Ester
1 Vano mmahiku a Asuweru,* ela tiwi, Asuweru yoowo aalamulela iprovinsia nsana nimoha ni makhumi meeli ni thanu napiili,* ovinyerya o Intiya ophiyerya o Etiyopiya,* 2 mmahiku yaawo Mwene Asuweru, aalamulela ari o epooma yoolipihiwa* yo Susani.* 3 Mu eyaakha yaneeraru ya olamulelo awe, owo aapaka efesta etokweene ntakhara asitokweene awe oothene ni anamuteko awe. Ahooleli a anakhoco o Persiya ni o Mitiya, achu oovuwa ni alamuleli a iprovinsiya yaari tho vaavale. 4 Nave mmahiku mancipale, mahiku awaakhwana nsana nimoha ni makhumi mathanu nararu,* owo aawooniha yaawo muhakhu wa omwene awe woocicimiheya, otokweene ni ovuwa wa owerya wawe. 5 Nave emanle mahiku yaala, mwene aapaka efesta etokweene ya mahiku mathanu napiili ntakhara achu oothene yaari o epooma yoolipihiwa yo Susani,* va nipuro nooreera* nenlo naari vaate va mwene, opacerya wa mutokweene ophiyerya wa mukhaani. 6 Nipuro nenle naareerihiwa ni ikurtina sa eliinyu, sa nchoce naphaamaxa ni sa ikuwo sooripelela seiho saamakeleliwe ni mikoi sa oxalo waphaamaxa. Saakhalavo tho mikoi soophilivila saamakeleliwe mmaseko a eparata, vamoha ni apoco a maarmore. Nave vacheyani waareerihiwavo ni maluku oowalamelaxa, maarmore aweela, maluku asisapo, ni maarmore ooripa. Saakhalavo tho mipaco sa ooru ni eparata.
7 Eviinyu yaawureryiwa mu akoopho a ooru; koopho ti koopho aari oohiyana ni mukina. Eviinyu ya amwene yaatepa waaca, mwawiiwanana ni mikhalelo sa mwene. 8 Haavo aakhinyeereryiwa owurya; nla naari nlamulo naacharihiwa va efesta yeele, woona wi mwene ni anamuteko awe yaalakelela wi mmoha ti mmoha aahaala owuryaka* ntoko onachuneleiyevo.
9 Nave tho Vasti mwaara a mwene,* aapaka efesta etokweene ntakhara athiyana a mu empa ya mwene Asuweru.
10 Mu nihiku naneethanu napiili, vaavaa murima wa mwene waahakalanlaaya nthowa na eviinyu, owo aahaaruma Mehumani, Pisita, Harpona, Bikita, Apakita, Setar, ni Karkasi, anamuteko athanu napiili a mu empa ya Mwene yaamukhaviherya mwene Asuweru, 11 wi emuruuhe vamiithoni va mwene Vasti mwaara a mwene, awanre yoowara ya mmuruni yoomwene, wi awoonihe achu ni asitokweene oreera wawe, woona wi owo aari ooreeraxa. 12 Nyenya mwaara a mwene, Vasti, aakhooca wiiwelela nlamulo na mwene naavahereriwe ni anamuteko a mwene. Wanthowa na yeela mwene aatepa onyeenyeya, nave esara awe yaanyahuwa.
13 Mwawiihiiha, mwene aahaakoha anamiruku yaawo yaasuwela phaama miyaha, woona wi miyaha* sa mwene saathokororyiwa ni yaale yaasuwela phaama malamulo ni othoriha milacu. 14 Alipa a miruku aatanneiyenoxa yaari Karxena, Xetare, Atimata, Tarsi, Mere, Marsena ni Memuka. Asitokweene yaala athanu napiili o Persiya ni o Mitiya yaakhalano weemereryiwa wa oya wa mwene nave yaakhalano mirici sa vasulu mu olamulelo. 15 Mwene aahaakoha ariki: “Mwawiiwanana ni nlamulo, tiheeni enaphwanela weeriwa ni Vasti mwaara a mwene, woona wi owo hiiwelenle nlamulo na Mwene Asuweru nenlo aarummeiye anamuteko awe?”
16 Mwa yeela, Memuka aahaakhula vamiithoni va mwene ni wa asitokweene ariki: “Vasti mwaara a mwene, haachekenle pahiru amwene, nyenya tho ohaachekela asitokweene oothene ni achu oothene a iprovinsiya soothene sa Mwene Asuweru. 17 Vawi yeela mwaara a mwene opankeiye enamusuweliwa ni athiyana oothene, nave awo anamwaanyemulaka asiiyaya ni oloca eriki: ‘Mwene Asuweru aamwiichaniha mwaarawe Vasti, nto owo aakhooca.’ 18 Olelo vaava, asaara oothene a asitokweene o Persiya ni o Mitiya yasuwelaru yeela mwaara a mwene opankeiye, anamulocaka tho mmukhalelo mmohamoha wa asiiyaya, ni hekawoonelamo nave ekaamunanariwano. 19 Mwasiveliwa mwene, mukumihe nlamulo mu nsina nanyu, nave nrempwe mmalamulo o Persiya ni o Mitiya, yaawo ahinawerya otorokiwa: Vasti ahirwe tho aphiye vamiithoni va Mwene Asuweru. Nave mwene, murici awe wa okhala mwaara a mwene, mumvahe muthiyana mukina oophwanelela ompwaha yene. 20 Nave nlamulo nenla na mwene nasuweliwa mu olamulelo anyu woothene, athiyana oothene ootheliwa ekaamwaacicimiha asiiyaya moohipwacha yaari amuhakhu naari oohaawa.”
21 Miruku seiha saamuhakalaliha mwene ni asitokweene, nave mwene aaheerano yeeyo Memuka aalonceiye. 22 Mwawiihiiha, mwene aarumiha ikaarata wa iprovinsiya soothene sa omwene awe, ni marepeliwo a eprovinsiya ti eprovinsiya ni mu elocelo ya nloko ti nloko, alamulaka wi mulopwana ti mulopwana akhale muhooleli a echoko awe nave wi veechokoni vawe elociwekevo elocelo ya nloko nawe.