Liivuru Anaawiili a Matharihelo

27 Yotamu aarino iyaakha makhumi meeli nathanu vaavaa aakhanleiye mwene, nave aahilamulela iyaakha khumi nathanu nammoha o Yerusalemu. Amama awe yiichaniwa Xerusa, mwaana amwaamuthiyana a Satoki. 2 Owo aaneerano yeeyo yaari yawookololowa vamiithoni va Yehova, hiiha ntoko Usiya, apapa awe yenraayano. Moohiyana ni yaawo, owo haavolonwe mu empa ya Yehova. Nyenya achu yaanatitelela weera ichu moonanara. 3 Owo aateka mulako mutokweene wa empa ya Yehova nave aapaka miteko mincipale o exiri ya Ofeli. 4 Aahiteka tho ipooma mmakupa a omwaako wo Yuta, ipa soolipihiwa ni muconco otakhwani. 5 Aawana ni mwene o Amoni nave vookuchula aamvootha. Ophiyerya wi achu o Amoni yaamvahererya mu eyaakha yeele italentu* sa epara nsana, ikooru* sa tiriku macikhwi khumi* ni ikooru sa sevata macikhwi khumi.* Achu o Amoni tho yaahimuliva waaca wene omohamoha mu eyaakha yanaawiili ni eyaakha yaneeraru. 6 Mwawiihiiha, Yotamu aamvira akhalaka oowerya, woona wi aarehererya ephiro awe vamiithoni va Yehova Muluku awe.

7 Saweereya ikina sa Yotamu, ikhoco soothene aawanneiye ni saweera sawe, irempwe mu liivuru a mamwene o Isarayeli ni o Yuta. 8 Owo aarino iyaakha makhumi meeli nathanu, vaavaa aakhanleiye mwene, nave aahilamulela iyaakha khumi nathanu nammoha o Yerusalemu. 9 Voocharela, Yotamu aahiichuuwa ni makholo awe, nave awo yaamvitha mu epooma ya Tavite. Akasi, mwanawe, aakhala mwene mu nipuro nawe.