: “Mu empa yeela ni o Yerusalemu yeeyo kithanlilaaka mpuwa mwa maloko a Isarayeli, kinamukuhamo nsina naka okhala wookhala. 8 Nave nkirwa kuuluula oviihavo inaani sa Isarayeli mu elapo yeeyo kaaroromelinhaaka makholo aya, yaaniiwelela mweephoole soothene kaalamulenlaaka, Nlamulo noothene, mahusiheryo ni mathoriheryo yaavahiwe moorweela wa Mose.” 9 Manase aahititelela omuhuweliha Yuta ni achu o Yerusalemu, aweerihaka yaawo opaka ichu moopwahererya opwaha maloko yaawo Yehova aatolonxeiye vamiithoni va Aisarayeli.
10 Yehova aanaloca wa Manase ni wa nloko nawe, nto awo hiyaampwacha. 11 Mwawiihiiha, Yehova aamuruuhela ahooleli a anakhoco a mwene a wa Asiriya. Yaamphara Manase emukowelela anancoolo, ni ikurenti piili sa muchove nave emukeriha o Papulu. 12 Mu wuukhuwa wawe, owo aahivekela ni murima woothene wa Yehova, Muluku awe nave aahiiyeviha vancipale vamiithoni va Yehova Muluku a makholo awe. 13 Manase aahititelela ovekela wa Yoowo, nave Owo aahitannyeya murima ni mavekelo awe a vathi va murima nave aahiwiriyana yooveka awe ya omoreliwa ikharari, nave Owo aahimukookiherya o Yerusalemu mu omwene awe. Voocharela, Manase aahisuwela wi Yehova, ti Muluku eeparipari.
14 Emanle weereya yeela, owo aahiteka ixiri vaate wa epooma ya Tavite, makupa onakhuma nsuwa o Kihomi, opopani.* Aahiteka arakamiha ophiyerya o mulako wa ihopa. Owo aahititelela oteka ixiri arukureryihaka epooma ophiyerya o Ofeli nave ixiri saatepa orakamela osulu. Ohiya yeeyoru, mu ipooma soothene soolipihiwa so Yuta, owo aahaathanlamo ahooleli a anakhoco. 15 Ohoolo waya, aahaaviihamo mu empa ya Yehova amuluku atheru ni eruku yoophwaniherya hiiha ntoko a altare oothene aatenkeiye o mwaako wa empa ya Yehova ni o Yerusalemu, nave owo aahaarihela okhwipi wa epooma. 16 Aahimurehererya tho altare a Yehova nave apacerya ovahavo mikucho sawaataana ni mikucho sa othamalela, nave aahaaleela Ayuta wi emurumeeleke Yehova, Muluku a Isarayeli. 17 Nyenya, achu nlelo yaanavaha mikucho mmapuro oocukhuwa, naamwi yeerano yeeyo pahiru wa Yehova, Muluku aya.
18 Saweereya ikina sa Manase, nivekelo aapankeiye wa Muluku awe ni masu a mulipa awoona yoowo aalonce mu nsina na Yehova, Muluku a Isarayeli, soorempwa mu yaweereya ya mamwene a Isarayeli. 19 Nivekelo nawe ni mukhalelo nivekelo nawe na vathi va murima naakhuliwaaya soocheka sawe soothene, ohiroromeleya wawe, weiwo aatenkeiyewo mapuro oocukhuwa nave aahelamo apoco aweeliheya* ni iruku soopachiwa ahaakumve wiiyeviha, soothene soorempwa mu aliivuru a alipa awoona awe. 20 Voocharela, Manase aahiichuuwa ni makholo awe, nave aavithiwa vaate vawe; Amoni, mwanawe aahikhala mwene mu nipuro nawe.
21 Amoni aarino iyaakha makhumi meeli napiili vaavaa aakhanleiye mwene, nave aahilamulela iyaakha piili o Yerusalemu. 22 Owo aaneera yeeyo yaari yoonanara vamiithoni va Yehova, hiiha ntoko Manase, apapa awe, yenraayano; Amoni aanavaha mikucho wa iruku soothene soopachiwa seiho Manase, apapa awe, yaapankaaya, nave aanalapela seiyo. 23 Nto owo, hiiyevinhe vamiithoni va Yehova hiiha ntoko Manase, apapa awe, yiiyevinhaaya; moohiyana, Amoni aahaaceererya vancipale yoocheka awe. 24 Vookuchulani, anamuteko awe yaampakanela nave emwiiphela mpa mwawe. 25 Nto achu a elapo yaahiwiipha oothene yaale yaampakanenle omwiipha mwene Amoni nave emweera Yosiya, mwanawe, mwene mu nipuro nawe.